Mazmur 147 - Eipomek

“Allah arye, aning-aning nirya talibuka, deice tam erebuka, pia mikip weiknye ulule,” nyabuk yupu

¹ Nun ni Allah Yahweh ati, “Yahweh, anda pia telebuk ulyame,” nyabkiyabe. Nun si erenyap Allah ati, “Anda pia telebe,” nyabuka, el si erebuka kina ati, mot nyanyaba ara, telebe! Allah ati, “Anda pia telebe,” nyabibyeura, nun kanye deibuka, telebuk unyabe. Wininyaba ara, pia teleb un ning ulule. Wininyap ning ara, Allah arye kanye delilule.

² Yerusalem mutuku weik asik dolamik ning ara, yuk mutuku nang arye uluplobik bukni, wini talak ara, Allah Yahweh arye, amutuku nirya lipsisikuka doplirye, teleb kanye bobuka donmale. Pera mutuku yu nang arye, Israel nang omikbuk, tuba kam ulamik nang ara, tapu koubuka, sik mutuku tamubuka bobinamik bukni, Allah arye Israel nang melilirye, tamubuka Israel yala nang sik mutuku boyanganmale.

³ Pia ikin weik ulamikba, sik kanye talima nirya daksakukba, imun kanye bobuka, ulamik nang nirya ara, Allah arye anang ati, wini talak akunum kwetebuka teleb kilinmale. Anang sik suse dila nirya ara, kweteplirye, tamubuka telebuk kililule.

⁴ Allah ara, mikip weiknye ulula ati, im deice ulye kurya nirya ara, elcuk nuklirye, akurya nirya tiklamle. Tonda, Allah arye akurya nirya akunum deiplyeura, sik yuk-yuk bukni, sik si nirya dolule.

⁵ Diba, nun ni Allah ara, aning-aning nirya deice tam ulirye, aning-aning nirya talilula ati, el mikip weik ulya ara, kum nukuka nyaptibye. Aning atonun, elce tenelul ning ap, aning-aning nirya nong noutam ning ati, weik kel bikamuknye ap ara, nun kum bikmantoe.

⁶ Yu unyak nang arye, yuk nang ati, yaninyak nang nirya ara, Allah Yahweh arye, kanye tamubuka anang ebuka, teleb kililule. Bukni, sik pia malye winin ninguk talibuka, malye-malye wininyak nang ati ara, Allah arye, anang weneplirye, pia amu tamuk kililule.

⁷ Ati ara, nun ni Allah Yahweh ati, “Anda pia telebuk ulyame,” nyabuka, mot nyabibyak arye, el si erenamabe. Tonda, mot nyana ati, lelim nyan ning, el si ara kecapi, dobuka kanye delin mot nyabibyak arye, nun ni Allah ati, “Telebe,” nyabuka, el si erenamabe.

⁸ Allah elcuk, im deice tam ulye ning nirya ara, ‘Tukwak nang kum eipnamak’ tenen, dua kitibuka deiplyeba, aning nirya arye, lelilul deice arye, kum elinyabe. Bukni, adua kan-kan arye, ‘Tukwak mutuku deice nirya mok cenamle’ tenen, mok ton kintinibuka delilule. Allah arye areplyeba, mok ceplyeura, Allah el mikip deice arye kintinip deibuk mutuku kon bulye deice nirya ara, maning ap, mutmuta ap, palule.

⁹ Tonda, yatato ning do nirya ara, bai tam ulamle kam ning nirya, sik din pataplyeura, Allah elcuk, sik din arelule. Aning atonun, maka yala nirya ara, sik mapu deibiceba, din pataplyeura, Allah aryuk, sik din arelule.

¹⁰ Kuda basam ara, mikip weik kiptu babye, Allah arye akuda, el mikip teneplirye, kanye kum delilule. Tonda, ninye tukwak nang babye, sik yan mikip uptuba, minopce bikbik abuka bitinga babye, aning ati, Allah arye aning teneplirye, kanye kum delilule.

¹¹ Aning nirya ati, kanye kum delilule bukni, Allah Yahweh, elce kanye delilul ning ara ani. Ara, yata nang do nirya ara, Allah arye, “Aning wininamlume, aning ara, pia kum wininamlulume,” nyapdeiamsuk yupu moubuka kekebikirye, el tonok ilil uplyeba, diksukumuk wininyak nang ati, Allah arye, kanye deililule. Anang ara, Allah arye, “Weik bico tenesinirye, pia teleb kilinamsine,” nyabuka, nyalin yupu deice arye nyadeipyamsuk yupu nirya, moubuka kekebikirye, Allah elcuk lyelonamsile,’ tenenyak nang ati, Allah arye kanye delilule. Yuk nang ap, yuk ning ap ati, kume.

¹² Ati, anggun Yerusalem mutuku weik asik noutam ululum nang nirya arye, Allah ati, “Se, nun ni Yahweh, anda pia telebe,” nyabuka, el siuk erenamlume! Diba, anggun Sion mutuku noutam ululum nang nirya ara, Allah ati, “Anda pia telebuk ulyame,” nyabuka, el siuk erenamlume.

¹³ Allah ati, ‘Anda telebe,’ nyanamluma deiyok ara ani. Ara, ‘Yuk mutuku nang arye, ‘Naʼ tenen nang dam yanuka obikcak’ tenen, anggun weik asik domlum ning nirya ara, Allah elcuk mikip kililule. Winipmanto ara, anggun weik asik wekelban bisik bublan dam ara, cang besi beton ikilamak atonun kibuka, anggun mutuku nirya kalikisulule. Tonda, anggun mutuku noutam nirya ara, Allah elcuk anggunce delimunye mapu nirya babye, mikip areplirye, telebuk kililule.

¹⁴ Tonda, anggun ululum mutuku noutam nirya ara, Allah arye melibuka kalikisilyeba, anggun mal olan nang arye, kum olyangasinyake. Israel mutuku noutam nirya ara, olana kum aryuk, talye kanye bobuka ululume. Tonda, anggun din ning patana ati, gandum duk weik ap, yuk din ning yala-yala nirya ap, weika arye arisulule.

¹⁵ Allah arye, tukwak mutuku ap, tukwak mutuku unyak nang ap ara, ‘Na yupu biknamake’ elce teneplye ning ap, el yupu nyaplye ning ap ara, tukwak nang arye kekenyake. Allah elce nyaplye yupu nirya, tukwak mutuku sirya, im sirya, Minopce balule. Tukwak mutuku unyak nang nirya arye, kekenamake.

¹⁶ Winipmanto ning ara, Allah arye, ‘Es mok, el si ara salju, dopkwetepliba sakuka, tukwak mutuku nirya siknilongonamle,’ teneplye talak aryuk, salju dopkwetelyeba, tukwak mutuku nirya siknilongolule. Aning atonun, beren tam talak saklamle ning, ‘Pia moul mok, el si ara, embun beku, aning tukwak mutuku deice saknamle,’ teneplye ning ara, aning adiparyuk tukwak mutuku deice sakalule. Winipmanto ara, uku dinmalya ani, tangaplyeba, ninye arye uku sice lubuka, bai tam dopkwetebice ning ara, tuku deice lelilongolamak touk, Allah arye embun beku dopkweplyeba, tuku deice lelilongolule.

¹⁷ Aning atonun, Allah im deice arye, pia moul mek kintiniplirye, keil urasin atonun kintinibuk ning, el si ara hujan es, tukwak mutuku deice dolkwetelule. Allah arye, pia moul kum dopkweteplyeura, yatanye birye, talye parapkabuka tuba tiktu do? Kume, aning ara, nunce kum winipmanto ning winilule.

¹⁸ Bukni, Allah arye, ‘Pia ikip mok, wininga urasin atonun, el si es batu, dopkwetepman ning ara, tamubuka buppu kiplyeba, talye mek kilanamle’ tenen, Allah el kanye aryuk, yupu nyaplyeura, aning nirya adiparyuk buppu uplyeba, kum danin balule. Allah el kanye aryuk, kum anya doplyeba, kum peiyang alule. Aning atonun, elcuk, ‘Winipnamne,’ teneplye ning ara, weik mek nirya balamle.

¹⁹ Tonda, Allah aryuk, el yupu nirya ara, nun apu koproba Yakub biti, “Aning wininamlume. Aning ara, pia kum wininamlume,” nyalilamuke. Aning atonun, Allah aryuk, nun Israel yala nang nirya ati, “Aning wininamlume, aning ara, pia kum wininamlume,” nyabuka, el mem yupu nyapdeiamsukba, kekelamupu.

²⁰ Allah arye, nun Israel nang ati, ‘Na tenen nang, na mapu unamak,’ tenen, wipdeiamsukce, teleb kibuka meliamsuk touk, yuk yala nang nirya ati, aning atonun pia kum winilamuke. Sik yuk-yuk daunyak yala nang nirya ara, Allah arye, “Aning wininamlume. Aning ara, pia kum wininamlume,” nyabuka, areamsuk mem yupu ara, sik ton kum kekelamik ati, bita kum bikamike. Ati nun ni Allah Yahweh biti, “Se, Yahweh, anda pia telebuk ulyame,” nyabuka, el si pia erenamabe.