Mazmur 132 - Eipomek

“Allah arye, tia talak ati, Sion mutuku ulule,” nyabuk yupu

¹ Israel nang arye, weik sum upneba, ‘Allah si erenamab’ tenen, Yerusalem mutuku noutam wekelbalamik talak nirya ara, Mazmur yupu mot nyalamik. Sikce nyalamik yupu ara, ani. Nun ni Allah Yahweh, nun ninye deiyoknye Daud biti, ‘Bico tenepmince, teleb kipdeipnalam’ tenen, moropkiabe. Daud el deice ara, weik ikin ning, pia weik arye bulubuka, imun kanye bomuk ning ara, ance tamubuka, tonap teneipdenulyame, nun ni Allah.

² Tonda, Raja Daud birye, Allah Yahweh anti, nyalin yupu ton nyapdeipkuke. Allah anda, aning-aning nirya deice tam talibuka umince, Pia Mikip Weik Allah ulyame. Tonda, ance nun apu koproba Yakub biti, pia melilalumnye ulyama ati, Daud birye, “Winipnamne,” nyabuka, nyalin yupu nyapdeiamkuk. Nyabuka, Daud birye nyapdeipkuk yupu ara, ani.

³ Se na ni Allah, dipkoprob na aik ara, aupmal bukni, anyaik tonap kum weknamne. Tonda, na mana aik koproba aupmal bukni, anyaik pum tonap wekuka, kum mapnamne.

⁴ Tonda, nara talye wekuka kum mapnamne. Wi weik upnutu babye, na talye wekuka, mana aik pum tam, pia kum mapnamne.

⁵ Deiyok ara ani. Ara, ‘Minop talak ara, na ni Allah Yahweh, el si eren aik kintinibuka doptinyeʼ tenen, pia patapnile. Ati anyaik dopnamnarya. Allah el si eren aik akunum dopnyeura, atalak ara, kanye deipnirye, na aik koproba ton, tamubuka wektinirye, na aik noutam maptinye. Allah anda, aning-aning nirya talibuka, pia deice tam umince, Pia Mikip Weiknye ulyamnye bira, nun apu koproba Yakub biti, pia melilamlume. Ati, na kanye ara, an si eren aik minop doptinyeura, aminyan talak, na aik koproba wekna teleb uka. An aik min kum dopnyeura, na aik koproba kum wektinye,’ tenenune.

⁶ Nun Israel yala nang arye, pia teleb yupu ton akunum kekebupu. Ara, Efrata mutuku unyak nang arye, kekebuka nyapsikba, nun ton kekebupu. Tonda, Yaar mutuku noutam unyak nang arye, ayupu ton nyabikba, kekebupu.

⁷ Amutuku noutam unyak nang arye nyapsik. “Nun kayapu nang, anggun nirya kekeplulume! Nun nirya arye, neika bibirye, Allah el tia talak ati ululak, Yerusalem mutuku binamabe! Yerusalem mutuku bibyeura, Allah el si erena ati, nun nirya arye, nun kisok tuku deice dipdongobuka, kanupdongobuka, Allah el siuk erenamabe. Winipmanto ara, Yerusalem mutuku, Allah el tia ati, didik sen mutuku noutam ulula ati, Yerusalem mutuku bibirye, el si uk erenamabe.

⁸ Ati, ‘Nun ni Allah Yahweh, anda adiparyuk bukmince, antia talak ati didik selamlumak, Yerusalem mutuku binuka unamlam’ tenen, moropkiabe. Allah ance, “Aning ara, wininamlume. Aning ara, pia kum wininamlume,” nyapdeiamsuk yupu ara, keil pala deice sekdeiamlumak, Musa birye, aning dobuka, marikna pum tam dongobuk ning, el si ara Nyalina Yupu Marikna, tonda ‘Peti Perjanjian’ nyalamik ning ara, ‘Aning doprobibirye, Yerusalem mutuku boyanalam’ tenen, moropkiabe na nio.

⁹ Se, nun ni Allah, an si eren aik pum tam pil dona deiyok nang, sik imam-iman nang arye, pia diksukumuk wininyak ning ara, sik ap yanamake. Tonda, an Allah arye, ‘Na mapuʼ tenen, akunum wipdeiamsulum nang ara, kanye deibibirye, weik yupu deice arye, an siuk pia erenamkiabe.

¹⁰ Nun ni Allah, ance nun deiyoknye raja Daud biti, pia bico telyama ati, ‘El Daud biti, pia kum bataknalame’ tenen, moropkiabe. Ara, ance Daud biti, ‘Anye Israel nang nirya talenamle. Elda ninye deiyok kibuka, raja Israel unamle’ tenen, akunum wipdeiamlume.

¹¹ Min talak ara, Allah Yahweh, ance nun deiyoknye Daud biti, nyalin yupu deice arye, “Pia dipkoprob, ninye deiyok talibuka un ning ara, arepkinirye, erepdeipnamkin,” nyabuka, nyalin yupu deice arye, akunum nyapdeiamlume. Allah ance, anyalin yupu deice arye, akunum nyapdeialum ati, aning ara, pia kum bataknamlame. Allah ance ayupu ton nyaplume. “Daud ance deipnalam mapu kan-kan arye, Israel yala nang, anggun ninye deiyoknye raja kina ati, ninye ton, pia wipdeipnamne.” Tonda, Daud ance biknulyame, Israel yala ninye deiyoknye kina ati, weik teleb bun ning, el si takhta deice ara, ance deipnalam mapu kankan arye, tonoknye ton wipdeipnyeba, atakhta deice buklirye, Israel yala nang nirya talinamle.

¹² Tonda, ance delinamlam mapu nirya ara, na Allah arye, ‘Aning ara, wininamlume. Aning ara, pia kum wininamlume,’ nyalin yupu deice akunum nyapdeipse yupu, an mapu arye, moubuka talibikirye, pia diksukumuk winibikceura, anang babye tuba erelinamne. Sikce, Israel nang nirya talipnamake. Tonda narye, ‘Teleb winina ati, aning ara wininamlume. Diksukum winin ning ati, winibuka-winibuka wininamlume,’ nyapdeiamsise yupu ara, Daud ance delinamlam mapu ati peterepnibuk, sik kekebikirye, aninguk talibuka telebuk winibiceura, sik ap, tonda sikce delinamak mapu ap, Israel yala nang talibikirye, ninye deiyok nang, raja-raja unamake. Raja kibikirye, Daud an ninye deiyok kina ati bun ning, el si ara takhta, deice bukikirye, Israel nang talipnamake.”

¹³ Allah el si Yahweh arye, el tia talak unamlak ati, Sion mutuku akunum wipdeibuk. Allah arye, “Diba, Yerusalem mutuku noutam ara, ‘Na pia aunamne’ tenen, patapnila ati, asukumuk unamne!” nyabuk.

¹⁴ Tonda, aning atonun, Allah arye, “''Amutuku ara, na didik sen mutuku ati asukumuk pia aunamne,” nyabuk. Tonda, “Sion mutuku pia patapnila ati, amutuku noutamuk pia aunamne!” nyabuk.

¹⁵ Tonda, Allah arye nyabuk, “''Amutuku noutam unamak nang, sik patan ning nirya ara, naryuk weik arye arenamne. Tonda, amutuku noutam unamak nang kan-kan babye, anggun patapnamsil din ton arepnamsine.

¹⁶ Tonda, ninye lyana ati yupu, Sion mutuku unyak imam-imam nang ati peterepnyeba, kel bikikceura, sikce yuk Israel yala nang nirya ati, peterebiceba, kekebuka, kel biknamake. Tonda, Yerusalem mutuku noutam unamak nang ati, narye, “Wininamlume,” nyamsese yupu moubuka talinamak nang nirya ara, narye teleb kipdeipyeba, sik pin-pin kanye bobikirye, weik yupu deice arye, ‘Telebe,’ nyabuka nyanamake.

¹⁷ Sion mutuku noutam ara, na mikip arepnirye, lo arepnyeba, Daud birye deiplyeba, dadeipdanin banamak nanguk, wipdeipnyeba, Israel nang talepnamlanye ton, sik deiyoknye ton unamle! Na Allah arye, Israel nang talibuka, ninye deiyoknye ulul raja Daud biti, ‘Anye bira, dipkoprob, Israel nang sik ninye deiyoknye unamle’ tenen, akunum wipdeipsa ati, amutuku nirya ara, dipkoprob talinamle!

¹⁸ Daud biti, ‘Anye nun lik’ tenen, mal pinamak nang nirya ati, na Allah arye, wenebuka, sik anang nirya, amu tam kipdeipyeura, sik pia alye weik dakdanamake. Bukni, narye wipdeipsinye Daud bira, el ninye deiyoknye kina ati, lak kin ning, el si mahkota ara, ninye arye aning dobuka, Daud el kisok deice deibikceura, el mahkota deice ara, dirina pia weik upnamle! Allah arye ayupu nirya nyabukba, sik mot nyana deiyok nang arye sekik.