Mazmur 19 - Eipomek

Daud mot sena deice arye, “Ninye arye, Allah kwepdeibuk ning eibikirye, el siuk erenyake,” nyabuk yupu

¹ Allah ance kwepdeipnulumba, im noutamak ulul ning nirya ara, tukwak ninye eibikirye, an pia teleb unyak ning ap, weik dirina unyak ning ap ati, kel kibikirye, an siuk erekinyake. Ninye arye, im ap, im noutamak ulul ning nirya ap, eibice deice arye, ‘Se, Allah arye, pia teleb kibuka mambul pil dolule. El dam pia telebuk ulirye, el mikip arye pil dolul ning nirya ara, pia telebuk ulule,’ tenen, moubuka kel kinyake.

² Tonda, Allah ance im ap, im noutamak ulul ning nirya ap, kwepdeiplum ning nirya ara, urasin pia teleb ulye deice arye, Allah el pia teleb ulul ning nirya ara, laka nyasulule. Ara, ninye yupu deice arye nyalamak touk, kum nyasinyak bukni, aning nirya urasin elinyak deice aniryuk, laka nyasulule. Aning atonun, lukunyan talak nirya babye, ninye arye im noutamak ulul ning eibikirye, moubuka tenebica deice arye, ‘Se, Allah ara, dipkoprob weik mambulnye ulule’ tenen, kel kinyake.

³ Ara, ninye nyalamak touk, kum nyasulul bukni, aning urasin deice aniryuk laka nyasulule. Tonda, ninye yupu ap, yuk lelim ap arye, kum nyasulul bukni, mutuku-mutuku nirya noutamak unyak ninye nirya, im noutamak ulul ning urasin eibice deice arye, Allah el teleb ulul ning ara, moubuka kel bikinyake.

⁴ Keting ap, wala ap, kurya ap nirya ara, ninye yupu nyalamak atonun, nyabuka kum laka nyasinyake. Tonda, tukwak ninye arye yupu nyanyaka ara, kum kekenyap bukni, mutuku nirya unyak ninye arye, im noutamak ulul ning nirya eibice deice arye, ‘Se, Allah el pia teleb ulul ning ara, ani’ tenen, moubuka kel bikinyake. Mutuku-mutuku unyak ninye nirya babye, im noutamak ulul ning nirya elinyaka ati ara, adeice arye, Allah el winilul ning ton, sik nirya kel bikinyake.

⁵ Allah arye keting ara, kwepdeibuka im noutamak deibukba, pia aulule. Winipmanto ara, kil min kum dopmalinye, akil kum dopmalye talak arye, teleb kwerya ap, pia teleb baju ap, ongoplirye yaliba, el kayapu nang arye dilamak touk, berekelongon talak, keting weleplirye yaliba, dirin weik ulule. Tonda, ninye bikbik abuka bana weik kelnye birye, ‘Bikbik abuka, mikip asa arye binune’ tenen, kanye deibuka kintinililamle touk, beren tam talak keting kutukuka tiklirye, keting duk-duk noutamak nirya, mikip arye balule.

⁶ Keting beren tam talak ara, keting yangan tam arye kutukuka tiklirye, keting duk-dukan noutamak ara, bisik banmalya ani, sintam ara, omutuku keting wengban tam kum ulule. Winilula anya arye, el balul talak nirya ara, im sirya, mutuku sirya nirya ulul ning ara, el tin aniryuk buppu pirilule. Tonok ning babye duknuptuba, keting dirina ap, tin ap kum upnamle. Tukwak mutuku ulul ning nirya, keting sinarya elule.

⁷ Allah el si Yahweh arye, “Aning wininamlulume. Aning ara, pia kum wininamlulume,” nyapdeipsuk yupu nirya ara, pia telebuk ulule. Ayupu moubuka kekebipyopura, nun kanye ap, talima ap kam kilisulule. Ikin usilye talak ara, kanye talima kwa disulule. Allah Yahweh arye ninye ati, “Teleb winin bisik ani,” nyapdeiamsuk yupu nirya ara, pia diksukum yupu ulula ati, nunce, ‘Ayupu ara, dib do, tilila do?’ tenen, kanye kum bokoltonamsile. Allah arye ayupu nyalamuk touk, nong dipkoprob upra banamla ati ara, ayupu nirya ara, moubuka diba tenepnamabe. Walwal nang babye, Allah arye anyapdeiamsuk yupu, pia moubuka kekebikirye, talibibyopura, sik kel kibuka bakirye, aminyan talak, sik babye kel ninye unamake.

⁸ Allah Yahweh arye, ‘Wininamlulume,’ nyapdeiamsuk yupu nirya ara, diksukum winina ati, nyapdeiamsuke. Anyapdeipsuk ning ara, dipkoprop, aning moubuka kekebipyopura, nun kanye talima pum tam arye, weik kanye delinamabe. Allah Yahweh arye, “Wininamlulume. Aning ara, pia kum wininamlulume,” nyapdeiamsuk yupu ara, dirina kilina deiyok ning ulula ati ara, ayupu moubuka diba tenebibyopura, nun kanye talima pum tam, dirin kilinamsile. Tonda, aning-aning nirya eibibirye, ‘Teleb ning ani, malye ning ani’ tenen, teleb kibuka, kel kinamabe.

⁹ Ninye arye, nun ni Allah Yahweh ati, ‘Elda weik mambulnye’ tenen, ilil usilye ning ara, pia weik teleb ulule. Aning ara, pia ati aunamsile. Allah Yahweh arye, “Wininamlulume. Aning ara, pia kum wininamlulume,” nyapdeiamsuk yupu nirya ara, diksukum yupu uk ulule. Ayupu noutamak ara, malye winin ning, tonok babye kum ulule. Allah Yahweh arye nyasilye touk, dipkoprob nong winipnamle.

¹⁰ Allah arye nyapdeiamsuk yupu nirya ara, dekna weik ning, emas pia urasin teleb ning atonun kume. Ninye arye, ‘Se emas ara, weik mambul dekna ning,’ tenenyak bukni, dipkoprob emas ara mitik mambul uk ulule. Allah el nyasilye yupu ara, weik mambul ulule. Tonda ninye arye mong mek dibikirye, “Se, aning ara, to weik nyasulule. Aning ara, pia telebe,” nyalamak bukni, aning babye, mitik teleb uka. Allah arye nyasilye yupu ara, weik teleb ulule. Tonda mong mek moulamlak yung arye, mek dobuka, dilamak ning ara, teleb ulamle bukni, aning babye mitik teleb uka. Allah el yupu ara, weik teleb ulule. Mong mek ara, mitik teleb uka.

¹¹ ‘Mangkau arye malye winibibyak’ tenen, Allah yupu moubuka kekebibirye, ‘Malye ning ani, teleb ning ani’ tenen, moubuka kel kibibirye, malye winin ning batakibirye, diksukum un ninguk, talibuka unamabe. Ara, Allah arye nyasilye yupu nirya, kekebuka pia talilamlenye bira, Allah arye anye biti, weik dekna ning arepliba, dopropnamle. Tonda, Allah el yupu uk moubuka talilirye, diksukumuk ululnye bira, el winin ning nirya ara, telebuk upra banamle.

¹² Yatanye birye, ‘Na malye wininun ning ara, ani’ tenen, moubuka kel kiptu do? Kume, nun bidamang aryuk kum uptibye. Ati, ‘Se, nun ni Allah, na kanye talima pum tam malye unulul ning ati, namin kipnutumce, amalye ning nirya kilipnutume’ tenen, moropkine. Na kanye talima pum tam malye unilye ning, kum eiptinya ati ara, ‘Mangkau arye malye winipnyeba, ancuk namin kipnamnilyam’ tenen, moropkine na nio.

¹³ Tonda, na ni Allah, an amu tam unirye, an piluk donun bukni, na talima pum tam ara, malye ning tuba unilya deice arye, ‘Malye winin ning, ani,’ tenepne bukni, ‘Talye mangkau asa malye winipnyak’ tenen, na ni ance melipniminya deice arye, malye kum wininamne. Na talima pum tam malye wininulul ning arye, ‘Bisibuka malye kipniliba, malye winipnyak,’ tenena ati, moropkine na nio. An mikip arepnimince, melipniminya deice arye, weik malye winin ning kum kipnirye, diksukumuk unamne. Ati, ‘Allah ance melibuka lyepronamnilam’ tenen, moropkine na nio.

¹⁴ Tonda, na moropkin ning ara ani. ‘Na ni Allah narye nyanamne yupu ap, na talima pum tam arye tenenamne ning nirya ap, diksukumuk uptuba, ance nati kanye deipnutum’ tenen, moropkine.

¹⁵ Na ni Allah Yahweh, ance nati melibuka kalikinilyame. Yata weik ikin ning do, aning-aning nirya, ‘Na dam yanuka ikin upnilyak’ tenen, an dam yanganune. ‘Ninye yuk nang arye opsicak’ tenen, weik mutuku yangan keil, donga duknubuka balamak touk, ‘Allah ance lyepdopnamnilam’ tenen, an dam bikbik abuka yanganune. Na ni Allah, anda na malye winin ning noutamak arye, wilibuka Lyelonilyama Deiyoknye uminya ati, nyapkine. Raja Daud birye nyabuk.