Mazmur 150 - Eipomek

Allah Yahweh ati, ‘Telebe,’ nyanamap yupu

¹ Nun tukwak unyap ninye nirya arye, nun ni koprop Allah el si Yahweh ati, “Anda pia telebuk ulyame,” nyabuka, el si atibuk erenamabe. Allah Yahweh el aik ara, im deice ulula anya arye, malye ning tonok ning babye, kum ulul ati, pia telebuk lekak ulule. Ati, el mapu nirya bulubikirye, elti, “Anda pia telebuk ulyame,” nyabuka, el si pia erenamabe. Im deice pia ulirye, im deice alip tam nirya, el mikip weik deice arye, talilula anya arye, el tibuk, “Telebe,” nyabuka, kibuka si erenamabe. Ara, el mapu nirya babye, mikip arye, “Telebe,” nyabuka, el siuk erenamabe.

² Allah el tibuk, kanye deibuka, si erenamabe. Ara, ‘Allah ara, el mikip weik adiparyuk aning-aning nirya talibuka winilulnye ati ara, el tibuk, “Telebe,” nyanamabe. Yuk nang nirya ara, ‘El mikip weik ulye touk, ton kum unyake’ tenen, el tibuk, “Anda weik erebuka mikip pia weiknye ulyama anya arye, telebe nyapkiyabe,” nyabuka, el tibuk kibuka, pia si erenamabe. Tonda, ‘Allah elda weik erebuka ululnye birye, pia mambul weik pil dolule’ tenen, nun nirya arye, el siuk weik arye erenamabe.

³ Allah el si erebuka kina ati, pong-pong ana, el si ara terompet deice arye, pong-pong abuka, mot sebuka, elti, si pia erenamabe. Tonda, yuk mot sena ati, lelim nyalul ning, el si gambus ap, kecapi ap, weik lelim lenmalya deice arye, Allah el siuk, pia erenamabe.

⁴ Allah elti, si eren mot sen talak, lelim nyalul ning, el si ara rebana bopmapya deice arye, mot wibibirye, senamabe. Tonda, kanye lon mot sena ati, lelim lelul ning, el si ara kecapi ap, seruling ap bobuka, mot senamaba deice arye, el siuk pia erenamabe.

⁵ Aning atonun, el si erebuka, mot sena ati lelim lelul ning, el si ara ceracap ap, tonda canang ap, sik abitinye ning bopmapya deice arye, mot moubuka wibibirye, Allah el siuk erenamabe.

⁶ Tonda, Allah elce kwepdeiamukba, tukwak mutuku noutamak kam ulul ning ayala-yala nirya arye, Allah Yahweh el tibuk kanye deibuka, kibuka erebikirye, el siuk erenamake. Nun ni koprop Allah, el si Yahweh ati, “Anda pia teleb ulyame,” nyabuka, el siuk erenamabe. Akunuma. ‘Tukwak mutuku noutamak kam ulul ning nirya arye, Allah ati, “Telebe,” nyapnamak’ tenen, Haleluya nyapne. Na Sisinanye Raja Daud arye, akunuma nyapne.