Mazmur 120 - Eipomek

Daud arye, “Melipnilyame,” nyabuka, morobuk yupu

¹ Nara, imun kanye bobuka, unye talak nirya arye, ‘Na ni Allah Yahweh arye, na damak yanuka melibuka lyepnamnil’ tenen, “Na ni koprop, ance yanuka, melibuka lyepropnilyame,” nyabuka moronune. Narye Allah ati, moronye talak nirya ara, kekeplirye, melininulule.

² Diba na ni koprop Allah Yahweh, “Ance sik talye yupu nyaltakanyak nang ap, minina yupu nyaltakanyak nang nirya ap, sik aunyaka noutamak arye, na lyepropnilyame,” nyabuka moropkine.

³ Se, sik tilila yupu nyanyak ninye wenena ati, Allah arye, sik nong deice ara, yata ikin ning arepnamle do? Tonda, elce sik tilila yupu nyanyak ninye ati, ‘Weika arye tonap tabakuka wenepnamne,’ teneplyopura, yata ning deice arye sikti, wenena ning dobuka, sik nong deice deipnamle do?

⁴ Na kanye ara, elce lo areplibuk, yu nang arye, mal tace lubuka deibikirye, ‘Sik tilila yupu nyanyak ninye nirya opnamak’ tenen, mal dobikcopura, opnamsiake. Tonda, ninye arye, kat yo uku dapmakiba, dipropmalirye, uku kalum dem lolamle ning dobuka, anggun anang nong deice deipnamsiyake.

⁵ Se, nara, bico tenena kumce, pia yu upliba, yuk nang ati, oltakanauk wininyak ninye noutamak ununa anya arye, na malye kanye bonune. Ara, sik yu weik ninye, Mesek mutuku nang ap, Kedar mutuku nang ap atonun, ubuka wininyak ninye noutamak neika ununa ati, na malye kanye bobuka unune.

⁶ Na ap neika unyap ninye ara, yuk ninye nirya ati, ‘Neika kanye talima lamapdongobuka arye, dukdongobuka unamabe,’ tenebuka pia kum unyake. Sikda, ‘Yuk ninye nirya ara, nun like,’ tenen, onauk unyake. Ayu ninye ap, neika ulamse talak ara, keting tamun weik ulamse anya arye, na lik weik unulule. Ati, na patanulul ning ara, ‘Sik kanye bobuka, unyak ninye ap, na ap, neika pia kum unamabe,’ tenenune.

⁷ Ara narye, “Yuk ninye ap, neika talima dukdongobuka winin ning ara, teleb uka,” nyalamne talak nirya ara, na ap neika unyap ninye ara, yu weik ninye anya arye, sikce, “Kume, yuk ninye ap, kanye talima dukdongobuka namin asa arye, neika un ning ara, nun like. Teleb ning ara, nunda mal olanauk wininamabe,” nyanyake. Ati ara, na lik weik unulule. Daud arye nyabuk.