Mazmur 145 - Eipomek

Daud arye, Allah el si erena ati, mot deice arye nyabuk yupu

¹ Na ni Allah, anda na ninye deiyoknye Sisinanye, Raja unilyame. Ati, ‘Narye an si erena ati, mot senmanirye, pia tuba-tuba kibuka, si erenamkine. Pia kum bataknamne,’ tenenune.

² Asum-asum nirya, narye Allah antibuk, “Anda pia telebuk ulyame,” nyanamkine. Winipnirye pia ati, “Anda pia mambulnye ulyame,” nyabuka, ‘An tibuk kipkinirye, si erenamkine,’ tenenune.

³ Ara, talye ati kume, na ni Allah Yahweh, anda Weik Erenanye uminya ati, antibuk, “Telebe,” nyabuka, kibuka si erenamne. Allah an mikip weik arye tenebuka, pil dolyam ning ap, weik mambul winilyam ning ap ara, anirya moubuka kel kibuka, sirya kum daktibye. An winiminye ning nirya ati, ninye nirya arye, kanye deibuka, an siuk erenamkiyake.

⁴ Aning ati ara, Allah ance kintinibuka deiplum ning nirya ap, weik mambul pil domlum ning ap, ninye arye eibuka ngalukikirye, antibuk kibuka, si erenamkiyake. Ati, ninye arye sik mapu deibikiba, dadeipdanin banamak ninye nirya ati, wisi nang arye, sik mapu nirya kel bikna ati, an siuk pia erenamkiyake. Erepkikirye, “Allah ara, mikip weik deice arye, ninye kum winipmanto mambul pil dolule,” nyabuka, nuknin bakiba, aminyan talak daunamak ninye nirya babye, kekenamake. Aning ara, pia laka nyabuka, nyapdanin banamake.

⁵ Na kanye ara, wisi nang arye, sik delinamak mapu ati, Allah an weik mambul winilyama deice arye, teleb ubuka pil dolalum ning ap, pia teleb winilamlum ning ap ati, kibuka an si erebikirye, laka nyanamake. Narye, ‘Allah anda mambul pil ap, ninye arye kum winipmanto ning ap, pil dolulnye ulule’ tenen, pia moubuka tenenauk unamne.

⁶ Allah ance, weik mambul pil, ninye arye kum winipmanto pil, mikip weik deice arye, dobuka winilyam ning nirya ara, ninye kel bikikirye, nukuka laka nyapnin banamake. Sikce yuk ninye ati, nyabikibuk kekebikirye, ayupu bobuka, yuk nang dam nyapdanin bakirye, an siuk, pia weik arye erenamkiyake.

⁷ Allah ance aning-aning nirya, pia teleb ubuka pil dolyam ning ap, ninye ati pia teleb ubuka melisilyam ning ap, malye winina pia kum diparyuk, diksukum ubuka winilyam ning ap ati, nukuka laka nyapnin banamake. Winicopura, ninye nirya arye, “Allah ara, weik mambul pil dolirye, diksukumuk ululnye bira, eluk ulule,” nyabuka, an si erena ati, kanye deibuka, mot senamake.

⁸ Allah Yahweh, anda tukwak ninye nirya ati, weik arye kanye talima arekiliba, bico tenenanye ulyame. Ati, nun malye wininyap ning ati ara, adiparyuk wenebuka oplopsutum bukni, an adiparyuk, minopce yu tenebuka, kum osilyame. ‘Malye wininyak ninye arye, sik malye winin ning batakikirye, na damuk tamubuka yatinge,’ tenesilyame. Ance nun tukwak ninye nirya ati, bico tenesimince, pia tuba-tuba melisiminye ning ara, pia kum batakasilyame. Ance tenelamsulum touk, asum-asum nirya, pia melisilyame.

⁹ Allah Yahweh, ance ninye nirya ati, kanye talima arekulule. Tonda, Allah arye kwepdeiamuk ning nirya ati, ‘Na tenen ninguk ulule’ tenen, an talima namin ubuka bico tenesimince, pia moubuka kalikisilyame.

¹⁰ Diba, na ni Allah Yahweh, ance kwepdeialum ning nirya arye, an siuk erenamkiyake. Tonda, anti dib tenebikce, batakana pia kumce, an yupu uk, talibuka dobolbanyak ninye nirya arye, antibuk, ‘Telebe,’ nyabuka, an siuk erenamkiyake.

¹¹ Sik aninye nirya arye yuk ninye ati, “Nun ni Allah, el mikip deice arye, aning-aning nirya talibuka, Weik Erenanye ulya ara, pia telebuk ulule,” nyanamake. Tonda, “An tibuk, nun ninye deiyoknye, Sisinanye Raja usulule,” nyabuka, teleb yupu nyakirye, an siuk erenamkiyake. Wininyakce, “Allah anda, mikip weik deice arye, ninye kum winipmanto mambul pil dolyamnye,” nyabuka, asum-asum nirya nukunmakirye, an siuk erenamkiyake.

¹² Ance ninye kum winipmanto pil, minop talak arye domlum ning atibuk, nukunmakiba, mutuku-mutuku nirya unyak ninye nirya arye, ‘Se, Allah elda, mikip weiknye ulule’ tenen, kel kipnamake. Ara, ninye kum winipmanto ning, winilyam ning nirya, sik eibikirye, kel kipnamake. “Nun ni Allah el mikip deice arye aning-aning nirya talibuka, Weik Erenanye ulula anya arye, pia telebuk ulule,” nyabuka laka nyanamake.

¹³ Allah ance aning-aning nirya talibuka, Weik Erenanye ulyamnye, wini talak arye diprongobuka, doryanamle talak nirya ara, pia ati aunamle. Aning nirya kum kum danamle. Pia ati aupnamle. Allah ance aning-aning nirya talibuka unalam ning ara, keting tamun pia weik arye unamle. Ninye arye mapu deibikirye, dadeipdanin, banamak ninye babye, ancuk aninye ap, aunamle ning nirya ap, talimince, Weik Deiyoknye unalame. Allah Yahweh ance tenelyam ning ara, asum-asum nirya, pil teleb ubuka, dopnin banamlame. Allah Yahweh, ance “Winipnamsine,” nyabuka nyalina yupu deice arye nyapdeiamsulum yupu ara, pia sirya dakanamle. Tonok ning babye, kum batakalyame. Ara, Allah ance, ‘Wininamne,’ tenelyam ning nirya ara, dipkoprob an tenyamsulum touk, winilyame. Tukwak ninye nirya ap, yuk kam ulul ning nirya ap, Allah ance kwepdeialum ning ayala-yala nirya ati, Allah ance pil dosilyam ning nirya ara, bico tenesimince, pia teleb ubuka melisilyame.

¹⁴ Weik ikin ning ninye, sik nong deice yaliba, imun kanye bobuka, unyak ninye nirya ati ara, Allah Yahweh ance eipsimince, adiparyuk melisilyame. Tonda, Allah ancuk ninye talimauk diliba, imun kanye bobuka unyak ninye ara, an taruk arye, talibuka tikilisilyame.

¹⁵ Aning ati ara, ninye nirya ap, kam ulul ning nirya ap arye, Allah anti, ‘Din ning arenamsilarya. Tonda, nun patasilye ning ati, dipkoprob pia melinamsil’ tenen, kintinibuka dinmaki bukni, din ning patan talak, akunum dam uplyopura, sik din ning, ayala-yala nirya, ance arelyame. Tonda, sik ikin kanye bopmace ninye ati, teleb kibuka melilyame.

¹⁶ Allah ancuk ninye ap, yuk kam ulul ning, ayala-ayala nirya ap, sik patan ning nirya ara, kintinibuka arisilyame. An taruk aniryuk, tukwak ninye nirya ap, yuk kam ulul ning aning-aning nirya ap, nun patan ning nirya ara, ancuk arisilyame.

¹⁷ Allah Yahweh, ance tenebuka, winiminye ning nirya ara, pia diksukumuk winilyame. Malye winin ning tonok babye, pia kum winilyame. Ninye nirya sik wininyak atonun, moubuka tenemince, diksukum yupu uk, nyabuka lipsisikuka bokolisilyame. Tonda, tukwak ninye nirya ap, kam ulul ning nirya ap, Allah ance kwepdeialum ning nirya ati, Allah ance pil dosilyame. Winisiminye ning nirya ara, ance pia bico tenesiminya deice arye, teleb ubuka pil domince, melisilyame.

¹⁸ Allah Yahweh ati, “Se na nio, nunti melinamsilame,” nyabuka moronyak ninye, sik dam ara, Allah el tuba ulule. Ara, sik kanye noutamak arye, kanye bokoltona ap, malye tenena ap, yupu talye nyana kum diparyuk, dipkoprob teleb wininyaka deice arye, Allah ati moronamak ninye ara, Allah sik dam ulirye, sik moronyak yupu kekebuka, pia melinamle.

¹⁹ Allah anti ilil tenebuka, nimalye arye kanye dakdongobuka wininyak ninye arye, “Se, nun ni melipsilyame,” nyabuka, morokinyak ninye ara, sikti, melipmince, teleb kililyame. Aninye arye, “Se, yatanye birye melipsutue do? Kume, Allah elcuk melipsutue,” nyabuka morokinyak ninye ara, an kekepmince, aninye nirya ati, melibuka lyelyame.

²⁰ Allah ati dib tenebikirye, elti, kanye deibuka wininyak ninye nirya ati ara, Allah Yahweh ance melipminba, an amu tamuk, kanye namin asa aryuk wininamake. Bukni, malye winin ninguk, talibuka wininyak ninye nirya ara, wenebuka oplopmince, sirya daknamlyame.

²¹ Ati, nara asum-asum nirya Allah Yahweh, antibuk si erenamkine. Aning atonun, Allah ance kwepdeiyalumba, kam unyak ning ayala-yala nirya arye, Allah Yahweh an si atibuk, asum-asum nirya, an siuk pia erenamkiyake. An si erepnamak ning ara, pia kum bataknamake. Sisinanye Raja Daud, el mot sena deice arye nyalamuk.