Mazmur 12 - Eipomek

Israel mutuku noutam ara, ninye nirya arye, malye weik winilamikba, Allah ati morobuk yupu

¹ Ninye deiyoknye Raja Daud birye, Mazmur yupu mot sekuk. Ara, Allah yupu mot nyana deiyoknye, el arepnamuka ati sekuk. Tonda, amot ara, yuk mot, el si Shemit lelim nyalamupu deice arye, amot babye alelim deice nyanamlume.

² Se nun ni Allah Yahweh, Israel mutuku noutam ara, ‘Allah arye nyasilye yupu moubuka kekebikirye, aninguk talibuka, telebuk wininamap’ tenen nang ara, tonok ning babye, tuba kum wininyaka ati, nun nio ance yanuka lyepropsutume. Diba tukwak mutuku unyak yala nang nirya ara, tonoknye babye, ‘Nara pia kum bataknamne bukni, Allah arye nyasilye yupu, moubuka talibipyak arye, diksukumuk unamne,’ kum tenelule. Ninye nirya arye, an yupu ara, akunum yaniltakanyake.

³ Allah arye nyasilye yupu pia kum tenenyak bukni, ton nang arye, sik kayapu nang nirya ati, talye-talye yupu nyalanyake. Sikce, yuk nang ati, ‘E, anda pia telebnye ulyame,’ nyabuka, talye aryuk, tilila yupu deice arye nyanyak bukni, sik kanye talima noutam ara, pia yuk ninguk tenenyake.

⁴ Aning ati ara, nunce, ‘Anda Yahweh arye, talye yupu nyanyak ning ara, sik sitang bam bol seklopminyeura, tilila yupu ton tuba kum nyanamak’ tenen, morokinyabe. Maknya kintilanmakirye, sik sitang ap, si bambol ap deice arye, weik dib tenen yupu uk nyanyake.

⁵ Tonda, malye kanye bobikirye, anggunce, “Nun weik kel yupu arye nyapmunyeura, yuk nang nirya ati, malye kipnamabe. Sikda nun amu tamuk unamake,” nyabuka nyanyake. Tonda, sik kanye erepdakirye, “Nun kanye aryuk tenenyap yupu nirya ara, talye lukdanuka nyanamabe. Yata deiyoknye birye, ‘Ance aning ara, winiplyame, aning ara, pia kum winipnalame,’ nyabuka, yupu nyapdeipsutu do? Kume, nun kanye aryuk tenebupu touk unyabe,” nyabuka, maknya kintilanmakirye, nyanyake.

⁶ Ati, nun ni Allah Yahweh arye tenebuka nyasulule. Ara, yu nang arye, sik bona kum ati talye kankan nang ati, yaniltaknauk unyake. Winikirye, ikin ning pia weik arye bobuka, sik nong deice delinyaka ati, sik talye kankan nang arye, ngalukuka engenyake. Aning ati ara, na Allah Yahweh, minop tiknirye, sik akankan nang ati, melilyanamne. Sik talye kankan nang arye, ‘Se, nun ni Allah lyepsuturye, pia telebak deipsutuba, talye urdem uptibye,’’ nyabuka, ikin kanye bobuka, ukirye morolamak nang atonun kibuka, dipkoprob anggun dam yanuka lyepropsinirye, ninye yanuka kum opmanto sukum dobuka deipnamsine!

⁷ Aning ati ara, Yahweh arye, ‘Winipnamsine,’ nyabuka, nyalin yupu deice arye nyasilye yupu nirya ara, pia dipkoprob yupu ulula ati, elce peteresilye touk dipkoprob winipnamsile! Winipmanto ara, ninye arye dekna weik ning, el si perak dobuka, like nakub barye deice arye, uku dongobikceba, uku arye malye ning nirya akunum diplyopura, perak pia teleb ninguk lake kilamle touk, Allah arye nyasilye yupu noutam ara, talye yupu tonok ning babye, pia kum ulule. Dipkoprop teleb yupu nyasulule.

⁸ Ati nun akunum bikupe. Wini talak ara, pia malye nang kan-kan noutamuk unyap bukni, nun ni Allah Yahweh, ancuk, melibuka kalikisiminya deice arye, telebuk unamabe. Ati, ance talibuka kaliksiminyeba, wini talakk unyak yu nang arye, ton ap kum opsitinge. Wini talak arye dipdongobuka, doyanamle talak nirya ara, ancuk pia moubuka kaliksiminyeba, sikce tonap malye kum kipdeipnamsiake.

⁹ Wini talak ara, amutuku unyak nang bokuka, pia weik tam nang arye, ‘Malye winin ninguk talibuka wininyake!’ nyabuka, talima erebikirye, kwalinyaka deice arye, malye pia weik wininyake. Ati, nun dana-dana tam nirya ara, sikce, ‘Yatanye ton obuka malye kiptibye do?’ tenen, pia epnin banyake. Winipmanto ara, yu kam arye, ‘Ayam maka ara, dan sukum unmatuak, obuka diptinye do?’ tenen, pia pi doplirye, epra balamle touk unyake.