Mazmur 116 - Eipomek

Dipmanto ubuk bukni, lyeprobuk ati, mot sebuk yupu

¹ Nara, Allah Yahweh ati, tuba kanye delinamne. Ara, na kanye imun upnilye talak nirya ara, Allah ati moropnyeura, el kekeplirye, elce nati, moubuka melinulule.

² Na ikin weik ulamnuk talak ara, na ni Allah ati, malye nyabuka moropse talak ara, el kekepnukce, meliamnuka ati, na kam unamne talak nirya ara, el tibuk moronamne.

³ Tapu koubikiba, kum lopmanto ulamle touk, upnukbuk, nara dipmanto wamse bukni, Allah arye lobuka lyepropnukba, kam unune. Dipmanto upse talak ara, ‘Dipnun do?’ tenen, ilil weik upnukce, na kanye talima weik arye uk dipnuke.

⁴ Dipmanto upse bukni, winipnuk talak ara, na ni Allah Yahweh ati, moropsirye, “Na ni Allah Yahweh, ance nati, melibuka lyepropnilyame,” nyabuka moropse.

⁵ Nun ni Allah Yahweh, elda ninye ati, bico tenena ap, melina ap deiyoknye ulule. Allah elda, malye winin ning, tonok ning babye kum ulirye, diksukumuk winilula anya arye, nunti kum batakasulule.

⁶ Ninye kanye talima erelana kumce, kanye lamapdongobuka ululnye bira, Allah Yahweh arye melilule. Ati ara, na mikip pia kum wamnuk talak ara, Allah arye nati, melibuka lyepropnuke.

⁷ Allah el si Yahweh arye, akunum melipnuka ati, na kanye talima lamapdongobuka arye, el amu tamuk unamne. Ati winipnirye, pia kum teniltonamne.

⁸ Na ni Allah Yahweh, na dipmanto ulamse talak ara, ance lyepdeipnulume. ‘Na dipnun do?’ tenepse talak ara, kanye imun upnukba, weik arye ngalukuka engenmasebuk, na ni Allah Yahweh, ance melibuka lyepropnulume. Tonda, na yan dum duknukba, sakmanto ubsibuk, Allah ance talibuka, Allah atibuk, tuba-tuba dib tenelamsa anya arye, na ikin weik ulamnuk talak ara, anti morolamkise.

⁹ Morolamkesiba, ance lyepnuluma ati, wini talak ara, kam tuba unyak ninye kan-kan, tuba kamuk unirye banune. Nara, na ni koproba Allah, el si Yahweh dam balamneba, elce elinulule.

¹⁰ Na ikin kanye bobuka ulamse talak ara, ‘Se, yata wiripnamnil do?’ tenen, ilil weik ulamnukba, ulamse. Atalak noutamak ara, “Se, nara, ikin weik unune,” nyabuka engelamse.

¹¹ Na imun kanye bobuka, ulamse talak ara, ‘Yata wiripnamnil do?’ tenen, ilil weik ulamnukba, ulamse. Atalak ara, “Yuk tukwak ninye nirya arye, na ati ara, tilila yupu uk nyaltakaninyake,” nyapkise.

¹² Allah Yahweh ance, aning-aning nirya ara, nati weik arye teleb ubuka, arelamnulume. Ati ara, narye yata teleb ning tamubuka, Allah anti arepkitinye do?

¹³ Allah ance ninye lyena ati, teleb yupu nyapdeiplum ning ara, narye, ‘Yuk nang kekebikirye, dib tenenamak’ tenen, pia laka nyabuka peterenamne. Tonda, ‘Allah ance pia melipnamnilam’ tenen, an siuk kibuka moronamkine.

¹⁴ Na ni Allah, an mapu nirya wekmekak arye, an Allah ati, “Wininamne,” nyabuka, nyalin yupu deice arye, nyapdeiamkise touk, dipkoprob wininamne. Kum bataknamkine.

¹⁵ Allah Yahweh ati dib tenenyak nang ara, tonoknye do, ton dibikcopura, sik anang ati, pia bico tenelule. Allah arye wipdeiamuk ninye dibicopura, ‘Aninye ara, pia weik mambule,’ tenelule.

¹⁶ Diba, na ni Allah Yahweh, nara an amu tam pil donanye unune. Ara, na deiamnuk kil ara, Allah an amu tam ulamuk kil arye deiamnuke. Tonda, malye ning arye, tapu koubuka, wenenak atonun deiamnuk bukni, ance lopdeipnuluma ati, nara an piluk donamkine.

¹⁷ Winipnulum ati, narye an si erena ati, kam ning obuka boyanirye, adiparyuk anti, “Telebe,” nyabuka, an si erenamkine.

¹⁸ Tonda, an mapu weik wekmeka noutamak arye, “Na nong nirya ara dobuka, Allah Yahweh anti arenamkine,” nyapkisa ati, aninguk tuba wininamne.

¹⁹ Ara, Yerusalem mutuku, Allah el si eren aik domikce, anyaik damak wekelbana ati, bai tam memepdeiamikak, tiknirye, ninye pia weik wekmacak arye, “Na nong nirya ara, Allah ati arenamne,” nyapnamne. Allah Yahweh ati, telebe nyanamne. Daud mot deice arye nyabuk.