Mazmur 27 - Eipomek

“Allah arye melisilyeba, telebuk unyabe,” nyabuk yupu

¹ Daud birye nyabuk. Allah ance na dirina kilina ap, na lyena ap, Deiyoknye ulyame. Ara, weik kat poka cang arye erebuka dolamak touk, Allah Yahweh ance erebuka uminyeba, nara an amu tam unune. Ati ara, yuk nang nirya ati, ton birbir apnilirye, ilil kum unamnile.

² Na mal olan nang arye, ‘El opnamap’ tenen, yanuka warikininyak nang ara, sik babye ananguk, keil yan dum dukliba, sakuka olamle atonun, upnamle. Tonda, na mal olan nang arye, ‘Opnuyabe,’ tenepnetinga babye, sik ananguk saknamake.

³ Tonda, ‘Na yanuka warikuka opnamap’ tenen, yin nang yanamake. Tonda nati mal olyanamniake. Winipnica babye, ilil kum upnamnile. ‘Allah ancuk melipnunilca,’ tenepnirye, ilil kum unamnile.

⁴ Ati ara, na ni Allah Yahweh, elti, pia tuba-tuba moronun ning ara, tonok ning ara ani. Na kam unamne talak nirya ara, Allah Yahweh, el si eren aik dam anyuk unirye, ‘Na lyelonamnile,’ nyabuka moronune. Tonda, Allah Yahweh, el urasin pia teleb ulul ning ara, ‘Pia dinamne’ tenen, moronune. Tonda, el si eren aik dam unirye, tuba-tuba dinamna ati moronune.

⁵ Ara, urdem ati kume. Na kanye imun ning upnile talak nirya ara, ‘Allah arye nati, kalikuka melinamnile’ tenen, unune. Ara, ikin ning nirya, na dam yanamle talak nirya ara, Allah arye melibuka lelipdongopniliba, el amu tam unamne. Allah arye melibuka lelipdongopnilirye, na bobuka, mutuku deice delilbinamnile.

⁶ Winipnilyopura, na mal olan nang kan-kan arye, Allah arye erebuka dopnamnile. Na mal olan nang nirya ara, malye kipnamne. Ati ara, na weik kanye deipnirye, na ni Allah dam, ‘Telebe,’ nyabuka, el si eren ati, teleb arin ning arelyanganamne. Winipnirye, Allah Yahweh el tibuk, mot deice arye, nyapnirye, si erenamne.

⁷ Ati, na ni Allah Yahweh, narye anti moropkinyopura, bico tenebuka kekenamnilyame.

⁸ Na ni Allah, na talima pum tam arye, ‘Allah el si erepnune,’ tenepe talak nirya ara, na adiparyuk tenebuka, an siuk erenamkine.

⁹ Ati ara, na batakanina meme. Narye moropkinye talak nirya ara, an urasin tamuna meme. Ance nati, yu upkiliba, urasin malye bonina meme. Aning ara, ancuk lyelonilyamnye ati, ‘Na batakniminyak’ tenen, moropkine. ‘Tonda nara, an amu tam pil donanye ununa anya arye, narye anti, nyapnamne ning ara, kekebuka namin kipniminyak’ tenen, nyapkine. Anda, na ni Allah, na Lyena Deiyoknye unilyama ati nyapkine.

¹⁰ Na nin ap, na ni ap ara, sikce bataknitiringa babye, Allah Yahweh ance, kum bataknamnilame. Na moropkinye talak nirya ara, Allah ancuk melinamnilame.

¹¹ Na ni Allah Yahweh, ance, ‘Teleb una bisik ara, ani,’ tenen, teneminye ninguk peterenilyame. Tonda, ‘Diksukum bisik ara ani,’ teneminye ninguk, peterenilyame. Aning ara, talye ati kume. ‘Na mal olan nang pia weik unyakce, malye kipnicak’ tenen, nyapkine.

¹² Nati, na mal olan nang arye, ‘Optibye,’ tenenyak nang, sik deice Allah ance deipminba, ‘Opnicak’ tenen, moropkine. Tonda, sik anang arye, ‘Na deice tilila yupu nyabuka, ikin ning, na dam deipnicak’ tenen, moropkine. Tonda, anang arye, ‘Anye opnuyap,’ nyaninyaka ati, na ni Allah, ‘Ance kalikuka melipnamnilam’ tenen, moropkine.

¹³ Dipkoprop, Allah ance na dam, bico tenebuka melipniminyopura, na kele, ‘Na tukwak mutuku kam unamne talak noutamak ara, ance eibuka, teleb diksukum winin ninguk, arenamnilame,’ tenepne. Ara, an Allah Yahweh arye, teleb kilinamnilama ati nyapne.

¹⁴ Ati ara, narye Allah antibuk diba tenen, ‘Moubuka mikip arye talinamne. Ilil kum deice aniryuk ulamnirye, dilamnirye, Allah el si Yahweh arye, pia melinamnile,’ nyabuka, Daud birye nyabuk.