Mazmur 123 - Eipomek

‘Allah ara, bico tenesilirye, teleb kibuka melipsutue’ tenen, Allah ati, morona yupu

¹ Israel yala nang arye, weik kwalya kwalin sum akunum uplyeura, ‘Allah ati, el si erelbinamap’ tenen, Yerusalem mutuku wekelbalamik talak, Mazmur yupu mot nyanamika ati, sekuk yupu. Se nun ni Allah, anti, na urasin erepnirye, an winilyamak ap, an ap ati dinamkine. Bukni, anda, mikip weiknye, im deice noutamuk umince, aning-aning nirya talebuka, weik deiyoknye ulyama ati, ‘Na ni koproba Allah eipnamne’ tenen, na urasin erepnirye, an tam dinamane.

² Ara, nun ikin unyaba ati, ance nunti dipdebuka melipsilyame na nio. Nun nirya arye, ‘'Nun ni Allah, elcuk melinamsil’ tenen, an atibuk patapsilyeba, anti morokinyabe. Winipmanto ara, bona talin nang, sik amu tam talye pil donyak nang arye, ‘Na deiyoknye birye, yata yupu nyapnamasil do?’ tenen, el dam dinauk unyak touk, nunce an dam dina ap, kekena ap unyabe. Diba winipmanto ara, talye pil dolamlye kil arye, el deiyok kil dam yanuka, ‘Yata yupu nyapnunil do?’ tenen, ebuka dina ap, kekena ap, ulye touk, nun babye, an dam yanuka kekenauk unamabe. Aning ati ara, nun urasin erebibirye, ‘'Nun ni Allah, el si Yahweh ara, dan sukum ulul do? Dan talak yalirye, teleb yupu nyapsilirye, melibuka lyepnamsil do?’ tenebuka unyabe. Tonda, anti dipdebuka kekenauk unyabe na nio. Ara, nunda malye wininyak nang unyap bukni, Allah arye aning namin kipsilirye, el kanye aryuk bico tenepsilirye, teleb kibuka melinamsil talak ara, min kum yanmalye talak nirya ara, nunce el dam yanuka, dinauk unamabe.

³ Se, nun ni koproba Allah Yahweh, an kanye deice aryuk, nunti, bico tenepsimince, teleb kibuka lyepsimince, melinamsilam’ tenen, moronauk unamkiabe. Diba, nunti, ‘Nun lik,’ tenesinyak nang arye, nun deice, pia mali yupu weik nyasinyaka ati, akunum mikip namin unyaba ati, nunce, “Se, nun ni Allah, melibuka lyepsilyame,’ nyabuka morokinyabe. Deiyok ara, asum-asum nirya ara, nunti, ‘Nun lik,’ tenesinyak nang arye, nunti, ‘Anang dauplye,’ tenepsikirye, nyek-nyek nyana ap, malye yupu nyana apuk winisinyake. Aning nirya ati, nunda akunum like usulule.

⁴ Yata karin talak arye, nun kanye talima noutam ara, ‘Se,’ tenen, lik weik akunum usulule. Se, yupa weik talak deice arye, ikinuk akunum ubupu ati, ara tuba kum winitibye na nio. Aning deiyok ara, ikin kum uplyeba, sik talye kanye bobuka, telebuk unyak nang arye, nunti, ‘Sikda malye nang unayake,’ tenesikirye, nyek-nyek nyabuka, malye yupu nyasinyake. Aning nirya ati, nunda akunum lik usulule. Diba, sik maknya kipdanuka, nun Israel nang ati, ‘Nun lik, anggunda mali nang uka,’ tenesikirye, malye yupu nyasinyak nang ati, nun akunum ‘Lik,’ tenenamabe na nio. Ati, ancuk, yanuka melipsilyame na nio.