Matius 7 - Eipomek

Yesus arye, “Yuk nang ati yapyap apmunye ning ara, pia meme,” nyabuk yupu

¹ Yesus arye nyabuk. “Anggunce yuk nang ati, anggun babye malye un ning tenena kum aryuk, yuk nang sik malye un ning atibuk, ‘Anggunda, pia malye nang,’ nyabuka, yapyap apmunyopura, pia kum nyanamlulume. Yuk nang ati, yapyap tuba apmunyopura, Allah arye anggunti, yupu bokeipsilirye, wenepnamsile.

² Anggunce yuk nang ati, yapyap nyalamlum touk, Allah arye anggunti, yapyap abuka wenepnamsile. Yuk nang ati, weik arye yapyap amunyopura, Allah el babye weik arye yapyap abuka, anggunti wenepnamsile. Anggunce yuk nang ati, mitik anun wenepmunyopura, Allah el babye anggunti, mitik anun yapyap abuka wenepnamsile,” Yesus arye nyabuk.

³ Yesus arye ayupu nyabukopura, adomon yupu ton nyabuk. Anggun asing noutamak weik yo touku aupmasilibuk, aning tenena kum diparyuk, anggun kayapu nang, dib tenen nang ati, “Anggun asing noutamak, yo kita singsinga atonun ning aupmasile,” nyamunye ning ara, yata ati do?

⁴ Yata wiribuka arye, an asing noutam weik yo touku aupmasilibuk, anggun kayapu nang ati, “An asing noutamak yo kita singsinga atonun ning dopropnukine,” nyaptum do?

⁵ Anggun kanye talima noutamak pia malye ning tuba aupmasilabuk, ‘Teleb ning winibibiba, yuk nang eipsikirye, sikda teleb nang tenenamsiyake,’ tenelulum nang ani. Minop ara, weik yo touku anggun asing noutamak aupmasilya doproptumopura, anggun kayapu asing tulukmatu ning teleb wiribuka eiptumce doptume. Anggun asing noutam weik ning, kum dobuka batakmunyopura, yata wiribuka eiptumce, anggun kayapu nang asing noutam, mitik upmalye ning doproptum do? Yesus arye nyabuk.

⁶ Ayupu nyabukopura, adomon yupu ton nyabuk. “Anggun Allah arena ati wibuka deiplum ning ap, dekna weik ning ap, dopropmunce, bai kam ap, yua basam ap arepmunyopura, yaniprikirye, tamubuka si tobuluklobuka batakadurake. Bulukuka batakaduraka anya arye, teleb ning dobuka kam ap, basam ap ati, kum arenamlulume. Aning atonun, ninye sik talimak gat upliba, ilil kumce, pi dobuka unyak nang ara, Allah yupu pia ilil ning ara, talima gat nang ati, kum peterenamlyame. Anang ara, Allah yupu kum kekepmanto nang ati, peterepmunyeba, ayupu kum kekebikirye, yaniplobuka demuk unamake.” Yesus arye, el lelul yupu bita moubuka kekenmek nang ati, nyabuk.

Yesus arye Allah morona ati, nyabuk yupu

⁷ Yesus arye ayupu nyabuk. Anggun patasilye ning moropmunyopura, Allah kekepsilirye, aninguk arenamsile. Anggun patasilye ning, ‘Danak eipnuyap do?’ tenen, epkirikmunyopura, eipnamlume. ‘Anyasik abuka wektinye’ tenen, bisik lorum-lorum abuka, pitin-pitin upmunyopura, Allah arye buplan kukeipnamsile.

⁸ Aning ati ara, na dipkoprop nyapsine. Yata nang do nirya, Allah ati morolamak nang ara, Allah kekeplirye, arepliba dolonamake. Elkirikilulnye bira, Allah arye melipliba eipnamle. ‘Anyaik wekuka bitinye’ tenen, bisik lourum-lourum abuka, pitin-pitin ululnye bira, Allah arye abuplan kukeipliba weknamle.

⁹ Anggun teniplulume. Anggun awekmalum nang kan-kan, yatanye el mi arye el li biti, kwaning moroplye bukni, talya keiluk arepnamlum do?

¹⁰ Tonda, el mi arye mekin bal moroplye bukni, ninye on kwatima arepnamlum do? Kume, anggun mapu arye moronyak touk, teleb ning arenamlume.

¹¹ Anggunda, talimak malye winilulum nang bukni, anggun mapu ati, teleb ning arena ara, akunum kel biklume. Winimunye ning ara, mitik teleb ubuka, mitik anun arye arelulum bukni, anggun ni Allah im deice ululnye birye, el kanye talima pia telebnye binya arye, elti, moronyak ninye arenamsil ning ara, weik telebe uka.

¹² Allah arye, “Wininamlulume, aning ara kum wininamlulume,” nyapdeibukba, Musa arye mem yupu sekeipsuk yupu ap, Allah yupu laka nyalamik nabi nang arye seklamik yupu ap, weike seklamik bukni, yupu deiyok pia weik mambul ning ara, ani. Anggun winimunye ning winamlum talak nirya ara, ‘Se, yuk nang arye nati, teleb ubuka winibuka winipnitinge,’ tenemunye touk, anggun babye, yuk nang ati, aning atonun teleb ubuka wininamlulume. Yesus arye nyabuk.

Yesus arye, mitik bisik buplan ap, weik bisik buplan ap ati, nyabuk yupu

¹³ Yesus arye ayupu nyabukopura, ayupu ton dukdongobuka nyabuk. “Anggun akekenmanulum nang ara, mitik bisik buplan noutamak wekenamlume. Allah arye malye unyak ninye wenebuka donoknamlak mutuku bisik ap, buplan ap ara, weik bisik weike ubuka anya arye, abisik deice ara, ninye weike wekuka banyake.

¹⁴ Bukni, Allah arye kanye talima teleb unyak ninye taliliba, pia kam unamakak ara, el wekelban bisik ap, buplan ap ara, pia mitik dukun bisik anya arye, ninye weike, ‘Se, abuplan wektibye’ tenen, enyak bukni, ninye pia mitik anunuk eibuka wekenamake,” Yesus arye nyabuk.

Yesus arye, yo mouna ati, nyabuk yupu

¹⁵ Yesus arye ayupu tonap nyabuk. “Kekenululume. ‘Tilila yupu peteren nang arye yanuka peterepsikcak’ tenen, kanye moubuka unamlulume. Ara, anang arye, ‘Allah el yupu peterenyabe,’ nyabuka talya nyaplopsikiba, tilila yupu peteren nang yanuka peterepsicopura, mangkau kanye bobuka, sik nyanyak yupu diba teneluluma ati, anggun moubuka tenepmunce unamlulume. Anang sik winina ara, kanye talima mitang arye teleb winin nang atonun wininyak bukni, sik talima ak ara, yua basam atonun unyake. Ara, yu una ap, wirik-wirik ana ap, unyaka ati nyapsine.

¹⁶ Winibuka wininyak bukni, sik wininyak ning moubuka eililum deice arye, ‘Aning ara, tilila nang unyake’ tenen, kel bikinamlulume. Anggun kel bikna ati, winipmanto ning nyapnusine. Ura, ninye arye, ‘Sumik duk daknuyabe,’ tenebikirye, cunang tapu deice mouamlyak ton dakanyak do? ‘Kisang dakuka dipnuyap’ tenen, kwalip naca tapu deice arye dakanyak do? Kume.

¹⁷ Aning atonun, dina teleb yo duk moulamle yo ara, teleb yo dukuk moulul bukni, ninye kum dipmanto yo duk moulamle yo ara, malye yo dukuk mouptue.

¹⁸ Teleb yo duk moulamle yo ara, malye yo duk kum mouptue. Malye yo duk moulamle yo ara, teleb yo duk kum mouptue.

¹⁹ Teleb yo duk kum moulamle yo nirya ara, ninye arye webukabikirye, uku dongonyake.

²⁰ Anyapmasin touk, yo yala nirya yo duk moupliba eipmunce, ‘Ayo yala ara anye,’ tenelamluma atonun, atilila yupu peterenamak nang arye, sik wininamak ning deice arye, eibuka kel bikinamlulume.

²¹ Ninye aryuk nati, ‘Na ni, Na ni,’ nyabuka, talya nyaltakaninyak nang nirya ara, narye talipniba, neika kum unamabe. Nati, ‘Na nie,’ nyabuka, talya nyaltakaninyak nang nirya kum bukni, Na ni Allah, im deice ululnye birye, ‘Ninye nirya wininamak’ tenen, nyasilye touk kekebikirye, aninguk talibuka unyak nanguk, narye talipnirye, na ap neika unamabe,” Yesus arye nyabuk.

²² Ayupu ton nyabuk. “Allah arye ninye nirya wibuka boknamle talak ara, ninye weik arye, nati nyapnamniyake. ‘Naie, naie, an si deice arye, an yupu lakak laka nyalamubu talak ara, an si deice arye, isa dolkwetelamubu. An mikip deice arye, ninye kum winipting ning, sirya pil dolamubu,’ nyabuka moropnamniyake.

²³ Bukni, narye aninye ati, adiparyuk laka kibuka nyapnamne. ‘Anggunda kanye talima pia malye ululum nang anya arye, na dam arye bindoplulume. Anggun winilamluma ara, na kum kel bikamsise. Anggunda na mapu koprop kume. Anggunda na walwale,’ nyapnamne,” Yesus arye nyabuk.

Yesus arye, aik dona kel nang ap, aik dona walwal nang ap ati, nyabuk yupu

²⁴ Yesus arye nyabuk. Ura, ‘Na nie,’ nyabuka, talya nyaltakaninyak nang ati, “Anggunda na walwale,” nyapnamne, nyapmasina aning ati ara, yupu tonap nyapnusine. Yata ninye do nirya, na nyasinye yupu kekebikirye, aninguk wininyak ninye ara, aik dona pia weik kel nang atonun unyake. Anyaik dona kel nang ara, ‘Anyaik dopnun’ tenen, tuku palibuka mutuku yangan keil deice ayukumna yo ikuka aik dobuke.

²⁵ Aik akunum dobukopura, weik mok cebuka, yenya dobukce, mek obukopura, anyaik dam yanuka obuka aknubuk bukni, aik kum loklobuk. Ara mutuku yangan keil deice arye ayukumna yo ikuka dobuka ati, el aik kum loklobuk.

²⁶ Bukni, yata ninye do nirya, na nyasinye yupu amul deice aryuk kekebuka batakikcopura, aik dona walwal nang atonun unyake. Aik dona walwalnye bira, ayukumna yo mek wininga deiceuk deibuka dobuk.

²⁷ Dobukopura, mok cebuka, yenya dobukce, weik mek deibukak dongobukce, anyaik dibukce loklobuk. Anyaik loklobukba, weik arye lelim nyabuk. Yesus arye nyabuk.

²⁸ Yesus arye ayupu nyanmoka ani, sirya dakukopura, abulupmek nang nirya kekebikce, mambul kanye bobuka, ‘Se’ tenen, ngalukunmek.

²⁹ Ara, ‘Allah arye, ‘Wininamlulume, aning ara kum wininamlulume,’ nyapdeibukba, Musa arye sekeiyamsuk yupu peterena deiyok nang arye, peterelamsik touk kum bukni, Yesus ara, dipkoprop weik kel arye peterelamsile. Elda, dipkoprop peterena weik deiyok ning talilirye, peterelule,’ tenebuka, ngalukunmek.