Mazmur 10 - Eipomek

Yu nang arye, Israel nang ati, malye kililamika ati, Allah morolamik yupu

¹ Se, nun ni Allah Yahweh, yata deiyok ati, ance nunti yukak tikmanalimne, kum melisilyam do? Tonda, yata ati, nun ikin weik unyap talak ara, ance yanuka kum melibuka lyesilyam do? Winipmanto ara, anda duknupmamince, luba kiltakasinauk winisilyame.

² Tonda, sik yu weik nang ara, kwalibuka maknya kintininyakce, sik talye bona uto-toa talina kum nang ati, ikin pia weik, sik nong deice delinyake. Wininyaka ati, sikce yuk nang ati, ‘Anang ara, malye kipdeibibiba, ikin kanye pia weik tonun bobuka unamak’ tenen, talye yupu nyabikirye, malye un ning kanye uk tenebicopura, ‘Aning deice arye, tuba tamubuka, sik nong deiceuk yanamle’ tenen, morokinyabe.

³ Malye winin ninguk talibuka wininyak nang ara, ‘Nun patapmasilye ning ara, ani-ani,’ nyabuka maknya kintinibikirye, kwalinyake. Ati, ‘Sik malye wininyak ning ara, tamubuka sik nong deice yanuka, malye kipdeipdating’ tenen, morokinyabe. Tonda, sikce, ‘Nun bona weik tonun doprobibirye, bona talin nang unamab’ tenenyak nang ara, Allah Yahweh ati, ‘Allah ara, nun lik,’ tenebikirye, batakanyake. Tonda, yuk nang nirya ati, ‘Malye kipdeipnamap’ tenen, pia sunyake.

⁴ Tonda, sik urasin eibibirye, bikinyabe. Sik talima noutam ara, pia maknya kintinin nanguk unyaka ati, sikce utenenyake. Sikce, ‘Kume, nun malye wininyap ning ap, teninyap ning ara, Allah arye eibuka kum bikisulule,’ tenenyake. Sikce teninyak ning ara, ‘Kume, dipkoprob Allah ara, kum ulule. Allah ati nyace yupu nirya ara, talye yupu uka,’ tenenyake.

⁵ Tonda, sikce, ‘Yo bok weik tonun dopropnamab’ tenen, pil donyak ning nirya ara, teleb kibuka winikiba, nong ara, pia weik tonun upnin balule. Nun ni koproba Allah, ance, ‘Winipnamne ning ara, ani. ‘Aning ara, pia malye, aning ara, pia telebe,’ tenepmince, yupu nyalisilyam yupu nirya ara, pia telebe. Ara, im tam atonun ulula ati, anang arye, pia moubuka kum biktinge. Tonda, ance yupu bokolisilyam ning ara, sikce moubuka kum tenenyake. Tonda, yuk nang arye, sik maknya kintininyak nang ati, ‘Anggun malye ululum ning ara bataklulume, malye winina meme!’ nyabikiba sik kwalinyak nang arye, ‘Anang ara, nun like. Dupmalye’ tenen talak dobuka, malye yupu uk nyasinyake.

⁶ Sik maknya kintininyak nang, sik talima noutam ara, ‘Kume, ikin ning, nun dam pia kum yanamsile. Tonda, atalak arye dipdongobuka, doyanamle talak babye, imun ning nun dam pia kum yanamsile. Ati nunda, pia telebuk unamabe!’ tenenyake.

⁷ Sik anang ara, ninye sulongon yupu ap, talye yupu nyana ap, weik tonun nyanyake. Tonda, yuk nang ati, ‘Sik nong deice ikin weik tonun delinamabe,’ tenenauk unyake. Atonun, yuk nang nirya ati, ‘Anang ara, nun pia like,’ tenebikirye, pia malye winin ninguk talibuka, talye unamabe!’ tenenyake.

⁸ Tonda, sik ayu nang arye, utenenyake. Sikce, ‘Telebuk wininyak nang, bisikak talye mangkau kanye bobuka bakiba, mitik ninye asik dam duknupmikce, anang yakiba, talye karin arye opnamabe,’ tenenyake. Utenebikirye, anang mangkau bakiba, ayu nang duknupmakca arye, talibuka onyake. Atalak ara, moubuka dikirye, ‘Abisik banamak nang ara, mitang uplinye bira, adiparyuk opnamak nang ara, dan nang do?’ tenen, ‘Moubuka eiptibyeʼ tenen, dinyake.

⁹ Winipmanto ara, bai tam talye kam ulamle yu weik ning, el si singa kus arye, duknupmalirye, banmalya ani, yuk kam ning obuka dilamle touk, anang babye atonun wininyake. Tonda, sikce yuk nang ati, duknupmakirye, warikininyak ning ara, talye ati kume. Ara, ‘Sik talye bona uto-toa talina kum nang tomopnuyap’ tenen, wininyake. Ubukba tenebikirye, talye bona uto-toa talina kum nang mangkau kanye bobuka, sik dam bakiba, sik yu nang arye, anang talibuka tomobikirye, onyake.

¹⁰ Tonda, ‘Minopce tikmakirye, mitang nang opnuyap’ tenen, duknubuka warikinyake. Tonda, sik yu nang ara, mikip weik unyaka deice arye, mitang nang mangkau kanye bobuka bakiba, adiparyuk obikirye, kum danalinyake. Ati, sik talye bona uto-toa talina kum nang ara, pia weik tonun, ikin kanye bobuka unyake.

¹¹ Sik maknya kintininyak nang, sik talima noutam ara, ‘Kume Allah ara, nun unyap ning ara, pia kum bikisulule. Elce nunti, akunum luba kipsuka ati, malye winin ninguk talye mangkau asa wininamabe,’ tenenyake. Tonda sikce, ‘Allah elda, nun malye wininyap ning ara, kum elisulula ati, yuk nang ati, ikin ning pia weik tonun, sik nong deice deiptibya babye, Allah arye eibuka kum biksutue,’ tenenyake.

¹² Wininyaka ara, se nun ni Allah, ance tikmince, sik malye wininyak nang ati, minop wenepnulyame! Tonda, nun ikin kanye weik bobuka, unyap nang ap, kanye namina asa ubirye, yuk nang amu tam unyap nang ati, luba kina kume na nio! Nun ti melibuka lyepsilyame!

¹³ Se, sik anang ara, mikip dobuka, pia malye winin ninguk talibuka, wininyak nang ara, yata ati, nun ni Allah anti, ‘Nun like’ tenen, yanikinyak do? Tonda, sik talima noutam ara, yata ati sikce, ‘Kume, Allah bira, nun malye wininyap ning ati, pia kum wenenamsile. Allah arye nunti, ‘Sikda, yata ati malye winin ninguk tuba talibuka, pia winilulum do?’ nyabuka, ‘Kum wenepnamsile,’ tenebikirye, nyanyak do?

¹⁴ Bukni, na ni Allaho, nun akunum biknuyape. Dipkoprop ning ara, ance tukwak nang wininyak ning nirya ara, ance akunum elisilyame. Ara talye ati kum bukni, ance, ‘Sik wininyak ning nirya ati, bita eipnirye, sik wenena ati, dengna arepnamne,’ tenelyame. Tonda atonun, ‘Sik ti, yupu bokeipnamne,’ tenelyame. Ati ara, sik namin asa uk unyak nang arye, ‘Kume, nun wininamap ning ap, nun nong nirya ara, Allah el taruk deice delinyabe,’ tenen, anti pia diba tenekinyake. Tonda, nun ni Allah, ance sik kwaknamne mapu ati, pia moubuka dimince, kalekuka melisilyame!

¹⁵ Na nio, anti moropkiabe. ‘Sik mikip dobuka, pia yu weik unyak nang ati, sik mikip unyaka ara, ance kum kipdeipnamlame!’ tenen, moropkiabe. Tonda, ance sikti, ‘Sik pia malye wininyak ning ara, yata wirinmak do?’ tenen, moubuka dipdemince, aning nirya eipmince, wenepnalam’ tenen, moropkiabe na nio.

¹⁶ Nun ni koproba Allah Yahweh ara, aning-aning nirya talibuka, ninye deiyoknye pia unalame! Yata nang do nirya, Allah ati diba kum tenebikirye, malyeuk wininyak nang nirya ara, Allah elce talilul mutuku noutam arye, kum daneipnamle!

¹⁷ Nun ni Allah Yahweh, nun kanye namin asa unyap nang arye, nun patapsiliba, anti morokinyap ning nirya ara, adiparyuk kekepsilyame. Tonda, nun kanye imun usulul ning nirya ati, melipsimince, nun talima kwa dinamsilame!

¹⁸ Tonda, nun bikmubu. Nunce morokipye ati, ance nun bona uto-toa kum talinyap nang ap, kwaknamne nang ap, ikin deipsikiba, imun kanye bonyap nang nirya ap ati, teleb kipsimince, melibuka lyenamsilame! Ara ance, “Aning ara, wininamlume, aning ara, pia kum wininamlume,” nyapdeipsulum yupu aulye touk deice arye, teleb kipdeipnamsilame. Teleb kipdeipnamsilama deiyok ara, ani. Teleb kipdeipsiminyopura, sik yu nang arye, malye kipsikiba, ilil weik unyap ning nirya ara, kum kipdeipsiminba, telebuk unamaba atia.