Mazmur 137 - Eipomek

Babel mutuku bobinamik ninye arye, mek kup-kup ulamik talak engebikce, nyabik yupu

¹ Ara, nun Israel ninye nirya ara, Babel mutuku bobinamsikba, amutuku noutamak ulamupu talak ara, amutuku balamuk mek lilunak bukmance, Sion mutuku ati tenipdenopura, pia weik arye engenauk ulamupu. Ara, minop talak, nun mutuku koprop, Yerusalem mutuku ati, tuba tenenauk ulamuburye, engelamupu.

² Amutuku noutamak palamuk yo, el si gandarusa yo tikamuk. Ayo kan-kan bukmapu talak ara, yupu len ning, el si ara kecapi, ‘Kanye lon mot ton kum senamabe’ tenen, nun kecapi dobuka, ayo deice kirikilkwetelamupu.

³ Nun mot len ning, el si ara kecapi, kirikilkwetelamika deiyok ara, ani. Ara, Babel mutuku noutamak unmapu talak ara, sik yu nang arye nunti, “Mot nyamunba kekenusiyabe,” nyabuka nalinmeke. Ara, “Anggun minop talak Sion mutuku ulamlumce, nyalamlum mot uk nyapmunce, kanye teleb kilinamsilyame,” nyabuka dilamsikce, yupu mikip arye nyapsik bukni, mot sepmanto kum unmapu. Ara, minop talak, nun mutuku yanuka obisipsikce, tapu koubuka bobinamsikce, ikin pil dilamsik nang arye, ‘Mot senmakiba kekebibirye, akutunamabe’ tenen, yu asa arye nyanmasike. “Kanye deipdanamabe ati, mot selulume,” nyanmasike.

⁴ Bukni, nunda ‘Kume, pia imun kanye bobuka unmabe anya arye, yata wiribuka Sion mutuku atibuk teniptibirye, kanye deibuka, teleb ulin mot nyaptibye do?’ tenenmapurye, mot kum senmapu. Nun Babel mutuku noutamak ulamupu talak, ‘Amutuku noutamak ara, nun ninye asik nang atonun ubuka, unmaba ati, nun ni Allah Yahweh ati, kanye deibuka, sen mot nyaptibye kuma,’ tenenmapurye, mot kum senmapu.

⁵ Atalak ara, kanye lon mot kum nyalamupu bukni, utenenmapu. ‘Kume, minop talak ulamupu mutuku, Yerusalem mutuku ati kum luba kiptibye. Yerusalem mutuku ati, luba kiptibye toura, nun sirik mikip taruk ara, sesal sepsutuba, pil kum dopmanto utibye,’ tenelamupu.

⁶ Aning atonun, Yerusalem mutuku ati, luba kiptipyopura, nun sitang deice namin kum arye sesal lebuka taplaksutue. Nun sitang sesal lepsutuba, yupu nyapmanto kum uptibye. Ara, ‘Nunce Yerusalem mutuku ati, pia tuba kum tenibipyopura, ikin weik upsilyak,’ tenena ati nyababe. Tonda, nun wininyap ning nirya ati, mitik anun arye kanye deiptibye bukni, Yerusalem mutuku ara, weik mambul weik ulula anya arye, weik ninye asik, kota Yerusalem mutuku ati ara, weik arye kanye delinyabe. Weik asik Yerusalem mutuku ati, lik pia kum unamsile. Nun nirya ara, kanye deibuka unamabe.

⁷ Diba, nun ni Allah, ance Edom mutuku ulamik ninye, sik malye winilamik ning ati, luba kina kume. Pia teninamlyame. Sik Edom mutuku ninye arye, pia malye ulamik ning ara, kum luba kinamlame. Ara, sik Edom yala ninye arye, Yerusalem mutuku noutamak dobuka ulamupu aik, uku dongopnuyik talak, malye nyanmek ning ara ani. “Anyaik nirya batakana kume. Asik-asik nirya dakuka bataknulame. Daknin banmamunya ani, aning nirya babye batakana kume, akunum nirya daklopnamlume,” nyapdeiamuk. “Anyaik-anyaik nirya ara, dakuka uluplobibiba, keil pala deice deibik ning ara, lakak upnamle. Anyaik nirya dakuka uluplobibiba, aik oldem upnamle,” nyalamik. Nyabikba, aik deiya deibuka domupu ning nirya dakuka uluplobik. Winibika ati, aning ara, Allah ance pia kum luba kinamlame. Nun ni Allah, anda awinibik ning ati, weik arye wenenamlyame.

⁸ Se, anggun Babel mutuku noutamak umunye ninye nirya, Allah arye lo areplibuk, anggunti wenebuka opnamsiak ninye ara, weik arye kanye delinamake. Sik Babel mutuku ninye arye, nun Israel ninye ati, malye weik ulisumunya deice arye, kanye imun ning pia weik upmasile anya arye, anggun Babel mutuku ninye wenena ati, kwang daknamsiyak ninye ara, weik arye kanye delinamake. Ara, ‘Nun Israel yala ninye nirya ati, malye winilisumunya dekna ati, tamubuka opnamsiake.’ Ati ara, aninguk tenebuka unamlulume.

⁹ Tonda, teneipdenamlulume. Winiryuk delilalum mi moum dilamice mapu nirya ara, yuk mutuku ninye arye, anggun dam yanuka, sirya opsikirye, ninye arye, sik mitik mapu bobuka, weik keil deice donokice deice arye opnamake. Sik amapu oplopnamak nang aryuk, ‘Merekuka winipmabe’ tenen, weik kanye deibuka unamake. Aning nirya ara, nun Israel ninye arye tenenyabe.