Mazmur 108 - Eipomek

Raja Daud birye, ‘Yu nang arye opsikcak’ tenen, Allah morobuk yupu

¹ Raja Daud birye, aMazmur mot yupu sekuk. Daud birye nyabuk yupu ara, ani.

² Se, na ni Allah, na talima noutam ara, teniltona pia kumce, anti diba tenekunune. Diba, na kanye ara, pia kum boktopnamnile. Narye, kitar obuka mot nyana deice arye, na kanye deipnirye, amot nyanamne. Na kanye pum tam unilye, dip kanya ara, bikmince, bita tenepnalame!

³ Tonda, anggun Israel nang ara, kitar nyan ning, el si ara gambus ap, kecapi ap, kintinip deipmunce, amot nyanamlume. Keting winiryuk panalyangalamle talak ara, narye ton, amot nyanamne!

⁴ Amot nyanamna deice arye, sik yuk mutuku noutam unyak nang kekenamak sukum, amot nyanamna deice arye, an Allah Yahweh ati, “Telebe,” nyanamkine na nio. Tonda, sik yuk mutuku noutam unyak nang, yuk-yuk nang nirya, sik kekenak ara, narye an Allah Yahweh ati, “Anda pia telebuk ulyame,” nyabuka, an si erekinirye, nyanamne.

⁵ Deiyok ara ani. Ara, an Allah Yahweh arye, nun Israel nang ati, weik tonun bico tenesimince, “Winibuka teleb kilinamsine,” nyalin yupu deice nyapdeipsulum touk, dipkoprob winipnamsilame. Winipmanto ara, tukwak mutuku, eitam dukdongobuka, dua kan-kan ara, ‘El cang ara, yata wiribuka ulul do?’ tenen, pia kum kiklipdenmanto ulula atonun, anda weik tonun bico tenesilyam ning ara, nukman kumto ulule. Tonda, winipmanto ara, ‘El cang ara, yata barye do?’ tenen, tukwak mutuku arye dipdongobuka, im dup tam ara, meter arye kiklipman kumto ulamle touk, ance, nun Israel nang ati, batakna kumce, pia weik tonun bico tenesimince, melinauk wininamsilam ning babye, pia nukman kumto ulule. Atonun, an Allah arye nunti, “Winibuka melinamsine,” nyabuka, nyapdeipsulum touk, aninguk tenibuka, batakna kumce, pia melinauk winilnamsilam ning ara, pia nukman kumto ulule. Winipmanto ara, tukwak mutuku arye dipdongobuka, deice tam im dup noutam ara, dua balamlak, ‘El cang ara, yata barye meter ulul do?’ tenen, kiklipman kumto atonun, anda batakna kumce, nunti, pia melinamsilam ning ara, kiklipman kumto ulule.

⁶ Se nun ni Allah, anda pia telebuk ulyama ati, ninye nirya arye anti, “Elda pia telebe,’ nyabuka, nyanamap yupu ara, im tam bukni, deice tamuk welepnamlule. ‘Ninye tukwak nang nirya arye, an si ati, pia erenamkiak’ tenen, morokinyabe. Atonun, an mikip weik una ap, tonda anda pia telebuk una ap, an dirina weik ap ara, ‘Tukwak mutuku, im sirya, mutuku sirya nirya unyak nang arye, biknamak’ tenen, morokinyabe.

⁷ Na ni Allah, anti diba tenebuka, sik kanye talima an deiceuk akunum delikinyak nang ara, sik on nang arye, ‘Anang obuka, sirya daknamak’ tenen, ‘An mikip weik sirik taruk arye, an tam nang lyepropnalam’ tenen, moropkine na nio! Ara, sikce anti, diba tenekinyak nang nirya ara, ance sikti, ‘Lobuka lyepnalam’ tenen, moropkine na nio!

⁸ Se, nun ni Allah, an si eren aik noutam bukni, Pia Lek Teleb Aik ulyam noutam arye, an Allah arye, nyalin yupu deice arye nyapdeipsulum yupu ara, ani. Na kanye deipnirye, Sikhem mutuku unyak nang nirya oplopnyakarye, amutuku nirya alupdopnirye, bokuka, na mapu koproba, Israel yala nang arepnamsine. Atonun, weik mutuku lu, el si Sukot mutuku unyak nang babye, opnirye, amutuku dopropnirye, ‘El cang ap, pala ap ara, yata barye do?’ tenen, kiklilena ati, meter dopropnirye, amutuku nirya ara, kiklipnirye, nuknamne.

⁹ Dipkoprop ning ara, yata mutuku do nirya, akunum obuka dopropnyopura, amutuku nirya ara, ‘Naʼ tenen ati, pia talipnamne. Ati, Gilead mutuku ap, Manasye mutuku ap ara, na akunum dopropnirye, pia talipnamne. Tonda, Efraim mutuku nirya ara, narye amutuku dopropnyopura, winipmanto kat topi, el si Baja, atonun unamnile. Yehuda mutuku nirya ara, amutuku noutam dopropnamne. Ara, winipmanto ara, sisin nang arye talinyak kama atonun, amutuku ara, aning atonun unamnile.

¹⁰ Atonun ton, pala weik mutuku, el si ara, Moab mutuku noutam nirya akunum dopropnyopura, amutuku noutam ati, winipmanto ara, na yan mek liknak atonun unamnile. Tonda, lak kina ati, na yan ongona, el si ara, sandal loplopnirye, Edom mutuku deice dopkwetepnamne. Winipnyopura, ninye nirya aning eibikirye, ‘E, Edom mutuku nirya ara, Allah arye akunum talilule’ tenen, bikinamake. Atonun, Pilistea mutuku dopropnyopura, amutuku noutam tiknirye, weik yupu deice arye, “Amutuku nirya ara, ‘Naʼ tenen mutuku ulule,” nyanamne. Ninye nirya arye, aning kekebikcopura, ‘E, Pilistea utuku nirya babye, Allah arye akunum obuka talilule’ tenen, bikinamake. Allah arye nyabuk.

¹¹ Nyabukopura, Israel nang, sik deiyoknye raja Daud birye nyabuk. “Bukni na ni Allah, na mal olan nang ati, ‘Sik babye optinyeʼ tenen ati, yatanye birye, melibuka, mikip yu weik nang, sik aik dam bobinamnil do? Atonun, ‘Na mal olan nang ati olbinun’ tenen, yatanye birye, melibuka bobinutuba, weik mutuku, el si Edom noutam bobinamnil do?

¹² Asipmakina deiyok ara, ani. Diba nun ni Allah, ance nun malye ulamupu ning nirya ara, ance akunum luba kibuka bataksuluma ati, nun yuk aryuk, yata wiriptibye do? Tonda, wini talak ara, ‘Nun ona ati yin talin nang arye, nun mal olanuyapʼ tenen, banamap talak babye, Allah an ap, nun yin talin nang ap, neika kum banyabe. Nun diamuk olbanyabe.

¹³ Nun kele. Talye tukwak nang ati, ‘Melipsululume!’ nyabuka moroptibyeba, sikce yanuka melipsitinga babye, aning ara, talyeuk upnamle. Tukwak nang arye, kum melipsitinge. Ati na nio, nun mal olan nang olbana ati ara, ‘Ancuk melipsutumba, nun mal olan nang ati, obuka, sirya daktibye’ tenen, moropkiabe na nio.

¹⁴ Bukni, nun kele. Nun ni koproba Allah arye, yanuka melipsutuma deice arye, nun mal olan nang nirya ara, adiparyuk nunce obuka, sirya daktibye. Deiyok ara, nun ni Allah, ancuk, nun mal olan nang nirya, obuka malye kiplopnalame!