Mazmur 107 - Eipomek

“Allah Yahweh pia telebuk winilulnye ati, mot nyana deice arye si erenamabe,” nyabuk yupu

¹ Allah Yahweh el tibuk, “Telebe,” nyanamabe. Allah elda, pia diksukum telebuk ulirye, nunti bico tenesulul ning ara, kum kum danamle. Pia ati aupnamle. Ati ara, el tibuk, si erenamabe.

² Se, na kayapu, yata ninye do nirya, anggun tuba-tuba weik kanye imun ning, anggun damak yangalamukba, Allah Yahweh anggunti, melibuka lyepromsukce, teleb kipdeiamsuk ninye nirya ara, Allah elce meliamsuknye nirya ati, anggun kayapu, yuk ninye dam binuka, laka nyanamlulume.

³ Anggunda, yuk-yuk mutuku, pia pera mutuku, yuk ninye noutamak bobinamsikba, ulamlumce, ninye asik nang atonun ubuka ulalumba, Allah elce akunum lyepsukce, bulubuka deiamsuk. Ara, keting yangan tam ap, keting wekelban tam ap, tonda utam ap, eitam ap, dana-dana mutuku nirya ap, dabinuka ulalumba, bulubuka tonok sukum deipsuke. Ati, Allah el si erebuka kinamlulume.

⁴ Tonda, ninye kum unyak mutuku, mok ap, mek ap kum ati, buppu weik arye, ninye kum ulamik mutuku, weik mutuku binuka aulamika ani, lopdakuka, ortam mutuku binuka unmana ani, asukum batakuka, yukak balamik. Adeice arye, tonok mutuku uk, kum ulamik. Balsusunauk ulamik talak ara, ‘Weik asik dolamik mutuku bana ati, bisik ara asukum, asik unyakak ara, asukum’ tenen, kum kel biklamik. Talye banauk winilamik.

⁵ Sik aninye ara, winilamika deice arye, din ning patana ap, mek patana ap, ubukba, adeice arye, sik aninye ara, dipmanto ulamik. Sik kan-kan noutamak ara, ton nang diplamik. Ulamika deice arye, sik yupa ara, mitik kipnin balamik.

⁶ Atalak ara, sik imun kanye bobuka ulamikce, Allah Yahweh ati, ‘Se, nun ni Allah melipsilyame,’ nyabuka morolamik. Nyabuka morobikopura, sik kanye imun uamuk ning ara, akunum lyeprobukce, teleb kipdeibuk.

⁷ Allah arye, sik aninye ati ara, kalikuka melilamukce, diksukum una bisikuk, bobuka balamuk. Aninye bobuka balamuka ani, aminyan talak ara, weik asik teleb ning, weik kota mutuku bobuka balamukce, ateleb mutuku noutamak deibukba, telebuk ulamik.

⁸ Ati ara, Allah Yahweh elce kanye talima areplibuk bico tenen, melilul ninye nirya ara, Allah el tibuk, “Telebe, anda weik telebnye winilyame,” nyabuka, el si erebuka kinamake. Tonda, Allah el si Yahweh arye tenebuka, pil dolul ning nirya ara, ‘Se, aning ara, ninye arye kum upmanto ning winilula’ tenen, el tibuk, “Telebe,” nyanamabe.

⁹ Ara, urdem ati kume. Deiyok ara, mek patanmalye ninye ap, dina patanmalye ninye ap, elce yamubuka areliba, dibiceura, boulule. Ati ara, Allah el tibuk, “Telebe, anda weik telebnye winilyame,” nyabuka, el si erebuka kinamake.

¹⁰ Ton ninye ara, yu nang arye, malye kibuka bisibikce, aninye tomobuka, wenena aik noutamak dabinuka deiamikce, weik kat tapu, rantai besi arye, tapu koupdongamikba, imun kanye bobuka daulamik. Aninye nirya ara, kuna noutamakuk daulamikce, pia ikin kanye bobuka ulamik.

¹¹ Wenena aik daulamik ninye nirya ara, talye ati kum wenena aik kum ulamik. Deiyok ara, Allah el yupu deice arye, ‘Aning wininamlulume. Aning ara, kum wininamlulume,’ nyapdeiamuk ning ati, sikce, moubuka kum taleamikce, yaniltalamikba, Allah elce yuk nang deice mikip arebukba, sik amalye ulamik ninye nirya ara, yuk mutuku nang arye, sik nong deice ikin ning delilamikba, kanye imun kanye uk, bobuka ulamik. Tonda, Allah aning-aning nirya talibuka, deice tam erebuka, Pia Mikip Weik Deiyoknye ulul bukni, elce nyalamuk yupu nirya ati ara, ‘Nun like, aning kum wininamabe,’ nyabuka, moubuka kum talilamikce, yaniltalamikba, Allah arye aninye ati wenelamuk.

¹² Allah Yahweh el yupu kum kekelamikce, malye winilamik ninye nirya ati, pia ikin ning, sik nong deice deiamukba, sik talima noutamakuk dilamukba, imun kanye bobuka ulamikce, yuk mutuku ninye arye, sikti, “Weik ikin pil donamsulume,” nyapdeibikba, weik ikin pil dolamik. Winilamik bukni, sik nong nirya mikip ara, mitang ubukba, tuku deice sakuka poulbalamik talak nirya ara, ‘Se, yata nang arye yanuka, melibuka lyepsitinge do?’ tenen, elamik bukni, sik yuk nang arye, melibuka kum lyelolamik. Sik nirya ara, ikinuk ulamuk.

¹³ Ikin kanye bobuka ulamikba, ikinuk ulamuk. Ikin kanye bobikce, Allah atibuk, “Melipsilyame,” nyabuka, malye lebuka morolamik. Malye kanye bobuka, morolamik talak ara, Allah kekebukce, sikti, lyeprobukce, teleb kipdeibuk.

¹⁴ Allah ati morobikopura, kunukne noutam ulamik ning ap, kat tapu arye koupdongamik ning ap, ulamika ara, Allah aniryuk, atapu loplobuka, lyeprobukce, tuba tonap, aninye teleb kipdeibuk.

¹⁵ Ati ara, Allah Yahweh, elce talima arebukba, bico tenen, melilamuk ninye nirya arye, Allah el tibuk, “Telebe, anda weik telebnye ulyame,” nyabuka, el si erebuka kinamake. Tonda, Allah el si Yahweh arye, tenebuka pil dolul ning nirya ara, ‘Se, aning ara, ninye arye kum winipmanto ning winilula’ tenen, el tibuk, ‘Telebe,’ nyanamake.

¹⁶ Allah ati, “Telebe,” nyapnamaka ara, urdem ati kume. Deiyok ara, Allah el mikip weik deice arye, kat ning, el si tembaga deice arye, moubuka domik bisik bublan, tirikdongamse ning nirya ap, tonda kat ning arye, bisik bana noutamak dobuka, lelipdongamse ning nirya ara, akunum dakuka batakuk.

¹⁷ Tonda ton ninye ara, sik babye malye ulamika, dekna deice arye, pia walwal nang winilamak touk winilamik. Winibuka ulamikba, sik malye weik winilamika deice arye, weik ikin uk dilamukba, weik ikin ning dololamikce, pia imun kanye bobuka ulamik. Ara, sik bidamang malye winilamik ning deice arye, sik aninye dam, weik ikin uk ap, ikin ning ap, yayukba dopdobikce, weik kanye imun ulamik.

¹⁸ Weik kanye imun uk dilamukba, sik aninye ara, dipmanto ning dina ayala-yala nirya, eibike babye, dukmantopu ulamikce, kum dobuka dilamik. ‘Din ning aning-aning nirya ara, nun like’ tenen, bataklamikce, ikin weik ulamik. Winilamika deice arye, sik dipmanto ulamik.

¹⁹ Ikin ulamikba, mambul kanye bomikce, Allah atibuk, “Melipsilyame,” nyabuka, malye nyabuka morolamik. Malye kanye bobuka, morolamik talak ara, Allah kekebukce, sikti, lyeprobukce, teleb kipdeibuk.

²⁰ Aninye ara, sik kanye imun uk dilamuk ning arye, sirya dakmanto ulamik bukni, Allah elce nyabuk yupu, adiparyuk, auk loprobukce, aninye ati kam bulilamuk. Uk arye dipmanto ulamik bukni, Allah elce, ‘Na tenena ninye kum ubicak’ tenen, kwetepdeibukce, tuba tonap, teleb kipdeibuk.

²¹ Ati ara, Allah Yahweh elce, kanye talima arebukba, bico tenen, melilamuk ninye nirya arye, Allah el tibuk, “Telebe, anda weik telebnye ulyame,” nyabuka, el si erebuka kinamake. Tonda, Allah el si Yahweh arye, tenebuka pil dolul ning nirya ara, ‘Se, aning ara, ninye arye kum upmanto ning winilula’ tenen, el tibuk ‘Telebe,’ nyanamake.

²² Tonda, sikce Allah Yahweh ati, weik kanye deibikirye, “Telebe,” nyabuka, kam ning obuka, el si erena ati, boyanuka arenamake. Aning atonun, tonda Allah elce ninye kum winipmanto pil dolul ning nirya bobuka, yuk ninye damak laka lebuka, peterepra banamake. Ayupu laka lelbanamak talak ara, Allah ati kibuka don mot wibikirye, yuk ninye, sik damak laka nyalbinamake.

²³ Ton ninye ara, weik laut mekwen deice balamle kapal bobuka, balamik ninye babye, talye ati kum winilamik. Ara, ‘Bona ning ayala-yala nirya, nun laut mekwen deice balamle ning, el si ara kapal laut pum tam, yuk pera mutuku bobibirye, dekipyopura, dekna ning weik arye dolonamabe,’ tenelamik. Tonda, ‘Nun dina dibibirye, kam unamabe’ tenen, sik dina ati, weik laut mekwen deiceuk, pia balamikce, mekwen pum bal ikan ati, enauk ulamik.

²⁴ Ati, sik weik laut mekwen deice, kapal arye bukuka balamik nang ara, Allah Yahweh arye, ninye kum winipmanto pil, weik mambul pil, laut mekwen deice domuk ning ara, sik asing arye eililamikce, kel biklamik. Tonda, weik laut mekwen noutamak ubuk ning nirya babye, laka ulamukba, eibuka kel biklamik.

²⁵ Ara, Allah arye, “Winipnamlume,” nyalamuk touk, mikip weik kumanya balamukce, laut mekwen deice yanuka, pubukba, mek ara, longteng-longteng alamukce, weik mek talin-talin deibukce, welelamuk.

²⁶ Laut mekwen deibuk noutamak arye, mek talin-talin deibuka welebukopura, mekwen deice bukuka balamuk kapal ara, mek mikip arye erebuka, alip tam bobinmoka ani, tamubuka mekwen deiceuk, yanuka batakukba, amekwen deice, kapal bulamik ninye nirya, ilil weik ulamuk. Minop talak ara, ilil kum ninye ulamik bukni, mekwen arye, sikti, dipmanto ubuk talak ara, ilil weik ubukba, sik tenelamik ning ara, ‘Se, dipkoprob talyeto mekwen dipmandasile,’ tenen, ilil weik ubukba, sik kanye nirya ara, ilil ulamuk.

²⁷ Adeice arye, sik aninye nirya ara, kisok dokbo balamukba, yu mek weik arye dipmakiba, kisok biribiri aplirye, kanye wangalamak touk ubuk. Winibukba sikce, ‘Winipnamabe,’ tenepmek kanye nirya ara, wangapsinibukba adiparyuk luba kilamik.

²⁸ Ikin ulamikba, mambul kanye bomikce, Allah atibuk, “Melipsilyame,” nyabuka, malye lebuka morolamik. Malye kanye bobuka, morolamik talak ara, Allah kekelamukce, sikti, lyelamukce, teleb kililamuk.

²⁹ Ara, kumanya mikip weik arye balamuk ning ati, ‘Tunimaplyame,’ nyalamukba, kumanya Allah el yupu kekelamukce, adiparyuk tunimalamuk. Winibukba, weik mek talin-talin welelamuk ning babye, tunimalamuk.

³⁰ Kumanya akunum kum danopura, sik anang kanye delilamikce, ‘Nun binamap mutuku ani,’ tenelamik ning ara, Allah arye meliamukba, balamik.

³¹ Ati ara, Allah Yahweh elce kanye arebukba, bico tenen, melilamuk ninye nirya arye, Allah el tibuk, “Telebe, anda weik telebnye ulyame,” nyabuka, el si erebuka kinamake. Tonda, Allah el si Yahweh arye tenebuka, pil dolul ning nirya ara, ‘Se, aning ara, ninye arye kum upmanto ning ulula’ tenen, el tibuk telebe nyanamake.

³² Tonda, sik aninye arye, Allah Yahweh ninye kum winipmanto ning, mambul pil dolamuk ning nirya ara, yupu bobuka, yuk ninye ati, laka nyalbinamake. Tonda, Allah el yupu talibuka, pil donyak nang, sik wisi-wisi nang ara, ninye yupu bokolina ati, bulunyakak laka nyalbinamake.

³³ Tonda, Allah arye weik mambul pil dolamuka ara, ani. Yata mutuku ninye do nirya, el yupu yanibikirye, pia malye weik winibicopura, Allah arye aninye, ikin ning arelule. Winipmanto ara, mek balamuk ning nirya, kum kipdeipliba, celolamle. Mek pu dobuka balamle ning nirya babye, Allah arye nyaplyopura, amek pu cebuka, sesal lepdeipliba, tuku nirya kat uk kililule.

³⁴ Aning atonun, yata mutuku ninye do nirya, el yupu yanibikirye, pia malye weik winibicopura, sukun tuku nirya kum kipdeiplirye, mok ap, mek ap, kum ati, buppu weik arye, ninye kum ulamik mutuku tuku uk, yanuka punulongolule. Amutuku tuku deice, tuku pum tam arye, garam atonun ning panapliba, palamle ning ayala-yala nirya, kum papmanto ulule. Aning ara, amutuku unyak ninye arye, malye wininyaka dekna ati winilule.

³⁵ Bukni, yata mutuku ninye do nirya, Allah arye nyalul yupu moubuka kekebikirye, teleb ubuka diksukumuk winibicopura, Allah arye, aninye ati melilule. Ara, pata mutuku ara, tuba tamubuka mekwen delinak kililule. Aning atonun, keting buppu arye, mek nirya cepropliba, mikne tukwak arye, tuba tamubuka mek pu kipnamle.

³⁶ Winiplye talak ara, dina patanmalibuk unyak ninye ara, dobuka teleb kililul mutuku deipliba, teleb ubuka wininamake. Aninye nirya ati, winiryuk mutuku ton kintinipliba, aninye nirya arye, weik asik dobikirye, amutuku uk unamake.

³⁷ Tonda, sikce wa wibuka dokonamak ning ap, tonda anggur tapu duk, wa wibuka kounamak ning ap nirya, nong kiplyopura, libuka tonok sukum bulubuka, deipnin balamikiba, pia weik upnamle.

³⁸ Allah Yahweh arye, sik aninye ati melilamliba, sik mapu delina ati ara, weik tabakuka arepnin baliba, delinamake. Winipnin banamaka deice arye, sik mapu nirya, pia weik deipnin banamake. Tonda, sikce talibuka weinamak kam ning ayala-yala nirya babye, pia weik upnin banamle.

³⁹ Bukni, yuk mutuku ninye arye, Allah el ‘Naʼ tenen, ninye ati yanuka, obisibikirye, sik aninye, yupa pia weik obuka sirya dakikirye, Allah elti, dib tenenyak ninye mitik anun, sirya tuba batakikcopura, Allah arye abataknamak ninye ati melilule.

⁴⁰ Yuk mutuku ninye arye, Allah el ‘Naʼ tenen ninye ati, ikin ning weik dobuka, sik nong deice akunum deibikcopura, Allah Yahweh arye, sik yuk mutuku deiyok talibuka unyak nang nirya ati ara, kanye talima mitang kipdeipliba, yuk nang, sik amu tam unamake. Unamak talak ara, Allah arye, sik aninye ati, “Ninye pia bana kum mutuku, pia pata mutuku bisik bimunce, tonok mutuku kum binuka unamlum bukni, amutuku uk, binuka, yanuka kilamunce, lu tamupdanuka binamlume,” nyabuk.

⁴¹ Bukni, Allah elti, dib tenenyak ninye, sik imun kanye bobuka unyak ninye noutamak, aninye nirya ara, Allah Yahweh arye lyeproplirye, teleb kilinamle. Wininamle talak ara, bona utoto talina kum ninye ati, Allah weik arye, meliplya deice arye, sikce deibikiba, dadeipdanin banamak ninye ara, sik tam ninye nirya ara, ninye yupa pia weik upnin banamake. Winipmanto ara, domba basam mi deipliba, weik ulamle touk ubuka, weik upnin banamake.

⁴² Pia diksukumuk ubuka wininyak nang ara, aning eibikirye, kanye deibuka pin-pina asa arye unamake. Bukni, sik malye winin ninguk talibuka unyak ninye ara, yupu tana kumce si bam bol tirikdongobuka unamake.

⁴³ Yatanye do, weik kel bikna deice arye, pia moubuka kel kipmantonye bira, anyapman yupu nirya teneplirye, moubuka kel kipnamle. Tonda, el anye birye, ‘Allah ara, dipkoprob aulule. Allah Yahweh arye, nun tukwak ninye ati, weik arye bico tenesilya ara, pia kum kum danamle’ tenen, moubuka tenenamle. Daud birye, ayupu nyabuk.