Mazmur 105 - Eipomek

Yuk ninye mutuku sirya, im sirya nirya ara, ‘Allah elti, dib tenenamyakʼ tenena ati, Allah arye winilil ning nirya ati, laka kibuka nyanamlule,’ nyabuk yupu

¹ Allah ati, ‘Telebe,’ nyapmunce, el weik mambul yupu nyabuk ning ara, ninye mutuku-mutuku nirya ukcak, laka nyanamlulume.

² Allah el tibuk, kanye lon mot sena deice arye, “Allah elda ninye kum winipmanto ning nirya, pil dolulnye,” nyabuka, el siuk erebuka nuknin banamlumba, ninye nirya arye, ‘Ayupu ara, mambul yupu’ tenen, kel kipnamake.

³ Allah el nong ara, pia telebnye ulule. Ati, nunda, el ‘Naʼ tenen, nang unyap anya arye, nunda kil-kil kanye bobuka, unamabe. Anye atonun, yata ninye do nirya, Allah ati si erenyak nang nirya ara, kanye deibuka, pin-pin asa arye unamake.

⁴ Nun Israel ninye nirya arye, Allah Yahweh el tibuk, asum-asum nirya si erebibirye, “An mikip weik ara, nun arepsimince, nun dam uminyopura, adeice arye nun mikip uk unamabe,” nyabuka, asum-asum nirya moronamabe.

⁵ Allah arye, ninye kum winipmanto pil dolamuk ning ap, “Aninguk moubuka talipnamlume,” nyapdeiamsuk yupu ap, ninye yupu bokeiyamsuk ning nirya ara, moubuka tenepmunce, talibuka unamlume. Tonda, pia luba kum kipnamlulume.

⁶ Se, Allah el amu tam ulamukce, el pil donanye Abraham arye deiamsukba, dadeipdanin yangalulum ninye nirya ap, tonda Allah arye, wibuka deiamukce, akuamuknye Yakub birye deiamsukba, dadeipdanin yangalulum ninye nirya ap arye, Allah elce ninye kum winipmanto pil dolamuk ning ap, tonda, “Aninguk moubuka talinamlulume,” nyamsuk yupu ap, aninguk moubuka talipmunce, tenenamlulume. Pia kum luba kipnamlulume.

⁷ Allah Yahweh elda, nun ninye deiyoknye usulula ati, elce nunti, “Aning ara, wininamlulume. Aning ara, kum wininamlulume,” nyapdeiamsuk yupu ara, tukwak mutuku-mutuku nirya unyap ninye ati, nyapdeiamsuke yupu ara, nun dam pia aunamle. Aninguk talibuka unamabe.

⁸ Allah elce nunti, “Wininamsine,” nyabuka, nyalina yupu deice arye nyapdeiamsuk yupu nirya ara, ton kum luba kipnamle. Pia tuba tenenamle anya arye, tonok ning babye kum bataknamle. Ayupu nirya ara dipkoprob nong upnamle. Tonda, Allah arye, “Aning ara, wininamlulume, aning ara kum wininamlulume,” nyapdeipsuk yupu nirya ara, pia ati aunamle. Minop talak arye aulamuka atonun, atalak babye aunamle. Doryanamle talak babye, pia ati aunamle. Kumu kum danamle. Pia aunamle.

⁹ Allah Yahweh, el nyalina yupu ara, nun apu Abraham ap, Isak ap, sik damak nyapdeiamuke. Allah Yahweh arye, “Winipnamsine,” nyabuka nyalin yupu ara, Abraham el dam nyapdeiamuke. Ayupu ara, dipkoprob Abraham el mi Isak deice yanuka dukdongobuk. Ati, ayupu pia tuba-tuba tenelule.

¹⁰ Tonda anyapdeiamuk yupu uk, ‘Tuba aupnamle’ tenen, ila tamubuka Allah arye Yakub el dam yayukce, “Minopce nyapkise yupu ara, dipkoprob nong upnamle,” nyabuka, tuba tonap nyapdeibuk. Ara, Israel ninye nirya arye, ‘Ayupu uk pia moubuka tuba-tuba tenena arye, teleb kipdeipnamsine’ tenen, yanuka nyapdeibuk.

¹¹ Nyabuk ning ara, Allah arye sik Abraham ap, Isak ap, nun Israel ninye ap ati, “Kanaan mutuku arepsiniba, anggun mutuku atonun umunce, pia ati amutuku talibuka unamlume,” nyapdeibuke.

¹² Minop talak, Allah el mapu Israel ninye, Mesir mutuku ulamik talak ara, ninye asik nang atonun ulamik. Sik Israel nang Mesir mutuku ulamik nang nirya ara, sik yupa mitik anun uk ulamik. Weik kum ulamika anya arye, yuk mutuku ninye nirya arye sikti, ‘Daubikce, aninye ara mambul kume,’ nyabuka tenelamik.

¹³ Sik Israel ninye ara, tonok mutuku uk kum ulamik bukni, amutuku-amutuku nirya, sikcuk pakalilamikba, ton mutuku ulamna ani, batakuka yuk mutuku binuka ulamik, amutuku arye lopdakuka, yukak balamik. Adeice arye, sik aninye nirya ara, talye bisik banauk ulamik. Tonok sukumuk darapdongobuka, kum ulamik.

¹⁴ Winilamik bukni, Allah arye sik anang nirya ati, kum namin kimokba, yuk mutuku ninye arye sik Israel ninye dam, ikin ning ton kum delilamik. Tonda, ‘Sik aninye ikin ning deipnamak’ tenen, sik ni koproba Allah Yahweh arye, dana-dana tam ninye deiyok kibuka taleamik nang, Raja-Raja ati, “Sikce na mapu ikin ning delina kume,” nyabuka, yupu seklamuk.

¹⁵ Allah arye yuk mutuku ninye deiyok nang ati nyalamuk. “Sik Israel yala ninye ara, narye wepdeipse nang anya arye, sikti, ton kum dupnamlulume. Tonda, na yupu nyapdeipniba, laka nyan nang, nabi-nabi nang, sik dam ikin ning ton kum delinamlume,” nyabuka yupu seklamuke.

¹⁶ Tonda, minop talak, Israel ninye arye talibuka ulamik mutuku nirya ara, din patan ning li arebukba, amutuku weik din patalamuk. Winibukce, amutuku noutamak din dilamik ning nirya ara, kum kipnin balamukba, ikin weik ubuk. Allah elce, sik dina dilamik ning aning-aning nirya doprobuk.

¹⁷ Bukni, tonoknye Yusup tonok ara, ‘El minopce Mesir mutuku binuka unamle’ tenen, Allah arye wipdeiamuk. Ati, Allah arye tenelamuk touk, Yusup el du yapu arye, Mesir nang dam dekikura, minopce binamukce, Mesir nang sik pil melibuka donanye kibuka, pil melibuka ulamuk.

¹⁸ Atalak, anye bira Yusup el yan ara, kat tapu arye pia koupdongamik. Tonda, el ngang dam ara, ikin ning rantai besi arye karakeiyamike.

¹⁹ Winyamikba, Mesir mutuku ninye deiyoknye, ikin kanye bobuka ulamukce, Allah arye nyalamuk yupu ati, ‘Aning winipnamle do? Yata ning wiripnamsil do?’ tenen, mambul kanye bobuka, ulamuk bukni, Allah arye Yusup biti meliamuk deice arye, Yusup elce, “Doryanamle talak ara, aning winipnamle, aning ton winipnamle,” nyabuka laka nyabuk. Yusup birye laka nyabuk touk, aninguk dukdongobuk. Winibuka ati, Mesir mutuku deiyoknye birye, ‘Se, dipkoprob Allah Yahweh arye nyalul yupu ara, dipkoprob ulule’ tenen, bikuk.

²⁰ Aning kel bikuka deice arye, Mesir mutuku ninye sik ninye deiyoknye birye, Yusup biti tapu koubuka wenena aik dongamika ara, “Lopdeiplulume,” nyabukba, lopdeibukce, adiparyuk wenena aik noutamak arye, lopdongamikba, teleb ubuka ulamuk.

²¹ Yusup akunum lopdeibikba, Mesir mutuku ninye, sik ninye deiyoknye birye, Yusup akunum doprobukopura, Yusup erepdeibuk. Erepdeibukce, nyabuk. “Yusup na talinun bona ning yala nirya ap, tonda na aik dam kalikina ap deiyoknye bira, elcuk kalikilirye, talibuka unamle,” nyabuka, Yusup wepdeibuk.

²² Nyabukopura, Yusup elcuk, Mesir mutuku taleamuknye birye, nyabuk. “Ancuk, na aik pil don nang ap, wisi-wisi nang nirya ap ati, ance kel bikamlum weik kel bikna deiyok ning peterenalyame,” nyapdeibuk. Tonda, “Yusup elcuk, na pil don nang nirya ap, amutuku noutamak taleamik nang, wisi-wisi nang ap nirya, sik deiyoknye umince, sik anang nirya yupu bokdeipmince, lipsisikilinamlyame,” nyapdeibuk.

²³ Winibuk talak ara, Yusup el li koproba, Yakub Kanaan mutuku batakukce, Mesir mutuku biyuk. Mesir mutuku biyukce, ninye asiknye atonun binuka ulamuk. Ara, tikilban nang atonun ubuka binuka ulamuk.

²⁴ Allah arye Yakub el mapu weik kibuka deipnin balamukce, mikip arelamukba, pia mikip weik ulamika anya arye, sik mal olan nang arye, yanuka kum obuka, bisipmanto ulamik. Israel ninye ulamik mutuku dana-dana tam ulamik ninye ara, mikip mitik asa arye ulamik bukni, Israel ninye ara, mikip weik asa arye ulamik.

²⁵ Allah arye, Mesir mutuku ulamik nang ati, kanye tamupdeibukba, sik anang arye, el mapu koprop Israel yala ninye nirya ati, derebuka malye yupu nyabuka, weik ikin ning sik nong deice delilamik. Tonda, Allah el mapu Israel ninye sikti, tilila yupu nyaplobuka, ikin ning delilamikce, amutuku ninye ati, ‘Minina yupu nyabibya deice arye, amutuku ninye nirya arye, Israel ninye ati, ‘Nun lik’ tenenamake’ tenen, talye yupu uk nyalamik. Tonda, Mesir mutuku ninye arye, sik Israel ninye ati tilila yupu uk nyalamik.

²⁶ Winilamikba, Allah Yahweh, el melinanye Musa ap, el du Harun ap, Allah elce wipdeiamukce, ‘Israel ninye melinamdak’ tenen, dopdeibukba, sikda Mesir mutuku birik.

²⁷ Sik abitinye nang ara, Allah arye akunum wipdeibukba, sik anang arye, Mesir mutuku noutamak birikce, ninye arye kum winipmanto pil yala nirya ap, tonda ninye winipmanto kum pil yala nirya ara, Allah arye, ‘Winipnamrake,’ tenyamuk touk, binuka winilamdikce, pil dolamdik. Allah arye, ‘Winipnamdake,’ tenelamuk touk, mambul pil binuka dolamdikba, amutuku ulamik ninye nirya arye, ‘Se, dipkoprob Allah, el mikip deice arye pil dolul ning’ tenen, kel bikamik.

²⁸ Weik mambul pil dobuka ulamdik talak ara, Allah arye, “Aning ara wininamdurume. Winipdumunyopura, ikin ning yanuka winipnamle ning ara ani,” nyabuka, nyaiamuk touk winibuk. Allah Yahweh arye Mesir mutuku noutamak nirya ara, kunukne ninguk arebukba, kunukna uk ubuk. Kunukna noutamak ulamik bukni, adeice arye kum kel bikamikce, mandipna kanye bobuka ulamikce, “Allah arye nyalul yupu ara, kum kekenamabe,” nyabuka, el yupu yanilamik.

²⁹ Allah elce nyapdeiamuk yupu kum kekepmanto ulamika ati, Allah arye, sik wenena ati, elce, ‘Teleb ulul mek nirya ara, tamubuka ininguk danule,’ tenebukura, Mesir mutuku noutamak balamuk mek ap, mekwen ap nirya ara, ining uk dayuk. Ining ubuka deice arye, amutuku mek noutamak ulamik mekwen pum bal, ikan ayala-yala nirya gara, debuka sirya dakik.

³⁰ Mesir mutuku ninye ara, tuba mandipna kanye uk ulamikba, Allah arye arebukba, yakai ayala-yala nirya, weik yupu nyabikce, amutuku yanuka, wekuka landibik. Tonda, yakai aniryuk Mesir mutuku ninye sik ninye deiyoknye un damak, pia telebak nirya babye, biyikce, wekuka langdibik.

³¹ Winibuk bukni, Mesir mutuku ninye tuba mandipna kanye uk bobuka ulamikba, Allah Yahweh elce amutuku noutamak ati, “Bum ap, suma ap, weik arye weklulume,” nyabukba, yupu lelim weik arye nyabuka, amutuku noutamak yanuka wekik. Winibika deice arye, Mesir mutuku nirya ara, suma ap, bum ap, sik uk pia weik ubuk.

³² Tonda, Mesir mutuku noutamak ara, Allah Yahweh elce, ‘Dekne duk-duka puru mok cepnamle’ tenen, nyabukce, dopkwetebukba, kubuka, tukwak mutuku sakuk. Adekne duk-duka puru mok tukwak sakalamuk talak ara, tuba-tuba bebeya lakna uk unmok.

³³ Wininmok talak ara, anggur tapu ap, kwarang yo ap nirya ara, metebuka tukwak uk sakalamuk. Winibukce, Mesir mutuku nang, sik yo ayala-yala nirya ara, metebuka tukwak uk sakanmokce, sirya dakuk.

³⁴ Winibuk bukni, Mesir mutuku ninye arye, tuba mandipna kanye uk ulamikba, Allah elce sul kwising yukubukba, sul kwising yupa ara, kum nukmanto, weik arye amutuku noutamak yanuka langdibik.

³⁵ Winibikce, asul kwising uk nirya panabuka yayikce, amutuku ninye sik koulamik ning ayala-yala nirya, bok deice yanuka amubikce, dibuka sirya dakik. Tonda, amutuku ninye sik dina ati, tuku deice koulamik ning nirya ara, dibuka sirya dakdongobik.

³⁶ Tonda, aning nirya akunum bukni, sik Mesir mutuku ulamik ninye ara, mandipna kanye uk ulamikba, Allah elce, Mesir mutuku ulamik ninye, sik min yuma sal mapu nirya ara, oplobuk. Ara, amutuku ulamikce, kil dopdanuka delilamik min yuma mapu nirya ara, obuka sirya dakuk. Mesir mutuku ninye arye, sik min yuma mapu ati, ‘Nun mapu mikip unamaka deice arye, telebuk unamabe,’ tenelamik bukni, Allah arye, min yuma mapu nirya obuka, sirya dakuk.

³⁷ Weik ikin ning aning-aning nirya, Mesir mutuku ninye, sik deice akunum deibukura, Allah Yahweh el mapu Israel ninye ara, Mesir mutuku arye bobuka biyuk. Abobuka banuyik talak ara, Mesir mutuku ninye arye, ‘Minop bitinge’ tenen, Israel ninye ati, urasin teleb ning, dekna weik ning emas ap, perak ap arebikba, bobiyik. Ara, sik mikip weik ap, kil-kil deice ap aniryuk biyik. Israel ninye ayala-ayala nang nirya, neika biyik talak ara, tonoknye babye, anye bira mikip kume, mitang ati, nyabuka kum batakuk. Sik nirya mikip arye bindobik.

³⁸ Atalak ara, sik Mesir mutuku ninye arye, Israel ninye ati, ‘Se, sik Israel ninye arye opnamsiyak do?’ tenen, kanye imun deice ulamikce, ilil ulamuk. Winibuka ulamika ati, Israel ninye biyik talak ara, sik Mesir mutuku ninye ara, kanye teleb ubuka ulamik.

³⁹ Israel ninye ara, Mesir mutuku batakuka, bisik balamik talak ara, Allah el mapu melina ati, keting noutam ara, Allah Yahweh arye dua arepnaba, yanuka lelipdongopneura, sikda amu tam balamik. Tonda lukunyan talak ara, Allah arye uku weisa arepnaba, sik bisik banak ara, dirina upnaba, adeice eipna arye, yanibuka balamik.

⁴⁰ Winibuka melibukba balamik talak ara, Israel ninye arye Allah ati, “Se, nun dina ara, tup ning ton patapsil ati, melipsilyame,” nyabuka morobikopura, maka el si puyu maka, weik tonun langdibuka arepnaba, sikce obuka dilamik. Tonda “Nun dina ati, roti ning patapmasile,” nyabuka moroneura, Allah arye roti kwaning, el si ara mana, im deice arye dopkwetepnaba, dobuka, dipna arye boupnopura, sik bisik balamik.

⁴¹ Tonda, “Mek patapsile ati, mek arepsilyame,” nyabuka, Allah ati morobikura, mutuku bukamuk noutamak arye, keil deice debukba, mek panabuka sakuk. Atalak ara, mek kumak, pia pata mutuku noutamak ulamik bukni, amek ara, mutuku patak arye panabuka yayukce, mikip arye biyukba, kwebuka dilamik.

⁴² Awinilamuk ning nirya ara, Allah arye el pil donanye Abraham biti, ‘Winipnamkine,’ nyabuka nyalin yupu nyapdeiamuk ning ara, kum luba kiyamuk. Aning ara, tamubuka tenibukce, amambul pil nirya dolamuk.

⁴³ Utenebukopura, Allah Yahweh el mapu ati, kil-kil kanye bobuka meilyamukce, bobuka balamuk. Abobuka balamuk talak ara, Allah elcuk wipdeiamuk ninye nirya ara, kil-kil kanye bobuka ulamikce, weik yupu nyalamikce, kanye deibuka ulamik.

⁴⁴ Bisik balamik talak ara, Allah arye meliamukba, balamika ani, elce, ‘Arepnamsine,’ nyapdeiamuk mutuku biyikura, sik amutuku mince ninye yala nirya arye talibuka ulamik ning, Allah nyaiamuk touk, el mapu koprop Israel ninye ati, amutuku arelamukba, binuka ulamik. Tonda, yuk mutuku ninye talibuka wilamik wa dam nirya ap, sikce, ‘Nun na dokola’ tenen, moubuka delilamik dekna weik ning nirya ara, Allah arye Israel ninye ati, mikip arelamukba, yuk mutuku taleamik ninye nirya, obisibuka balamikce, amutuku ning nirya dololamik. Sik Israel ninye arye, aning-aning nirya talibuka ulamikce, sik mutuku ap, bona ning ap atonun ubuka taleamik.

⁴⁵ Allah Yahweh arye, amambul pil dolamuk ning nirya ara, urdem ati kum pil dolamuk. Deiyok ara ani. Ara, winipniba, kel bikikirye, “Aning ara, wininamlulume. Aning ara, kum wininamlulume,” nyapdeiamse yupu nirya ara, ‘Dib nyamsuke,’ tenebikirye, ‘Aninguk talibuka dukdongobuka wininamak’ tenen, apil dolamuk. Ati ara, ninye nirya arye Allah ati, ‘Se, anda pia teleb ulyame,’ nyabuka, el siuk erenamlume. Daud arye nyabuk.