Mazmur 124 - Eipomek

Israel ninye nirya bulubuka, Allah el si eren aik, Yerusalem mutuku damak, welebuka balamik talak, nyalamik mot

¹ Daud kanye deibuka, mot sena deice arye nyabuk. Na kayapu, Allah Yahweh arye, nun Israel ninye ati, ‘Melinamsine,’ nyabuka, kum nyasulula anya arye, nun dam ara, yata ikin ning yasutu do?

² Tonda, yu mutuku nang nirya arye, nun Israel ninye ati, ‘Anang opnamap’ tenen, nun dam yanamsik talak ara, nun ni koproba Allah Yahweh arye, kum meilyamsuk do? Kume, meliamsukba, ikin ning, nun damak kum wamsuk bukni, Allah arye kum meilyamsutopura, yata ikin ning ton nun damak wamsuk do?

³ Tonda, sik yu nang arye nunti, sik yu ara, uku buk dilamle touk, nun deice delilamsik talak ara, nun ni Allah Yahweh arye, nun kum meilyamsutopura, nun mal olan nang arye, akunum oplomsitinge. Allah arye nun kum meliamsutopura, anang arye nunti, kam kipman obuka dopkweicamsitinge.

⁴ Winipmanto ara, Allah arye nunti, kum meilyamsutopura, sik yu nang arye obuka, sirya dakamsitinge. Winipmanto ara, weik mek oplirye, aning-aning nirya bobuka balamle touk, winyamsitinge.

⁵ Nun mal olan nang arye, olyasik talak ara, yin talin nang ara, yupa pia weik yanamika anya arye, aninye arye, ‘Israel ninye opnamabe’ tenen, yanuka onmasitingce, mek olamle touk winyamsitingba, asukumuk diamtibye bukni, nun ni koproba Allah arye, meilyamsuka anya arye, kum obuka binamsike.

⁶ Winipmanto ara, bai tam ulamle kuse, el nong weik ap, yu weik ap ulul kuse, el si ara singa kuse arye, yuk kam ulul ning opnulya ati, si topdongobuka bolbolok alamle tonun, yu nang arye, nun yanuka, talibuka opsiting bukni, nun ni koproba Allah arye, nunti meilyamsuka anya arye, aning ara, kum winyamsike. Ati, Allah el si kibuka, si erenamabe.

⁷ Aning atonun, winipmanto ara, maka wena wepmacak, maka mangkau arye wekelbiliba, yupliba, loplobuka balamle touk, Allah arye, nunti lyepdeiamsuke. Tonda, maka wemica pum bisik biliba youpli bukni, tapu seklobuka, kuplobalamle touk, nun ni Allah arye nunti, winibuka lyepdeipsuke. Ara, Allah arye, nun oldan nang kan-kan arye, lyepsuke.

⁸ Ati ara, nun melina deiyoknye bira, Allah Yahweh el tonok ulule. Nun ti melilyanamsilanye bira, Allah Yahweh el tonok ulule. Allah elda, weik kwemdina deiyoknye ulula anya arye, tukwak mutuku, im sirya, mutuku sirya ap, im deice ulul ning nirya ara, elcuk kwepdeibuk.