Mazmur 149 - Eipomek

Israel nang arye Allah ati, “Telebe,” nyan ning ati, mot deice sekuk yupu

¹ Nun Israel nang nirya ara, “Allah el si Yahweh ara, pia teleb ulule,” nyabuka, el siuk erenamabe. Nun ni Yahweh el kanye delin mot, winiryuk ninguk nyanamabe. Nun Israel yala nang nirya arye, ‘Allah el siuk erenamap’ tenen, bulubuka neika unamap talak ara, Allah ati, “Anda pia telebuk ulyame,” nyabuka, mot nyan deice arye nyanamabe. Ara, batakna kumce, ‘Allah arye nyasilye yupu nirya talibuka, diksukumuk wininyap nang arye, mot nirya ara, nyanamabe’ tenen, nyapne.

² Nun Israel nang yuk-yuk nang nirya ara, Allah arye kwepdeiamsuka deiyoknye bira, aulirye talisulula ati, kil-kil kanye bobibirye, Allah el siuk erenamabe. Ara, Sion mutuku noutam unyap nang nirya ara, nun ninye deiyoknye, Allah arye nun talisulula ati, nun deiyoknye Raja usulule. Tonda, Allah ap, neika unyaba ati, kanye deibuka unamabe.

³ Tonda, nun Sion mutuku noutam unyap nang nirya arye, Allah, el pia teleb si aulula ati, nunce elti, “Se, anda pia telebe,” nyabuka, mot nyan deice arye nyanamabe. Allah ati, “Telebe,” nyanamap talak ara, lelim nyalamle ning, el si ara tarian ap, kecapi ap, rebana ap deice arye bobuka, amot pia nyanamabe. Diba, Sion mutuku unyap nang nirya ara, Allah ati, mot nyanamabe.

⁴ Deiyok ara, Yahweh arye wipdeiamsuk nang, el ‘Naʼ tenen nang ara, kanye deibuka unyabe. Tonda, yata nang do nirya, sikce sik bidamang kanye erelana kumce, sik talima namin asa ukirye, ‘Allah aryuk melipsutue,’ tenenyak nang ati, Allah arye teleb kilisululce, nun ikin usulul noutam ara, lobuka lyelosulule.

⁵ Allah arye akunum wipdeiamsuk nang ara, Allah arye nyasilye yupu moubuka talibibirye, diksukumuk unyaba ati, kanye deibuka unamabe. Deiyok ara, yuk yala nang eipsikirye, ‘E, sik anang ara, telebuk wininyake,’ tenen, nun el si erebuka kinamsiake. Allah arye nyasilye yupu moubuka talibikirye, diksukumuk wininyak nang ara, ‘Sik amsuna deice manamak talak babye, kanye deibikirye, weik yupu deice arye, ‘Telebe nyanamak’ tenen, Allah ati moronune.

⁶ Ato nang nirya arye, sik ni Allah ati, “Se, anda pia telebe,” nyabuka, ‘Weik yupu deice arye nyanamak’ tenen, Allah ati moronune. Tonda, sik nirya arye, sik taruk deice arye, pia yu weik parang bobikirye, yanamake.

⁷ Deiyok ara ani. Ara, ‘Sik yuk-yuk mutuku unyak nang, yuk-yuk nang nirya arye, malye weik winilamik ning ati, kwang daknamap’ tenen, yu parang boyanamake. Anang arye, yu parang boyanamaka deiyok ton ani. Ara, yuk mutuku nang, yuk-yuk nang nirya arye, akunum malye weik winilamik ning ati, ayu parang arye, anang obuka, wenepnamake.

⁸ Tonda, sik yuk-yuk mutuku unyak nang talibuka, ninye deiyok kibuka, Raja-Raja unyak nang ati, tomobikirye, rantai tapu arye koupnamake. Tonda, sik Raja-Raja nang amu tam ubuka, sik pil donyak ninye deiyok nang babye, kat ning el si ara besi arye, sik yan ap, taruk ap tapu koupnamake.

⁹ Winipnamaka deiyok ara, ani. Ara, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu nyasilye touk, sik yuk yala nang arye, malye winilamik ning moubuka dipdekirye, awinilamik touk, Allah el yupu deice arye, yupu lipsisikuka bokeibikirye, wenepnamake. Allah el ‘Naʼ tenen nang arye, yuk mutuku nang ati, wenepnamaka ara, sik si erebuka kina ap, deiyok koubuka si erena ati, apil donamake. Ara talye wininyak nang ati kum bukni, Allah arye nyasilye yupu moubuka talibikirye, batakna kumce, ayupu uk dobolbanyak nang arye, sik malye wininyak nang ati, yupu lipsisikuka bokeibikirye, wenepnamake. Nun Israel yala nang nirya arye, nun ni Allah, el si Yahweh ati, “Se, anda pia teleb ulyame,” nyabuka, el si ukerenamabe!