Mazmur 118 - Eipomek

Allah arye meliamukba, akunum winibuk ning ati, telebe nyapdeibuk yupu

¹ Allah Yahweh el tibuk, “Pia telebe,” nyabuka el si erenamabe. ‘El teleb una deiyoknye ulirye, kanye delisulule. Tonda, elce nunti, weik arye bico tenepsilirye, melisulule. Aning ara, kum kum danamle, pia aunamle,’ tenebuka, nun Israel yala ninye nirya arye, el siuk erenamabe.

² Winisilya ati ara, sik Israel yala ninye nirya ara, “Allah arye nunti, talima areliba, bico tenepsilirye, kanye delisulule. Aning ara, kum kum danamle, pia ati unamle,” nyabuka, nun Israel yala ninye nirya arye, el si erenamlume.

³ Atonun, Harun birye deibukba, dadeipdanin, yangalalum nang ara, Allah el si eren aik noutamak talibuka, pil dolulum nang, imam-imam nang, sik nirya ara, “Allah arye nunti, talima areliba, weik arye bico tenesulul ning ara, kum kum danamle. Aning ara, pia ati aunamle,” nyabuka, el si erenamlume.

⁴ Tonda, Allah el tibuk, pi deibuka dib tenekirye, elti, ilil tenenyak ninye nirya ara, “Allah arye talima areliba, weik arye bico tenesulul ning ara, pia ati aunamle,” nyabuka, el siuk erenamlume.

⁵ Na ton imun kanye wamnuk talak ara, Allah Yahweh atibuk, malye nyabuka ngaluksirye, moropse. Moropse ning ara, elcuk kekepnukce, na kanye imun upmanuk ning nirya ara, elcuk lyepropnukce, teleb updeipnuk.

⁶ Aning ati ara, na ilil upniliba, yok sirim kum talipnamnile. Ara, Allah Yahweh aryuk, pia tuba melinilyame. Ati ninye yuk nang, sik mikip deice arye, na damak yanuka, asilen ning ton kum winipnitinge. Ara, Allah arye tuba melinulula ati nyapne.

⁷ Na ni Allah Yahweh, elda na damak ulirye, ton melinulula anya arye, nati on nang, na damak yanuce talak ara, ‘Anye bira, el nong deice weik ikin ning deipnamap’ tenen, yanganyak bukni, Allah arye, “An mal olan nang akunum yanganmaka ati, kalikuka pia dinamlyame,” nyaniliba, nara dinauk unune. Na mal olan nang ara, Allah elcuk obuka, sirya dakanamle. Na oldan nang obuka bisinamle ning ara, nara asing aryuk dinamne.

⁸ Winipnamle ati, teleb ning ara, ‘Allah Yahweh, el amu tam binuka una ara, pia telebe. Allah elcuk melinamnile’ tenen, el tibuk moronamne. Bukni, ‘Sik ninye tukwak ninye atibuk, sikce melipnitinge,’ tenena ning ara, pia kum tenenamne. Ara, nun tukwak ninye nirya ara, mikip kumce, mitang ninye uk unyap bukni, Allah elda, mikip weiknye ulula ati, nyapne.

⁹ Atonun, ‘Ninye deiyok kibuka unyak nang, sik amu tam upniba, melinamniyake,’ kum tenenamne. Bukni, teleb ning ara, ‘Allah Yahweh el amu tamuk, kanye lamapdongobuka mitang asa arye unamne. El dem aryuk melinamnile,’ tenenauk unamne. Nun tukwak ninye nirya ara, aning atonun tenebuka unamabe.

¹⁰ Minop talak ara, na mal olan nang weik yangalamikce, yanuka weik arye, wareklamnik bukni, Allah Yahweh, el mikip weik deice arye meliamnukba, Allah Yahweh, el si deice arye, sik aolyangalamnik nang nirya ati obuka, sirya daklamse.

¹¹ Ara, tonok bisik aryuk kum yangalamik. Dana-dana bisik ap, itam bisik ap, outam bisik ap nirya yangalamikce, yanuka wareklamnik. Bukni, winilamnik talak nirya ara, Allah Yahweh el mikip weik deice arye meliamnukba, Allah Yahweh, el si deice arye, sik aolyangalamnik nang nirya ati, olbisilamse.

¹² Winipmanto ara, na mal olan nang arye, yanuka wareklamnik talak ara, ‘Mong arye, ninye si topnuyap’ tenen, amubuka dobolkiriklamak touk, winilamnike. Tonda, winipmanto ara, sik anang nirya ara, mutmuta kel-kel alamle ning, uku dinipdongobikiba, uku din kumabuka paplirye, uku buk dilamle touk, winilamnike. Ara, obuka sirya dakmanto winilamnik. Winibuka ulamnik bukni, winilamnik talak nirya ara, Allah Yahweh el mikip weik deice arye meliamnukba, Allah Yahweh el si deice arye, sik aolyangalamnik nang nirya ati, olbisilamse.

¹³ Nara, na oldan nang, sikce mikip weik arye yaribuka, ‘Dopkwetepnamap’ tenen, dopkwetepnikba, kote sakmanto ulamse bukni, atalak-atalak nirya ara, Allah Yahweh, el mikip weik arye, nati meliamnukba, aolyangalamnik nang nirya ati, olbisilamse.

¹⁴ Allah Yahweh elcuk melinulula anya arye, elda na mikip kilinanye ulule. Ati, narye el tibuk, “Telebe,” nyabuka kinamabe. Ara, talye ati kume. Allah elcuk, nara akunum lyepromnuka ati, nyapne.

¹⁵ Kekepdelulume. Allah Yahweh el mapu koprop, sik diksukum wininyak ninye ara, sikce asik dobuka unyakak nirya, “Nun ni koproba Allah arye, nunti, melipsilirye, nun oldan ninye nirya akunum obuka bisilule. Ara, Allah el mikip weik deice arye, mambul pil domsukce, nun oldan ninye nirya ati, obuka bisilamsuke. Allah arye nun melina ati, el sirik taruk deice arye, weik mambul pil dosulule,” nyabuka, el si atibuk kinyake.

¹⁶ Tonda, “Allah Yahweh, el mikip weik arisilya deice arye, mikip weik upsilye deice arye, nun oldan nang nirya obuka bisinyabe. Allah arye nun melina ati, el sirik taruk arye, weik mambul pil dosulule,” nyabuka, el si atibuk kinyake.

¹⁷ Nara, kum dipnamne bukni, pia tuba kamuk unamne. Akam tuba unamne talak ara, na ni Allah Yahweh, elce weik mambul pil dolul ning nirya ati, narye sik yuk ninye kekena ati, laka nyanamne.

¹⁸ Allah el si Yahweh arye, na malye winilamse ning nirya wenena ati, weik ikin ning, na nong deice deiamnukba, kanye imun ulamnuk. Bukni, Allah arye nati, ‘Elda dipturye, ninye dibikirye, banyak sukumuk bitue,’ kum tenelamnuke. Melipnukba, el mikip deice arye, tuba kam unune.

¹⁹ Aning ati ara, Allah Yahweh, el si eren aik, bisik bublan wekelbanak yanyopura, minopce anyaik bisik bublan kukdeipnululume. Winipnumunyeura, narye Allah el si eren aik wekuka binirye, Allah Yahweh ati, “Telebe,” nyabuka, erebuka kinamne. Winipnirye, el siuk pia erenamne.

²⁰ Allah Yahweh, el si eren aik wekelbana ati, bisik bublan ara, atia. Abisik bublan wekelbana ati ara, diksukumuk telebuk, winibuka unyak ninye ara, abisik bublan wekelbinamake. Bukni, malye winin ninguk, talibuka unyak ninye nirya ara, pia kum weknamake.

²¹ Ati nara, Allah an siuk, pia erenamkine. Ara, talye ati kume. Na ni Allah, na morokunun ning nirya ara, kekebuka melinilyama atia. Tonda, na mal olan nang nirya, obuka bisilalumce, nati pia lyelonilyama ati, “Telebe,” nyapkine.

²² Tonda, sik asik teleb ubuka dolamik nang arye, ‘Akeil urasin malye keil’ tenen, dobuka, bai tam donokik. Akeil ara, bataklamik bukni, akeil dobuka, bai tam donokik keiluk, weik mambul keil akunum upmale. Winipmanto ara, keil aik donyak nang arye, ‘Akeil aik abilinga nirya, pia teleb diksukumuk upnamle’ tenen, minopce delilamak keil atonun, sik bai tam donokik keil ara, weik mambul keil akunum ulule. Winipmanto ara, yuk keil nirya ara, mitik mambul bukni, akeil tonok ara, weik mambul aik dona deiyok keil, akunum ulule.

²³ Aning ara, Allah Yahweh elce, ‘Akeil ara, weik mambul keil unamle’ tenen, akeil dobuka, erepdeibuk. Allah elcuk apil nirya dobuk. Ati dipkoprop, nun aninye nirya arye, aning eibibirye, ‘Se, ara weik mambul’ tenen, kel bikibirye, ngalukunamabe.

²⁴ Allah Yahweh arye tenebuka, kintinip deiamuk talak ara, akunum upmala ati, nun nirya arye, atalak nirya ati ara, weik kanye deibibirye, Allah el siuk erebuka, si erenamabe.

²⁵ Diba, nun ni Allah Yahweh, nunce anti moropkiyabe. Ara, “Allah ance, nun moropkiyap ning, adiparyuk kekepsimince, lyelonamsilame,” nyabuka morokinyabe. Tonda, “Allah Yahweh, an mikip, nun deice deipsiminba, nun mal olan nang nirya obuka, sirya daknamabe. Tonda, nun pil donamap ning nirya ara, teleb ubuka, pil dobipyeura, telebuk unamle,” nyabuka, anti morokinyabe.

²⁶ Allah Yahweh el si deice arye, dopkweteplibuk, yanamlanye ati ara, nunce elti, Allah Yahweh, el si erenyap aik noutamak wekibirye, elti, si erenamabe.

²⁷ Allah Yahweh elda, Allahuk ulule. Winilirye, nun kanye talima noutamak ara, kel bikna deiyok ning ap, kanye dirina kin ning ap, aresulule. Winisilya deice arye melisulule. Ati, ‘Na ti arin ning ara, sik aninye arye arenamkiyake’ tenen, kintinip deibuk talak akunum uplyopura, Allah el si erena ati, imbik yo bok bobuka, wekelbimunce, Allah Yahweh el si erena ati, keil yangabuka, taplakuka kintinip deibik ning dam, binamlulume. Ara, akeil yangabuka, taplakuka kintinip deibik ning dana-dana tam, sapi kisok yang dana-dana belelamle atonun ning, puturulilamak ning dam binulume. Ara, Allah el si erena ati binulume.

²⁸ Anda, na ni koproba Allah unilyame. Aning ara, narye na ni Allah antibuk, “Telebe,” nyabuka, narye Allah an siuk, weik arye erenamkine.

²⁹ Allah Yahweh, el si atibuk erenamabe. ‘Elda teleb winina deiyoknye ulirye, kanye delisulule. Tonda, elce nunti, kanye arisiliba, weik arye bico tenepsilirye, melisulule. Aning ara, kume kum danamle, pia aunamle,’ tenebuka, el siuk erenamabe. Na Raja Daud arye nyapne.