Mazmur 16 - Eipomek

Daud mot sena deice arye, “Narye Allah ati, pia diba tenebuka moronune,” nyabuk yupu

¹ Na ni Allah, ance kalikuka melipnilyame. ‘Ikin upnilyak’ tenen, an dam anyuk yanganune. Anda ninye melina deiyoknye ulyame.

² Ati ara, narye an Yahweh ati, nyakunune. “Na ni koproba Allah, anda na deiyoknye unilyame,” nyabuka, si erekunune. Yata ning do nirya, teleb ning talinun ning ara, ancuk arenilyame. Yuk yala ning nirya ara, talye ninguk winilul bukni, anda weik telebnye winilyame.

³ Tukwak mutuku noutamak unyakce, ance, ‘Wininamlulume,’ nyapdeiamsulum yupu talibuka, diksukumuk wininyak nang ara, pia kanye delinune.

⁴ Tonda, kam una kum ninguk, si erenyak ninye ara, kam ning bobuka, aisa dam yangakirye, si erenyak ninye ara, ikin weik kanye bobuka unamake. Sik nong deice ikin ning, pia weik unamle. Sikce talye ning, aisa si erena ati, kam ning obuka, uku dongolbalamaka ara, na kum melibuka donamne. Tonda, sikce isa si nyanyak ning ara, narye aisa si pia kum nyanamne.

⁵ Na ni Allah Yahweh, aminyan talak teleb upnamnile ning ara, ancuk arenamnilama ati, an siuk erenamne. Na wininun ning ap, talinun ning ap nirya ara, ancuk kalikinilyame. Ati an siuk erenamne.

⁶ Dipkoprop Allah, ance arepnulum tuku ara, pia teleb ninguk arepnulume. Winipnuluma ati, na talima pum tam, pia weik arye, kanye delikunune.

⁷ Allah ance nati, ‘Wininamlyame, teleb bisik ara ani,’ nyabuka peterenilyama ati, an siuk pia erenamkine. Pia lukunyan noutam babye, ance nyapdeipnulum yupu, tuba tenenauk unune.

⁸ Nara, Allah anti, tuba tenenauk ununa ati ara, na kanye ara, anda na dam tuba tikuka melinilyame. Na dam anyuk unilyama ati, ikin ning, na dam yatua babye, ‘Allah arye meliniliba, teleb aniryuk wininamne’ tenen, kanye delinune. Ton ilil kum unulule.

⁹ Ati ara, na talima pum tam, teleb kanye deipnirye, narye anti, kanye deibuka an siuk erenamkine. Tonda, ‘Na nong nirya, Allah atibuk arepnune,’ tenebuka arepnyopura, nara ilil una kum aryuk, pia kanye darapdongobuka unamne.

¹⁰ Aning ara, urdem ati kum nyapne. Na dipnya babye, Allah ance kum bataknamnilame. Winipnimince, ance wibuka deipnulumnye, pia diksukum winibuka telebuk wininunye bira, dipnyopura, tuku pum tam weipnica babye, nong ara, kum lyupnamnile. Kam bukeipnamnilama ati nyapne.

¹¹ Tonda, Allah ancuk pia kam una ati, diksukum bisik peterepnilyamura, biknune. Winipniminyopura, an damuk yanirye, pia kanye deibuka unamne. Winipniba, an sirik tam dam unun talak nirya, pin-pin kanye dobuka un ning, pia aunamle ning ara, ance na dam tabakuka arenamnilame.