Mazmur 127 - Eipomek

Allah el si eren aik bana ati, Yerusalem mutuku welebuka, balamik talak ara, amot nyalamik

¹ Sisinanye Raja Salomo birye, kanye deibuka mot sena deice arye nyabuk. Allah Yahweh aryuk, tonok aik kum dobika ara, anyaik dopnamak nang ara, urdem atibuk, talye aik donamake. Aning atonun, Allah Yahweh arye, tonok weik ninye asik ara, kum kaliklyopura, sik weik asik kalikinamak nang babye, talye atibuk kalikinamake.

² Yata nang do nirya, pia beren tam koprop arye bukuka, pil donmaca ani, iniplya babye, talye pil atibuk donamake. Tonda, atonun tonoknye ton, ‘Na din ning dopropnamne’ tenen, tonok sum, pia pi dobuka, donmalya babye, talye atibuk donamle. Deiyok ara, sik ni Allah Yahweh arye sikti, din ning ayala-yala nirya aresulule. Allah arye nun ninye nirya, akunum kwepdeipsuka anya arye, elce nunti, bico tenepsilirye, nun patapsilye touk, arenamsile. Allah Yahweh arye, nun ninye nirya ati, bico tenepsilirye, nun mana ati, lo arepsiliba, manyabe. Winisilya ati ara, Allah ati kum dib tenebibirye, pia pi dobuka, talye piluk doltakana kume. ‘Allah arye melisilya deice aryuk unyabe,’ tenebuka pil donamabe.

³ Dipkoprop nun ninye arye deilinyab mapu nirya ara, Allah el bidamnye aryuk, talye aresulula anya arye, amapu nirya ara, ‘Allah arye nun mapu nirya ara, dekne ning arelamak touk aresulule,’ tenenamabe.

⁴ Kam talak aniryuk, sal mapu weik arye delinyak ninye ara, winipmanto ninye tonoknye birye, mal weik arye wamlibuka talilamle atonun, unyake.

⁵ Yatanye do nirya, sal mapu weik arye delilamlanye bira, el anye bira, ‘Allah arye, sal mapu weik arye wamlibuka arenulule’ tenen, kanye pia delinamle. Winipmanto ara, mal weik wamlibuka talilamlanya birye, kanye delilamle touk, ubuka kanye delinamle. Tonda, yatanye do nirya, sal mapu weik arye delilamlanye bira, el oldan nang yakce talak ara, kum ilil unamle. El oldan nang, yanganmaca ani, keil poka bublan dam yaica babye, ilil kum upnamle.