Mazmur 11 - Eipomek

‘Nun ni Allah birye, pia kalekuka melisulule. El dam arye, ikin ning pia kum upsutue,’ nyabuk yupu

¹ Raja Daud birye, Mazmur yupu sekuk. Ara, Allah yupu mot nyana deiyoknye arepnamuka ati, sekukce arebuk. ‘Ikin ning, na dam yalirye, opnilyak’ tenen, na ni Allah Yahweh, el damuk unune. Ati ara, yata ati, anggunce nati, ‘Yukak bilyame,’ nyapnutum do? Anggunce nati, “Mitik maka arye, ‘Ninye opsikcak’ tenen, ilil upliba, minopce mutuku kon lakuka balolamle touk, binulyame,” nyamnulum ning ara, yata ati do?

² Anggunce nati, “Kume akunum elilulume! Ara, sik yu nang arye, ‘Anye opnuyap’ tenen, sik mal ap, yin ap, akunum kintinipmake! Sik mal ara, yin tapu deice akunum kintinibuka deipmakce, lukunyan talak ara, mal yanuka opnamsiake. Ara, Allah arye nyasilye yupu talibuka, nunce diksukumuk wininyap nang ati, sik yu nang arye, ‘Opnamap’ tenen, kintinipmake!

³ Se, Allah arye, ‘Aning winina ara, pia telebe, aning winina ara, pia malyeuka,’ nyapdeiamsuk yupu nirya ara, malye nang arye, ayupu nirya yanibibirye, nun malye kipdeipsikcopura, nun diksukumuk wininyap nang arye, yata wiriptibye do? Kume, aning ara, yupu kum lipsisitibye!

⁴ Bukni, nun ni Allah, el si Yahweh bira, aning-aning nirya talibuka, ninye deiyoknye ulirye, el mikip ara, pia weik ulule. Allah Yahweh, aning-aning nirya talilulak ara, im deice arye, pia teleb takhta deice bukuka, yupu bokolisulule. Ati ara, yata ning do nirya, elcuk disulule. Ati, tukwak mutuku unyak nang nirya, sikce wininyak ning, yuk-yuk ning nirya babye, elcuk elilirye, bikisulule.

⁵ Allah Yahweh arye, malye winin ninguk, talibuka wininyak nang babye, teleb ning talibuka, diksukumuk wininyak nang babye, ‘Teleb wininamak do, kum do?’ tenen, asilelule. Bukni, Allah el talima noutam ara, ‘Sik malye winin ninguk, talibuka wininyak nang nirya, sik anang ara, pia na like,’ tenelule.

⁶ Ati, sik malye-malyeuk wininyak nang ara, sik nong deice, kanye ikin weik un ning arepnamle. Ati, sik tuba kam unamak talak nirya ara, sik dengna ati, pia ikin ning arenamle. Winipmanto ara, keting buppu weik deiplirye, aning-aning nirya silal lelamle touk, sikti, weik tonun wenepnamlarya!

⁷ Aning winipnala deiyok ara, talye ati kume. Deiyok ara, Yahweh el kanye talima noutam ara, pia diksukum winin ninguk winilula ati, ninye arye wininyak ning ereplirye, kanye delilula ati, elce, “Aning ara, wininamlume. Aning ara, pia kum wininamlume,” nyapdeipsuk yupu deice nyasilye touk, wininyak nang ati, el kanye pia delilule. Ati, diksukumuk wininyak nang ara, sirya talak ara, el dam yakirye, el urasin ton eipnamake. Allah arye, sik anang ati, bico teneplirye, kanye deipnamle.