Mazmur 142 - Eipomek

‘Na mal olan nang arye opnikcak’ tenen, “Na ni Allah melipnilyame,” nyabuka, morona ati, nyabuk yupu

¹ Raja Daud birye, ‘Yu nang arye opnicak’ tenen, weik keil deiya pum tam duknubuk talak arye, nyabuk yupu. Ayupu ara, sik ‘Israel nang peterepnamne’ tenen, sekuk Mazmur yupu mot. Tonda, Allah morona yupu deice arye sekuk. Daud birye nyabuk yupu ara, ani.

² Na weik yupu deice arye, “Na ni Allah Yahweh ati, “Melipnilyame,” nyabuka moronune. Moronirye, na nyanun yupu deice arye, “Se, Yahweh, ance melibuka lyepnilyame!” nyabuka moronune.

³ Na ikin unilyeba, narye Allah dam arye, “Se,” nyabuka, engepnirye, weika arye malye nyanune. Diba, na ikin kanye bobuka, unun ning nirya ara, Allah el dam arye, laka nyabuka, moronune.

⁴ Na ni Allah, na kanye talima pia kum upnilyeba, pia mitang unulul talak ara, na kele. Ancuk, na ikin unilyeba, unun talak ap, aminyan winipnamsil ning nirya ara, an akunum bikamlume. Bukni, nati ara, ‘Anye bira, nun lik ati, tomobuka opnuyab,’ teneninyak nang arye, na banun bisik noutam ara, ninye on ning, akunum kintinibikce deibik.

⁵ ‘Yatanye birye yanuka melipnamnil do?’ tenen, na diksukumuk wininirye, anti pia dinauk unune. Aning nirya ara, patapniliba, pia dinauk unun bukni, na melipmantonye ton, na dam pia kum ulule. ‘Yu nang arye opnikca’ tenen, na duknupmanto babye, pia kum ulule. Tonda, na tam nang babye, yuk mutuku daunyak nang babye, nati, bico tenepnikirye, kum melinamsile.

⁶ Ati, na ni Yahweh anti, ‘Se, ancuk melibuka lyepnilyame!” nyabuka morokunune. Narye Allah anti, ‘Yu nang arye opnikcak’ tenen, na duknupmantoak ara, an dam uka. “Na melipnamnilam,” nyabuka, morokinirye, nyapnukine, na nio! Na kam tuba unun talak nirya ara, yuk nang arye kum bukni, Allah ancuk pia bico tenepnimince, melinilyame. Allah ancuk nati melinilyame.

⁷ Se, na ni Allah, na pia ikin unilyeba, pia amu tam atonun akunum ununa ati, narye anti moropkinye yupu ara, ‘Moubuka kekepnutum’ tenen, moropkine na nio! Nati, yanipnikirye, ikin weik areninyak nang arye, ‘Kanye ikin ning ton tabakuka arepnikcak’ tenen, na ni Allah, ancuk na lobuka melipnilyame! Ayu nang ara, mikip weik nang unyak bukni, nara mitangnye unune.

⁸ Se na ni Allah, na wenena aik pum noutam dongopnik talak arye, ‘Ancuk nati, melibuka lopdopnimince, telebakuk deipnamnilam’ tenen, moropkine. Winipniminyeura, narye anti, ‘Anda pia teleb ulyame,” nyabuka, an siuk erenamkine. Allah arye, “Aning ara, wininamlume, aning ara, pia kum wininamlume,” nyapdeiamsuk yupu talibuka, diksukumuk wininyak nang ara, na dam dana-dana tam nirya, neika unamake. Aning deiyok ara, ani. Ara, ance pia teleb kipdeipnimince, teleb ning weika arye arenamnilame.