Mazmur 26 - Eipomek

Malye ning ton winina kumnye birye, Allah ati, ‘Melipnilyame,’ nyabuka morobuk yupu

¹ Raja Daud birye, aMazmur yupu sekuk. Na ni Allaho, ‘Ance na telebuk ulamseto ning ati, yupu bokeipnutumba, yuk nang arye kekebicopura, ‘E, elda malye ton kum winilule,’ tenepnitingce, bikniting’ tenen moropkine. ‘Dip do, tilila do?’ tenen, teneniltona kum aryuk, Allah Yahweh ati, pia diba tenenune.

² Se, na ni Allah Yahweh, ‘Anye bira, malye ulul do, telebuk ulul do?’ tenen, na wininye ning nirya ati, moubuka dipdenimince, biknamnilame. Ara, na kanye talima noutam tenenun ning babye, patanulul ning babye, dipdenilyame na nio.

³ Na ni Allah, ance nunti, “Bico tenepsinirye, winipnamsine,’ nyabuka, nyalin yupu deice arye nyapsesi ning nirya ara, batakna kumce, dipkoprob pia arepnamsine,” nyapsulume. Aning nirya ara, narye luba kina kumce, tuba-tuba tenenune. Anda nati, batakna kumce, tuba-tuba pia melinauk unilyame.

⁴ Nara, talye yupu nyanyak nang ap, neika kum unamabe. Aning ara, na like. Tonda, tenebuka arye wininyak nang ap, talye yupu nyanyak nang ap, na ap neika pia kum unamabe

⁵ Aning atonun, yata nang do, Allah arye, ‘Aning ara wininamlume, aning ara kum wininamlume,’ nyapdeiamsuk yupu, yanibuka batakanyakce, malye weik unyak nang ara, ‘Na pia lik,’ tenenune. Ati ara, sik malye weik unyak nang ap, na ap neika una kumce, leibuka unune.

⁶ ‘Nara malye winin ning, pia kum winilamse ning ara, biknamniak’ tenen, bikilina ati, na taruk mek liknyeura, yuk nang eipnikirye, aning bikininyake. Wininye ning ara, kam ning opnarye, an Yahweh arena ati kintinilamik ning, el si ara mesba, antanap dongobuka memepdeibika dam banamne.

⁷ Mesba dam banamne talak ara, kanye lon mot ton nyanamne. Tonda, an Allah arye, pia mikip weik ning, ninye kum winipmanto ning akunum winilamlum ning ara, yuk nang kekena ati, laka nyanamne.

⁸ Na ni Allah, an si eren aik dam ara, an ulyamak, na kanye pia delikunune. Ara, an ulyamak ara, pia telebuk ulula ati, na kanye delinune.

⁹ Na nio, ‘Ance sik malye wininyak nang wenebuka opnamlam talak ara, na ap wenebuka kum opnamnilam’ tenen, moropkine. Ura, sik malye un ninguk talibuka, malye-malye weik wininyak nang ap, yuk nang ati onyak nang ap, wenepnamlam talak ara, ‘Na ap kum wenebuka opnamnilam’ tenen, moropkine.

¹⁰ Aning ara, tuba-tuba malye winin ninguk pia wininyake. Tonda, ‘Duknubuka malye winin ninguk, pia winiptibye’ tenen, ninye ona ati, namin kin yo bokuk dolonyake.

¹¹ Bukni na nio, na kam unye talak ara, amalye winin ning ara, ton pia kum wininune. Nemalye arye una ap, talye yupu nyana ap kumce, diksukumuk unune. Ati ara na nio, bico tenepnimince, na ikin unilye noutam arye, lobuka lyepnilyame.

¹² Na telebuk wininuna ati, ikin ning na dam ton pia kum yanamnile. Ati, ance wipdeiamsulum nang arye, an si erena ati, tonokak bulubiceura, an si erebuka, anti, ‘Pia telebe,’ nyanamak talak ara, na babye atonun, Allah Yahweh, anuk neika si erenamkine.