Mazmur 148 - Eipomek

Im deice ap, tukwak ap nirya arye, Allah Yahweh ati, “Telebe,” nyabuka, el siuk erenyak yupu

¹ Nun nirya arye, Allah Yahweh ati, “Anda pia telebuk ulyame,” nyabuka, el si erenamabe. Sik im deice ululum ning ap, malaikat ap, sik nirya arye, Allah Yahweh el tibuk, “Se, Allah anda, pia telebuk ulyame,” nyanamlulume. Aning atonun, sik im alip tam erebuka ulamlum ning nirya arye, Allah Yahweh ati, “Elda pia teleb winilulnye,” nyabuka, el tibuk si erenamlume.

² Se, sik im deice talye daunyak malaikat ap, tonda im deice yin talibuka unyak malaikat nirya ap, tonda im noutamak Allah elti, melibuka unyak nang nirya ap arye, Allah ati, “Anda pia telebuk ulyame,” nyabuka, el siuk erepmunce, elti, si erebuka donamlulume.

³ Im deice ulul ning ara, keting ap, wala ap arye, Allah ati, “Anda pia telebuk ulyame,” nyabuka, el si erenamlume. Tonda kurya im deice ikamliba, dirina weik ulamle kurya ap, anggun nirya arye, kanye deibuka, Allah el siuk erenamlume.

⁴ Se, im deice itam erepdeiamuk ning nirya arye, Allah el siuk erebuka, kibuka donamlulume. Tonda im deice alip tam deibuk mek ap, dua ap nirya arye, eluk si erenamlume.

⁵ Yata un ning do nirya, Allah arye kwepdebuk ning aning-aning nirya arye, “Allah Yahweh anda pia telebuk ulyame,” nyabuka, el si pia erenamlume. El si erenamluma deiyok ara, ani. Allah Yahweh arye, el yupu nyabuka deice arye, aning nirya kwepdeiamuk. Ati, Allah el siuk erenamlume.

⁶ Aulye ning ayala-yala nirya ara, Allah aryuk, ‘Asukum ara, aning unamakak ani. Sik nong ap, urasin ap ara, winibuka unamake’ tenen, kintinibuka deiamuk asukumuk unyake. Allah arye, ‘Apia wininamake,’ nyapdeiamuk touk, atalak arye dipdongobuka, pia ati anyuk wininamake. Allah arye nyalye yupu ara, yuk nang arye yupu kum sektinge, elce nyalye touk, apia wininamle.

⁷ Se, Allah Yahweh, elce kwepdeibukura, tukwak mutuku noutamak unyak ning ayala-yala nirya arye, elcuk si erebuka donamlulume. Tonda, “Allah anda pia telebuk ulyame,” nyabuka, el si erenamlume. Tonda, weik laut mekwen noutamak ara, ulamle kwatima, el si ara Naga kwatima ap, yuk weik mekwen pum bal, ayala-yala nirya ap arye, Allah el si atibuk pia erenamlume.

⁸ Se, bebeya lakliba, uku lalamle ning ap, weik mok purwu saklamle ning ap, dua ap, mikip weik arye balul kumanya ap, mok ap, dou ulamle talak ap, aning-aning nirya ara, Allah arye, “Winipnamlulume,” nyabuka nyalilye touk, Allah Yahweh el yupu uk kekebuka unyake.

⁹ Tonda, weik mutuku-mutuku nirya ap, mutuku dup nirya ap, yo duk moulul yo, ayala-yala nirya ap, aras yo ap, talye yo ayala-yala nirya ap arye, Allah el siuk erenamlume.

¹⁰ Aning atonun, kam ning ayala-yala nirya, Allah arye kwepdeiamlumba, talye bai tam noutamak, kam unyak ning ayala-yala nirya ap, ninye arye weinyak ning ayala-yala nirya ap, tonda pol deice arye lakuka balalum maka, ayala-yala nirya ap, tonda bai tam kam ukirye mun deice balul ning ayala-yala nirya ap, anggun nirya arye, Allah el siuk erenamlulume.

¹¹ Se, Allah elce kwepdeiamukba, tukwak mutuku noutamak, ninye deiyok talibuka ululum Raja, weik nang nirya ap, yuk weik deiyok kibuka ululum nang nirya ap, tukwak mutuku noutamak talibuka ulamlum pemerintah nang nirya ap arye, Allah Yahweh el tibuk, si erebuka, el siuk erenamlulume.

¹² Se, anggun kam nang babye, kam kilapu babye, mitik mapu babye, wisi nang babye nirya arye, Allah Yahweh el tibuk, “Anda, pia telebe,” nyabuka, el siuk erenamlume.

¹³ Telebe, sik nirya arye, Allah Yahweh el siuk erebikirye, “Allah anda pia telebuk ulyame,” nyabuka, elti, si erenamake. El si erenamaka deiyok ara, ani. Ara, Allah Weik Erenanye uliba, tukwak mutuku unyak ninye nirya arye, ‘Se, el si ara, weik mambul si ulule. Elda pia mikip weiknye,’ tenenyake. Im deice ap, tukwak mutuku, im sirya, mutuku sirya ap ara, mitik teleb ulul bukni, Allah el pia teleb ubuka ulye ning ap, dirina weik ulya ap ara, aning nirya deice tamuk, erebuka ulule.

¹⁴ Allah elcuk im sirya, mutuku sirya unyak ninye ati, tenelule. Tonda, elce awamuk ninye, sik Israel yala ninye ati, mikip deiyok ning arelamukba, sikda mikip weik ninye ulamik. Ara, Allah arye, “Aning ara telebe, aning ara malye,” nyabuka laka lelamuk touk, ayupu moubuka talinyakce, diksukum unyak ninye ati, kanye delilirye, aninye dobuka, ‘Sikda ‘Naʼ tenen, ninye’ tenelirye, el damuk delilule. Ati, aning-aning nirya arye, Allah el siuk erenamake. Nun nirya arye, Allah Yahweh el siuk erenamabe. Sisinanye Raja Daud arye, mutuku deice arye nyabuk.