Mazmur 18 - Eipomek

Raja Daud birye, mot nyana deice arye, el mal olan nang ati, akunum obuka malye kibukce, Allah ati, ‘Telebe,’ nyabuk yupu

¹ Raja Daud birye, aMazmur yupu mot sekukce, ‘Allah yupu mot nyana deiyoknye arepnamuka ati, sekuk. Daud bira, Allah Yahweh, el amu tam pil talibuka donanye ulamuk. Amazmur yupu mot sekuk ning ara, Yahweh ati, nyabukce, amot nyalamuk. Tonda, amot sekuk talak, ara Allah Yahweh arye, Daud biti melibuka lyepdobuk deice arye, Daud el mal olan nang ati, obuka sirya dakuk. Daud birye nyabuk yupu ara, ani.

² Daud birye, “Se, na ni Allah Yahweh, ance na mikip arepnulumnye biti, na kanye nirya, an deiceuk delikunune,” nyabuk.

³ An Yahweh arye, na ikin unulul ning nirya ara, ancuk lopnimince, lyenilyame. An mikip ara, pia weik tonun ulula ati, winipmanto ara, Allah anda weik mutuku yangan keil ap, tonda yu nang arye wekmanto kum weik keil aik ap, atonunye unilyame. ‘Yu nang arye yanuka opnikcak’ tenen, ilil unulul talak nirya ara, an damuk yanuka, dungnubuka unyopura, ance melinimince, telebuk ununa ati, anda weik mutuku keil yangan atonunye unilyame.

⁴ Anda, pia teleb ulyama ati, nun nirya arye anti, “Se nun ni Allah Yahweh anti, pia teleb ulyame,” nyabuka, an siuk erekinyabe. Ati, na ikin unulul talak nirya ara, anti, “Naio yanuka melibuka lyepnilyame!” nyabuka morokunune. Na mal olan nang arye, ‘Anye opnuyap’ tenebikirye, na dam olyanamniak talak ara, narye anti morokununa ati, ancuk na lyelonamnilame.

⁵ Dipkoprop, yu nang arye, na dam antanap dongobuka, ‘Opnuyab,’ tenepnik talak ara, ‘Akunum opnuyapʼ tenen, piripnikba, dipmanto wamse. Atalak ara, talye karin arye ikin weik ning, na dam yayukba, ilil weik upnuka ati, imun kanye bobuka ulamsirye, ‘Se na dipnune,’ tenepse. Winipmanto ara, mek weik oplirye, talye karin arye mek yalirye, ninye weik tonun diplirye opliba, bikikirye, yuk nang nirya, ilil weik ulamle touk, atalak ara, na ton winyamse.

⁶ Atalak ara, dipkoprob dipmanto wamse. Winipmanto ara, akunum diamik nang banyak mutuku, el si Sheol mutuku arye, mikip weik tapu arye, yanuka koulongolamak touk upnukba, dipmanto wamse. Atalak ara, nara dipkoprob akunum dipmanto wamsa ati, lyepdanmanto kum wamse. Winipmanto ara, talye bai tam kam ulamle ning, mangkau kanye bobuka, bisik balamakak, ninye arye wena wepmakirye, akunum kintinibuka wepmakcak bakiba, abai kam ning youlamle touk, na babye winipnikba, dipmanto wamse.

⁷ ‘Atalak ara, na mal olan nang arye, opnuniyak’ tenen, dipkoprob pia imun kanye bobuka ulamsa ati, narye anda Allah Yahweh ati, “Melibuka lyepnilyame!” nyabuka, moropkise. Diba, na si erekunun Allah ati, “Naio ancuk yanuka melipnilyame!” nyabuka moropkise. Anti moropkise talak ara, an si eren aik pum tam arye, na ngalukuka moropkise yupu kekepnulume. Ara, narye engebuka moropkise yupu akunum nyapsopura, an amul arye kunum kekepnulume.

⁸ Kekepnulumce, na lyelona ati, na dam yanamalum talak ara, tukwak mutuku, im sirya, mutuku sirya nirya ara, weik tonun lulukukce, mikip arye sirim talibuk. Ara, im sirya, mutuku sirya nirya weik lulukukce sirim talibuk. Atalak ara, an Allah, yu weik upkuka ati, weik lulukukce, mutuku kon nirya ap, amutuku-amutuku nirya amu tam uamuk keil ara, sirim talibuk.

⁹ Allah anda, yu weik upkuk talak winipmanto ara, an u pum bisik arye, weik tulum ara, laka panabuk. Tonda winipmanto ara, atalak aryuk, aning-aning nirya dilamle uku buk ap, uku kalum ap ara, an si sitang pum tam arye, yanuka laka ubuk. Allah, an yu weik upkukba, winipmanto ara, weik uku buk ap, kalum ap ara, an nong noutam arye kutukukce, dinmoke.

¹⁰ Aning winipkuk talak ara, ance im deice kukuka dinmalumce, tukwak mutuku yalume. Tukwak mutuku yalum talak ara, pia mirin dua ara, an yan amu tam upkukba, adeice arye yalume.

¹¹ Allah anda pia minop yalum talak ara, im deice mikip weik ulyam malaikat, el si ara Kerub, el balye deice buklumce, el pol arye im deice arye lakuka, tukwak mutuku dam yalume. Winipmanto ara, mikip weik kumanya, pu apliba, pola yangalamle touk, atalak ara, Allah an minopce tukwak mutuku yalume.

¹² Ance tukwak mutuku yalum talak ara, ‘Talye tukwak nang arye, na nong epnamniak’ tenen, an nong dana-dana tam nirya, weik kunuklamle ning arye, lelipdongopkukba, tukwak nang arye kum eipkik. Tonda, mirin weik dua ap, mok ap, an nong dana-dana tam siknidongopkuka ati, ninye arye, an nong kum eipmanto upkike.

¹³ Allah an nong dam ara, dirina weik uamuka ati, pia kunukuk dua kan-kan arye, an dirina tukwak ubuk. Tonda, an tukwak yalum talak ara, im deice arye weik es mok, mitik keil bum atonun ubuka sakuk. Tonda, uku buk tuba dilamuk kalum ap, tukwak mutuku deice sakuke.

¹⁴ Diba, Allah Yahweh anda im deice arye tukwak mutuku yalum talak ara, im noutam arye, weik liman nyabuk. Atalak ara, an Allah, aning-aning nirya deice tam talibuka umince, Pia Mikip Weik Deiyoknye ulyama ati, ance weik yupu deice arye nyaplumba, tukwak nang nirya kekebik.

¹⁵ Atalak ara, Allah ance, weik bebeya weik tonun im tam arye dopkweteplumba, anti, ‘Allah bira, nun lik ati, el yupu pia kum kekenamabe,’ tenekinyak nang nirya ara, aning eibika deice arye, ilil weik ubukba, sikda dana-dana tam nirya, bikbik abuka bindobik. Allah ance bebeya weik dokweteplum ning ara, uku dilul touk ulamle mal atonun ubuka ati, atalak ara anti, ‘Allah ara nun lik,’ tenen, an yupu pia kum kekekinyak nang arye, ilil weik ubukba, dana-dana tam nirya bikbik abuka bindobike.

¹⁶ Allah anda tukwak mutuku yalum talak, weik laut mekwen pum tam ara, karu weik uamukce, balamuk mek ton, ance lak kipdeiplume. Tonda, tukwak mutuku amu tam, weik mutuku bulamle keil ton lak kiplume. Aning-aning nirya ara, Allah Yahweh ance, sik malye winin nang ati, weik yupu deice arye weneplum talak aryuk, aning babye winibuk. Atalak ara, anti, ‘Nun lik,’ tenekinyak nang ati, yu weik upkukba, ance weik yupu deice arye weneplume.

¹⁷ Na Daud bira, pia ikin weik ulamnuk talak ara, Allah im deice ulirye, el taruk bibikuka tukwak mutuku noutam yanuka talipnukce, melibuka lyepnuke. Na mal olan nang arye, nati opmanto unmanik talak ara, Allah arye lyepnuk ning winipmanto ara, ani. Ara, weik mek oplirye, ninye nirya dipmanto upliba, tonoknye birye, el kwit melibuka lyeplirye, anye dobuka, telebak delilamle touk, Allah arye lyepnuka ati nyapne.

¹⁸ Diba, pia mikip weik nang arye, ‘Anye opnuyap’ tenen, na dam ona ati, piripnikba, na akunum dipmanto wamse bukni, Allah arye anang kan-kan arye, melibuka lyepnuke. Ayu nang arye nati, ‘Anye nun lik ati, adiparyuk opnuyabe,’ tenepnarye, na dam yanuka opnunik bukni, Allah arye sik dam arye, nati melibuka lyepnuke. Diba, na mal olan nang ara, pia mikip weik ulamika ati, nara mitangnye ulamsa ati, lepdanmanto kum wamse buk, Allah aryuk lyepnuke.

¹⁹ Na ikin weik ulamse talak ara, na mal olan nang arye, na dam yanuka opnunik bukni, na ni Yahweh elcuk melipnukba, sikce kum opnike.

²⁰ Allah arye nati melibuka lyepnukce, tamubuka teleb sukum ninye arye, opmanto kumak yanuka deipnuke. Allah arye nati, kanye deipnuka ati, na mal olan nang dam arye lyepnuke.

²¹ Tonda, nara malye winina kumce, pia diksukumuk winilamsa ati, Allah arye na melina ati, dengna arena atonun ubuka, lyepnuke. Ara, na taruk arye, malye winin ning pia kum winilamsirye, diksukumuk ulamsa ati, Allah arye, na melina ati, dengna arena atonun ubuka, lyepnuke.

²² Ara, talye ati kum lyepnuk bukni, deiyok ara, Yahweh arye, “Aning wininamlume, aning ara, pia kum wininamlume,” nyapdeiamsuk yupu nirya ara, narye talibuka dobolbanauk ulamsa ati, elce lyepnuke. Tonda, na malye winina kum arye, na si erenun Allah ati kum yanipsirye, el dam arye batakuka, kum bindomse.

²³ Allah kum batakamsa deiyok ara, ani. Ara, elce, “Aning wininamlume, aning ara, pia kum wininamlume,” nyapdeiamsuk yupu ara, pia batakna kumce, talibuka ulamse. Tonda, Allah arye, nunti, “Teleb winin ning ara, ani, malye winin ning ara, ani,” nyapdeiamsuk yupu ara, batakuka luba kum kipsi bukni, aning nirya biklamsirye, talibuka tuba wininune.

²⁴ Allah dam ara, malye winin ning tonok babye, kum winilamsiba, el akunum biknuke. Tonda, malye un ning talibuka kum winilamsa ati, na talima noutam ara, ‘Se, na malye wininun ning ara ani,’ tenen, malye kanye bobuka, kum unune.

²⁵ Ati ara, Allah Yahweh arye, na diksukumuk winilamse ning elilula ati, na teleb ubuka diksukum winilamse touk ubuka, teleb dengna dekuka arepnuke. Ara, na taruk arye, malye un ning talibuka, kum winilamsiba, elilamnuka ati, Allah arye dengna teleb ninguk arepnuke.

²⁶ Sik yuk nang nirya, sikce anda Allah ati, batakna kumce, pia tuba diba tenebuka dobolbakinyak nang ati, ance tamubuka sikti, pia kum batakalyame. Tonda, malye winin ning tonok babye kum ukirye, diksukumuk wininyak nang ara, Allah ance tamubuka diksukum kililyame.

²⁷ Atonun, malye winin ning talina kumce, pia teleb winin ninguk wininyak nang ati, Allah ance tamubuka, sik anang ati, pia teleb winin ninguk kililyame. Bukni, yata nang do nirya, sikce talye-talye yupu nyabuka, kanye tenina deice arye, malye winin ning talibuka, duknubikirye, malye unyak nang ara, ance kel weik bikina deice arye, sikti, yu tenebuka, ikin ning arepmince, wenelyame.

²⁸ Aning ara, talye ati kum nyapne. Deiyok ara, sik talima mitang asa unyakce, yuk nang amu tam unyak nang ara, ance anang melibuka lyelolyame. Bukni, sik kanye erepdakirye, maknya kintininyak nang nirya ara, ance sikti, wenepmince, amu tam deipminyopura, alye dakalanyake.

²⁹ Na kele. Allah ancuk, teleb kiliniminba, kam tuba unirye, na kam unye talak nirya ara, telebuk unune. Winipmanto ara, ancuk na weisa lapdeipniminba, telebuk tuba kam unune. Winipmanto ara, ikin weik unulul talak ara, pia kunukna noutam atonun unun bukni, na ni Allah, ancuk dirina weik arenilyam deice arye, tamubuka telebuk kilinilyame.

³⁰ Pia yu weik yin talin nang, na dam yanuka, ‘Opnuyabʼ tenen, pirininyaka babye, Allah ance melinilyama deice arye, mal olan nang nirya, obuka sirya daktinye. Atonun, nati bisik noutam, cang weik poka dopnitinga babye, Allah ance melipnutuma deice arye, acang poka deice tam kaplibuka, poulbitinye.

³¹ Se, Allah ance winilyam ning nirya ara, pia diksukumuk winilyame. Ance pil dolyam ning ara, malye ning tonok babye kum ulule. Teleb winin ninguk winilyame. Tonda, Allah Yahweh ance, “Winipnamne, winibuka teleb kilinamsine,” nyabuka, nyalin yupu deice arye nyasilyam yupu nirya ara, dipkoprob nong upnamle. Tonok babye kum batakalyame. Yata nang do nirya, sikce anti, ‘Allah elcuk melibuka lyepnamnil’ tenen, an damuk yanuka unyak nang ara, ance anang ati, pia melibuka kalikinalyame. Winipmanto ara, anda nun nong lelin ning, el si ara perisai atonun usilyama ati nyapne.

³² Dipkoprop Allah anuk ulyame. Anda Yahweh ulyame. Yuk Allah ton pia kum ulule. Yatanye birye ton, nun nirya ati, melibuka kalikinamsil do? Kume, nunce si erenyap Allah, elcuk kalikinamsile. Kalikinamsila ati, winipmanto ara, yu nang arye kum opnamsitingak, elcuk weik mutuku yangan keil atonun usulule.

³³ Allah ancuk, na mikip kilinilyame. Yuknye birye kume. Tonda, na banun bisik nirya ara, ancuk melibuka kalikiniminba, telebuk unune.

³⁴ Allah ancuk, na yan mikip kipdeipnuluma ati, winipmanto ara, rusa basam arye, keil deice bikbik abuka balamle bukni, alap upliba, sakuka kum olamle touk, ance winipdeipnulume. Allah ance na dobuka, na mal olan nang arye yanuka opmanto kum sukum deipnuluma ati, talye kanye bobuka, telebuk unune. Winipmanto ara, cang weik mutuku kon deice deipnulumba, telebuk ununa ati nyapne.

³⁵ Allah ance na taruk mikip kipdeipnimince, “Winipnalam, winipnalam,” nyabuka, ninye mal olan ning nirya, teleb kibuka peterenilyame. Allah arye winibuka mikip weik kilinilyama ati, na yin ara, kat ning, el si tembaka deice arye, memepdeipnitinga babye, ayin tapu arye dipdongobuka doptinye.

³⁶ Tonda, ance na tuba lyelonilyama ati ara, winipmanto ara, na nong lelin ning ati, el si ara, perisai atonun unilyama ati, yuk nang arye, na kum opnitinge. Tonda, an sirik tam mikip weik taruk arye, tuba melinilyama ati, tuba telebuk unune. Allah ance nati, weik tonun bico tenepnimince, melinilyama deice arye, tuba telebuk unune. ‘Mambul weik pil dolulnyeʼ tenen, akunum kipdeipnulumba, wininuna ati, na tam nang arye, nati si erebuka kininyake.

³⁷ Allah ancuk, pia teleb karayong bisik deice deipnulumba, talye mangkau asa banuna ati, na mal olan nang arye, opmanto kum uninyak ati, telebuk unune. Yuk nang arye nati, ‘Anye bira, nun lik,’ teneninyak nang arye, obuka kum sirya daknitinge. Winipmanto ara, teleb bisik deice deipnulum ati, na yan ara, alap arye sakuka, kum opnutue.

³⁸ Aning kum bukni, na mal olan nang ara, ‘Opnamanca’ tenen, mikip aryuk dobolbanune. ‘Na mal olan nang nirya, sik dam yanuka opnirye, sirya daknamne’ tenepsirye, batakna kumce, bikbik abuka dobolbanauk ulamsirye, sik nirya obuka, malye kiplopse.

³⁹ Na mal olan nang dam yasirye, anang nirya, narye tomobuka oplopsa ati, sikda tamubuka bukman kumto ubikce, sik nirya dibina uk ubik. Aning nirya oplopsiba, tuku deice sakikce, tonap, bukmanto kum ubikce, na yan damuk dibikba, sik nong deice yaninmase.

⁴⁰ Aning nirya winilamsa ara, na mikip deice arye kume. Aning kum bukni, an Allah aryuk, ‘Anye el mal olan nang olbilirye, sik nirya obuka sirya daknamle’ tenen, mikip weik arepnuluma deice aryuk, na mal olan nang nirya oplopse. Ara, an Allah aryuk nati, mikip weik arepnuluma deice arye, sik nirya obuka sirya dakse. Ance na mal olan nang ati, mitang kipdeiplumce, ance sik dobuka na amu tam deiplume.

⁴¹ Allah ance na melina ati, mambul pil dopnuluma deice arye, na mal olan nang nirya ilil ubukba, ‘Se, anye birye opnamsil’ tenen, sikce donga karikuka, bikbik abuka bindobike. Tonda, ance meliamnuluma deice arye, nati, ‘Anye nun pia lik,’ tenelamnik nang nirya ara, obuka malye kipsirye sirya dakse.

⁴² Anang ara, na ap, sik ap olanmabu talak ara, sikce, ‘Se, yatanye birye yalirye, melibuka lyepsutu do?’ tenen, an Allah ati morobik bukni, ance sikti, bataknauk winiplume. Diba, na mal olan nang ara, ‘Allah Yahweh arye yanuka melipsutu do?’ tenen, anti weik yupu deice morolamik bukni, an Yahweh ara, anang arye morolamkik yupu pia kum kekelamlume.

⁴³ Allah ance anang ati, kum kekeplumce, kum meliamluma ati, narye, mal olan nang nirya ara, obuka sirya dakse. Sikda, obuka malye kipse ati, winipmanto ara, kumanya yanuka, mikip arye dopliba, tuku sung-sunga nirya bobalirye, kum danin balamle touk, narye mal olan nang nirya obuka sirya dakse. Diba, winipmanto ara, ninye arye talye balamle ning do, malye kibuka akunum lyulul ning do, bisikak aupmaliba dobuka, bai tam dolamak touk, na mal olan nang nirya obuka, yuk pere sukum donokse.

⁴⁴ Atalak nirya ara, yuk nang arye yu ubukba, ‘Anye nyalul yupu kum kekepnamap’ tenen, na dam yanuka, malye ubika noutam arye, an Allah arye lyepdopnulume. Tonda, ance na wibuka erepdeipnulumba, narye sik yuk-yuk mutuku nang babye, talipsirye, sik ninye deiyoknye kibuka ulamse. Winilamse talak ara, na mince kum bikamse nang, yuk-yuk mutuku nang ara, na amu tam deipseba, na pil melibuka dolamnike.

⁴⁵ Anang ara, narye, “Winipnamlume,” nyabuka, nyalamse yupu kekelamikce, adiparyuk na yupu nyalamse touk, na amu tam piluk dopra ulamik. Yuk mutuku nang, ninye asik nang arye, na dam yanuka, ‘Derepnamsil do? Wenepnamsil do? Yata yupu nyapnamsil do?’ tenen, nati ilil weik ubukba, sik nong nirya sirim talinauk ulamuk.

⁴⁶ Tonda, nun ap, yuk mutuku nang ap, mal olan talak ara, sikce, ‘Se, yata wiriptibye do? Kume’ tenen, ilil weik ubukba, sik talima dakalsakanauk ulamuk. Sikda, ‘Anye birye opsilyak’ tenen, ilil weik ubukba, ‘Yuk mutuku nang arye yanuka, opsicak’ tenen, cang keil poka domikce, ulamik asik noutam arye batakuka, na dam yanuka, sik nong sirim talinauk ulamuk.

⁴⁷ Allah Yahweh arye, na kam ulamse talak ara, pia teleb kibuka meliamnuka ati narye elti, “Allah Yahweh ara, pia kam unamle! Nati, melibuka kalikinululnye biti ara, “Anda pia telebuk ulyame!” nyabuka, el siuk erenamabe. Tonda, Allah ara, weik mutuku yangan keil atonun unulule. Ara, el dam binirye, dungnubuka unyopura, yu nang arye, kum opnitinge. Tonda, na ikin unulul talak nirya ara, an Allah aryuk nati, lyelonilyama ati, narye an si ara, pia weik tonun si erenauk unamkine!

⁴⁸ Yuk-yuk mutuku nang arye, nati, ‘Anye opnamap’ tenen, na dam olyangalamnik bukni, Allah el mikip deice arye, anang nirya ara, obukce, sik mutuku tuba kam ulamik nang dobuka, na amu tam deibukba, nara sik ninye deiyoknye kipsirye, narye, ‘Winipnamlume,’ nyabuka nyalamse yupu ara, sikce ilil ap, alye ap daklamikce, adiparyuk ayupu kekenauk ulamik.

⁴⁹ Tonda, nati, ‘Anye opnamabe’ tenen, na dam olyangalamnik nang nirya ara, Allah aryuk, nati melibuka lyepnuke. Diba, sik yuk-yuk mutuku nang arye, ‘Anye Daud bira, elce nyasulul yupu ara, pia kum kekenamabe’ tenen, mandipna kanye bobuka, yanilamnik bukni, Allah ance na dobuka, sik deice tam erepdeipnuluma ati, nara sik deiyoknye ulamse. Tonda, sik yu weik nang arye, ‘Anye Daud bira, nunce opnamap’ tenen, na dam yanuka, ‘Opnuyabʼ tenen, pirilamnik nang nirya ara, Allah ancuk, anang nirya oplumce, nati melibuka lyepdopnulume.

⁵⁰ Aning-aning nirya ara, anda Allah Yahweh aryuk, nati melibuka lyelonilyama ati, sik yuk-yuk mutuku nang nirya arye, kekenamakak ara, narye Yahweh anti, weik tonun si erenamkine. Winipnyopura, sik nirya arye, kekenamake. Tonda, Mazmur yupu mot deice arye, “Allah anda pia telebuk ulyame,” nyabuka, an si ap, an ap ati, pia si erenamkine.

⁵¹ Allah ancuk na wibuka, erepdeipnuluma deice arye, nara ninye deiyoknye Raja kibuka, Israel nang taleamsirye, yuk-yuk mutuku ninye deiyok nang ton, weik tonun obuka, sirya dakamse. Tonda, Allah ance, na Daud biti, ‘Israel nang taliplirye, sik deiyoknye raja unamle, ‘tenen, lak kilina ati ara, na wibuka erepdeipnulumce, na kisok deice minyak zaitun mek kwebuka likdeipnulume. Atalak arye dipdongobuka, danoutam talak nirya ara, ance nati, weik tonun bico tenelamnulumce, “Winipnamkine, winipnopura, pia telebuk kilinamkine,” nyabuka, nyalin yupu deice arye, nyalilamnulum ning nirya ara, pia kum batakanilyame. Tuba-tuba, melinauk winilyame. Ara, na Daud ap, tonda narye deipnyopura, dadeipdanin, banamak nang nirya, sik kan-kan arye, daunamak nang ap ati, aning atonun wininamlame. Daud birye, ayupu nirya nyabuka sekuk.