Mazmur 138 - Eipomek

Allah, ‘Telebe,’ nyana ati, aMazmur mot yupu sekuk

¹ Raja Daud birye, aMazmur mot yupu sekuk. Sekukce, Daud birye nyabuk yupu ara, ani. “Se, na ni Allah, na talima pum tam nirya deice, anti, “Telebe,” nyapkine. Diba, sik im deice unyak malaikat nirya, sik kekenyakak arye, narye aMazmur yupu mot deice arye anti, “Pia telebe,” nyabuka, amot nyakunune.

² Tonda, Allah an si eren aik, malye ning pia kumak, pia teleb lek aik ubuka dam arye, an si erena ati, tuku deice kutam dipdongobuka, anyaik eipnirye, an kekena ati, amot nyana deice arye nyanune. Wininuna deiyok ara ani. Ara, Allah an ap, an si pia telebnye ap, ance, “Winipnamne,” nyalyam yupu atonunuk kibuka, winilyam ning nirya ap, aning nirya ati, “Telebe,” nyapkine. Tonda, anda pia weik tonun bico tenesimince, “Batakna pia kumce, winibuka teleb kilinamsine,” nyabuka, nyalin yupu deice arye nyalisilyam touk, aning tuba-tuba winisilyam ning ati, narye, “Pia telebe,” nyapkine na nio. Ati ara, Allah an siuk pia erekunune. Ara, aning-aning nirya aupmal bukni, ance yuk awamlye ning deice tam ara, an si akunum erebuka deiamluma ati, an si ara, weik mambul si ulule.

³ Se na ni Allah, narye anti moropse sum aryuk, ance na moropse yupu kekepnulumce, adiparyuk melipnulume. Melipnuluma ara, talye kume. Ara, ance nati, mikip weik tonun tabakuka arepnuluma deice arye, na talima nirya ara, mikip weik tonun ton upnukba, na mal olan nang ati, ilil una kumce, mikip asa unune.

⁴ Tukwak mutuku, im sirya, mutuku sirya nirya unyak nang ati, talinyak ninye deiyok nang, sik Raja-Raja nang nirya ara, ance nyasilyam yupu akunum kekenamaka ati, aning ara, sik nirya arye Allah anti, ‘Anda pia telebe,’ nyabuka, an si atibuk erenamake.

⁵ Anda Allah Yahweh arye winilyam ning ap, ance pil dolyam ning ati, tenebikirye anti, “Se, Allah ara, pia teleb ulule,” nyabuka, mot nyan deice arye, an si atibuk erenamake. Sikce an si erenamkiaka deiyok ara, talye ati kume. Bita kekepnulyame! Aning deiyok ara, Allah an weik mikip ap, an pia teleb ulyam ning ap, an dirina ap ara pia weik ati, sik nirya arye, antibuk, an si erebuka, kanye kil-kil mot nyanamake.

⁶ Ton deiyok ara ani. Allah Yahweh, anda dipkoprob aning-aning nirya talibuka umince, pia deice tam, mikip weik deiyoknye ulyam bukni, ance nun tukwak mutuku noutam, ikin weik unyap nang ati, bico tenepsimince, tuba bikisilyame. Bukni, sik talima erepdakirye, maknya kintininyak nang nirya ara, yukak aryuk elilyame. Anang dam yanuka, sikti, kum melilyame.

⁷ Na kele, pia ikin uniliba, imun kanye bobuka, unye talak babye, ance nati kalekuka melinilyame. Melinilyama deice arye, na mal olan nang arye, yu weik upliba, ‘Anye nun lik ati, opnuyabe,’ tenepnitinga babye, sikce kum opnamniake. Deiyok ara ani. Allah an sirik tam mikip weik ukulul taruk arye, lopdeipnimince, lyelonilyame. Ati, na mal olan nang arye, kum opnitinge.

⁸ Ati ara, na kele. Allah Yahweh ance nati, ‘Anye bira melipniba teleb unamle. Tonda, apil dopnamle, aning ton winipnin banamle,’ tenepnulum ning nirya ara, melipnuluma deice arye, aning nirya dipkoprob nong upnamle. Tonda, aning ton akunum bikamse. Ance nunti, weik tonun bico tenesimince, ‘Winibuka pia teleb kilinamsine,’ nyabuka nyalin yupu deice arye nyasilyam ning nirya ara, pia kum bataklume. Aning nirya, pil donauk ulyame. Weik tonun bico tenesilyam ning ara, pia unamla ati, aning nirya dipkoprob nong upnamle. Ati nun ni Allah morokinyabe. ‘An taruk mikip aryuk kwepdeiamsulum nang nirya ara, tuba tenesimince, pia kum batakasilyame. Melinauk unamsilam’ tenen, morokinyabe na nio.