Mazmur 106 - Eipomek

‘Allah arye, el mapu sik Israel nang ati, teleb kililule,’ nyabuk yupu

¹ Nun ni Allah Yahweh ati, “Anda pia telebnye ulyame!” nyabuka, el si erenamabe. Diba, Yahweh pia telebuk winisulula ati, nun nirya arye, “Naio anda pia teleb ulyame,” nyabuka, elti, si erenamabe. Tonda, Allah arye nunti, “Weik tonun bico tenesununa ati, ‘Pia teleb kilinamsine,’ nyabuka, nyalin yupu deice arye nyapdeipsine,” nyapdeipsuke. Aning nirya ara, pia kum bataknamle.

² Allah Yahweh ara, el pia mikip weik deice arye, ninye winipmanto kum pil dolul ning ara, yatanye birye, aning nirya laka nyaptu do? Kume, aning nirya, kum laka nyapmantoe. Atonun, Allah el pia teleb ulye ning nirya ara, yata tonye birye, aning nirya. laka nyaptu do? Kume, aning nirya babye, kum laka nyapmantoe.

³ Yata nang do nirya, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu dobuka, ayupu nyasilye touk, ninye yupu lipsisikuka bokolina deiyok nang nirya ara, pia kanye deibuka, telebuk unamake. Ara, adeiyok-deiyok nang nirya arye, pia diksukumuk unyake. Ara, Allah arye, “Wininamlume,” nyasilye touk wininyake. Tonda, yuk nang ara, telebuk wininyake.

⁴ Se, na ni Yahweh, ance, ‘Na tenen, nang unamak’ tenen, weiamlum Israel nang ati, teleb kilinalam talak ara, nati ton lyepnimince, melipnamnilame. Tonda, sik Israel nang, ikin kanye bobuka unyaka ati, ance anang nirya lopdeipmince, lyepropnalam talak ara, na ton melipnamnilame na nio!

⁵ Ara, talye ati kum bukni, ance Israel yala nang nirya ara, teleb kipdeipminba, sikce pil dobuka, wininamak ning nirya ara, sikce teleb ning weik tonun dolonamak ning ap, pia telebuk wininamak talak ara, ‘Narye ton eiptinye’ tenen, moropkine na nio! Tonda, ance wibuka teleb kipdeiamlum Israel nang arye, kanye deibuka, kil-kil asa unamak nang ara, ‘Na ton eiptinirye, sik teleb wininamaka ati, na babye kanye deiptinye’ tenen, moropkine. Ara, an ‘Naʼ tenen nang, pia talipminba, sik Israel nang teleb wininamak nang ara, na ton eipnyopura, telebuk kanye deibuka, kil-kil asa unamne.

⁶ Se, na kele. Nun Israel yala nang, nun apu yapu nang, min talak ulamik nang ara, malye weik winilamik touk, nunda atalak unyap Israel nang babye, an yupu yanibibirye, malye winin ning weik wininyabe. Sik minop talak ulamik nang babye, nun atalak unyap Israel yala nang babye, ance, “Aning ara, wininamlume. Aning ara, pia kum wininamlume,” nyapdeiamsulum yupu batakuburye, malye weik winilamupu touk, tuba malye winin ning weik tonun tuba wininyabe.

⁷ Nun apu yapu ara, Mesir mutuku noutam ulamik talak ara, ance pia mambul ning, mikip weik ninye dopman kum pil dolalum ning ara, teleb ubuka kum tenyamika ati, ‘Aning ara, deiyok noutam ara ani,’ tenen, moubuka kum bikamik. Aning kum bukni, tonda ance nyalin yupu deice nyapdeiamsulum yupu babye, luba kibik. Ara, ance, “Anggunda wininamlume, wininamlume. Winipmunyopura, narye anggunti, weik tonun bico tenesinirye, pia teleb kilinamsine,” nyabuka, nyalin yupu deice arye, nyapdeipsulum yupu ara, sik nirya arye, luba kiamik. Aning nirya tenena kumce, tuba talibuka, kum winilamika ati, nun apu yapu arye, Allah anti batakike. Anda, aning-aning nirya deice tam erebuka, Pia Mikip Weik Deiyoknye ulyam bukni, sikce anti batakikce, ‘Allah arye nyasilye yupu ara, kekebuka kum, aning nirya kum talipnamabe, nun yuka!” nyabuka, an dam arye kisikdakuka, yukak bindobike.

⁸ Diba, nun apu yapu arye, pia malye weik winilamik bukni, Allah arye, ‘Yuk nang arye, na si ati, malye yupu nyapnikcak’ tenen, sik Israel nang lyepdobukce, lopdeibuk. Allah arye, Israel yala nang lyepdobuka deiyok ara, ‘Ninye nirya arye, na pia mikip weik ununa ara, bita biknamak’ tenen, Israel nang lobuka lyeprobuk.

⁹ Atalak ara, sikce pia pata mutuku noutam balamikce, weik laut mekwen, el si ara, Laut Teberau dam yanuka, binman kumto upmoka ati, Allah arye alaut mekwen ati, yupu mikip arye nyabukba, laut mekwen nirya cepdobukba, tuku mikdobukba, tuku lak ubuk. Abisik tuku dem ubukba, Allah arye menekukba, sik Israel yala nang nirya, el aminyan tam yayikce, kel-kel abuk tuku deice arye, bisik otam banmik. Ara, mek pia kum sukum, kata mutuku noutam bana atonun ubuka, kisikdakuka otam biyik.

¹⁰ Allah winibuka deice arye, sik Mesir mutuku yin talin nang arye, ‘Israel yala nang nirya opnuyab,’ tenebik nang nirya ara, Allah arye obuka, sirya dakukce, el ‘Naʼ tenen nang ati lyeprobuk. Diba, Mesir nang arye, ‘Israel nang opnamap,’ tenebikce, olyayik bukni, Allah arye, Israel nang lyeprobuk.

¹¹ Israel nang lyeprobuk bukni, Allah arye nyabukba, alaut mekwen arye tamubuka yayukopura, sik mal olan nang, Mesir mutuku yin talin nang nirya ara, dibuk. Amek kwen arye, anang nirya dibukce, sirya dakukopura, tonoknye babye, ton kum batakukba, kam kum ubik. Sik nirya dibinauk ubik.

¹² Allah arye, aning nirya akunum winibukopura, adeice arye, sik Israel yala nang nirya ara, Allah arye nyabuk yupu nirya, diba tenebik. Diba tenebikce, mot nyabika deice arye, Allah ati, “Se, nun ni Allah bira, el pia mikip ap, teleb ap ulula ati, telebe nyabape,” nyabuka, el si erelamik.

¹³ Bukni, sik daulamika ani, mitik tonun ton akunum ubukopura, Allah bira ninye arye ton winipman kum pil dolamuk ning ara, tamubuka luba kibik. Tonda, sikce, ‘E, minop ara, Allah arye, “Winipnamlume,” nyapsiliba, ‘Kekebibya deice arye wininamabeʼ tenen ning ara, tuba kum biklamika arye, sik min bikamik ning ara, luba kilamik.

¹⁴ Tonda daulamika ani, aminyan talak ara, sik nirya arye, ‘Se adin ara, ton tabakuka diptibye,’ tenen, patana weik ubuk ati, malye kanye bobuka ulamik. Winilamika deice ara, ‘Allah arye arisulul ning ara, nun lik’ tenen, ‘Allah arye nun patapsuk ninguk arepsutu do? Aning min kum datu do?’ tenelamikce, Allah ati kwatibuka asilamikce, malye kilamike.

¹⁵ Allah arye, ‘Na like,’ tenebuk bukni, sikce moronmek ning arebuk. Sikce moronmek touk, kam ulamle ning tuptoto arebuk bukni, atalak arye, nakina yala weik ning ton dobuka, sik deice deibukba, sik nong bol nirya ara, malyeuk kipnin balamukba, mitang diamuk ulamik.

¹⁶ Tonda, sik tia ati, cang kain arye doltakna tenda aik, delilamik sukum arye, sik deiyoknye Musa ap, el du koproba, Harun ap ati, ‘Anang ara, nun lik ati, sikce nyasururak yupu ara, tuba kum kekenamabe. Nun tenebipye ninguk winiptibye,’ tenelamik. Ara, Allah arye Harun biti, ‘Anye bira, na amu tam ulirye, na si erena ati, mambul pil donamle,’ tenebukce, Harun wipdeibukba, mambul pil dona deiyoknye ulamuk bukni, Israel nang arye, ‘Kume, anye bira, nun lik,’ tenelamikce, malye weik winilamik.

¹⁷ Malye weik winilamikba, Allah bira, yu weik ubuka ati, amalye winilamik ning, deiyok kiamdik nang bitinye, sik si ara, Datan ap, Abiram ap ati, wenebuka obuk. Ara, Allah arye nyapdeibukba, amutuku tuku dilikukba, sik abitinye nang ap, sik yupu kekelamik nang ap, atuku pum tam sakikba, atuku ara, tamubuka yayukce, anang nirya ansinip dongobukce, siknipdongobukba, anang nirya dibik.

¹⁸ Ton talak ara, malye weik winilamika ati, Allah arye nyapdeibuka deice arye, sik kan-kan arye weik uku arebukba, auku arye, sik malye winilamik nang nirya, obukopura dibik.

¹⁹ Tonda, daulamika ani, yuk talak ara, Allah ati bataklamika ati, Horeb mutuku binuka unmek talak ara, sapi basam mi urasin atonun ning memepdeibikce, aninguk si erelamik. ‘Aning ara, nun ni koproba aulule’ tenen, kat ning, el si emas dobuka, sapi basam mi urasin atonun ning memepdeibikce, isa si erelamik. Winilamika deice arye, pia malye weik winilamik.

²⁰ Israel yala nang ara, awinibika deice arye, ‘Allah el pia teleb ulya ap, mikip weik ulya ap ara, nun lik’ tenen, batakikce, Allah el pununa ati, talye sapi basam mi, maning bok dilamle kam ning, urasin atonun ning memepdeibikce, aning eibuka, isa siuk erenmek.

²¹ Winibika deice arye, sik Lyena Deiyoknye, Allah ati, luba kibik. Ara, Mesir mutuku noutam, ikin weik ulamik talak ara, sik lyena ati, sik ni Allah arye, pia mikip weik pil dolamuk ning nirya ara, luba kibik.

²² Ara, Mesir mutuku noutam bukni, mutuku si Ham mutuku noutam ara, Allah arye, el mikip weik deice arye, sik lyena ati, ninye dopman kum pil dolamuk ning nirya ara, adiparyuk batakikce, tuba kum tenelamik. Tonda, pata mutuku noutam balamik talak, weik laut mekwen, el si Laut Teberau dam yayik talak ara, Allah arye mambul weik pil dobukba, sik nirya arye, ‘Se’ tenen, mambul kanye bobikce, ilil weik uamuk bukni, aning babye luba kibikce, tuba kum tenelamik.

²³ Atalak ara, sik malye weik winilamika ati, Allah arye, “Sik Israel yala nang nirya ara, obuka malye kipnirye bataknamne!” nyabuk. Nyabuk touk, Allah arye anang nirya akunum obuka, sirya dakmatu bukni, Musa birye Allah el dam yanuka, Allah ati, ‘Se na nio, aning ara, kum winipnulame. Anang namin kipnalame,” nyabuka morobuka ati, Allah arye anang kum obuka, sirya dakuk.

²⁴ Nirya daulamika ani, aminyan talak ara, pia teleb mutuku, Kanaan mutuku tam winiryuk biyik talak ara, sikce, ‘Kume, amutuku ara, nun lik,’ tenen, malye weik nyalamik. Deiyok ara, Allah arye, “Narye arepnamsin mutuku, Kanaan mutuku tam ara, pia teleb mutuku ati, amutuku noutam ara, teleb kipdeipsiniba, telebuk unamlume,” nyabuka, nyalin yupu deice nyapdeiamuk ning ara, sik Israel nang arye, diba kum tenelamika ati, “Amutuku ara, nun lik,” nyalamik.

²⁵ Winilamika ati, sik terpal atonun ning arye domik doltakan tenda aik pum tam bulamikce, amutuku ati malye nyabuka, engelamik. Sikda, ‘Nun lik,’ tenelamikce, malye weik nyalamika ati, Allah Yahweh arye, “Winipnamlume,” nyapdeiamuk yupu ara, kum kekelamikce, aning atonun kum winipnin balamik.

²⁶ Sik Israel yala ninye ara, “Allah arye nyasulul yupu ara, kum kekenamabe,” nyabuka bataklamika ati, Allah arye, el taruk erebukce, nyalin yupu ton nyabuk. Ara, Allah arye, “Sik Israel yala nang ara, pia malye weik tuba wininyaka ati, sik nirya ara, obuka sirya daknyopura, pata mutuku noutam ara, sik nirya dibinauk unamake,” nyapdeibuk.

²⁷ Tonda, Allah arye nyabuk. “Sik Israel yala nang arye deibikiba, dadeipdanin banamak nang nirya ara, wenepnirye, bokuka yuk-yuk deipnirye, amutuku noutam arye yakniba, sik nirya ara, yuk-yuk mutuku noutam unyak nang kan-kan uk binuka unamake. Tonok teleb mutuku noutamuk, kum unamake,” nyapdeibuk. Winibuka ati ara, Allah arye sik Israel nang nirya bokukce, amutuku noutam arye yakuka, sikda yuk-yuk mutuku ulamik nang kan-kan donokukba, amutuku binuka, anang ap neika ulamik.

²⁸ Yuk-yuk mutuku noutam binuka ulamik talak ara, sik Israel nang arye, sik Peor mutuku nang arye, isa si erelamik ning ati, ‘Nun ni bira, isa si Bahal aulule’ tenen, atalye ning talilamikce, isa Bahal, el siuk erelamik. Tonda, sik yuk-yuk mutuku nang winilamik touk, sik Israel yala nang babye, ‘Akunum diamik nang, sik kanye arye yanuka nunti melipsitinge’ tenen, kam ning obuka, akunum diamik nang ati, arelamikce, anang sik kanye ati, “Melipsululume,” nyabuka morolamik.

²⁹ Winilamika deice arye, malye-malye weik winilamika ati, Allah arye aning nirya elilamuka ati, yu weik ubuk. Sik malye winilamik ning ati, Allah el yu weik ubuka ati, sik wenena ati, nakina yala weik ning dobuka, sik deice deibukba, anakina talilamuk deice arye, anang weik tonun dibilamik.

³⁰ Nakina yala weik ning dilamukba, ninye weik tonun deibik talak ara, tonoknye el si Pineas tikukce, ninye tonok ton malye winilamuknye obuka ati, Allah arye aning eibukce, kanye deibuk.

³¹ Allah arye, Pineas winibuk ning eibukce, kanye deibuka ati, elce, ‘Pineas birye, anang bitinye obuka ara, moubuka teleb winin ning akunum winipmale,’ tenebuk. Allah arye, utenebukce. Nakina yala weik din ning, kum daneibuk ati, sik Israel yala nang arye, Pineas winibuk ning ara, pia tuba bikinyake. Ara, atalak ulamik nang babye, aminyan talak ulamik nang babye, wini talak tuba unyak Israel nang babye, ‘Pineas birye winibuk ning ara, pia telebe,’ tenen, aning tuba bikinyake.

³² Tonda, Kanaan mutuku noutam daulamika ani, aminyan talak Meriba mutuku dam unmek talak ara, sik Israel yala nang arye, tonap malye wininmeka deice arye, Allah Yahweh el yu weik ubuk. Israel nang arye, mek patalamuka ati, malye weik winibika deice arye, Musa babye malye winibuka ati, Allah arye Musa biti, wenebukba, ikin ning doprobuk.

³³ Ara Israel nang arye, malye yupu weik nyalamika deice arye, Musa bira, yu weik ubuk. Yu weik ubuka ati, moubuka tenina kumce, malye yupu ton nyabukba, Allah arye el Musa biti, yu ubukce wenebuk.

³⁴ Tonda, Israel ninye ara, Kanaan mutuku tam wekelbinuyik talak ara, Allah arye, “Na diba tenena kum, amutuku yuk-yuk unyak nang nirya ara, anggunce obuka, sirya daknamlume,” nyapdeibuk bukni, sik Israel yala nang arye, aning kum winipnin balamikce, amutuku nang ap neika ulamik. Winilamika deice arye, sik babye, malye weik winilamik.

³⁵ Israel yala nang arye, sik Allah ati, diba kum tenelamik nang, Kanaan mutuku noutam yala yuk-yuk daulamik nang dam binuka, talye kanye bobuka, anang ap neika ulamikce, amutuku ulamik nang arye, malye weik winilamik ning elilamikce, ‘Nun babye aninguk wininamabe,’ tenelamikce, malye weik winilamik.

³⁶ Israel ninye ara, Kanaan mutuku tam nang ap neika ulamika ati, Kanaan mutuku tam nang arye, isa mer si erelamik ning ara, sik Israel yala nang babye, aisa siuk erelamik. Winilamika ati ara, malye winin ning ton tabakukapnarye talibuka winilamikce, malye weik kipdeipdanamik.

³⁷ Sikce malye winilamik ning ton ani. Ara, sikce delilamik mapu ton, tonok-tonok dobuka, isa si erena ati, amapu obuka, isa ati arelamik. Atonun ton, sikce delilamik kilmapu babye, tonok-tonok dobuka, isa si erena ati, akilmapu obuka, isa ati arelamikce, uku dongolamik.

³⁸ Israel nang arye delilamik mapu ap, kilmapu ap ara, malye kum winilamik bukni, sik ni yapu arye, amapu weik tonun olamikba, ining weik balamuk. Ara, talye ining kum bukni, sikce delilamik mapu ap, kilmapu ap olamikba, sik ining weik balamuk. Ara, talye ati kum olamik bukni, deiyok ara, ‘Kanaan mutuku noutam unyak nang arye, isa si erenyak ning ati, nun ton aisa si erenamap’ tenen, sik mapu weik tonun olamikce, aisa ati, arelamikce, uku dongolamik. Winilamika deice arye, Allah arye sikti, areamuk mutuku nirya ara, pia malye kipdeiamika ati, Allah arye amutuku nirya, ‘Na like,’ tenelamuk.

³⁹ Aning dem kum bukni, isa si erena ati, sikce delilamik mapu weik tonun obuka, isa mer ati arelamika deice arye, sik nong ton, malye kipdeipdayikba, Allah arye sikti, “Kume, anang nirya ara, akunum malye kipdeipdayika ati, na dam yatingce, na si kum erepnitinge,’ nyabuk. Winipmanto ara, sal arye kilapu akunum domice bukni, akilapu batakuka, yuk talye unyak kilapu ton dobikirye, neika unyakce, ubula yolalamaka atonun, Israel nang arye, sik ni Allah ati, yaniltakanauk winilamika deice arye, pia malye weik winilamik.

⁴⁰ Israel yala nang arye, aning-aning nirya ara, malye weik winilamika ati ara, Allah el yu weik ubukba, sik anang ati, wenebuk. Ara, Allah arye, sik Israel yala nang ati, ‘Pia, sikda ‘Naʼ tenen nang unamak’ tenen, akunum wipdeibukce, sikti, kanye deiamuk bukni, malye-malye weik winilamika ati, Allah arye, ‘Se, anang ara, na like,’ tenelamuk.

⁴¹ Tonda, yu weik ubukba, sik wenena ati, elti, diba kum tenelamik nang, ‘Sikce Israel nang obikirye, talipnamak’ tenebukce, el mapu Israel nang dobuka, sik yuk mutuku nang, taruk deice arebukba, Israel yala nang weik tonun olamike. Israel ninye batakuka, yuk-yuk mutuku nang ati arebuka ati, lo arebukba, anang arye, ‘Israel yala nang ara, nun pia lik,’ tenilamik nang arye, Israel yala nang dam yanuka olamikce, sik ap, sik bona nirya ap, talilamik.

⁴² Ati ara, ‘Israel yala nang nun lik,’ tenelamik nang, sik yuk-yuk mutuku nang arye, Israel nang obuka, sik nong deice, pia ikin weik deililamikce, ikin pil ton dilamikba, kanye imun kanye bobuka ulamik. Ulamika ati, sik Kanaan mutuku tam yuk-yuk yala nang ara, sik mikip deice arye, Israel nang talilamikba, Israel nang ara, ikin weik ulamukba, lyepdanman kumto ulamik.

⁴³ Atalak nirya, sik yuk-yuk nang arye, Israel yala nang talilamikba, ikin weik ulamik bukni, Allah arye, sik dam yayukce, lobuka lyeprobuk. Allah arye, Israel nang lyeprobuk bukni, tuba tonap, sikce sik bidamang talima noutam, ‘Allah arye nyasilye yupu, tuba kum kekepnamap’ tenen, Allah yaniltanauk winilamik. Tonda, sikce malye weik winilamika deice arye, Allah arye sikti, wenebukce, pia amu tam kipdeibukba, ikin deiceuk ulamik.

⁴⁴ Winilamuk bukni, daulamika ani, aminyan talak ara, ikin ubukba, sikce, “Se, nun ni Allah yamunce, melibuka lyepsilyame!” nyabuka morolamikba, sik ikin kanye bobuka, ulamik ning elilamukopura, sikti, bico tenebukce, tonap, sikti, melibuka lyeprobuk.

⁴⁵ Tonda, Allah arye, ‘Se, ‘Naʼ tenen nang, kum ubikcak’ tenen, elce sikti, “Sikda wininamlume. Winipmunyopura, narye pia teleb kipdeipsiniba, telebuk unamlume,” nyapdeiamuk nyalin yupu ara, tonap bikuke. Aning tuba tenenauk ulamuka ati, sikti, bico tenebukce, sik dam yanuka lyeprobuk. Deiyok ara, Allah arye, “Anggun ti, weik tonun bico tenesinirye, pia teleb kipdeipsiniba, pia telebuk unamlume,” nyapdeiamuk yupu, akunum nyabuka ati, adeice arye, tamubuka Israel nang lyeprobuk.

⁴⁶ Aning nirya tuba bikuka ati, elce sik Kanaan mutuku tam yuk yala nang, sik talima noutam pil dobukba, anang arye, sik Israel yala nang nirya ara, bico tenelamik. Ara, Israel nang opnarye, tapu koubuka, talilamik nang arye, Israel nang ati, bico ulamuk.

⁴⁷ Ati ara, narye aMazmur yupu deice, mot sekmanye birye nyapne. “Se, nun ni Allah, an si Yahweh ara, nun Israel yala nang nirya melipsilyame!” “Ara, yuk pera mutuku nang arye, talisinyak sukum yamince, melibuka lyepsimince, ‘Nun nirya bulubuka, bobinamsilam’ tenen ati, moropkine na nio.” Ara, talye ati kum bukni, deiyok ara ani. Ara, nun Israel yala nang, tuba kam unamap nang arye, anti, “Anda pia telebnye ulyame. An si ap, an weik mikip ap, an pia teleb uminye ning ap ara, pia telebuk ukulule,” nyabuka, an siuk erebibirye, anti, pia si erebuka kinamkiabe. ‘Wininamap’ tenen, “Ance melibuka lyepnamsilame,” nyabuka moropkiabe na nio!

⁴⁸ Tonda nyapsine. Nun nirya arye, nun ni Allah, nun Israel nang arye si erenyap Allah ara, el si Yahweh ati, “Anda pia telebnye ulyame,” nyabuka, el siuk erenamabe. Allah Yahweh ara, aning-aning min kum uamuk talak arye, dipdongobuka, danoutam talak nirya ap, dounamle talak nirya ap, eluk aulule. Pia Kam Unanye ulula ati, minop talak akunum ulamukce, danoutam talak ulamuka ani, wini talak tuba ulye touk, aminyan doupnamle talak babye, kam tuba unamle! Ati ara, nun Israel yala nang ap, tukwak mutuku unyak nang, yuk-yuk nang nirya ap ara, “Allah pia aunamle” tenen ati, ‘Amin’ nyanamabe. Tonda, nun nirya arye, “Yahweh anda, Pia Telebnye ulyame,” nyabuka, “El siuk pia erenamabe,” nyapne.