Mazmur 109 - Eipomek

Daud, el mal olan nang arye elti, malye yupu weik nyalamika ati, ‘Allah arye, anang kwang daknamle’ tenen, morobuk yupu

¹ Raja Daud birye, aMazmur mot yupu sekuk. Ara, ‘Allah yupu mot nyana deiyoknye arepnamak’ tenen, sekuka arebuk. Daud birye nyabuk yupu ara, ani. Se diba, nara an si erekunun Allah ara, ‘Tunim abuka kum unamlamʼ tenen, moropkine.

² Deiyok ara, ani. Sik pia malye-malye weik wininyak nang arye, nati talye yupu weik arye nyaninyake. Sikce, tilila yupu deice aryuk, malye yupu ap, minina yupu ap, nyaninyake.

³ Anang nirya arye nati, ‘Anye, nun pia like,’ tenekirye, pia malye yupu, na deice nyaninyake. Deiyok ning, pia ton kum upmalibuk, malye yupu nyabikirye, ‘Anye opnuyabe’ tenen, na dam yanuka, warikininyake.

⁴ Na ning ara, aning ati, bico tenebuka telebuk unun bukni, sikce nati, minin yupu weik arye nyaninyake. Tonda, sik ikin uplye talak ara, narye, ‘Anda Allah arye, anang melipnamlam’ tenen, sikti, Allah moronune.

⁵ Ati ara, narye sikti, telebuk winiptinye babye, sikce tamubuka nati, ikin pia weik, na deice deilininyake. Narye sikti, dipkoprob bico tenenun bukni, sikce nati ara, “Anye, nun pia like,” nyabuka, malye kilininyake.

⁶ Na ni Allah, ayu nang arye, nati, nyanyak yupu ara, nyapnukine. Ayupu ara, ani. Sikce, nati, “Kume, ninye yupu bokolin talak ara, talye yupu nyapnamlanye bira, bobuka deiptibyeura, Daud el diksukum tam tikukce, el deice malye yupu nyaplyeba, aninye deiyok nang arye, Daud biti, wenepnamake,” nyaninyake.

⁷ Tonda, nyaninyake. “Ninye deiyok nang arye, ‘Anye Daud bira, malye kibuk do? kum do?’ tenen, yupu talibuka bokeipnamak talak ara, sirya ara, sikce, “Diba, el Daud bira, ‘Malye winibuka ati, wenepnuyabe, nyaptinge’ tenen, patalule,” nyaninyake. Tonda, sik anang nirya arye, “Elce Allah ati, moroptu babye, ‘Allah arye, kum kekepnamleʼ tenen, nyanyake. Tonda, anggunce, ‘Allah arye, el Daud biti, ‘Elce moropnamnil yupu ara, pia malye ulule, teneptue,’ tenenyakce, nyaninyake.

⁸ Tonda sikce, “Daud bira, keting tamun weik tonun ton, kam kum unamle. Min aryuk dadiptu ura, yuknye birye, ninye deiyok kipturye, anye birye, ‘Raja Daud punupturye, Daud bira, ninye deiyok ning, talilul ning nirya ara, anye alubuka dopropturye, talipnutu,’ tenebikirye,’ nyaninyake.

⁹ Tonda sikce, “Daud bira, ‘Min diptuba, elce deiamuk mapu nirya ara, kwaknamne mapu uk unamak,’ tenebikirye, nyaninyake. Tonda sikce, “Daud dadiptu ura, elce domuk kil ara, youwak kil unamle,’ tenebikirye, nyaninyake.

¹⁰ Tonda, aning ton tenenyake. Ara, ‘Daud birye deiamuk mapu, sik nirya arye, talinyak ning nirya, kum uptuba, amapu arye, ‘Dan mutuku binuka, winiptibye do?’ tenen, dana-dana tam nirya, talye banauk winitinge,’ tenebikirye, nyaninyake. Tonda, sikce utenesinyake. ‘Daud el mapu arye domik asik-asik nirya ara, yuk nang arye ulubuka, sice bukloptingce, Daud el mapu ati, amutuku noutam babye, dobuka dopkweptingura, bai mutuku binuka, uptinge,’ tenebikirye, nyaninyake.

¹¹ Tonda aning atonun, sikce utenensinyake. Ara, ‘Daud bira, bona talin ning talilamuk ning nirya ara, yuk nang arye, alubuka doproptingce, elda pia talye kankanye buk uptue,’ tenebikirye, nyaninyake. Tonda, ‘Daud bira, min talak ikin pil ara, wa wibuka, yala kouamukba, aning pabuka, nong upnamle talak ara, yuk nang arye, aning nirya ubula doproptingura, elda wa lin ning tonok babye, kum kiptue,’ tenebikirye, nyaninyake.

¹² Tonda sikce, ‘Daud bira, ikin weik uptuba, imun kanye bobuka, unamle talak ara, tonoknye babye, el Daud biti, bico tenebuka kum meliptue,’ tenebikirye, nyaninyake. Aning atonun, sikce nati, ‘Daud diptuopura, elce deiamuk kam tuba unamak mapu nirya ara, kwaknamne mapu uk kibuka, unamak bukni, atalak ara, tonoknye babye, bico upturye, amapu ton, pia kum melipnamle,’ tenebikirye, nyaninyake.

¹³ Aninguk kum bukni, tonda sikce nati, ‘Daud birye deiamuk mapu nirya ap, sikce deiamikba, dadeipdanin yangalamik nang nirya babye, adiparyuk diptingura, kum datinge,’ tenebikirye, nyaninyake. El mapu nirya arye, akunum diamik mapu nirya ap, sik amapu nirya arye, deibikceba, dadeipdanin banamak mapu nirya ap, minop diptingce, kum datingura, Daud el yala ap, el si ap ara, pia kum upnamle. Ara, yuk nang arye, Daud el yala si, tuba kum tenenamake. ‘Daud el yala ap, el si ap, pia kum uptuba lubakinamake,’ tenebikirye, nyaninyake.

¹⁴ Tonda, sikce nati, ‘Aninguk kum bukni, Daud el li koproba arye, malye winilamuk ning nirya ara, Allah Yahweh arye, aning nirya, kum biknamle. El li koproba arye, malye winilamuk ning ara, Allah arye kum namin kipdeiplirye, Daud el li koproba ati, weneptue,’ tenebikirye, nyaninyake. Tonda, aning atonun, sikce nati, ‘Tonda, Daud el lin koproba arye, malye winilamuk ning nirya ara, Allah Yahweh arye, aning nirya kum namin kiplirye, kum kipdeipliryeura, Daud el lin koproba ati, weneptue,’ tenebikirye, nyaninyake.

¹⁵ Tonda, sikce nati, ‘Daud el li ap, el lin arye, malye winilamdik ning ara, Yahweh arye aning kum biklirye, tuba tenenauk uptue,’ tenebikirye, nyaninyake. Tonda, sikce nati, ‘Daud ap, el li ap, el lin ap, sik si kum uptuba, nun tukwak mutuku noutam unyap nang nirya arye, anang sik si pia luba kibibirye, anang sikti, ila ton ap, pia kum tenenamabe,’ tenebikirye, nyaninyake.

¹⁶ Tonda, sikce nati, ‘Daud bira, ikin weik ning taleptuba, imun kanye bobuka uptue,’ tenebikirye, nyaninyake. Tonda, sikce, “Aning nirya patapsilyeba, nyanyaba ara, talye ati kume. Deiyok ara, ani. Ara, nun kanye ara, Daud elda, kam tuba ulamuk talak nirya ara, elce, sik pia talye kankan nang ara, ikin weik ulamik bukni, elce sikti, bico tenebuka, pia kum melilamuk. Aninguk kum bukni, sik bona pia kum talilamik nang ap, aning-aning nirya patalamukba, ikin weik ulamik nang ap, Daud birye, bico tenena kumce, atalye kan-kan nang ati, ton pia kum melilamuk. Daud birye, anang ati, ‘Sikda dauplye,’ tenelamuk. Diba, sik yu nang arye, na Daud biti, winibuka tenekirye, malye yupu weik nyaninyake. Tonda, sikce nati, ‘Aninguk kum bukni, sik talye kan-kan nang ap, talima daksakmanto, imun kanye bobuka, ulamik nang ati ara, Daud birye anang ati, dobonauk winilamuk bukni, sirya ara, sik nirya deiamik. Ayu nang arye, winibuka tenenikirye, malye yupu nyaninyake.

¹⁷ Tonda, sikce nati, ‘Daud bira, yuk nang ati, ‘Ikin weik upnamak’ tenen, ninye kir dona ap, ‘Ninye dipnyak’ tenen, sulamak nang ap ati, kanye deiamukce, apil weik arye dolamuk. ‘Ninye sulamak nang, pil dolamuka ati, wini talak ara, amalye ning weik, el nong deice yanuka upnamle,’ tenebikirye, nyaninyake. Tonda, sikce nati, “Daud birye, yuk nang ati, “Allah bico tenepnirye, anggunti pia teleb kilinamsile’ tenen, Allah ati moronamsine,” nyabuka, teleb nyan yupu ara, ‘Na lik’ tenen, kum nyalamuka ati, nun kanye ara, ‘Allah arye, Daud biti, teleb kum kipdeipnamle,’ tenebikirye, nyaninyake.

¹⁸ Tonda, sikce nati, “Winipmanto ara, moul li talak ara, ninye arye deice tam kiniklamak baju, el si ara jaket, tuba-tuba kiniklamak touk, Daud birye, yuk nang ati, malye yupu ap, sulamak nang yupu ap, asum-asum nirya, weik arye nyalamuk. Aning ati ara, winipmanto, mekwen pum tam wekipnyeura, amek nun nong nirya, moul kilamsil touk, ninye kir don yupu ap, sulamak nang yupu ap, Daud el nong deice yanuka uptuba, ikin weik upnamtue. Tonda winipmanto ara, ninye nong bol deice, nintong teleb minyak likikcak arye, sik anang nong, tup pum tam weklamle touk, “Ninye sulamak nang yupu ara, el nong noutam nirya wektuba, dadiptue,” nyabuka, ayu nang arye, nati tenebikirye, nyaninyake.

¹⁹ Tonda, sik yu nang arye, na Daud biti, “Winipmanto ara, ninye arye moul li talak, alip baju el si jaket, kiniklamak touk, tonda deiyatinga, el si pinggang deililamaka touk, Daud bira, ninye sulamak nang yupu, el nong deice nirya yanuka winiplyeba, ikin weik uptue,” tenebikirye, nyaninyake.

²⁰ Ati na Daud birye, an Allah ati, nyapkine. Anggunce, amalye yupu nirya nyaninyaka ati, na Daud birye, anda Allah ati, ayupu moropkine. Ara, ‘Anda Allah Yahweh arye, sik talye minina yupu ap, malye yupu ap, nyanyak nang nirya ati, weik arye wenebuka opnalam’ tenen, moropkine na nio. Ara, sik yu nang arye, nati, “Daud bira, adiparyuk dadipute,” nyabuka, malye nyaninyak yu nang ati, nyapkine.

²¹ Sik ayu nang arye nati, pia malye yupu nyaninyak bukni, na kele. Anda Yahweh, aning-aning nirya talibuka, Pia Mikip Weik Deiyoknye ulyama ati, ance nati, talibuka umince, kalikinilyame. Ati, anda na deiyoknye ulyame. Ati ara, Allah ance, na Daud biti, melibuka lyepropniminyeura, yuk nang nirya eibikirye, ‘An si moubuka kel biknamak’ tenen, moropkine, na nio. Na ni Allah, na kele. Ance, “Bico tenesimince, pia ati teleb kilinamsilame,” nyabuka, nyalin yupu deice arye nyapdeiamsulum ning ara, aning atonun, tuba-tuba winisilyama ati, aning ara, pia telebe. Ati ara, narye anti, ‘Melibuka lyepropnilyame!’ nyabuka, morokunune.

²² Ton deiyok ara, nara imun kanye bobuka ununa ati, narye kum winipmanto unune. Ati, ‘Ancuk, nati melibuka lyepropnamnilam’ tenen, moropkine na nio. Tonda, winipmanto ara, ninye arye, yuknye ati, parang arye, el talima noutam daklamak touk, ayu nang arye, ikin weik deililamak deice arye, na kanye talima noutam nirya ara, daksakmanto unulula ati, anti moropokine, na ni Allah.

²³ Winipmanto ara, keting duduk arye, keting dirina kiplyeura, kurya ton laka aulul bukni, lukunyan talak ara, min arye akurya tunim abuka kum kilolamle touk, nara min arye dipnamnarya! Dipnya babye, nara kanye arye ton ap, kum buknamne. Winipmanto ton, talye po yalirye, ninye nong deice amubuka bukuka, ninye arye anyak apo obikceba, min arye kum ulamle touk, na babye, ninye arye opniyakopura, min arye kum unamnarya.

²⁴ Narye, din nirya bataknirye, ‘Allah ara, yata yupu nyapnamnil do?’ tenen, din dina kum aryuk, moubuka kekenun bukni, adeice arye, na yan ap, kutam ap ara, pia mitang kipnin banmanile. Din dina kum aryuk, mitang upnilyeba, na nong bol nirya ara, pia malye upmanilba, na yok ap nirya ara, lake kipnile.

²⁵ Bol malye kipmanilce, ikin kanye bobuka unmana ati, nati minin yupu nyaninyak nang arye, yep-yep nyanikirye, akutubuka, malye yupu nyaninyake. Sikda na dam yakirye, na nong eibikceura, ‘Se, elda pia bol malye akunum kipmal,’ tenebikirye, sik ngang, kwakdu-kwakdu nyabikirye, kanupdongobuka, ayupu nyaninyake.

²⁶ Nara, pia ikin weik ununa ati, na ni Allah Yahweh, ‘Ancuk yanuka melipnamnilam’ tenen, moropkine. Ance, “Weik bico tenesimince, pia telebuk kilinamsilame,” nyabuka, nyalin yupu deice arye, akunum nyapluma ati, anyapsulum touk, wini talak ara, na dam yanuka, melibuka lyepropnilyame, na ni Allah.

²⁷ An Allah arye, akunum lyepropniminyeura, sik aning eipnamak nang, yala-yala nirya arye, ‘E, Daud biti, tuba tonap tamubuka, teleb kipdeipmalnye bira, Allah el uka tenebikirye, ‘Sik nirya moubuka biknamak’ tenen, ance sik anang nirya ati, peterenamlulume na nio! Diba, na kele, anda Allah aryuk nati, melibuka lyepropnamnilyame. Yuknye birye, aning atonun, pia kum winiptu atia.

²⁸ Na kanye ara, ‘Sik yu nang arye, na Daud ati, talye minin yupu ap, ninye sulamak nang yupu ap, talye luparabuka nyaptinye babye, anda Allah arye nati, lyepnimince, telebuk kilinamnilyame. Tonda, sik yu nang arye, ‘Daud biti, opnuyabe,’ tenebikce nang, na olana ati kintiniptinga babye, ance anang wenebuka opminyeura, alye weik daknamake. Sik amalye winin nang arye, alye weik dakdanamak bukni, anda Allah, an amu tam kibuka, an piluk donun nye, na Daud bira, ance melipniminyeba, kanye deibuka unamnarya! Utenena ati, moropkine na nio!

²⁹ Tonda, nati talye minin yupu ap, malye yupu ap, nyaninyak nang ara, ance wenepmince, sikti, ikin ning arepminyeura, Sikda alye weik dakdanamake. Tonda, yuk nang arye anang ati, ‘Sikda dipkoprob malye nang unyake,’ tenebikirye, kel bikikceura, anang ati batakikirye, tuba si kum erenamake. Winipmanto ara, ninye arye moul li talak, deice tam ongolamak baju, el si jaket kiniklamak touk kibuka, sik alye dakdanamak ning ara, weik kiplyeba, sik nong nirya deice, siknilongonamle. ‘Ance anang ati, winibuka wenepnamlam’ tenen ati, moropkine, na ni Allah.

³⁰ Winipminyeura, na Daud birye, na si deice arye anti, “Anda pia telebuk ulyame,” nyabuka, Allah Yahweh anti, nyapnirye, an si tonok erenamkine. Ara, nun Israel yala nang, ninye yupa pia weik, kum nukmanto neika bulubibye talak ara, anang kan-kan noutam tiknirye, anda Allah ati, “Naio anti telebe nyapkine,” nyabuka, an si ati, pia erenamkine.

³¹ An Allah ati, ‘Telebe,’ nyanamkine deiyok ara, ani. Ara, anda Allah Yahweh arye, aning-aning talina kumce, pia talye kankan nang ara, anggun diksukum tam tikmunce, melinauk winiluluma atia. Anda Allah arye, sik kankan nang dam tikmince, melilyama deiyok ara, ani. Ara, yuk yu nang arye, atalye kankan nang ati, ‘Adiparyuk, talye minin yupu nyabibyak arye, ninye yupu bokeipminyeura, anang ati, talye luba kibuka oplopnamake,’ tenebikirye, kintinipnamake. Winipnamaka ati, anda Allah arye, akankan nang ati, melilyame. Ati ara, na Daud birye, an Allah ati, “Pia telebe,” nyabuka, an siuk erekunune.