Mazmur 115 - Eipomek

‘Allah, el mikip deice arye, aning-aning nirya talibuka ululnye, el siuk erebuka kinamap’ tenen, mot sebik yupu

¹ Nun ni Allah Yahweh, antibuk si erebuka kinamkiyabe. Ara, nun tibuk kibuka, kum erelanamabe. Bukni, nun ni Allah, ance nunti, bico tenepsimince, melisilyama ati, nun adiparyuk anti, si erebuka kinamkiyabe. Tonda, ance nunti, ‘Wininamsine,’ nyabuka, nyalin yupu nyapdeiamsulum ning nirya ara, tonok ning babye, kum bataksulumce, aning nirya winilamsilama ati, an siuk pia erekinyabe.

² Tonda, yata ning deiyok ati, sik yuk mutuku ninye mutuku-mutuku nirya, “Israel ninye, sik ni koprop Allah ara, dan tam ulul do?” nyabuka nalisinyak do?

³ Nun kele. Nun ni koproba Allah ara, im deice ulirye, ‘Aning ara, winipnune,’ tenepmalye ning ara, adiparyuk, aninguk winilule.

⁴ Bukni, sik yuk mutuku daunyak ninye ara, sikce talibuka, si erenyak ning ara, urasin pia teleb kat ning, el si ara emas ap, perak ap, ninye taruk deice arye dobuka, ninye urasin atonun ubuka, puturubuka deibikirye, “Nun ni koprop ani,” nyabuka, aning si erebuka kinyake.

⁵ Sikce talibuka, si erenyak ning nirya ara, sitang aubuk bukni, yupu ara, kum nyanyake. Asing aubuk bukni, kum elinyake.

⁶ Aning ara, amul babye aubuk bukni, yupu ara, kum kekenyake. Atonun, u aubuk bukni, nintong ning ara, kum kekenyake.

⁷ Tonda, sik taruk aubuk bukni, talin ning ara, kum talinyake. Atonun, sik yan babye, aubuk bukni, yanibuka kum banyake. Atonun, si bam bol aubuk bukni, yupu nyana ap, isin panana ap, si maka kum dilkwetenyake.

⁸ Yata ninye do nirya, atalye ning puturubuka delinyak nang ara, atalye ning kanye bona kumce ulul touk, sik babye talye kanye bobuka unamake. Sik babye taruk mikip adiparyuk, pil donyak ning nong ulye touk, sik babye atonun unamake. Tonda, atalye ning ati, “Nun ni koprop,” nyabuka, dib tenebikirye, si erenyak ninye babye, talye kanye bobuka unamake. Teleb winin ning, pia kum wininamake. Talyeuk wininamake.

⁹ Wininamaka ati, se, anggun Israel yala ninye ara, atalye nang wininyaka atonun, kum wininamlume. Nun ni Allah Yahweh, el tibuk, dib tenebuka unamlume. Winipmunyopura, elcuk anggunti, melibuka kalikinamsile.

¹⁰ Se, Harun arye, deibukba dadeipdanin, yangalamika ani, deipsik nang, anggunce Allah el si eren aik pum tam talibuka, pil dolulum nang nirya ara, nun ni Allah Yahweh atibuk, dib tenebuka unamlume. Allah elcuk anggunti, melibuka kalikinamsile.

¹¹ Se, ninye nirya arye Allah Yahweh ati, ilil upsiliba, dib tenebuka, unamlulume. Winipmunyopura, nun ni Allah elcuk ton, melibuka kalikinamsile.

¹² Nun ni Allah Yahweh arye, nun Israel yala ninye nirya ati, tuba tenesilya deice, telebuk kilinamsile. Allah arye Israel yala ninye ap, Harun yala ninye ap nirya ati, pia tuba melipsilirye, telebuk kilinamsile.

¹³ Allah ati ilil tenebuka unyak ninye ara, weik nang babye, mitik ninye babye nirya ara, Allah elcuk tuba melisilirye, telebuk kilinamsile.

¹⁴ Winibuka melipsilirye, Allah Yahweh el kil-kil kanye un ning, arepsilyopura, mapu weik arye deipdanin, binamlulume. Ara, anggun ap, anggunce deipmunba, dadeipdanin, banamak ninye nirya ati, unamsile.

¹⁵ Aning ara, Allah Yahweh im deice ap, tukwak ap, kwepdeibuknye, elcuk anggun dam ulirye, melibuka telebuk winilinamsile.

¹⁶ Im deice ara, Allah Yahweh el babye, ‘Naʼ tenen, ninguk, kwepdeibukba, ulule. Bukni, tukwak mutuku ara, nun tukwak ninye, ‘Talibuka unamak’ tenen, kwepdeipsuke.

¹⁷ Tonda, akunum dibikiba, ninye wein damak weilbice talak ara, tuba tonap tamubuka yakirye, Allah Yahweh, el si erena ati, kanye lon mot kum senyake. Sikda, talye tunim abuka, dabinuka unyake.

¹⁸ Wininyak bukni, nun tuba kam unmap ninye tonok ara, kam unmap talak aryuk, Allah ati, telebe nyabuka, kibuka erebibirye, el siuk erenamabe. Wini talak arye dipdongobuka, yuk talak nirya ara, pia ati, el siuk erenamabe. Allah Yahweh ati, telebe nyapne.