Mazmur 17 - Eipomek

Malye kum uamuknye bukni, el deice ikin ning deiamikba, Allah ati morobuk yupu

¹ Raja Daud birye, aMazmur mot sekuk. Se, na ni Allah Yahweh, ikin unulula ati, narye anti, ‘Melipnilyame!’ nyabuka, engena deice arye, ‘Moubuka melipnilyame!’ nyabuka, moropkin yupu ara, kekepnimince, melipnilyame, na nio! Nara anti, ‘Melipnamnil’ tenen, moropmakin yupu ara, ‘Moubuka kekepnamnilam’ tenen, nyapkine. Na si bambol arye nyakunun yupu ara, talye yupu kuma. Dipkoprop yupu dem nyakunune.

² Na moropkin ning ara, ani. “Nara malye kum winipmasibuk, yu nang arye ikin ning dobuka, na nong deice deipnik bukni, ancuk yanuka, ‘Anye bira, malye kum winibuk,’ nyaptuma deice arye, aning kekebikcopura, yuk nang arye nati, ‘Se, dipkoprob anye bira, diksukumuk ulule,’ tenenamniake. Allah ancuk, dipdemince, ‘Dipkoprop teleb wininanye, diksukum koprop unanye bira, ani,’ nyanamsilame.”

³ Ance, na kanye talima noutam ara, moubuka dipdenimince, tonda, lukunyan noutam babye, ‘El talima noutam ara, malye winin ning aupmal do, kum do?’ tenen, na kanye talima noutam moubuka dipdeniminyopura, ‘Aning ton aubukʼ tenen, eipnamnilame. Na kanye talima noutam ara, malye un ning ap, tonda, ‘Malye winin ning talibuka wininamne’ tenen, ning ton, pia kum eipnamnilame.

⁴ Yuk nang arye, talye-talye yupu nyalamak touk, narye pia kum nyanune. Aning kum bukni, Allah ance nyasilyam yupu ara, moubuka kekenuna deice arye, sik ninye ona ap, malye kilinyak nang ulamak touk, narye kum wininune. Deiyok ara, ance, ‘Wininamlume,’ nyapdeipsulum yupu uk, talibuka wininune.

⁵ Diba na ni, ance, ‘Aning ara, wininamlume. Aning ara, pia kum wininamlume,’ nyapdeipsulum yupu, pia moubuka talinirye, dipkoprob uk wininune. Winipmanto ara, ninye arye kat tuku deice arye, bisik talye mangkau asa banmakirye, yan dum dukliba, kum saklamaka atonun, kum wininune. Ance nyapdeiamsulum yupu ara, pia moubuka kekenuna ati, malye kum wininune.

⁶ Narye anti, ‘Se, na ni koproba Allah melipnilyame,’ nyabuka morokunune. Ance, dipkoprob na moropkinye touk kekepnimince, melinamnilama ati, na kele, talye ati kum morokunun ning ara, ‘Melipnamnilamʼ tenen, morokunune. Ati ara, na nio na morokunun yupu ara, moubuka kekepnimince, melinamnilame na nio.

⁷ Na nio, na kele. Ance nunti, ‘Bico tenesilyama ati, winibuka-winibuka, pia melibuka lyepsinirye, teleb kilinamsine,’ nyalin yupu deice arye nyapdeiamsulum ning ara, pia teleb kibuka arenamsilame. Se na nio, anda dipkoprob mitang upliba, ‘Elce nunti melibuka lyepnamsil’ tenen, an dam yanuka unyak nang nirya ati, dipkoprob lyelosilyame. Ara, sik ona ati, yu nang tikikcak arye, ‘Mitang nang ati, adiparyuk opnuyap’ tenebikcopura, sik ikin unyak nang arye, an dam yanuka unamak nang nirya ara, an mikip deice arye melibuka kalikisimince, lyesilyame.

⁸ Na nio, ance nati, pia bicoe tenenilyama ati, ‘An asing koproba arye dimince, kalikinamlam touk, nati melibuka kaliknamnilam’ tenen, moropkine. Atonun, an dam ton deipnimince, kalekuka lyenamnilame na nio. Winipmanto ara, ayam arye, el mapu dobuka, el pol amu tam deiplirye, kalikuka irilamle touk, ‘Ance nati, an dam deipnimince, kalikinamnilam’ tenen, moropkine.

⁹ Ara talye ati kume. Deiyok ara, na mal olan nang arye, ‘Anye obibirye, el nong deice, ikin weik ning delinamabe,’ teneninyak nang, ‘Sikce opnikcak’ tenen, ance melibuka kalikinamnilyame na nio. Sik ayu nang arye, na dana-dana tam antanap dongobuka tikikcak arye, ‘Anye opnuyap’ tenen, akunum kintinipmaka ati nyapne. Ati, ‘Melibuka lyepnamnilamʼ tenen, moropkine na nio!

¹⁰ Sik yu nang arye, yuk nang ati, bico tenena ara, pia kum tenenyake. Tonda, sik yupu nyanyaka deice arye, malye weik winibikirye, pia maknya kintinin yupu nyanyake.

¹¹ Na banunak nirya ara, sikce na balye tam yakirye, warikininyake. Wini talak babye, sikce nati, ‘Anye obibirye, el nong ara, weik tonun dobuka, tuku deiceuk deiplopnamabe,’ teneninyake.

¹² Winipmanto ara, yu weik ap, nong weik ap ulul kuse, el si ara singa kuse, elce, ‘Bai tam kam ulye ning opnirye, sik nong ap, tup ap ara, seklopnirye, dipnamne,’ tenelule. Tonda, asinga kus, elce deiamuk mapu ara, ‘Kam ning mangkau kanye bobuka, na dam baliba, adiparyuk opnaman’ tenen, duknupmalirye, wariklamle atonun, ayu nang arye, na ona ati, aning atonun, ‘Anye opnuyapʼ tenen, warikininyake.

¹³ Ati ara, na ni Allah Yahweh, anda tikmince, na ona ati, yu nang ara, wenepmince, amu tamuk deipnamlame. Yu weik nang arye, nati, ‘Nun ninye ona ati, parang doprobibyakarye, anye oplopnuyap,’ tenenyaka ati, na nio, ance melibuka lyepdopnamnilame!

¹⁴ Na ni Allah Yahweh, an mikip taruk arye, melibuka lyepnilyame. Ara, tukwak mutuku unyak yu nang arye, talye tukwak ninguk pataplyeba, aninguk tenenyak nang arye, malye kipdeipnikcak ati, na nio, ‘Ance lyepropnamnilam’ tenen, moropkine. Na nio, narye moropkine. ‘Ance yu una ap, malye winina ap, talibuka wininyak nang ara, kanye imun weik ning arepnirye wenepnamne,’ teneplumce, sikti, akunum kintiniplum touk, ‘Ayu nang ati, weik tonun wenepnalam’ tenen, moropkine. Tonda, ayu nang, sikce deiamik mapu babye, ‘Ance ikin ning dobuka, sik dam deipminba, imun kanye bobuka unamak’ tenen, moropkine. Tonda, ayu nang arye deiamik mapu, sikce dadeipdanin bakirye, delinamak mapu babye, ‘Imun kanye weik bobuka, unamak’ tenen, moropkine na nio.

¹⁵ Bukni, na ati ara, malye winin ning talibuka kum wininuna ati, pia diksukumuk wininmanya ani, akunum winipnyopura, aminyan talak Allah, an urasin ton eipnamne. Tonda, aminyan akunum dipnyopura, daunmanya ani, tonap kam buknyak arye, an urasin ap, nong ap, eipnyopura, pia kanye deibuka unamne.