Mazmur 133 - Eipomek

“Ninye ara, olana ap, walana ap, winina kumce, kanye deibikirye, teleb kibuka neika una ara, pia telebe,” nyabuk yupu

¹ Raja Daud birye, Mazmur yupu deice, mot sekuk. Israel yala nang ara, ‘Allah el si erenamap’ tenen, Yerusalem weik asik domik mutuku welebalamik talak ara, Mazmur yupu mot deice arye nyalamik. Daud birye sekeibuk yupu ara, ani. Yata nang do nirya, olana ap, walana ap kumce, neika unyak talak nirya ara, kanye deibuka, telebuk winilamting toura, pia telebe.

² Winipmanto ara, Allah el si eren pil dona deiyoknye, el si Harun biti, wipdeiamik talak, ‘Imam deiyoknye unamleʼ tenen, bikilina ati, atalak ara, dengna weik minyak mek, el si ara, minyak Zaitun dobuka, el kisok deice dikdeibikba, aminyak mek biyukce, Harun el bam potong deice poul biyukba, abulupmek nang nirya, aning eibikce, kanye deibuka ulamik. Anang arye kanye deibuka ulamik touk, ninye nirya arye, kanye deipdanuka, neika ulamting toura, pia telebe, nyapne. Diba aminyak Zaitun dikdeibikba, Harun el bam potong deice biyukce, el cang baju, el si juba, abaju juba el ngang dam binuka, likdeibik. Sik atalak bulupmek nang nirya arye, aning ebikce kanye deibik.

³ Tonda, aning atonun, ninye ara neika ukirye, kanye deipdatingce, teleb kibuka neika ulamting toura, pia telebe. Winipmanto ara, cang weik mutuku, el si ara, Hermon mutuku kon bukuk tam ara, beren tam talak, mok purye weik saklyopura, amutuku unyak nang eibikirye, kanye delinyake. Atonun, tukwak nang arye, neika uptingce, kanye deipdatingce, ulamting toura, pia telebe. Sion mutuku deice, beren tam talak, mok purye saklyopura, amutuku unyak nang eibikirye, kanye delinyake. Ara, talye ati kume. Deiyok ara, ani. Minop talak ara, Allah Yahweh arye, “Sion mutuku noutam unamak nang ara, pia teleb kilinamsine,” nyabuka, nyalin yupu deice arye, nyapdeiamuk. Ara, “Israel yala nang ara, aminyan doyanamle talak nirya ara, kam pia una deiyok ning arenamsine. Sikda, min kume, kum danamake,” nyabuk.