Mazmur 114 - Eipomek

Allah arye, Israel nang dobuka, Mesir mutuku noutam arye, lobuka lyepdobukce, pata mutuku bobiyuk talak ara, Allah arye, mikip weiknye ninye dopman kum pil dobuk ning ati, nyabuk yupu

¹ Israel yala nang ara, Mesir mutuku noutam arye batakuka, bindobik. Ara, sik apu koproba Yakub birye deiamukba, dadeipdanin yangalamik nang, Israel yala nang ara, Mesir mutuku noutam, pia yuk yupu nyalamik nang kan-kan arye, batakuka bindobik.

² Atalak ara, Israel yala nang, sik apu koproba Yehuda birye, deiamukba, dadeipdanin yangalamik nang ara, Allah arye, sik Israel nang ati, ‘Na mapu unamak’ tenen, anang wipbukce, lyeprobukba, el ap, sik ap, neika ulamik. Ara, Allah arye, ‘Sik Israel yala nang nirya talepnirye, sik weik deiyoknye, pia unamne,’ tenebuka deice arye, Israel nang lyepdobukce, taleamuk.

³ Atalak ara, sikda weik laut mekwen el si, Laut Teberau dam, yanuka dinmekba, Allah arye ninye kum winipmanto pil dobuka deice, alaut mekwen noutam arye, cobuka laut mekwen dana-dana tam sekdakuka tikuk. Atonun, weik balamle mek, el si ara Yordan mek, kup-kup yayik talak ara, Allah arye ninye dopmankum pil dobuka deice, amek ara, tamubuka eitam kipdobukba, tia ati, cepdobuk.

⁴ Tonda, atalak ara, weik mutuku bukamukak nirya ara, tobukce, im kurukuka biyuk. Winipmanto ara, kambing basam arye, im kuruklirye, balamle touk ubukce, aweik bukuk mutuku nirya ara, lokonmokce banmok. Tonda, mitik mutuku kon nirya babye, domba basam mapu, im kurukikirye balamak touk, amitik mutuku kon babye, lokukba im kurukukce, banmok.

⁵ Ati ara, narye asipdesine. Israel nang mek otam koubuka, bana ati, ance weik laut mekwen ara, yata deiyok ati, mek noutam arye boklumce, dana-dana tam kipdeiplum do? Tonda, anda Yordan mek ara, yata deiyok ati, Israel nang mek otam koubuka bana ati, ance tamubuka, eitam kipdeiplumba, amek tia ati, cepdobuk do?

⁶ Atonun ton, sik weik mutuku kon bukamukak nirya ara, yata deiyok ati, mutuku nirya tobukce, im kurukuka banmok do? Tonda, sik mitik mutuku kon bukamukak nirya ara, yata deiyok ati, tobukce im kurukuka banmok do?

⁷ Se, tukwak mutuku, im sirya, mutuku sirya nirya ara, nun ni Allah Yahweh, el dam yamunyopura, ilil upliba, mutuku nirya ara, lulukukna ap, sirim talina ap, unamlume! Ara, nun apu koproba Yakub birye, si erelamuk Allah, el dam yamunyopura, sirim talinauk unamsile!

⁸ Tonda, nun ni Allah arye, pata mutuku noutam, mek pia kum uamuk mutuku bukni, Allah arye ninye dopmankum pil dobuka deice, weik keil noutam arye, mek arebukba, panabuka biyukce, weik mekwen deibuk. Ara, pia mutuku yangan keil uamuka noutam, Allah arye ninye kum winipmanto pil dobuk deice, mek pu panabuka biyuke.