Mazmur 28 - Eipomek

Raja Daud birye, ‘Allah melipnilyame,’ nyana ap, ‘Telebe,’ nyana ati, Mazmur deice arye, mot nyabuk yupu

¹ Na ni Allah Yahweh, ‘Ance melipnunilam’ tenen, yupu weik arye yukubuka, moropkine. Winipmanto ara, weik mutuku dam bukamlye keil deiyok dam duknupnirye, telebuk ununa atonun, an dam ara, kanye deibuka telebuk unune. Ati na nio, ‘Na moropkin ning ara, kekepnulilam’ tenen, moropkine. Na nio, anyapkina ara, talye ati kume! Ance na moropkin ning ati, kum kekepniminyeura, ninye dibikceba, tuku pum palibikirye, dongolamak touk winipnicake. Min akunum diamik nang unyak sukum binuka unamne.

² ‘Winipnyak’ tenen, na nio, narye anti, ‘Melibuka lyepnilyame,’ nyabuka, ‘Moropkin yupu kekepnunilam’ tenen, na nio narye engebuka moropkine. Na ikin unilye ning ati, ‘Ance melibuka lyepnilyame,’ nyabuka moropkine na nio. ‘Allah anti moropnukin’ tenen ati, na taruk erepnirye, an si eren aik pum tam, aik wilibuka Pia Teleb Lek Aik kibuk dam eipnirye, an Allah ati morokunune.

³ Ton nang arye, sik pia malye wininyak nang arye, yuk nang kekena ati, talye dakeiam kanye bobuka, sikce, ‘Nun kayapu nango, teleb aryuk neika unamabe,’ nyabuka, nemalyap arye nyanyake. Bukni, dipkoprob ning ara, sik kanye talima noutam ara, malye winin ninguk langdibukce lyulule. Sik talima noutam arye, ‘Sik anang ara, malye kibibyak arye, opnamabe,’ tenenyake.

⁴ Tonda, sikce pia malye ning winilamik atonun kibuka, weik tonun wenepnamlyame. Tonda, Allah, ance sik malye ulamikce ning dekna ati, ‘Weik imun ning, sik nong deice arepmince, anang ati wenepnamlam’ tenen, moropkine.

⁵ Deiyok ara, ani. Amalye wininyak nang ara, Allah Yahweh arye, mambul pil dolamlye ning ap, el taruk mikip arye winilamlye ning ap, ‘Aning nirya ara, dauplye, awinilye ning ati tenebuka, kum kekebibirye, kum bikinamabe,’ tenebuka unyake.

⁶ Nun ni koproba Allah Yahweh ati, ‘Se, elda pia teleb ulule,’ nyabuka, el si erenune. Nun ni koproba Allah Yahweh ati, ‘Se elda nun morobibye ning akunum kekeplirye, pia teleb kilisulule,’ nyabuka, el siuk erenune.

⁷ Nun ni Allah Yahweh ara, elce nati, tuba-tuba mikip kilinulule. Winipmanto ara, yin talin nang arye, yuk nang ati, ‘Sikce mal bobikirye opsicak’ tenen, sik nong lelilongona ati, kat ning, el si ara perisai, talibuka balamak touk, Allah arye nati, kalikinulule. Allah ati ara, ‘Dip,’ tenepnirye, na kanye talima nirya, el deiceuk delinune. Allah ati, mikip arye diba tenenuna ati, melinilya deice arye, na kanye talima noutam ara, pia kanye deibuka, mot nyana deice, kil-kil asa arye unune. Narye na ni Allah ati, “Naio, anda pia teleb ulyame,” nyanune.

⁸ Allah Yahweh arye, el tenen nang, nun Israel nang nirya ati, elcuk, mikip kilisulule. Tonda, Allah arye, ‘Anye bira, Israel yala nang nirya talibuka, sik ninye deiyoknye, Raja unamle’ tenen, wipdeinuknye biti, melibuka lyelonulule. Weik mutuku yangan keil dam duknupnirye, kanye deibuka ulamne atonun, Allah arye na weipnupce, tuba kalikinulule. Raja birye, Allah el dam ulya deice arye, yuk nang arye elti, malye kum kipdeiptinge.

⁹ Ati ara, na ni koproba Allah, anti moropkine. Ance, ‘Na tenen nang unamak’ tenen, ‘Wipdeiamsulum Israel nang nirya ati, lyepdopnamsilam’ tenen, moropkine. Tonda, nun Israel nang ara, ance minop talak akunum wiamsuluma ati, an tenen nanguk, pia unamaba ati, ‘Pia teleb kilinamsilamʼ tenen, moropkine. Winipmanto ara, sik domba basam weina deiyok nang arye, sik domba basam pia teleb kubuka weilamikirye, mitang ulamle basam tomobuka, bobalamak touk, ‘Ance nun Israel nang ati, melibuka bobinamsilamʼ tenen, moropkine na nio.