Mazmur 23 - Eipomek

Raja Daud birye, Allah el si Yahweh erena ati, mot sena deice arye, nyabuk yupu

¹ Allah el si Yahweh, elce nati, domba basam weilamak atonun, nati melibuka kalikinulule. Ati ara, yata patan ning do nirya, elce kalikuka melinilya deice arye, na patanilye touk, Allah arye nati pia arenamnile.

² Tonda, Allah elcuk nati, pia teleb kibuka melinulule. Winipmanto ara, domba basam weina deiyok nang arye, sik domba basam bobuka, maning pia teleb kibuka palulak, bobinuka deibikirye, kalikuka dilbalamak touk, Allah arye nati, na patan ning nirya melibuka arenulule. Tonda, domba basam weina deiyok nang arye, ‘Nun domba basam talye kanye bobuka, teleb mek dibikirye, kanye delinamak’ tenen, ona kum mek dam bobalamak touk, Allah elcuk, na bobuka, teleb sukumuk bobiniliba, ilil kum arye teleb kibuka unune.

³ Tonda, na imun kanye bobuka, unun talak ara, Allah arye nati melinilya deice arye, winiryuk kanye ap, mikip ap areniliba, kanye deibuka telebuk unune. Tonda, Allah arye, ‘Anda diksukumuk winiminyeba, yuk ninye eipkikirye, na si pia erenamniyake,’ tenelirye, nati, “Diksukum ban bisikuk binamlama ati, ateleb binamlam bisik ara, ani,” nyabuka, laka nyanululce, abisik deiceuk bobanulule. Elce, “Adiksukum bisikuk binulyame,” nyalinulul touk, banune.

⁴ Aning ati ara, na mal olan nang arye, na opmanto winipnamniak talak ara, nara imun kanye bobuka, kunukna atonun, mutuku binamne talak babye, na ton ilil kum unamnile. ‘Se, yata malye ning, na nong deice upniliba, ikin unamne do?’ tenen, pia kum tenenamne. Ara, talye ati kume. Deiyok ara, Allah ance na dam yanuka umince, nati tuba melinilyame. Na dam pia neika ulyame. Tonda, winipmanto ara, domba basam weina deiyok nang arye, sik domba ati, ‘Nun domba basam, yuk tam, opmanto mutuku bicak’ tenen, kama bobikirye, sik domba basam nong deice yakuka teleb bisik noutam kilamak touk, Allah ance nati, kalikuka melinilyamce, peterenilyame. Winibuka wininilyama ati ara, nara ilil asa una kumce, teleb kanye deibuka unune.

⁵ Tonda, na mal olan nang wekuka dinmacak arye, Allah ance na patan ning nirya, weika arye arenilyame. Winipmanto ara, weik kwalya kwalipmince, nati arenilyame. Ara, weik mambul nang yukubikceba, din ning weika arye dilyangalamk touk, wininiminyeba, na mal olan nang eibikirye, ‘Se’ tenen, unamake. Tonda, ninye arye, ‘Anye nun ninye deiyok kibuka unamsil’ tenen, pia teleb minyak mek, anye el kisok deice likeibiceba, anye ninye deiyoknye Raja ulamle touk, ance pia teleb kibuka kipdeipniminba, pia telebuk unune. Ati ara, yata ning do nirya, na patanilye touk, weika arye tabakuka areniminyeba, na dam yanganiliba, kanye deibuka telebuk unune.

⁶ Pia weika arye melinilyama ati, na kele, anda pia telebuk kilinamnilama anya arye, pia telebuk unamne. Na kam unamne talak noutamak nirya ara, ance nati bico pia tenenamnilyame. Tonda, batakna kum aniryuk, pia teleb kibuka melinamnilame. Aning ati ara, na tukwak mutuku noutamak kam unamne talak nirya ap, doryanamle talak nirya ap, teleb aryuk pia darabuka, Allah Yahweh an aik dam pia unamne. Raja Daud arye, mot nyana deice arye, ayupu nyabuk.