Mazmur 21 - Eipomek

Ninye deiyoknye Raja arye, el mal olan nang akunum obukce, mot sebuke, nyabuk yupu

¹ Ninye deiyoknye, Raja Daud birye ayupu Mazmur mot nyana deice arye sekuk. Allah yupu mot nyana deiyoknye arepnamuka ati, sekuk.

² Ninye deiyoknye Raja bira, ‘Allah arye el mikip arepnuka ati, na kanye delinune,’ nyalule. Allah arye ninye deiyoknye Raja ati, weik tonun melilula ati, Raja birye, kanye weik deibuka ulule.

³ Ninye deiyoknye Raja bira, el kanye talima noutam, weik tonun patanulul ning ara, na ni koproba Allah, ance akunum arenilyame. Tonda, Raja birye, ‘Na ni Allah melipnimince, aning ton arepnilyame,’ nyabuka, morolul ning nirya ara, kum bataklume. Adiparyuk arenilyame. Atonun tonda, ‘Kume,’ kum nyalyamce, “El morolul touk arepnune,” nyalyame.

⁴ Aning ara, talye ati kum nyapne. An Allah arye, Raja dam yaminyopura, pia teleb ning boyanuka, weik tonun tuba-tuba areniminye ning ati, nyapne. Winipminyopura, ‘Anye bira, Raja aulule’ tenen, lak nyana ati bikilin ning, el si mahkota, dekna weik ning, el si emas arye, memebik topi, aninye deiyoknye, el kisok deice akunum deiplume.

⁵ Ninye deiyoknye Raja arye, “Na ni Allah anti, na keting tamun weik tonun, tonap kam tuba uptinye’ tenen, moropkine,” nyabuka morobuk touk, ance Raja ati, akunum lo tonap arepnulume. Ati ara, aninye deiyoknye Raja bira, keting tamun weik tonun pia kam unamle.

⁶ Allah an mikip arye, tuba melibuka lyenilyama deice arye, yuk nang nirya arye, nati, si erepnikirye, “Anda pia telebnye,” nyaninyake. Allah ance nati, pia teleb akunum kipdeipnuluma ati ara, yuk nang eipnikirye, nati, “Se, Raja bira, pia telebuk ulule. El urasin babye, pia telebnye ulule,” nyapnamniake.

⁷ Allah ance, na Raja ati, pia telebuk kilinilyama ati, dorupnamle talak babye, pia telebuk unamnarya. Tonda, anda Allah arye, na dam yanuka, neika unyama ati, nara kanye weik deibuka unune.

⁸ Aning ara, talye ati kuma. Deiyok ara, na Raja bira, ‘Allah aryuk melinamnil’ tenen, an Allah Yahweh ati, pia diba tenekinirye, na kanye talima nirya, an deiceuk delikunune. Allah anda aning-aning nirya deice tam erebuka, Pia Mikip Weiknye ulyame. Tonda, Allah ance nunti, “Anggunda, pia bico tenesinirye, pia telebuk kilinamsine,” nyabuka, nyalin yupu deice arye, akunum nyapdeiamsuluma ati, ikin upmasilya babye, ilil una ap, kanye telintona ap, pia kum unamne.

⁹ Ati, an Allah arye, nun mal olan nang nirya, eipmince, bikminyopura, an mikip deice arye, anang obuka, sirya daknamlame. Aning atonun, anda Allah ati, ‘Nun lik, elti, nun lik’ tenen, yanikinyak nang nirya ara, an mikip weik sirik taruk deice arye, sik anang nirya ara, adiparyuk wenebuka oplopnamlyame.

¹⁰ An ti, ‘Nun lik,’ tenekinyak nang ara, ance anang bobinuka, weik uku buk dilirye, buppu ulul noutam donokminyopura, uku arye anang nirya dipnamle! Allah, ance tukwak arye, tukwak mutuku noutam lak kibuka yanalam talak ara, anda Allah Yahweh arye, yu weik upkilya deice arye, amalye winin nang nirya obuka, sice buklopnamlyame. Tonda, weik uku diplirye, buppu ulul ning ara, sik anang deice dopkwetepminba, uku arye, amalye wininyak nang nirya dipnamle!

¹¹ Sik malye winin ninguk talibuka, malye-malye wininyak nang babye, sikce deibikiba, dadeipdanin, banamak nang babye, wenebuka opnirye, kum kipdeipnyopura, tukwak mutuku noutam ara, tonap pia kum elinamabe. Ara, sikce delinamak mapu nirya ara, tukwak mutuku, im sirya, mutuku sirya nirya unamak nang kan-kan noutam, tonok nang babye, pia tuba kam kum unamake. Sik nirya kum daneipnalyame.

¹² Malye wininyak nang arye, ‘Yata wiriptibyeba, Allah ap, elce wipdeiamuk Raja nang ati, yanibuka malye kiptibye do?’ tenen, yupu talipmace talak nirya ara, sik malye wininyak nang arye, ‘Tilila yupu nyabibya deice arye, Allah arye wipdeiamuk Raja ap, Allah arye pil dolul ning ati, yanibuka malye kiptibye’ tenen, yupu talinamak nang babye, aning ara, nong kum upnamle.

¹³ Deiyok ara, an Allah arye, anang sikti, yakuka donoknalame! An Allah arye, sik malye wininyak nang ati, wenebuka oplopnalyame. Winipmanto ning ara, an mal ap, yin ap arye, sik malye wininyak nang nirya ati, adiparyuk obuka, sirya daknalame.

¹⁴ Ati ara, nun ni koproba Allah Yahweh, anda mikip weiknye ulyama ati, nunce anti, weik tonun si erebuka kikinyapce, “Allah Yahweh ara, Pia Mikip Weiknye ulule,” nyabuka, an siuk erenamabe. Aning atonun, an mikip weik ukulula ati, nunce, kanye kil-kil asa arye, mot nyabibirye, “Nun ni Allah bira, pia telebuk ulule. El mikip ara, weik tonun ulule!” nyabuka, an siuk erenamabe.