Mazmur 126 - Eipomek

Yerusalem mutuku welebuka balamik talak ara, Allah el si erena ati, amot nyalamik

¹ Kanye delina deice arye, amot nyabik. Minop talak Babel mutuku nang arye, Israel ninye weik arye, tomobuka bobinamik bukni, Allah Yahweh arye tamubuka, Sion mutuku yanuka deipsuke talak ara, ninye arye, lengdar deice eipmace ning ati, kanye lopliba, sik ninye kanye delilamak touk, ubuka kanye lopsuke.

² Atalak ara, pia kil-kil upsukba, akutububurye, nun ni Allah ati, kanye lon mot nyalamupu. Allah arye tamubuka, Sion mutuku yanuka deipsuk talak ara, sik dana-dana tam ulamik ninye nirya arye, nunti nyalamsike. ‘Se, Allah el si Yahweh arye, sik Israel ninye ati, weik mambul pil akunum dopsuke,’ nyalamik.

³ Anang nirya arye nyalamik touk, dipkoprob nun babye atonun, nyanyabe. Allah el si Yahweh arye, nun Israel ninye ati, pia mambul pil akunum dopsuke. Ati ara, nun pia kil-kil kanye bobuka, telebuk unyabe.

⁴ Winipmanto ara, mok ap, mek ap kum ati, buppu weik arye, ninye kum ulamik mutuku noutamak bukni, Allah arye areplibuk, mek panabuka balirye, tamubuka tuku teleb kililamle touk, ‘Nun ni Allah, el si Yahweh arye, nun kanye imun ulamsuk ning ati, punubuka teleb kilinmasil,’ tenepmabe. Ara, mek pia kum mutuku, amutuku si ara Negeb mutuku noutamak ara, mek panabuka balamle tonun, Allah arye winipdeipmasile.

⁵ Winipmasil ning ati ara, nunce ayupu ton nyapnamabe. Ninye nirya engebuka, asing maka adiparyuk bakirye, wa wibuka yala dokamiki bukni, ayala paplirye, nong upliba, linamice talak ara, weik arye kanye deibikirye, sik kanye lon mot senamake.

⁶ Aning atonun, ninye asing maka aryuk engebuka bakirye, yala ning dokikceura, tuba tamubuka bikirye, kanye deibuka mot senamake. Ara, kouamice ning wisiplyeura, libuka deibikirye, bobuka yanganyak talak ara, kanye lon mot nyabikirye, boyanganamake.