Mazmur 140 - Eipomek

‘Nun mal olan nang arye, yanuka opsikcakʼ tenen, ‘Allah arye melibuka lyepsutu’ tenebukce, Allah ati morobuk yupu

¹ Ninye deiyoknye, Raja Daud birye, Mazmur yupu mot nyana ati, ayupu sekuk. Allah yupu mot nyana deiyoknye arepnamuka ati sekuk. Daud birye nyabuk yupu ara, ani.

² Se, na nio, ‘Pia yu nang arye opnikcak’ tenen, Allah Yahweh ance, melibuka lyepdopnilyame na nio! Anang ara, yuk nang ati, talye mangkau asa oltakanyaka ati, ‘Sikce na ton opnikcak’ tenen, ilil upnila ati, moropkine. Ati, ance kalekuka melinamnilame na nio.

³ Ayu nang arye yuk nang ati, ‘Amutuku nang ton olbinamabe,’ nyabuka, sik kweit cayapu ap, yupu talinyake. Kanye pum noutam arye, aninguk pia teninyake. Sik ayu nang arye, asum-asum nirya arye, ‘E, amutuku-amutuku nirya, dana-dana tam nirya unyak nang ati, yu kilam yupu nyabibiba, kekepsikcopura, ninye olbanauk pia unamake,’ tenebikirye, malye wininyake.

⁴ Winipmanto ara, ninye on bal, el si yu weik ulye touk, ayu nang babye, sikce nyanyak yupu deice arye, yuk nang ati, ikin weik kilisinyake. Tonda, ninye olamle kwatima, el si pum tam ning, el si ara, yu si tang aulye touk, ayu nang babye, sik si pum tam ara, ninye on yupu weik aulule.

⁵ Ati ara, se na ni Yahweh, pia malye wininyak nang, ‘Sik taruk mikip arye, malye kipdeipnikcak’ tenen, ancuk nati, kalekuka melinamnilame na nio. Ara, ayu nang arye, yuk nang ati, talye mangkau asa oltakanyaka ati, ‘Sikce na ton opnikcak’ tenen, Allah ancuk melibuka kalikinamnilyame. Tonda, ayu unyak nang arye, nati, ‘E, anye Daud elda, winibuka-winibuka winiptibya deice arye, el daoptibye,’ teneninyake.

⁶ Diba sik babye talima erepdakirye, maknya kintininyak nang arye, ‘Daud tomobibirye, opnamap’ tenen, ninye on ning dobuka, na banun bisik noutam akunum dungnubuka deipnike. Tonda, tonok ning ara, ‘Anye tomobuka opnamap’ tenen, cang tapu arye, ninye tomon ning, el si jaring, akunum memebuka wibikce, na banun bisik noutam dungnubuka deibik. Tonda, na banun bisik noutam ara, ninye on ning, tapu koubuka ninye on ning, el si ara perangkap, akunum kintinip deibik.

⁷ Winibuka unyak bukni, narye Yahweh ati, “Naio, anda na si erenun Allah, an tonok ulyame,” nyanune. “Ance aning-aning nirya talemince, mikip weiknye ulyame ati ara, an ara na deiyoknye ulyame,” nyakinune. Ati ara, na ni Yahweho, narye anti morokunun yupu nirya ara, ‘Kekepnimince, minop yanuka, melipnamnilam’ tenen, moropkine.

⁸ Se, na ni Yahweh, anda pia mikip weiknye ulyama ati, na melibuka lyena deiyoknye bira, an tonoka. Ara, ninye olyanganinyak talak nirya ara, ance, ‘Ayu nang ara, na tenenye obikcak’ tenen, ancuk na kisok tam lelilongoniminba, ayu nang arye nati, kum opnitinge.

⁹ Tonda, na ni Allah Yahweh, sik malye wininyak nang arye, ‘Aning patapsile,’ tenenyak ning ara, ance pia kum arenalyame. Sikce, ‘Yuk nang ati, malye weik upnamabe,’ tenenyak ning ara, ‘Dipkoprop winibikcak’ tenen, ance lo pia kum arenalyame. Sik yupu ara, sekenalame na nio! Ati, sikce, “Aning ara, winipnamabe, winipnamabe,” nyabuka, malye yupu talibikirye, aning akunum kintinipnamak bukni, ance sikti, lo pia kum arenalyame. Deiyok ara, lo arepminba, amalye winin ning akunum winibikcopura, sikda talima pia erepdakirye, tabakuka pia maknya kintininamake.

¹⁰ Na ni Allah, ‘Na mal olan nang arye, maknya kintinibikirye, nati opnikcak’ tenen, ance anang ati, yupu sekenalame! Utenepnarye, moropkine na nio. Teleb ning ara, sik ayu nang arye nati, ‘Anye malye kipdeipnuyabe,’ teninyak ning ara, sik nong deiceuk, tamubuka bitue. ‘Ance anang ati winipnalam’ tenen, moropkine na nio.

¹¹ Ance sik anang ati, kanye imun weik ning, sik nong deice deipnalama ati, winipmanto ara, uku kalum pia buppu weik ulamle ning ara, im deice arye sakturye, sik kisok deice pouptopura, ‘Aning ara, telebe,’ tenepne. Winipmanto ning ton, ance anang tomobuka, weik tuku pum noutam dopkwetepmince, siknip dongopminyopura, tonap atuku pum tam arye, weleyanman kumto unamake. Aning babye, teleb tenepmana ati, aning ara moropkine na nio.

¹² Tonda, na nio, sik yu ubikirye, nunti talye minin yupu weik nyakce nang ara, ‘Nun Israel yala nang unyap mutuku noutam ara, tuba kum unamak’ tenen, moropkine. Ati, ance anang ara, yupu pia sekenalame. Ati, sik anang arye, yuk nang ati, onyak nang nirya ara, ‘An Allah arye sikti, kanye imun weik ning, sik nong deice deipnalam’ tenen, moropkine na nio.

¹³ Nara dipkoprob akunum bikinune. Nun ni Yahweh, elce sik talye bona uto-toa talina kum nang, aning-aning nirya, kum talinyak nang ati, pia bico tenelirye, ‘Ikin ning, sik nong deice yalyak’ tenen, sikti, pia kalekuka melilule. Tonda, sik talye bona uto-toa talina kum nang ati, yupu teleb kibuka, lipsisikuka bokeiplirye, sikti, tuba-tuba teleb diksukumuk kilule.

¹⁴ Tonda, sik talye bona uto-toa talina kum nang ati, yupu teleb kibuka lipsisikuka bokeiplirye, sikti, tuba-tuba diksukumuk kililule. Tonda, ance, “Aning ara, wininamlume. Aning ara, pia kum wininamlume,” nyapdeiamsulum yupu, moubuka talibikirye, diksukumuk wininyak nang nirya ara, an damuk tuba unamake. An unamlamak ara, anang nirya babye, an ap neika unamlume.