Mazmur 121 - Eipomek

Allah arye Israel ninye meilyamuka ati, mot nyabuk yupu

¹ ‘Allah el si erenamap’ tenen, Yerusalem mutuku welebuka balamik talak, nyalamik mot ara ani. Narye mutuku-mutuku nirya dinmanirye, ‘Se, na melipnamnilnye bira, dan mutuku arye yalirye, melipnamnil do?’ tenen, dinune.

² Na melilyanganilinye bira, na ni Allah Yahweh ulule. Elda, im deice ap, tukwak mutuku ap, kintinibuka deibuka deiyoknye bira, Allah el tonok ulule. El dem aryuk melinamnile.

³ Tonda, elce nunti, kum bataknamsile. Teleb ubuka kaliksiliba, nun yan babye, ton alap pitikuka kum opnamsile. Allah arye, nun Israel ninye ati, pia kalikisululnye bira, ton pia kum malule. Elce tuba-tuba nun damak ulirye, kalikuka melinamsile.

⁴ Dipkoprop nyapne, Allah el si Yahweh arye, nun Israel ninye ati, melibuka kalikinamsile anya arye, elda wi dukna ap, mana ap atonun, kum unamle.

⁵ Allah Yahweh arye, nun damak ausilirye, melibuka dinamsile. Tonda, nun ni Allah Yahweh aniryuk, nun dobukapsilirye, nun diksukum tamuk kalikinamsile. Ara, winipmanto ara, keting deiplye talak, weik yo tikamlyak, amu tam keting koak bulamaka atonun, Allah Yahweh arye, erebuka deice tam uliba, nunda el amu tam unamabe.

⁶ Wininamsila ati ara, keting noutam talak ara, keting deiplirye, nun nong deice, keting pia kum dinamsile. Lukunyan talak babye, wala dirina uplye talak ara, arukuna nun nong deice kum yanganamsile.

⁷ Allah Yahweh arye, nun nirya ati, kalikuka melisilya deice arye, nun opmanto ning nirya ara, nun damak ton pia kum unamsile. Elce teleb ubuka melisilyeba, kamuk unamabe.

⁸ Allah Yahweh arye, nun ban talak babye, yangan talak babye, pia teleb ubuka kalikinamsile. Ara, wini talak arye dipdongobuka, yuk dotalak babye, pia ati kalikinamsile.