Matius 9 - Eipomek

Yesus arye, nong nirya meiyal semuknye, kwetebuk yupu

¹ Sik nirya daulamika ani, Yesus arye ‘Na mutuku kopropa binune’ tenen, mek lia yo deice wekuka, mekwen deice arye otam tamubuka binmoka ani, omutuku biyukce, Kapernaum asik dolamikak biyukopura, amutuku noutamak ulamik ninye arye kekebik.

² Yesus wekuka bulbiyuk aik unmokce, peterenmok talak ara, dumbarye nang pala yo deice arye, nong nirya meiyal semuknye, binmanto kumnye, baya wibuka boyayik. Sikda, ‘Yesus arye anye kweteptue’ tenen, boyanmaka deice arye, Yesus ara, ‘Na ti dipkoprop diba tenepmaniyake,’ tenebuka kel kibukce, anye min kum kwetebuk talak arye, ameiyal semuknye biti nyabuk. “Na mio, an malye teneminye ning ap, malye winiminye ning ap, kum daneipkinirye, namin kipnamkine,” nyabuk.

³ Yesus arye ayupu nyanmok talak ara, Musa sekamuk yupu peterena deiyok nang ton, abukuka kekenmekce, sik kanye noutamak arye tenenmek. Anye birye ayupu peterenmala ara, yata ati do? Yesus ayupu nyanmala deice arye Allah si yanipmale. Ara, Yesus arye, ‘An malye winiminye ning namin kipkine,’ nyapmoka deice arye ara, ‘Na Allah atonunye unune,’ nyapmoka ati, elda dipkoprop malye nyanmale. Nun kele, ‘Allah elcuk nun malye wininyap ning kum danalilula ati, yatanye birye tonap apil doptu do?’ tenebik.

⁴ Sik talima noutamak nirya tenebik ning ara, Yesus el kanye noutamak akunum tenebukce kel kipmoka ati, elce Musa yupu peterena deiyok nang ati nyabuk. “Amalye yupu anggun kanye talima noutamak tenepmaluma ara, yata ati do?

⁵ Na kanam arye, ameiyal semukba, kum binmantonye biti, ‘An malye winiminye ning nirya kum daneipkine,’ talya nyaploptinye do? Akumopura, kanam aryuk, ‘Tikukapmince, an amsuna dobuka banulyame,’ talya nyaploptinye do?

⁶ Bukni, nada Ninye Mi Koprop Atonunye, na mikip deice arye, ‘Tukwak ninye sik malye winilamikce ning nirya, kum daneipsutue,’ tenen, kel kipmanuluma ati, ameiyal semuknye biti, adiparyuk kwetepnune,” Yesus arye nyabuk. Nyabukce, meiyal semukba, kum binmantonye ati ayupu nyabuk. “Anda, tikmince an amsuna dobuka, an aik tamubuka bilyame nyapkine,” nyabuk.

⁷ Nyabukopura, adiparyuk meiyal semukba, kum binmantonye teleb ubukba, tikukabukce, el amsuna dobuka, awekmek nang nirya sik adiparyuk, anyaik pum arye buru tam binuka, el bidamnye aik tamubuka biyuk.

⁸ Biyukba, awekmek nang nirya eibikce, Yesus winibuka deice arye, ‘Se, Allah arye el mikip pia weik arye anye akunum aribuka ara, kel bikaba atia,’ tenebuka ngalukunmekce, Allah el si erenmek.

Yesus arye, Matius doprobuk yupu

⁹ Yesus amutuku batakukce, yukak banmok. Banmoka ani, tonoknye, el si ara Matius ulamuk. Roma mutuku nang arye amutuku nirya talilamika ati, amutuku ulamik nang arye sik pajak yo bok Roma mutuku weik ninye deiyok nang ati arilamik. Matius ara, Roma mutuku nang arena ati, ‘Apajak yo bok bulubuka, Roma mutuku nang arepnamne’ tenen, ayo bok deiyamuk aik pum bukmokak, Yesus yayukce eibuk. Eibukce, Matius ati, “Anda na melibuka dobolyanilyame,” nyabukba, Matius arye adiparyuk tukuka, el bukmok aik batakuka Yesus melibuka dobolbiyuk.

¹⁰ Banmarika ani, Matius el aik koprop wekrikce, sik ap, Yesus el dopromukba, el melibuka balamik nang ap, amutuku talyamuk nang, Roma mutuku nang ati, pajak yo bok bulubuka arilamik nang weik tonap wekik. Tonda, yuk nang ap weik arye neika din dinmek. Sik Yahudi yala peterena deiyok nang arye, atalye ninye ati, ‘Sikda malye wininyak nang,’ tenelamik.

¹¹ Dinmek bukni, sik Farisi nang ara, Roma mutuku deiyok nang arena ati, pajak yo bok bulubuka delina deiyok nang ap, yuk nang ap, ara ‘Sikda malye-malye wininyak ninye,’ tenelamik nang ap, Yesus ap, neika din dinmekba, sik Farisi nang arye eibik. Eibikopura, Yesus el melin nang ati asipdeyik. “Anggun peterena deiyoknye Yesus ara, telebnye ulul bukni, pajak yo bok bulubuka delina deiyok nang ara, sikda ubula don nang unyaka anya arye, anang ap, yuk malye-malye wininyak nang ap, neika dinmaka ara, yata ati do? Ara pia malye weik wininmale,” nyabuka wenebik.

¹² Nyabuka wenebikba, Yesus arye ayupu kekebukce, anang ati domon yupu nyabuk. Uk dinmalibuk, aning moubuka tenena kum nang ara, ‘Ninye kwetenanye dokter dan do?’ tenen, kum enyake. Akum bukni, ‘Se, uk dinmasile’ tenen, moubuka tenelanyak ninye ara, ninye kwetenanye dokter ati pataplyeba, enyake. Aning atonun, nada malye winin nang teleb ulina ap, lyena ap ati yase. Aning atonun, mitik pung uk ulamice bukni, sik talima noutamak malye ning tuba aupmalye buk, aning moubuka tenena kumce, ‘Nunda teleb nanguk unyabe,’ tenenyak ninye ati, ‘Lyepnamne’ tenen, kum yase. Ati adomon yupu nyapsine. Uk dina kum nang ara, dokter kwetenanye kum patalule. Akum bukni, uk din ninye ara, dokter kwetenanye ati patalule.

¹³ Aning ati ara, na nyapnusin yupu ara ‘Deiyok ani’ tenen, anggun aik tamubuka bimunce, pia tenepmunce, kel bikinamlulume. Ara, Allah yupu nyalamuknye, nabi Hosea arye sekamuk yupu nyasilye touk, ‘Allah el kanye ara, Allah arena ati, kam ning obuka arilamak ning ara, na patana kume. Weik mambul ning ara, yuk ninye nirya ati bico tenebuka melilana ara, aninguk ara, weik telebe tenenune.’ (Hosea 6:6) Allah arye nyapdeibukba, Hosea sekamuk yupu ati nyapsine. Aning atonun, mitik pung uk ulamice bukni, sik talimak malye ning tuba aupmalibuk, aning tenena kumce, ‘Kume, nunda teleb nanguk unyabe,’ tenelanyak ninye ati, ‘Aninye ara dobuka lyepnamne’ tenen, kum yase. Sik malye winilamikce bukni, talima noutamak ara, ‘Se, nunda malye nanguk unyabe,’ tenenyakce, malye kanye bobuka unyak ninye ara, ‘Sik malye winilamikce ning batakikcopura, atouk ninye dobuka, lyepnamne’ tenen, yase. Yesus arye sik Farisi nang ati nyabuk.

Yesus arye, din dina kumce, Allah morona ati, nyabuk yupu

¹⁴ Yohanes Pembaptis elce peterelamuk yupu kekelamukce, melibuka balamik nang ap, sik Farisi nang ap arye, sik malye winilamne ning ati, ‘Allah moropnuyap’ tenen, din dina kumce, din bulang uk ubuka, Allah moronmek. Sik winibuka moronmeka ati, atalak ara, Yohanes Pembaptis el yupu kekebuka balamik nang, Yesus dam yayikce asipdeyik. “Nun ap, sik Farisi nang ap, nun nirya arye, ‘Nun malye wininyap ning kum daneipnamsil’ tenen, din dina kumce, din bulang uk ubuka Allah moronyabe. Nunda wininyap bukni, an mapu ara, awinipye touk yata ati kum wininyak do?” nyabuka asipdeyik.

¹⁵ Asipdeyikopura, Yesus arye anang ati domona yupu arye tamubuka nyabuk. “Kil donanye dopnulye talak ara, el ap, el kayapu ap, el melin nang ap ara, neika tuba unyak talak ara, kanye deibuka kum unyak do? Tonda, kwalin ning kwalibuka neika kum dinyak do? Ikin kanye bobuka, engenauk unyak do? Kume, sik kwit el kil don talak ara, kanye deipmanyaka anya arye, pia teleb kanye deipdakirye, kwalibuka neika dinyake. Aning atonun, nada kil donanye bito ununa ati, na mapu ara kanye imun upliba, din dina kumce, din si tebuka kum unyake. Din bulang uk kum unyake. Bukni, na talibuka bobuka binamniyak talak ara, sik ikin kanye upliba, din dina kumce, din bulang uk unamake,” Yesus arye ayana asinmek nang ati nyabuk.

¹⁶ Ayupu nyabukopura, Yesus arye, ‘Allah yupu sekamik ning telebuk ulule,’ tenebuk bukni, ‘Sik Farisi nang ap, sik apu yapu ap, Yahudi yala deiyok nang ap arye, sik bidamnye tenelamikce, talya tabakuka peterelamik,’ tenebuk. Sik tuba peterelamik ning mem ning ara, ‘Ara malye, kel kipnamak’ tenen, awekmek nang nirya ati, domon yupu bitinye nyabuk. Tonda Yesus arye, ‘Na peteren ning ap, na wininye ning ap deice arye, kanye tenena winiryuk ning kel kipnamak’ tenen, awekmek nang nirya ati, ayupu bitinye nyabuk. Yesus arye nyabuk yupu ara, ani. “Yatanye do nirya, minop baju baraplyopura, abaju lipsisikuka wina ati, winiryuk baju kwilikukaptingce, mek kum likilamikirye, kwilikamlyak deice deibikirye, kum winyake. Minop baju kwilikamlyak, winiryuk baju tabakuka wilamting bukni, ‘Winiryuk wibice ning, el urasin yuk, minop baju el urasin yuk uplyak’ tenen, aning kum wininyake. Tonda, abaju mek likikirye, ketingak deibikiba, akunum miklyopura, minop baju kwilikilule. Deiyok ara, winiryuk baju miklirye, mitik uplyopura, awilamakak arye, pum weik arye tonap kwelekenamle. Ara, winiryuk baju arye, minop baju kwilikamlyak deibuka wibikirye winilula ati, minop baju ap, winiryuk baju ap, ansinibuka wina ara, malye. Winibuka kum winyake.” Yesus arye nyabuk.

¹⁷ Ton ning ara, ayupu nyabuk. “Aning atonun ton, ninye domba bola dobuka, potong lyeklobikirye, dana-dana tam nirya wibikcopura, pum bisik ara, anggur mek kwebuka dikdongobuka delinyake. Wininyaka ati, ninye arye purubuka, winiryuk kwelamak anggur mek ara, minop domba bola pum kum dikdongobuka delinyake. Winiryuk anggur mek kwebuka minop domba bola pum dikdongoptinge. Bukni, anggur mek mikip neplirye, domba bola kwiliklirye, mek sakalule. Kwililirye, sakalyopura, anggur mek ap, domba bola ap, kum danuka malye ulule. Aning ara, kum wininyak bukni, anggur tapu duk purupra, winiryuk anggur mek kwelamak ning ara, winiryuk domba bola pumuk dikdongobuka delinyake,” Yesus arye nyabuk.

Yesus arye uk dilamukce, ining balamuk kil ap, dibuk kilmu ap, kwetebuk yupu

¹⁸ Sik nirya Yesus ap aunmek bukni, tonoknye yayuk. Anye bira, Yahudi yala nang Allah si erelamik aik, anyaik sik deiyok nang weik ulamik bukni, el ton ulamuk. Yayukce, Yesus eibukopura, ‘Yesus ati si erebuka kipnun’ tenen, Yesus yan dam gutam tuku dipdongobuka bukukce, Yesus ati weik arye moronmok. “Na kilmu akunum dipmal bukni, ance yanuka, el nong deice an taruk deipnutumce kweteipnutumba, kam buknamle,” nyabuka moronmok.

¹⁹ Moronmokba, Yesus ap, el melin nang ap, amoronmoknye ap, neika banmekce, Yesus dam dana-dana nirya langdipmekce banmek.

²⁰ Abanmek nang kan-kan noutamak arye, uk dilamukba, keting tamun 12 deice arye, el ining balamuk kil neika banmek. Yesus pil dobuka winilamuk ning kekebukce, ‘Yesus ara ninye kwetenanye dipkoprop ulule,’ tenebuka ati, akil arye utenebuk.

²¹ ‘Yesus el baju talya bolpipnutu ura, elce kwetepnutue,’ tenebuk. Utenebuka ati, abanmek nang noutamak arye, Yesus el balye tam tikilyayukce, el deice ongopmok baju ara bol pibuk.

²² ‘Yesus el baju bolpipnun’ tenen, yayukce, Yesus el baju bol pibukba, Yesus arye tamubuka, ayanmok kil eibuk. Eibukce ayupu nyabuk. “Na ka kilo, an diba tenepmanilama deice arye kwetepmakine. An kanye imun wamkuk ning ara, akunum kweteipmakina ati, telebuk kanye deibuka binamlyame,” nyabuk. Yesus arye nyabukopura, atalak aryuk, akil el ining balamuk ning ara, kum dayukce, teleb ubuk.

²³ Sik nirya ila banmeka ani, el kilmu dipmoknye, aik akunum biyukopura, anyaik dam unmek nang, sik weik arye engena ap, weik arye ngalukuka malye nyana ap, weik yupu nyabuka kwelana ap, ninye dipneba bung-bung nyana nyalamak ning nyanmeka ap, anirya wininmekba, Yesus arye eibuk. Eibukce, anyaik wekukce, amalye nyabuka, kwelanmek nang ati, Yesus arye nyabuk.

²⁴ “Anggun weik arye malye nyanmalumce, ngalukuka kwelanmaluma ara, yata ati do? Anggunda, anyaik batakuka yukak bilulume. Akilmu ara kum dipmale. Talya mapmale,” nyabuk. Nyabuk bukni, anyaik wekuka unmek nang arye, akilmu akunum dipmoka ara, akunum kel kipmeka anya arye, anang arye Yesus ati akutunmek.

²⁵ Akutunmekba, awekuka engenmek nang nirya ati, Yesus arye buru tam akunum yakwetebukopura, akilmu dipmokba, deipmek aik wekuk. Wekukce, Yesus akilmu taruk talibukba, adiparyuk akil tikukabukce, banmok.

²⁶ Bayukopura, anyaik wekmek nang nirya arye, mambul kanye bobuka ngalukunmekce, amutuku noutamak ulamik nang, yuk nang ati ayupu laka nyalamikba ninye weike kekelamik.

Yesus arye, asing kun nang ap, yupu lub nang ap ati, kwetebuk yupu

²⁷ Akilmu akunum kam bukeibukce, amutuku batakuka, bisik noutam banmoka ani, asing kuamuk nang bitinye, el balye tam tikilyarik. ‘Kwetepsetu’ tenen, weik yupu nyabuka yanuka moroprik. “Anda Daud yalanye birye deipkukba, unmalama anya arye, Ninye Lyena ati, Allah arye wibuka deipkuke. Ati bico tenepsimince, kwetepsutume,” nyabuka moroprik.

²⁸ Nyabuka moropnin banmarikba, Yesus tonok aik akunum wekukopura, abitinye nang Yesus dam yarik. Yarikba, Yesus arye nyabuk. “Anggunce, ‘Nun asing kwetepsetume,’ nyapmanuruma ara, ‘El dipkoprop kwetepsutue,’ tenepmanurumce moropmanurum do?” nyabuka asipdeyuk. Asipdeyukba, sikce tamubuka nyaprik. “Naie, ‘Dipkoprop kwetepsutume,’ tenepmakiname,” nyaprik.

²⁹ Nyaprikba, Yesus arye anang sik asing talibukce, ayupu nyabuk. “Anggun diba tenepmanuluma atonun winipnusine,” nyabukba, atalak aryuk sik asing kuamuka ara, teleb ubuk.

³⁰ Teleb ubukba, Yesus arye ‘Yuk nang kekebikirye, biknicak’ tenen, anang ati yupu mopreibuk. “Akwetepmasin ning ara, ‘Yuk nang arye nati kel kipnicak’ tenen, narye kweteipmasina ara, kum laka nyapnururume,” nyabuk.

³¹ Yesus arye nyabuk bukni, abitinye nang arye Yesus kwetepmok ning laka nyapra balamrikba, amutuku noutamak ninye weik arye kekelamik.

³² Asing kuamuk nang, bitinye nang Yesus kwetebukba, banmarik talak ara, yuk nang arye, lubanye tonok Yesus dam boyayik. Anye bira, isa el talima talyamuka deice arye, lupnye ulamuk.

³³ Anye bira, isa talyamukba, lupnye ulamuk bukni, Yesus arye aisok yakukba, atalak aryuk, anye yupu teleb kibuka nyanmok. Yupu teleb ubuka nyamokba, abulubuka wekuka kekenmek nang arye, se tenen, ngalukunmek. Ngalukunmekce, ayupu nyabik. “Amutuku Israel tam noutamak nirya ara, atouk ning ara kum ubukba, nun min arye pia kum elilamupe,” nyabik.

³⁴ Anang arye nyabik bukni, sik Farisi nang arye, “Kume, Yesus arye aisok yakalula ara, isa mer nirya, sik deiyok Isa Mutuku Dongonye, el mikip deice arye yakalule,” nyabik.

Yesus arye, “Allah el pil don nang mitikuk unyake,” nyabuk yupu

³⁵ Wini talak noutamak ara, Yesus arye, weik asik dolamik ap, ninye mitika arye ulamikak ap, Yahudi yala nang, sik Allah yupu peterena aik binuka wekelbalamukce, ‘Allah ninye lyeplirye, sik kanye talima talinamle’ tenen, lak teleb yupu lakak ubuka peterelamuk. Tonda, Yesus arye mutuku-mutuku nirya peterepra balamukce, uk yala yuk-yuk, uk dilamuk ninye weike kwetelilamuk.

³⁶ Amutuku-amutuku nirya balamuk talak ara, ninye yupa weik yangalamikba elilamuk. Dilamukce, ayangalamik nang ara, ninye arye weilamak domba, sik apu dam kum ulyopura, ‘Ortam binun do, atam binun do?’ tenen, kanye walwal upliba, teniltolamak touk, aninye unmeka ati, Yesus arye aninye ati bico tenebuka talima aribuk.

³⁷ Winibukce, el yupu kekebuka, el melibuka dobolbalamik nang ati, adomon yupu nyabuk. “Weik wa wiyamiceba, pia weike paplirye, kwaning nong ara weike akunum wisiamlye, bukni, yongopra lilbinmanto nang ara, mitik nun unyake.

³⁸ Aning ati ara, wa deiyoknye birye nyapdeipliba, ‘El pil don nang arye, el wa dam lilbanamak’ tenen, wa deiyoknye biti moronamlulume.” Yesus arye nyabuk.