Matius 8 - Eipomek

Yesus arye, barye suse atonun suse dilamuknye, kwetebuk yupu

¹ Yesus arye ayupu-ayupu nirya peterenmoka ani, akunum sirya dakukopura, amutuku kon deice arye koulukuk. Koulukunmok talak ara, ninye weike aminyan melibuka yanganmek.

² Aninye nirya koulukuka yanganmek bukni, barye suse atonun suse, nong bol nirya dilamuknye, aunmoka arye, Yesus eibukce, Yesus dam yayuk. Yayukopura, Yesus si erena ati, gutam tuku dibuka yanuka bukuk. Yanuka bukukce, Yesus ati morobuk. “Naie, an kanye deipnutumce, ‘Anye bira kwetepnune,’ tenepnutumopura, na barye suse adiparyuk kwetepnutume. Ati, ‘Kwetepnutum’ tenen, moropmakine,” nyabuka morobuk.

³ Barye suse dilamuknye birye morobukopura, Yesus el taruk anye deice deibukce ayupu nyabuk. “Narye anti kanye deibuka, kwetepdeipnukine. An suse wini talak akunum teleb ubuka nipdeipkine,” nyabuk. Nyabukopura, adiparyuk anye el barye suse atonun suse dilamuka nirya ara, kum dayukba, teleb ubuk.

⁴ Kum dayukba, Yesus arye anye biti nyabuk. “An suse kwetepmakinba, lopmakila ara, yuk nang ati, laka kum nyalbinulyame. Lak kum nyanulyam bukni, an nong dipdenamkila ati, Yahudi yala nang, Allah el si erena aik pum pil dona deiyoknye dam binuka, laka nyapmince, el elina ati, an nong amupdenulyame. Tonda, uk dilamne ninyeuk lopnopura, Musa arye, ‘Wininamlulume,’ nyabuka sekamuk touk, Allah si erena ati, kam un ning obuka arelbalamak touk, an babye aning kintinibuka arelbinalyame. Ara, yuk ninye eibikirye, ‘Allah arye anye akunum kwetepmanil,’ ‘Tenepnamkiyak’ tenen, nyapmakine,” Yesus arye nyabuk.

Yin talin nang, sik deiyoknye, el pil donanye biti, Yesus arye kwetebuk yupu

⁵ Yesus amutuku batakuka ila tonap banmoka ani, Kapernaum mutuku biyukopura, yin talin nang sik deiyoknye birye, ‘Na pil donanye, Yesus arye kwetepnutue’ tenen, Yesus dam yanuka morobukce, ayupu nyabuk.

⁶ “Naie, nati pil donanye bira, weik uk dilamukce, nong nirya sesal sebukba, weik arye donmalba, anti inilyanmakine,” nyabuk.

⁷ Nyabuka morobukopura, Yesus arye tamubuka nyabuk. “An aik binirye, an pil donanye kweteipnune,” nyabuk.

⁸ Yesus nyabukba, ayin talina deiyoknye birye tamubuka nyabuk. “Naie, nada, mambul kumnye binya arye, anda weik telebnye ati, na aik kum binuka weknamnilame. Atikmalamak aryuk, an yupu nyapminba, adeice aryuk, na pil donanye bira, uk kum dalirye, teleb upnamale.

⁹ Aning ara, talya ati kum nyapkine. Na kele. Na deiyok nang arye nyapnikiba, sik nyapnikce touk, adiparyuk pil donune. Tonda, na babye, na amu tam yin talin nang ati, ‘Winiplulume,’ nyabuka, yupu nyapdeipniba, kekebikirye, adiparyuk apiluk donyake. Tonoknye biti, ‘Bilyame,’ nyapniba balule. Tonye biti, ‘Yalyame,’ nyapniba, yangalule. Aning atonun, na pil donanye biti, ‘Apil dopnilyame,’ nyapniba, apiluk donulule. Aning ati ara, anda weik mikipnye unmalama anya arye, yupu uk nyaptumba, na pil melibuka melina teleb uptue.” Yin talina deiyoknye birye, Yesus ati nyabuka morobuk.

¹⁰ Ayin deiyoknye birye, ayupu nyabukopura, Yesus kekebukce, ‘Seʼ tenebuka ngalukuk. Ngalukukce, el melibuka yanganmek nang ati, ayupu nyabuk. “Na dipkoprop nyapsine. Israel mutuku noutamak balamse talak nirya ara, anye bira Yahudi yala kumnye bukni, elda weik arye, diba tenepmanil touk nang ton kum eililamse.

¹¹ Siria talak, Allah arye tukwak mutuku im sirya, mutuku sirya nirya noutamak, ninye weik lyeplirye, sik kanye talima talinamlak ara, ninye weike bulubuka yanganamake. Keting yangan tam ap, keting wekelban tam ap, dana-dana tam nirya arye, Yahudi yala kum ninye weike bulubuka, nun Yahudi yala nang, nun apu yapu ap ara, Abraham ap, Isak ap, Yakup ap, yanuka bukikceba, Allah arye weik kwalina kwalibuka deipliba, neika dinamake.

¹² Aninye nirya ara, Allah arye el kwalina dina ati, kintinibuka deipsukak, anyuk bukikirye dipnamak bukni, Allah arye, ‘Na tenen ninye unamake’ tenen, min arye wiamuk ninye, Yahudi yala ninye ara, nati diba kum teninyaka ati, sikda kum wekenamake. Allah arye aninye dobuka buru tam kunuk kuna noutamak donokliba, aninye ara kanye imun upliba, weik arye ngalukuka engenamake,” Yesus arye nyabuk.

¹³ Nyabukopura, elti, moropmoknye birye, el dam yanmok yin talina deiyoknye biti, ayupu nyabuk. “Kao, tamubuka an aik koproba bilyame. Diba tenepmanilamce, moropmanilama atonun melipnamkina ati, asum winipnukile,” nyabuk. Nyabukopura, aketing atalak deice aryuk, yin talina deiyoknye, el pil donanyeuk dilamukce, sesal semuk ning ara, kum nayukce, teleb ubuk.

Yesus arye, uk dilamuk ninye weike kwetebuk yupu

¹⁴ Yesus arye nyabukopura, banmoka ani, Peterus aik binuka wekuk. Anyaik wekukce, Peterus el yamal kil weik nong bupu uk dinmokba, mapmoka eibuk.

¹⁵ Eibukce, akil el taruk deice, Yesus taruk deibukba, weik nong bupu uk dinmoka ara, kum dayuk. Uk kum dayukba, akil amapmokak arye bukukopura, Yesus ap, el melin nang ap, sik din ning kintinibuk.

¹⁶ Sik aunmek bukni, eibukopura, yuk nang arye isa talyamuk ninye ap, uk yala-yala nirya dilamuk ninye ap weike, Yesus dam boyayik. Boyayikba, Yesus arye yupu tonok nyabuka deice aryuk, ninye talyamuk isa nirya yakukba bindobik. Tonda, uk dilamuk ninye nirya kwetebukba, uk dilamuk nang nirya kum dayuk.

¹⁷ Yesus arye, apil dobuk ning nirya ara, ‘Allah yupu laka nyalamuknye, nabi Yesaya arye nyalamuk touk winipnul’ tenen, winibuk. Nabi Yesaya arye laka nyabuka sekeiamuk yupu ara ani. ‘Nun Lyenanye birye nun uk dilamsuk ning nirya ara, kum daneipsuke.’ (Yesaya 53:4)

‘Yesus ap binamabe,’ tenelamik nang ati, nyabuk yupu

¹⁸ Ninye pia weike Yesus dam bulubuka yayikopura, Yesus eibukce el mapu ati, ayupu nyabuk. “Nunda, mek lia yo deice bukibirye, Galilea mek deice arye otam binamabe,” nyabuk.

¹⁹ ‘Mek lia yo buknuyap’ tenen, tuba banmek talak ara, Allah arye, ‘Wininamlulume, aning ara kum wininamlulume,’ nyapdeibukba, Musa arye sekeiamuk yupu peterena deiyoknye, tonoknye birye Yesus dam yayukce ayupu nyabuk. “Naie, An banalam mutuku nirya ara, na ap bananame,” nyabuk.

²⁰ Nyabukura, Yesus arye anye biti tamubuka nyabuk. “Kabang atonun ning do, yuk talya buru tam ulamle ning do nirya, tuku dekuka aik dobikirye unyake. Maka yala nirya, sik asik ara, yo deice dobuka unyake. Tonda, yo taruk deice manyake. Kabang el asik ara, yo peia pum ton malule. Kabang ap, maka ap, sik asik aupmal bukni, nada Ninye Mi Koprop Atonunye bira, na aik koproba kum ati, na manak ton kum upnuke,” Yesus arye nyabuk. “Na ti dobolyaniminyopura, ikin upnamkila ati, aning tenena kum diparyuk yanamlam do, bataknalam do?” Yesus arye, Musa yupu peterena deiyoknye biti nyabuk.

²¹ Yesus banmok bukni, Yesus el neika balamdiknye tonok arye, yanuka nyabuk. “Naie, aminyan ara, an ap, bananam bukni, na ni koprop dipmala ati, ‘Telebe dabilyame,’ nyapniminba, na ni weilbinune,” nyabuk.

²² Anye bira, nyabuka asipdeyuk bukni, Yesus arye tamubuka nyabuk. “Kume, adiparyuk an melipniminba, binuname. Diba tenena kum ninye ara, akunum dibik ninye atonun ninye unyaka anya arye, sik bidamnye aryuk dibikce ninye weipnamake,” nyabuk.

Yesus arye, weik mok piripna kum daneibuk yupu

²³ Yesus arye, ayupu nyabukba, sik banmeka ani, Galilea mek lilkwa biyikopura, Yesus ap, el yupu kekebuka melyamikce balamik nang ap, mek lia yo deice wekuka bulbuyik.

²⁴ Mekwen deice banmek bukni, weik yenya talye karin arye dobukba, mek lonting-lonting nyanmokce, mek lia yo pum mek wekenmokba, mekwen deibukce, sik mek lia yo mekwen pum wekmanto unmek. Aning nirya wininmok talak ara, Yesus mapmokbuk wininmok.

²⁵ Winibuka mapmokba, Yesus el melin nang arye el mapmokak biyikce, “Naie, nun mekwen dipmanto unmasila ati, an bukmince, yupu sekmince, nunti lyepsilyame,” nyabuka morobik.

²⁶ Nyabikopura, Yesus arye tamubuka nyabuk. “Anggun ilil unmaluma ara, yata deiyok ati do? Nati, mitik tonunuk diba tenepmanulume,” nyabuk. Yesus nyabukopura, bukukabukce, ayenya donmoka ap, mekwen lonting-lonting nyanmoka ap ati, “Tunimaplyame,” nyabuka, yupu sekuk. Yupu sekukopura, atalak aryuk, amekwen lonting-lonting nyanmoka ap, ayenya ap, tunim abuk.

²⁷ Winibukopura, Yesus el melin nang arye, sik weik ilil weik ubukba, ngalukunmekce asilanmek. “Se, Yesus ara, yatatonye ulul do? Weik yenya babye, mekwen lonting-lonting nyanmal ning babye, el yupu nyaplopura, el nyapmal touk kekebuka winiple,” nyabik.

Yesus arye isa talyamuk nang bitinye ati, kwetebuk yupu

²⁸ Weik yenya akunum tunim abukura, mekwen deiceuk banmeka ani, Galilea mekwen otam, mutuku si Gerasa mutuku biyik. Ura, Gerasa mutuku ara, isa arye talyamuk nang bitinye, ninye weiamik keil deiya noutamak ulamrik. Sik bitinye ninye weiamik keil deiya damakuk ulamrik talak ara, isa arye talyamuka deice arye, abitinye nang yu weik ulamrika anya arye, yuk nang arye amutuku noutamak kum balamik. Yesus ap, el mapu ap, Gerasa mutuku akunum biyikopura, Yesus ara, mek lia yo deice arye tukwak kutukuka tikilbiyuk. Tikilbiyukura, isa arye talyamuk nang bitinye, ninye weiamik keil deiya noutamak arye kutukukaprikce, Yesus dam yarik.

²⁹ Sik abitinye nang Yesus dam yarikopura, Yesus ati nyaprik. “Anda, Allah el Mi Koprop ulyame. Anda nun yata wiripnusilama ati, yanmalam do? ‘Allah arye isa nirya obuka sirya daknamne,’ tenebuk talak min kum upmal bukni, ance, ‘Sik opnaman’ tenen, yanmalam do?” nyabuka Yesus ati asipderik.

³⁰ Yesus ati ayupu nyaprik talak ara, ninye arye weiamik basam, yupa pia weike amutuku taram bukni, mitik pera tuku dilamik.

³¹ Basam arye tuku dipra aunmeka ati, isa mer nirya arye Yesus ati, moronmek. “Ance inibuka dopkwetepsiminba, aunmak basam nong pum wektibye do?” nyabuka moronmek.

³² Moronmek bukni, Yesus arye, “Telebe, anye el kanye talima talamlumak arye kutukuka buru bilulume,” nyabukura, adiparyuk isa talyamuk nang bitinye, sik talimak arye, isa nirya kutukukabikce, omutuku unmek basam nong pum wekelbiyik. Wekelbiyikopura, abasam yupa weike, amutuku taram arye bik-bik abuka koulukikce, mekwen pum wekelbanmek. Wekikopura, abasam nirya mekwen dibukba, dibik.

³³ Abasam weinmek ninye arye, awininmok nirya ap, anang bitinye isa talyamuk bukni, Yesus arye kwetebuk ning ap nirya eibikce, awininmok ati ninye asik dolamik noutamak laka nyapnin banmekba, ninye weik kekebikce, ‘Yesus ap, awininmok ning ap, eipnamap’ tenen, Yesus dam dilyayik.

³⁴ Anyasik domikak ulamik ninye nirya, Yesus dam dilyaikce, awinipmok ning nirya ap, Yesus ap eibikce, ilil ubukba, ‘Yesus ara, nun mutuku nirya batakuka, yukak bindoptue’ tenen, Yesus ati morobik.