Mazmur 2 - Eipomek

Allah arye ninye deiyoknye kina ati, wipdeibuk yupu

¹ Yata ning deiyok ati, ninye ayala-ayala nirya tukwak im sirya, mutuku sirya nirya, talibuka unyak nang nirya arye, ‘Allah ara, nun like,’ tenebuka, talye piluk donyak do? Tonda amutuku-amutuku talibuka, unyak nang arye tenebuka wininyak ning nirya ara, talye-talye urdemuk kibuka wininyake.

² Aning ara, sik ninye deiyok talibuka unyak nang ap, tonda mambul weik nang nirya ap, bulubuka wekikirye, Allah Yahweh ap, ‘Tukwak ninye lyepnamle’ tenen, wipdeibuknye ap ati, ‘Sik si yanipnamap’ tenen, yupu talinyake.

³ Tonda, tukwak mutuku-mutuku nirya talibuka unyak nang arye, ‘Allah ap, elce wipdeibuknye ap, sikce nyasilye ning yupu ara, nun like. Ayupu ara, tapu koulongana atonun usulula ati, lopdongopnuyabe,’ tenenyake. Tonda, sikce, “Nun adiparyuk batakibirye, nun yuk tenebibye ninguk, wininamabe,” nyanyake.

⁴ Nyakiba, Allah el im deice weik buna teleb ning deice bululnye kekeplirye, akutusulule. Tonda, atenebuka nyanyaka ara, ‘Talye yupu nyanmaka,’ tenen, mangkau kibuka batakalule.

⁵ Ati winiplirye, Allah el yu ning, sik nong deice deipnamle. Winiplyopura, sik ilil upliba, lukdanamake. Deiyok ara, Allah el yu sik aninye deice deipliba, ilil weik upliba, sik nong ara, birbir anamake.

⁶ Allah el si Yahweh arye nyapnamle. “Sion mutuku pia telebak, pia telebnye ulul mutuku noutamak ara, narye wipdeiamsinye amutuku deipne. Ara, ‘Amutuku noutamak ara, na si pia erenamniyak’ tenen, Yerusalem mutuku noutamak deipne. ‘Anye bira, tukwak im sirya, mutuku sirya nirya unyak ninye, sik ninye deiyoknye, Raja unamle’ tenen, wipdeipse.” Allah arye nyabuk.

⁷ Aninye deiyoknye birye nyapnamle. Allah Yahweh arye, nati nyapnuk yupu ara, nyapnune. Allah Yahweh arye nyapne. “Anda na mi koproba ulyame. Na Allah ara, an ni koproba na unune,” nyabuka, wibuka deipnuke.

⁸ Ance nati moropnunilyame. Moropneminyopura, mutuku-mutuku nirya ap, amutuku noutamak unyak ninye nirya ap ara, narye anti, arepkiniba, talibuka unamlame. Arepkinyopura, mutuku sirya, im sirya, anirya ancuk talinamlame.

⁹ Winipminyopura, ance pia kat ning besi ning deice arye, sik wininyak ning nirya opminyeba, yanuka opnamle. Ance tuku tilibuka memelamak makau, coltaklamak atonun winibukapmince, sik malye wininyak ninye wenebuka oplopnamlame.

¹⁰ Na Allah arye wipdeipse ninye deiyoknye birye, winipnamle ati, ‘Se, na kayapu tukwak talibuka umunye ninye deiyok nang nirya ara, nun ton wenebuka opsilyak’ tenen, anyapmasin yupu kekepmunce, moubuka wininamlume. Tonda, anggun weik deiyok nang nirya ara, ‘Allah arye wenepsilyak’ tenen, akunum laka nyapsina anya arye, moubuka wininamlume.

¹¹ Winipmunyopura, Allah yupu kekebuka umunce, Allah el si Yahweh ati, ilil tenebuka, el amu tam umunce, el piluk donamlulume. ‘Allah arye wenepsilyak’ tenen, weik ilil usululba umunce, nun ni koproba Allah ati, kanye delinamlulume.

¹² Aning atonun, anggunce Allah el Mi koproba ati, “Nun ni,” nyabuka, el amu tam umunce, el dam yok sirim talibuka, yana kinamlulume. Wininamluma deiyok ara, ‘Allah el si Yahweh arye wenebuka kum opnamsil’ tenen, wininamlulume. Tonda, ‘Mangkau arye Allah el yu nun deice deipsilyak’ tenen, moubuka wininamlulume. ‘Allah el Mi koproba arye, lyepnamsil’ tenen, el dam unyak ninye nirya ara, sik unamak ning nirya ara, telebuk unamle.