Mazmur 22 - Eipomek

Raja Daud imun kanye bobukce, Allah ati morobukce, mot sebuk yupu

¹ Se, na ni Allah, yata deiyok ati, batakmanilam do? Narye pia malye kanye bobuka, antibuk na talima pum tam arye, ‘Melipnamnilarya’ tenen, moronauk ukunune. Winibuka tenebuka, morokunun bukni, ance na tam kum dilyanmanilame. Tonda, ance nati kum melipmanilame. Pera atonun unmalame.

² Na ni Allah, keting noutam talak nirya, narye anti weik arye malye nyanmane. Bukni, ance yupu ton tamubuka, kum nyapmanilamce, yupu tana kum upmanilame. Ati lukunyan talak babye, mambul kanye bobuka, narye anti, tuba-tuba morokunune. Tonda, na kanye teleb kum unmanilba, malye kanye bobuka, moronauk ukunune.

³ Bukni, na kele, anda nun ninye deiyoknye usimince, malye winin ning, tonok ning babye, pia kum ukulule. Anda, pia telebnye winiminya ati, Israel ninye ayala-ayala nirya arye anti, mot nyabuka si erekinyakce, kikinyake.

⁴ Tonda, nun apu yapu nirya arye, antibuk ‘Elda dipkoprob aulule. Nun ni koproba Allah arye, dipkoprob melinamsilarya’ tenen, sik kanye an deiceuk delilamkikce, an si erelamkike. Winilamkik talak ara, ance sik dam ulamlumce, sikti, melibuka lyelamsulume. Ance nun apu yapu kum bataklamsuluma ati ara, sikce, ‘Se, yata ati batakasulul do?’ tenen, malye kanye bobuka, kum ulamik.

⁵ Sikce Allah anti, “Se nun ni Allah, lyepsilyame,” nyabuka, morolamkik ning ara, kekebuka melilalume. Tonda, sikce anti, diba tenelamkik ati, sik morolamik ning kekebuka lyemromsulume. Ati, sik ton malye kanye kum bolamikce, teleb kanye uk bobuka ulamik. Anti alye kum daklamik.

⁶ Bukni, nara ninye kume. Nara, pia malinye ati ara, kuluma atonunye wininune. Wininuna ati, yuk nang nirya arye nati, “Elda malye wininanye,” nyabuka, yep-yep nyabuka nalilamnikce, akutulamnike. Yuk ninye nirya arye nati, ‘Anye nun like,’ teneninyake.

⁷ Tonda, ninye nirya arye, na wininye ning ati, elininyakce, akutubuka nalininyake. Atonun, sikce si bam bol pum tam mur-murulakirye, ‘Elda talinye’ tenen, kisok kwakdu-kwakdu aninyake. Tonda, nati malye yupu weik nyaninyake.

⁸ Yuk ninye arye nyaninyake. “Nunce elti, mangkau kibuka batakipyeba, yata wiribuka unamle do? Anye birye, ‘Allah Yahweh elcuk lyepnamnile’ tenen, diba tenelula anya arye, Allah el siuk erelule. Winilula ati ara, Allah Yahweh arye, elti, kanye deibuka lyepnamle do, kum do? Elda Allah ati diba tenelulnye ati ara, nunda dinauk unamabe,” nyabuka nalininyake.

⁹ Sik diba tenena kum ninye arye, nyaninyak bukni, na ni Allah na kele. Diba, na ni Allah ance na nin mun pum bomnuk talak melilamnulumba, deiamnuke. Tonda, ance na nin melilamlumba, elce nati moum dilamse talak arye, dipdongobuka teleb kibuka kaliklamnukba, teleb aryuk nepra balamse.

¹⁰ Na nin mun pum bomnuk talak arye, dipdongobuka melilamnulume. Ati na deipnukba, nepse talak babye, na winin ning nirya, an deice aryuk winilamsa ani, wini babye wininamne ati, anda na deiyoknye Allah ulyame. Narye an siuk, pia erenamkine.

¹¹ Ati ara, na ni Allah, ance kum bataknamnilyame. Nara, pia malye winin ning kan-kan ununa ati ara, amalye winin ning, na dam yaliba, ikin kanye bobuka, unamne talak nirya ara, yuk nang arye ton yanuka, pia kum melinamniake. Ati na ni, ‘Na dam anyuk unamle’ tenen, morokunune.

¹² Winipmanto ara, mutuku si Basan mutuku arye, weik bai sapi basam yim ning, yang belelamle ning nirya yangakirye, yanuka wariklamak touk, na mal olan nang yupa weika arye yanuka, ‘Anye opnuyap’ tenen, antanap dongobuka, wariklamniyake.

¹³ Tonda, winipmanto ara, yu weik kuse atonun ning, bai tam pia yu ulul ning, el si ara, singa kus arye, el din ning obuka dipnulya ati, si akuka yangalamle touk kibuka, na mal olan nang arye, na ona ati, sikce na dam yakirye warikininyake.

¹⁴ Winibuka yana warikinin yakopura, na mikip ara, kum kipnin banulule. Winipmanto ara, mek kwepdeibikirye, diklobikiba balirye kum ulamle touk, na mikip kum kipnin banmanile. Winibuka unulule deice arye, na yok birbir anulule. Tonda, na talima pum tam ara, ilil weik unulule anya arye, uku buppu arye, lilin mek biliklamle touk unulule. Ati, ilil weik unulule ati ara, pia malye kanye bobuka unune.

¹⁵ Tonda, kira tuku dobuka, ketingak deipmakibuk, keting buppu arye sesal lelamle touk, na mikip ara, akunum kum upnile. Na dilkorona ara, si maka dilkwetena kum upnilirye, sesal lenulula ati, kat ning atonun unulule. Adeice arye, na sitang ara sesal lepniliba, yupu kum nyapmanto unune. Wininye talak ara, na ni Allah ance batakniminyeba, diamice nang butbuta deice malamak atonun unune.

¹⁶ Na dam pia malye winin ning talibuka wininyak nang, yu weik nang arye, buru tam yu kam atonun kibuka yakirye, nati yanuka warikil yanganinyake. Winipnikirye, na yan ap, taruk ap, yanuka lukuninyake.

¹⁷ Winininyaka ati, na din ning kum lilbitinye. Din ning kum dinuna ati ara, bol malye upniliba, na yok nirya ara, akunum laka upniliba nuktinye. Nara, pia bol malye bonuna anya arye, yuk nang arye, ‘Se’ tenen, dininyake. Tonda, na mal olan nang nirya, na dam yanuka elininyakce, ‘E, bita merekuka ikin ulule’ tenen, malye yupu nyabuka, dinauk uninyake.

¹⁸ Tonda, na baju ara, sikce bokuka dolonyake. ‘Ara, sikce dopropnuce talak ara, el dopnul do, na dopnun do?’ tenen, win ning, el si ara undi deice arye, ‘Aning dopropnamap do?’ tenen, winipdekirye, atenepmace touk, upliba dololamake. Aning atonun winibikirye, na baju ara, ubula doloninyake.

¹⁹ Sik yu nang arye, winipnamniak bukni, na ni Allah Yahweh, ance nati, bataknimince, pera mutuku atonun kum unamlame. Dipkoprop anda, na Mikip Kilina Deiyoknye unilyama ati ara, ‘Ance minop yanuka, melipnamnilam’ tenen, moropkine. Na ni Allah ancuk mikip kilinamnilyame.

²⁰ Ninye on nang parang ya bobikirye, na dam yanuka opmanto winininyak ning ap, tonda yu weik kam arye, opmanto wininulul ning ap nirya ara, ‘Ance lyepnamnilyame’ tenen, moropkine.

²¹ Tonda, kuse atonun ning, el si ara, singa kuse, pia yu ning si pum tam wekmanto unun ning ara, ance lyepnamnilyame. Tonda, bai tam ulul sapi basam, yang belelamle arye, yanuka opmanto wininilye ning ara, ance lyepronilyame.

²² Na ni Allah, ance lyepniminyopura, na tam nang yanuka bulubuka, an si erena ati, yanuka wekice talak aryuk, narye Allah, an si pia erenamkine. An si erena ati, ninye nirya bulubice talak ara, ance lyepnamnilam ning nirya ara, sik kekena ati, laka nyanamne. Winipyopura, an siuk erenamkiyabe.

²³ Ati ara, Allah Yahweh elti, diba tenebibirye, elti, ilil usilye ninye nirya arye, el siuk erenamabe. Tonda, nun apu koproba Yakub birye deibukba, dadeipdanin yanganyap nang nirya ara, Allah el siuk, erebuka kinamabe. Aning atonun, nun Israel yala ninye nirya arye, nun ni koproba Allah ati, “Elda weik mambule,” nyabuka, el siuk erebuka si erenmabe.

²⁴ Ara, talye ati kum nyapsine. Deiyok ara, ninye imun kanye bobuka, unyak nang arye, Allah anti ilil upliba, amu tam unyakce, ikin ning weik dolonyak ninye ara, kum batakalyame. An ti, “Se, melipsilyame,” nyabuka, moropkice talak ara, ance nunti mangkau kibuka kum batakasilyam bukni, nunce moronyap ning kekebuka melisilyama ati ara, an siuk erenamkiyabe.

²⁵ Allah ance na talima pum tam arye, nyapdeiamnulum ning nirya ara, an mapu bulubuka wekmace sukum arye, laka nyanamne. Ara narye, “Na ni koproba Allah ati, el si erepnamne,” nyabuka, nyalin yupu deice arye, nukamkise ning ara, sik dam laka nyanamne.

²⁶ Narye nyanamne yupu ara, ani. Yata ninye do nirya, sikce nun ni koproba, Allah Yahweh ati, ‘Elcuk melinamsile. Nun patan ning ara, elcuk arenamsile’ tenen, anti pia pi dobuka, ekinyak nang ara, an si erebikirye, si erenamkiyake. Ara, talye ati kume. Deiyok ara, ninye bona utotoa talina kum ninye, kanye lamapdongobuka arye, amu tamuk unyak ninye ara, ance melipsiminyeba, dotalak din ning dibikiba bounamle. Ati ara, Allah arye melilul ninye nirya ara, el siuk pia erenyakce, kanye deibuka, telebuk unamake.

²⁷ Tonda, doryanamle talak ara, ninye mutuku-mutuku nirya noutamak unyak ninye nirya ara, sik malye winin ning batakikirye, Allah Yahweh ati, ila tuba tonap tenebikirye, el dam tamubuka yakirye, el si erena ati, gutam tuku dipdongobuka, el siuk pia erenamake.

²⁸ Winibuka wininamaka ara, talye ati kume. Deiyok ara, Allah el si Yahweh, weik Kwemdina Deiyoknye aniryuk, aning-aning nirya ap, ninye mutuku-mutuku nirya ap, talisulule. Dan mutuku unyak ninye do nirya, Allah elcuk, sik deice tam ulirye, ninye deiyok kibuka talisulule.

²⁹ Aning ati ara, mutuku-mutuku nirya unyak ninye nirya arye, Allah el dam tamubuka yakirye, el si erena ati, gutam tuku dipdongobuka, el siuk pia erenamake. Ara, weik bona talin nang babye, talye amu tam ubuka, bona utotoa talina kum ninye babye, aning-aning kum talinyakce, urdem dadipnamak ninye babye, sik nirya arye, Allah dam yakirye, el si erena ati, gutam tuku dipdongobuka, el siuk pia erenamake.

³⁰ Nunce deibibyeba, dadeipdanin banamak mapu babye, “Nun ni koproba Allah arye, melibuka winilamsuk ning ani,” nyabuka laka nyanamabe. Winibipyopura, Allah an siuk erebikirye, sikce ton mapu deibikcopura, dadeipdanin, upre banamak ninye nirya babye, an siuk erenamkiyake.

³¹ Dotalak unamak ninye arye, sikce deipnamak mapu ati, “Nun ni koproba Allah arye, pia diksukum ubuka, ninye winipmanto kum pil dolamsuk ning ara ani,” nyabuka, laka nyanamake. Winipnamaka deice arye, sikce deibikceba, dadeipdanin banamak mapu nirya babye, sik nirya arye, Allah el siuk erenamake.