Mazmur 130 - Eipomek

Israel ninye arye, ‘Allah el si erenamap’ tenen, Yerusalem mutuku welebuka balamik talak ara, amot nyalamik “Kanye imun un ning, nun dam yalyopura, Allah arye yanuka, lyelonamsile,” nyabuka morolamik yupu

¹ Se, na ni Allah Yahweh, weik ikin ning, na dam yanmanilba, imun kanye bobuka unmane. Ati, ‘Na ni Allah arye, yanuka melipnilyame,’ nyabuka, weik yupu deice arye ngalukunmance, na ni Allah Yahweh, anti moropkine.

² Na ni Allah, ance na kanye imun upmanila ati, “Melipnilyame,” nyabuka, moropmakin ning ara, kekepnilyame. Winipmanto ara, ninye arye, ‘Nun kayapu nang weknamak’ tenen, aik bublan kukulilamak tonun, narye, “Melipnilyame,” nyabuka moronamne yupu nirya ara, ance moubuka kekenamnilame. ‘Na ikin unilye ning ati, moronmakin ning ara, moubuka kekepnimince, dilyanamnilame. Na moropkin touk, melinamnilam’ tenen, moropkine.

³ Atonun, nun ni Allah Yahweh. Nun malye weik unyap ning nirya ati, ‘Aninye wenepnamne do?’ tenen, tuba kum tenenamsilame. Na nio ance nun malye wininyap ning tuba tenepsiminyopura, yatanye birye, an damak yanuka, kanye deibuka tiktu do? Kume, nun tukwak ninye nirya arye, ‘Se, Allah arye wenebuka opsilyak’ tenen, alye dakdanuka duknupdatibye. An damak, yanmanto kum uptibye.

⁴ Se na nio, nun malye unyap ning ati, wenenauk winilamsutum bukni, anda, ‘Sik malye wininyak ning nirya ara, namin kipnirye, aninye lyepnyopura, sik malye wininyak ning kum kilinamne’ tenen, patakilibuk, bico tenesilyamnye, ulyama anya arye, ninye nirya arye, anti ilil asa unamabe. Ara, ‘Allah elda weik mambulnye ulule. Tonda, Allah elda pia telebnye ulule,’ tenen, an siuk, pia erenauk wininamkiyabe.

⁵ Aning atonun, na nong ap, na kanye talima ap nirya ara, anti kintinipnirye, ‘Allah Yahweh, yata talak yanuka melibuka lyepropnamnil do?’ tenen, dinauk unamne. Na ni Allah an yupu ara, pia teleb yupu ulula anya arye, Allah arye “Winipnamsine,” nyabuka, nyalin yupu deice arye nyapsuk ning atibuk, ‘Dan talak arye wiripnamnil do?’ tenen, dinauk unamne. ‘Ayupu moubuka tenepnirye, telebuk unamne’ tenen, an yupu deice na kanye delinune.

⁶ Na talima noutamak arye, Allah Yahweh ati, pia tuba tenena arye, kanye delinune. El tibuk pia patanulule. ‘Na ni Allah, dan talak yanuka lyepropnamnil do?’ tenen, na kanye talima noutamak ara, anti kintinibuka dinauk unamne. Ninye aik kalikina deiyok nang arye, lukunyan noutam, ‘Yu nang arye yanuka, opsikirye, nun talenyap ning, dalubuka dopropsicak’ tenen, pia dinauk ulamake. Aning atonun, narye, ‘Allah dan talak arye, yanuka lyepropnamnil do?’ tenen, anti, pia kintinibuka dinauk unune. Lukunyan kalikina deiyok nang arye, ‘Se, minopce berektue,’ tenelamak touk, sikda mitik anun aryuk tenenyak bukni, Allah ati tenikunun ning ara, pia weik arye pataniliba, tuba tenenune. Narye anti, pia moubuka dinauk ukunune. Inipmalye babye, berekmalya babye nirya, anti, an siuk erepkinirye, pia kintinibuka dinauk ukunune.

⁷ Se, sik Israel ninye nirya babye, Allah el damuk yanganamlume. ‘Nun ni Allah Yahweh arye, dan talak yanuka melibuka lyepropnamsilam do?’ tenen, anggun ni koprop Allah Yahweh ati, pia moubuka dinauk unamlulume. Winilamunyeura, Allah arye bico tenepsilirye, tuba-tuba melibuka lyelonamsile. Allah arye nun tukwak ninye nirya ati, pia bico tenesulule anya arye, pia kum bataknamsile. Allah arye, ‘Na tenena ninye ati, melibuka lyelonamne’ tenen, tuba-tuba kintinilisulule. Tonda, Allah elda pia mikip weiknye ulula ati, pia ikin ning noutamak utibya babye, melibuka lyesulule. Elda ikin kum uptue.

⁸ Allah elcuk nun Israel ninye arye, malye wininyap ning nirya, namin kipsilirye, kum kipdeipsilyopura, lyepnamsile. Lyebuka dopropsilirye, pia teleb winilinamsile. Nun malye wininyap ning ati, wenebuka oplopsutu bukni, bico tenepsilirye, amalye wininyap ning nirya ati, namin kipsilirye, lyesulule.