Mazmur 135 - Eipomek

Nun ni Allah Yahweh ati, “Anda pia telebuk ulyame,” nyabuka, el siuk erenyabe. “Yuk nang arye, yuk ning ati, si erenyak ning nirya ara, nunce aning ati, si kum ereptibye,” nyabuk yupu

¹ Nun nirya arye, nun ni Allah Yahweh ati, “Anda pia telebuk ulyame,” nyabuka, el siuk erenamabe! Tonda, nunce Allah ati, ‘Se an si Yahweh ara, pia mambul teleb si ulule,’ nyabuka, el si erenamabe! Tonda, Allah Yahweh, el amu tam umunce, el piluk dolulum nang babye, anggunce, Allah el si erenamlume!

² Ara, Allah Yahweh el si eren aik pum tam tikmunce, ‘Allah arye, nun malye winin ning kilipnamsilʼ tenen, el arena ati, kam ning obuka, ining arelamlum nang, anggun imam-imam nang ara, anggun babye Allah el si erenamlume! Diba, nun si erenyab Allah ati, nun nirya arye elti, “Allah anda, pia telebnye ulyame,” nyabuka, el siuk erenamabe!

³ Allah Yahweh ara, pia telebuk ulula ati, nun nirya arye, “Anda pia telebnye ulyame,” nyabuka, el siuk erenamabe. Tonda, Allah el si erebibirye, mot deice arye el si erenamabe. Deiyok ara, Allah el kanye aryuk, weik tonun bico tenesilirye, melisulule.

⁴ Ara, Yakub birye deiamukba, dadeipdanin yanganyap nang nirya ara, Yahweh arye, ‘Ayala nang ara, ‘Naʼ tenen nang unamake,’ tenepsukce, wibuka deipsuke. Diba, nun Israel yala nang nirya ara, akunum wibuka erepdeipsuka ati, “Anggun nirya ara, na ninguk ululuma ati, pia ati talipnamsine,” nyasulule.

⁵ Na kele. Nun ni koproba Allah Yahweh, elda mikip weik ulirye, mambul weiknye winilule. Diba, nun ni koproba Allah Yahweh, aning-aning nirya, deice tam erebuka ulule. Ninye arye, talye ning ati, si erenyak ning nirya ara, Allah el amu tamuk unyake. Yahweh ara, el tonok Allah ulule. Ninye arye, yuk ning ati si erenyak ning nirya ara, talye ninguk ulule.

⁶ Allah Yahweh arye, ‘Wininamne,’ tenelul ning nirya ara, adiparyuk talye luparabuka winilule. Ara, im deice ap, im noutam ap, tukwak mutuku sirya, im sirya nirya, weik laut mekwen pum tam ap, weik karou ara, nunce kum eiptibye. Mutuku noutam nirya babye, Allah arye tenelul touk, el pil dobuka ulule.

⁷ Winipmanto ara, ani. Tukwak mutuku sirya, im sirya arye, elce arepliba, weik dua welelule. Tonda, elce arepliba, weik bebeya laklamle ning, bebeya lakalule.

⁸ Tonda, minop talak ara, Mesir mutuku noutam ulamik nang arye, min yuma deiamik mapu nirya ara, obuka sirya dakuk. Sik nirya dibik. Ara, ninye arye deiamik mapu, sik min yuma mapu nirya, ninye arye weilamik ning arye, min yuma delilamik yim ning nirya ara, atalak aryuk obukba, dibike.

⁹ Atonun, anggun Mesir mutuku ululum nang ara, moubuka biklulume! Min yuma ara, Allah arye, ninye kum winipmanto ning ap, mikip weik ninye arye dopmankum pil ap, sik kan-kan noutam arye dolamuka deice arye, ‘Amutuku nang nirya ara, se, nun mutuku noutam, pia mambul pil donmasilye bira, dipkoprob Allah atia, tenepnamak,’ tenen ati, Allah arye apil dolamuk. Winibuka winilamuka deiyok ara ani. Ara, ‘Mesir mutuku ninye deiyoknye Firaun ap, el amu tam deiyok nang nirya ati, ‘Opnirye, amu tamuk deipnamne,’ tenebukce, sik nong deice, kanye imun weik ning areamuke.

¹⁰ Tonda, Yahweh arye, el ‘Naʼ tenen nang melina ati, sik dana-dana tam ulamik nang, yuk-yuk nirya ara, obuka, sirya daklamuk. Tonda, amutuku-amutuku nirya, taleamik deiyok nang, sik ninye deiyok nang kibuka, pia mikip weik raja nang ulamik bukni, Allah arye, aRaja nang nirya obuka, sice bultaklamuke.

¹¹ Winipmanto ara, sik Amori yala nang taleamuka deiyoknye, raja Sihon ap, tonda, Basan yala nang taleamuka deiyoknye, raja Og ap, tonda Kanaan noutam yuk-yuk nang taleamik raja-raja nang weik tonun ap, Allah arye obuka, sirya daklamuke.

¹² Allah arye aninye deiyok nang olamuka deiyok ara ani. Ara, elce, ‘Na tenen nang unamakʼ tenen, wipdeiamse nang, sik Israel nang ara, pia ati, na ninguk wininamaka ati, amutuku-amutuku nirya, alubuka dopropnirye, sik Israel yala nang nirya ati, bokuka arepnamna ati, atam mutuku tuku nirya ara, sik ninguk pia unamle.

¹³ Se, nun ni koproba Yahweh, an mambul teleb si ara, pia ati aunamle. An si ara ninye arye tuba teninauk unamake. Diba, tukwak mutuku, im sirya, mutuku sirya nirya, noutam unyak nang arye anti, “Se, Allah Yahweh ara, pia mikip weik ulirye, mambul weik ninye arye, dopman kum pil dolulnye winilule,” nyabuka, yuk nang kekenak ati, laka nyanauk wininamake. Atalak arye dipdongobuka, dounamle talak nirya ara, pia nyanauk wininamake. Tukwak nang nirya arye, an si luba kum kinamkiake.

¹⁴ Ara, talye ati kum bukni, deiyok ara ani. Yahweh arye, ‘Sikda ‘Naʼ tenen nang unamakʼ tenen, wibuka erepdibuk nang, sik Israel nang ara, ikin weik tuba unyak bukni, aminyan sirya talak ara, sik nirya ati melibuka lyeplirye, tuba tamubuka teleb kilinamle. Winiplyopura, yuk yala nang nirya arye, ‘Seʼ tenen, “Sik Israel nang ara, dipkoprob Allah el ‘Naʼ tenen nang unyake,” nyabuka, si erenamake. Allah arye winipnamla deice arye, el ‘Naʼ tenen nang, sik Israel nang nirya ati, weik tonun bico teneplirye, melibuka lyeplirye, pia teleb kipdeipnamle.

¹⁵ Nun kele. Tukwak mutuku, im sirya, mutuku sirya nirya, noutam unyak nang arye, talye ning ati, isa si erenyak bukni, aning ara, dipkoprob kam ulul ning kume. Sikce si erenyak ning nirya ara, dengna weik ning, el si ara, emas ap, perak ap doprobikirye, sik taruk arye puturubuka deilinyake.

¹⁶ Ati ara, sik taruk arye puturubuka deibikirye, si erenyak ning nirya ara, si bam bol aupmal bukni, yupu tonok ning babye, kum nyapnamake. Aning deice ara, asing ton memebuka delinyak bukni, aning arye, pia kum eiptinge.

¹⁷ Aning atonun, aning memebuka delinyak ning ara, amul ton memebuka, delinyak bukni, pia kum kekeptinge. Sik memebuka deibikirye, si erenyak ning nirya ara, kam kum ulula ati, isin ton pia kum ulule.

¹⁸ Ati ara, yata nang do nirya, sikce, ‘Isa si erenamapʼ tenen, sik taruk arye puturubuka delinyak ning ara, kam una kum ning ulul touk, sik aning memena deiyok nang ap, aning memebuka deibikceura, ‘Nun ni ani,’ tenen, diba tenebuka, si erenyak nang nirya ara, atalye ning winilul touk, ubuka wininamake.

¹⁹ Se, anggun Israel yala nang nirya ara, na nyapnusin yupu moubuka kekeplulume! Nun ni Yahweh ati, “Naio, anda dipkoprob pia telebnye ulyame,” nyabuka, Allah el siuk erenamlume! Tonda, Harun birye deibukba, dadeipdanin, yangalamlum nang, Harun yala nang nirya ara, anggun babye, nun ni Yahweh ati, “Naio, anda dipkoprob pia telebnye ulyame,” nyabuka, Allah el siuk erenamlume!

²⁰ Aning atonun, nun apu Lewi birye deibukba, dadeipdanin, yangalamlum nang, Lewi yala nang nirya ara, anggunce, nun ni Yahweh ati, “Naio, anda dipkoprop, pia telebnye ulyame,” nyabuka, Allah el siuk erenamlume! Tonda, yata yala-yala nang do nirya ara, Allah ati, diba teneplumce, ‘Allah arye nyasilye yupu moubuka talibibyak arye, ‘Aninguk pia wininamapʼ tenen, elti, ilil usilye nang nirya ara, anggunce, nun ni Yahweh ati, “Naio, anda dipkoprob pia telebnye ulyame,” nyabuka, Allah el siuk erenamlume!

²¹ Tonda, anggun Sion mutuku noutam ululum nang nirya ara, anggunce, nun ni Yahweh ati, “Naio anda dipkoprop, pia telebnye ulyame,” nyabuka, Allah el siuk erenamlume! Aning atonun, nun tukwak mutuku noutam unyap nang nirya babye, nun ni Allah Yahweh ati, “Naio anda dipkoprop, pia telebnye ulyame,” nyabuka, Allah el siuk erenamabe!