Mazmur 143 - Eipomek

‘Na mal olan nang arye, opnicak’ tenen, Allah ati, “Na melibuka lyepnilyame,” nyabuka moropse, sekuk yupu

¹ Raja Daud birye, aMazmur yupu deice, amot sekuk. Amot sekuka, Daud birye nyabuk yupu ara, ani. Se, na ni Allah Yahweh, ‘Narye anti moropkinye yupu ara, moubuka kekepnunilamʼ tenen, moropkine! Ance kum batakanimince, pia melinilyama deice, ‘Narye anti morokinye yupu nirya ara, ancuk kekepnimince, melipnamnilam’ tenen, moropkine na nio! Tonda, anda pia diksukumuk winilyama deice arye, na moropkinye ning kekepmince, tamubuka nyapnamnilame na nio!

² Na nio, tukwak mutuku noutam kam tuba unyap nang nirya ara, pia diksukumuk kum unyaba ati, yatanye birye, ‘Nara telebnye unune,’ tenepturye, an dam talye mangkau asa, yanuka tiktu do? Kume, aning ara, kum winipmanto. Nara, an amu tam unirye, an piluk donuna ati, ‘Ance na malye wininun ning ati, namin kipnutumopura, aminyan talak ara, yupu lipsisikuka bokeipnimince, kum wenepnamnilam’ tenen, moropkine na nio.

³ Na nio, kekepnilyame! Nati, ‘Anye bira, nun lik,’ teneninyak nang ara, ikin weik ning, na deice delininyake. Wininyaka deice arye, nara imun kanye bobuka, ikin weik unune. Imun kanye bobuka ununa ati, winipmanto ara, tuku deice sakukabikirye, pia kuna sukum ulamak touk unune. Ara, minop talak akunum diamikba, akunum tuku lukamik nang atonun ununa ati, nyapne.

⁴ Ati ara, na kanye talima noutam nirya ara, pia namin unirye, winipmanto pia kum unune. Tonda, na kanye tenen ning nirya ara, ilil weik uniliba, ikin kanye pia weik tonun bobuka unune.

⁵ Bukni, ikin unilye talak ara, minop talak winilamlum ning ati, tuba teninauk unune. Ara, ance akunum mambul pil, pia weik tonun dolamlum ning ara, tuba bikinune. Tonda, an taruk mikip deice arye, pil dolamlum ning nirya ara, tuba bikinune.

⁶ Na ni Allah, ‘Ancuk melinamnilam’ tenen, na taruk erepnirye, anti morokunune. Tonda, na kanye talima nirya ara, antibuk pia patanulule. Winipmanto ara, mok ap, mek ap, pia kum ulul mutuku noutam unyak nang, mek weik tonun patalamliba, ikin weik ulamak touk, narye anti, weik tonun patanulule.

⁷ Na ni Yahweh, na talima pia mitang uniliba, kum winipmanto ununa ati, narye morokunun ning ati, ance minop kekepnimince, melipnamnilame na nio! Na nio, ikin unilye talak, narye anti moropkinyopura, ‘Ance luba kum kinamnilam’ tenen, moropkine na nio. Ance kum kekepnimince, luba kibuka batakniminyopura, sik akunum diamik nang unyak touk, unamne na nio!

⁸ Ati na nio, na patapnil ning ara, ani. Ara, ance nunti, “Weik tonun bico tenepsinirye, pia teleb kilinamsine,” nyapdeiamsulum ning ara, dipkoprob aning nirya, tuba wininamsilame. Ati ara, narye beren tam talak nirya ara, aninguk tuba-tuba tenenune. Ara talye ati kume. Deiyok ara, ani. Ara, narye anti, ‘Allah aryuk, pia melinamnil’ tenen, pia diba tenekunune. Na talima nirya ap, na kanye ap, nong ap, ‘Na ni Allah, ancuk melinamnilam’ tenen, an deiceuk delikunune. Ati ara, ance nati, “Teleb bisik asukumuk binalame. Teleb winin ning ara, ani,” nyabuka, peterepniminba, dipkoprob teleb bisik biktinyopura, abisikuk binamne na nio!

⁹ Na ni Yahweh, ‘Na ona ati, yu nang arye, opnicak’ tenen, ‘Ancuk sik dam arye lyepnamnilam’ tenen, morokunune na nio! Ancuk nati, ‘Kalikuka melipnimince, teleb kibuka melipnamnilam’ tenen, an dam akunum bikbik abuka yanamse.

¹⁰ Tonda, Allah ance, ‘Anye birye winipnamle ning ara, ani-ani,’ akunum tenelamnulum ning ara, ‘Ance peterepnutumba, biktinirye, aninguk talibuka wininamtinye’ tenen, moropkine na nio. Aning patapnila ara, talye ati kume. Deiyok ara, anda na ni Allah ulyame. An tibuk si erekiniba, ance na talinilyame. Ati, an pia teleb ulyam Pia Teleb, Lek Dip Kanye arye, elcuk, “Wininalyame, wininalyame,” nyabuka, peterepnuturye, menekuka balibuk, nara el aminyan tam yanuka, abisikuk banamne na nio. Elce peterepnilyopura, ikin ning ara, na dam kum yanamle. Teleb bisikuk banamne.

¹¹ Na ni Allah, ance melibuka kalikniminyopura, kam tuba unamne. Winipnamne talak ara, yuk nang nirya arye, ‘An si Yahweh ati, bikikirye, an siuk pia erenamkiak’ tenen, moropkine na nio! Anda pia diksukumuk winiminye biti, ance, “Pia kalekuka melinamsine,” nyabuka, nyalin yupu deice arye nyapdeiamsulum touk, na ikin unulul noutam arye, lyepdopnamnilame na nio!

¹² Tonda, ance nunti, “Weik tonun bico tenesinirye, pia teleb kilinamsine,” nyabuka, nyalin yupu deice nyapdeiamsulum touk, adeice arye, nun mal olan nang ara, obuka sirya dakanamlame. Ara, nati, ‘Anye bira nun lik,’ teneninyak nang nirya ara, ‘Ance anang obuka, malye kipnalam’ tenen, moropkine na nio! Ara, talye ati kum bukni, deiyok ara ani. Nara, an amu tam unirye, an piluk donuna ati, ance lyepdopnamnilame na nio!