Mazmur 104 - Eipomek

“Nun nirya arye, Allah nun kwepdeipsuknye ati, si erebuka, kinamap,” nyabuk yupu

¹ Na ni Allah Yahweh, anda Weik Erenanye ulyame. Ati na kanye talima nirya, an deice deipnirye, “Anda pia teleb ulyame,” nyabuka, an siuk erekunune. Se, na ni Allah Yahweh, anda pia mambul weik ulyame. Winipmanto ara, ninye arye pia teleb baju ongopmakirye, urasin pia teleb ulamak touk, anda weik erena ap, pia mambul una ap, urasin pia telebnye ap, ulyame. Ati an siuk erenamkine.

² Nun ni Allah el dirina weiknye ulule. Ninye arye urasin teleb baju ongolamak touk, el deice dirina weik ulule. Tonda, ninye arye, kanam aniryuk baju bol dobuka, tia yanuka una ati, doltakna aik tapu bibik talebuka, kiriklamak touk, anda im deice ulul ning nirya kwepdeiplumce, teleb kipdeiplume.

³ Tonda an ulyamak, im deice ara, ninye arye, weik cang aik alip tam dobuka, welebalamak tonun, ance an ulyamak nirya, im deice dipdongobuka doplume. An aik nirya ara, im noutamak ap, tukwak mutuku ap, ulamle mek nirya, outam aulyeba, ance doplum asik ara, aning nirya deice tam, im deice arye doplume. Winipmanto ara, ance tukwak mutuku yangnaminye talak ara, an bisik ara, dua deice atikmince, banuminnye talak ara, dua deice bukminba, kum arye bobuka bakulule. Dua ap, kum ap ara, an amu tam ulirye, ance, ‘Winipnamle,’ tenepminye touk, an piluk dolule.

⁴ Aning-aning nirya talibuka ulyama anya arye, kum ap, uku ap ara, an amu tam bukuka ulula anya arye, ance, ‘Winipnamle,’ tenepminye touk, an piluk dolule. Tonda, bebeya lakna ara, an melina ninguk ulule.

⁵ Tukwak mutuku-mutuku nirya dobuka, weik mutuku yangan keil deice deiplume. Ninye arye aik dopnuce talak, ayukumna yo ikildaralamak atonun, ance, ‘Tukwak mutuku nirya, long-long aplirye, kum kum danamle’ tenen, tukwak mutuku amu tam mutuku yangan keil deiplumba, pia darapdongobuka, dopluma ati ara, anye pia aunamle.

⁶ Ance aning-aning nirya, min kum kwepdeiplum talak ara, tukwak mutuku deice weik mekwen deiamukba, tukwak mutuku lakak kum uamuk. Weik mutuku dup babye, mekwen noutamak karu pum tam uamuka anya arye, mutuku dup babye, kum eipmanto uamuk.

⁷ Winibuka uamuk bukni, nun ni Allah ance amekwen ati, “Dana-dana tam kiproplyame,” nyabuka, weik yupu deice arye nyaplumba, amekwen nirya, dana-dana tam kiprobukba, tukwak lakak ubuk. Liman olamle touk, ance weik yupu deice nyaplumba, mekwen nirya ara, adiparyuk minopce, dana-dana tam kiprobuk.

⁸ Mek obuka balamukak ara, mutuku konak arye, pu dobuka, lyu tam balamuk. Ara, ance, ‘Weik mekwen asukumuk deipnamle’ tenen, kwepdeiyalum touk, mekwen balamuk arye, deibuk.

⁹ Ancuk mek delilbinamukak akunum kintinibuka deiamlum touk, asukumuk tuba ulule. Tonda, ‘Asukumuk deipnyopura, deibuka langdibuka kum dinipnamle’ tenen, kwepdeiyalum touk, weik pala laut mekwen ap, yuk mekwen ap ara, ‘Aunamle,’ tenyamlum touk deiplume. Awiniplum ning ara, ‘Mek langdepsaklirye, ninye ulamica damak yanuka deiplirye, diplyak’ tenen, winiplume.

¹⁰ Aning winiplum ning ara, Allah ancuk mutuku bulamla amu tam bisik botokeiplumba, mek panabuka yangalule. Mek panabuka yangalirye, dana-dana tam mutuku dup aupmalya ara, noutam ara, mek balule.

¹¹ Winiplum ati ara, ‘Bura tam talye kam daunyak ning nirya, mekuk dinamak’ tenen, winiplume. Aning atonun, bai tam ulul ning, keledai basam nirya babye, ‘Mek pataplye talak, mek dibikirye unamak’ tenen, areplume.

¹² Maka aram ayala-yala nirya, yo taruk deice aik dobikirye, ‘Yo poula damak ukirye, yupu tanamak’ tenen, kwepdeiplume.

¹³ Tonda, im deice mutuku arye mutuku dam mok dolkwetelyame. Winipmince, tukwak mutuku nirya ara, ance kwepdeipnulum ning, aning-aning weik betekuka, telebuk palule.

¹⁴ Ninye arye weinyak kam ulul ning yala nirya, sapi basam do, domba basam do, aning nirya ati, ‘Sik dinamak’ tenen, mutmuta arelyame. Aning atonun, ninye ati ara, ninye arye, wa wibikiba, koulamak ning, aning-aning nirya arisilyame. An melisiminya deice arye, tuku noutamak arye, din ning aning-aning nirya paplirye, butukliba, boyanuka dinyabe. Winisiminya deice arye, tukwak mutuku deice kam ulul ning, aning-aning nirya ara, din ning dinyake.

¹⁵ Tonda, anggur yo dokamica ani, ninye arye dakuka dibikcopura, kanye deibuka teleb unyake. ‘Zaitun yo duk telel doprobikirye, sik asok deice likikiba, urasin teleb unamle’ tenen, zaitun yo duk moulamle yo ton, arepsulume. Tonda, ‘Ninye tukwak ninye nirya din ning dibiceura, sik nong mikip upnin banamle,’ tenen, roti din ning babye, yuk din ning aning-aning nirya babye, arisilyame.

¹⁶ Allah Yahweh, elcuk Libanon mutuku wabum yo, el si ara, kepyal yo nyalamak yo kouamice dam ara, mok weik arye areliba, teleb ubuka palule.

¹⁷ Ayo dupak, mitik maka ayala-yala nirya, sik aik donyake. Tonda, cang yan ap, kurun pol ap ulul maka, el si ara, ranggung maka, weik cang yo dupak, sik aik donyake.

¹⁸ Weik arye erebuka bukuk mutuku dupak, bai tam kambing, keil si deice balirye aulule. Tonda, ‘Mutuku bukdika amu tam, keil amu tam unamak’ tenen, mutuku dup keil deice balamle ning, el si ara ayam mana (pelanduk) kwepdeiplume.

¹⁹ Allah ance wala kwepdeipluma ara, ‘Ninye arye, e, ara li talak ani, buppu li ani, mok celye li ani, yuk li talak nirya ara uple’ tenen, kel bikna ati wala kintinibuka deiamsulume. Tonda keting babye binuka weknulye talak ara, keting el balye bisik kel anye arye, abisikuk kum ulule.

²⁰ Allah ance inina ning arepsuluma ara, asum-asum nirya inilamle. Akunum iniplye talak ara, bai tam ulamle ning keting noutam manyak ning ara, bukuka lukunyan banyake.

²¹ Tonda, bai tam ulul weik kus atonun ning, el si ara singa kus, ‘Na din ning ton, Allah arye kintinibuka deipnuk ning ton, diptinye’ tenen, weik yupu nyaplirye elbalule.

²² Wininmake bukni, bereklyopura, asinga kus nirya, keting noutam talak sik dungnubuka malamak sukumuk, tamubuka malbanyake.

²³ Lukunyan noutam balamle ning ara, sik malamak sukum tamubuka biceura, ninye tukwak ninye nirya bukikirye, sik pil dopra banyake. Apil ayala-yala nirya donmaca ani, akunum iniplyopura, sik pil batakikirye, tuba tamubuka sik asik malbanyake.

²⁴ Se, nun ni Allah Yahweh, ance pil dolyam ning aning-aning nirya ara, pia weik awinilyam ning ara, ninye arye kum nuktibye. Anda dipkoprob weik kel bikna deice arye, aning-aning nirya kwepdeiamsulume. Winibuka winipsulumba, tukwak mutuku noutamak nirya, ance kwepdeiamsulum ning, ayala-yala nirya weik aulule.

²⁵ Aning atonun, Allah ancuk, weik pala laut mekwen kintinibuka deiplumba, mekwen amu unyak ning mitik ning ap, weik ning ap, mekwen amu tam tuku deice balamak ning ap, mekwen noutamak balamle ning ap, pia weik unyake. Aning nirya ara, pia kum nukmanto.

²⁶ Tonda, laut mekwen pum tam, weik nong weik mekwen pum bal el si ara, Lewiatan, ance kwepdeiplumba, laut mekwen noutamak arye, mikip dobuka balule. Tonda, ance kwepdeipsulum laut mekwen deice tam, ninye dobikirye, weik mek lia yo, el si ara, kapal laut, akapal pum tam wekikirye, laut mekwen deice banyak ning babye elinyabe.

²⁷ Yata yala kam ulul ning do nirya, sik nirya ara, Allah antibuk, ‘Yata talak arye nun din ning arepnamsil do?’ tenen, pia kintinibuka dikinyake.

²⁸ Ninye do, yuk kam ulul ning ayala-yala nirya do, ance nun din ning arepsuluma ara, nunce bulubuka dinyabe. Tonda, ance kintinipsulum ning, an taruk arye bibiktalebuka areseminba, tukwak mutuku kam ulul ning nirya arye, nun din ning dibipyopura, bousulule.

²⁹ Bukni, nun ni Allah, ance nun nirya ati, lik ukilye talak ara, bataksimince, nun ton kum dilyasiminye talak ara, nun ilil weik upsiliba, imun kanye bobuka unyabe. Tonda, ninye do, yuk kam ulul ning do, ance nun isin dopropsiminye talak ara, adiparyuk dibinyabe. Akunum dibipyopura, ninye babye, yuk talye kam ulul ning babye, tuba tamubuka tuku uk dongolbanyabe.

³⁰ Bukni ance nun ap, yuk talye kam ulul ning ayala-yala nirya ap ati, ‘Mapu deibikiba, kam unamaka,’ tenepsimince, isin tuba arepsiminye talak ara, mapu ton deibibyeba, kam unamake. Ance kam una deiyok ning arepsiminye deice arye, talye kam ulul ning do, ninye do, mapu deibibyeba, dadeipdanin, banamak mapu ap, kam ulul ning deipdanin banamak mapu ap arye, tukwak mutuku-mutuku nirya binuka unamake. ‘Winibuka-winibuka,’ tenesiminya deice arye, tukwak mutuku nirya teleb ulisilyame.

³¹ Ati nun ni Allah an si ara Yahweh, an pia teleb winilyam ning ap, mikip weik arye pil dolyam ning ap, ninye nirya arye anti, “Elda pia telebe,” nyabuka, an si erenamkiyak ning ap nirya ara, ‘Aning nirya pia ati aunamle’ tenen, moropkine. Tonda, anda Allah Yahweh, ance kwepdeiyalum ning dimince, ‘Aning nirya ati kanye deibuka teleb unalam’ tenen, moropkine.

³² Se, nun ni Allah anda talinye kume. Tukwak mutuku dilyamin talak ara, mutuku nirya lulukulule. Tonda weik bulamle mutuku nirya yanuka bol piplyopura, asukum arye uku diplirye, weik tulum welelule.

³³ Aning nirya ati ara, na kam unamne talak ara, Allah Yahweh, el tibuk kinmanirye, mot senamne. Tonda, na tuba aunman talak ara, Allah ati, “Anda pia telebuk ulyame,” nyabuka, kanye lon mot senmanirye, kinamne.

³⁴ Atalak-atalak noutamak nirya, na kanye talima noutamak tenenamne ning nirya babye, Allah dinilirye, kel biknilyopura, ‘E, el tenelul ning ara, telebuk ulule, tenepnilirye, kanye delinamnile’ tenen, moronune. Ara, talye ati, kum nyapne. Na ni Allah Yahweh, el tibuk, na kanye delinuna ati nyapne. El melinilya deice arye, kanye delinune.

³⁵ ‘Ninye malye ninguk talibuka unyak ninye nirya ara, tukwak mutuku arye kum daneipnamle’ tenen, moronune. Aning atonun, yu tenebuka malye kanye bonyak ninye nirya babye, ‘Allah arye aninye wenebuka, kum daneipnamle’ tenen, moronune. Na ni Allah Yahweh, anda Weik Erenanye ulyame. Ati na kanye talima nirya an deice deipnirye, “Anda pia teleb ulyame,” nyabuka, an siuk erekunune. Nun tukwak ninye nirya arye, Allah ati, “Anda pia telebuk ulyame,” nyabuka, ‘Kanye lon mot senmabirye, teleb kilinamabe’ tenen, moronune.