Mazmur 141 - Eipomek

Lukunyan talak ara, Daud birye yupu ton nyabuka, Allah morobuk ati, sekik yupu

¹ Raja Daud birye, aMazmur yupu mot sekuk. Sekukce, Daud birye nyabuk yupu ara, ani. Se na ni Allah Yahweh, anti moropmakina ara, ‘Minop kekepnamnilam’ tenen, moropkine. Narye anti, ‘Melipnilyame!’ nyabuka, morokunun talak nirya ara, ‘Ance moubuka kekepnimince, melipnamnilam’ tenen, moropkine na nio.

² Winipmanto ara, sik imam nang arye, nintong teleb nyan ning, uku dongobikiba, atulum ara, an dam yaliba kekelyam touk, ‘Narye moropmakin yupu babye, an dam yatuba, kekeptum’ tenen, moropkine na nio. Tonda, winipmanto ara, nun Israel yala imam nang arye, ‘Nun malye winin ning, namin kipsilirye, tamubuka teleb kipdeipnamil’ tenen, lukunyan talak nirya, kam ning obikirye, an arena ati, uku dongolamak touk, narye na taruk erepnirye, anti moropkine na nio.

³ Se na ni Yahweh, ‘Nara, mangkau arye, malye winipnyak’ tenen, ance moubuka kalikniminba, ‘Na si deice arye, malye yupu tonok babye, talye karin arye kum nyanamne’ tenen, moropkine. Diba na ni Allah, ‘Na si deice arye, malye yupu nyapnyak’ tenen, ance kalekuka melipnamnilame na nio.

⁴ Atonun, an melipniminya deice arye, na kanye talima noutam babye, ‘Malye tenen ning tonok babye, pia kum teninamne’ tenen, “Melipnilyame!” nyabuka, moropkine na nio. Tonda, ‘Na ap, malye winin ninguk talibuka wininyak nang ap, neika babirye, malye ning winibibyak’ tenen, ance kalekuka melinamnilame na nio. Tonda, sik malye unyak nang arye, Nun ni bira ani’ tenen, isa si erena ati, arenyak din ning, narye ton, ‘Anang ap neika pia kum dinamne’ tenen, “Kalikuka melipnilyame!” nyabuka, moropkine na nio.

⁵ Allah Ance, “Aning ara wininamlume. Aning ara, pia kum wininamlume,” nyapdeiamsulum yupu, pia moubuka talilulnye birye nati, “Anda malye winipmalame,” nyabuka, wenepnutua babye, aning ara teleb uka. Ara, elce bico tenenulula ati, anyanulul yupu ara, teleb uka. Atonun, Allah ance, “Aning ara, wininamlume. Aning ara, pia kum wininamlume,” nyasilyam yupu, pia batakna kumce, tuba talibuka winilulnye birye nati, “Wininmanilama ara, bataknulyame. Aning ara, kum wininamlame,” nyabuka, wenepnutua babye, aning ara, pia telebe. Tonda, sik malye winin ninguk talibuka wininyak nang arye, nati, “E anye bira, nun kwit koproba ulula ati, elti, si erenamabe,” nyabuka, ‘Sikce aning nyapnikcak’ tenen, ‘Na lik,’ tenenuna ati, na ilil unmanile. Deiyok ara ani. Ara, sik anang arye, pia malye-malyeuk wininyaka ati, narye an Allah ati, “Anang ara, wenebuka opminyakarye, sik malye wininyak ning nirya ara, kum kipdeipnalyame,” nyabuka, tuba morokunune.

⁶ Yupu lipsisikuka bokolina deiyok nang arye, amalye winin ninguk talibuka wininyak nang tomobikirye, ‘Anang wenebuka opnamap,’ tenebuka, kintininyak talak ara, sik malye wininyak nang arye, biknamake. Ara, ninye yupu lipsisikuka bokolin talak ara, sikce, ‘Se, dipkoprob, Allah Yahweh arye nyasulul yupu ara, pia diksukumuk ulule. Elce nyalul yupu nirya ara, dipkoprob teleb uka,’ tenen, moubuka biknamake!

⁷ Winipmanto ara, ninye arye, besi ning dobukabikirye, keil teleb uka tuku deice batakikiba, akeil pakuka, mitik-mitik kilamak touk, Allah arye sik malye wininyak nang ati, wenebuka oplirye, malye kiplyeura, sik nong ap, yok ap, nirya bulaklirye, Sheol mutuku damuk deiplopnamle. Ara, akunum diamik nang unyak mutuku, el si ara Sheol mutuku, wekelban bisik dam ara, ‘Allah arye anang, sik yok bulaklopnamle’ tenen, nyapne.

⁸ Bukni, na ni Allah Yahweh, na kele. Anda aning-aning nirya talipmince, pia deice tam erebuka, Mikip Weiknye ulyama ati, ‘Ancuk nati lyepropnutum’ tenen, na asing arye, an uminye tamuk tuba dikunune. Ara, ‘Yuknye birye lyepnutu’ tenen, pia kum tenenune. Na melibuka lyelonulul deiyoknye bira, na ni Allah an tonoka. Anti diba tenekunune. Ati na nio, ‘Ance kum bataknamnilam’ tenen, moropkine.

⁹ Tonda, ‘Anye nun lik,’ teneninyak nang arye, ‘Anye tomobuka opnuyap’ tenen, akunum kintinibik ning aupmala ati, na nio, ‘Ancuk kalekuka melipnamnilam’ tenen, moropkine. Ara, sik malye winin ninguk talibuka, pia malye-malye wininyak nang arye, ‘Anye tomobuka, opnuyap’ tenen, kintinip deibik ning pum tam, ‘Mangkau asa binirye, aning pum tam sakuka weknyak’ tenen, ance kalekuka melinamnilame, na nio.

¹⁰ Na kanye ara, sik malye winin ninguk talibuka, malye-malye wininyak nang arye, sikce ninye on ning kintinip deibik ning ara, ‘Sikcuk aning pum tam saktingce, yupdating’ tenenyake. Teleb ning ara, ance nati, lyepropniminba, telebuk unirye, talye mangkau asa banamne. Utenena ati moropkine, na nio.