Matius 27 - Eipomek

Yudas opdayuk yupu

¹ Yahudi yala nang Allah arena ati, weik deiyok nang ap, Musa sekamuk yupu peterena deiyok nang ap, Yahudi yala nang, yuk deiyok nang wisi nang ap, alukunyan noutam nirya ara, sik yupu weik arye talinmek. Anang nirya yupu weik talinmekopura, ‘Yesus ara opnamabe. Ara winipnamabe,’ tenebuka yupu talipmek.

² Akunum tenebikopura, sikce nyapdeibikba, sik yin talin nang arye Yesus tapu koubuka, Yudea tam talyamuknye, ‘Gubernur Pilatus arye yupu lipsisikuka bokeipnul’ tenen, bobinuka arebik.

³ Sik Yahudi yala deiyok nang arye, ‘Yesus akunum opnamabe,’ tenebikce nyapmekopura, Yudas ninye lake yupu delilbinmoknye bikukce, ‘Se, Yesus ati ninye yupu nyana batakmatinye, na malye winipmane’ tenen, malye kanye bobuk. Malye kanye bobukce, sik arepmek keil uang 30 dobuka, sik Allah arena ati deiyok nang ap, yuk Yahudi yala deiyok nang ap, sik damuk tamubuka bobiyuk.

⁴ Sik anang dam biyukce ayupu nyabuk. “Se, na ni yapu, ‘Anye bira opnamlum’ tenen, yupu nyalyanmasinye bira, dipkoprop malye ning tonok babye kum winilule. Ati minina yupu nyapsirye, na dipkoprop malye winipse,” nyabuk. Nyabukura, sik anang arye tamubuka nyabik, “Anyapmasilam ning ara, nyana kume, dawaplye. Nun kum tenepnuyabe. Amalye winiplum ning ara, deiyok ara an uka,” nyabik.

⁵ Nyabikopura, Yudas malye kanye bobukce, akeil uang 30 bopmoka ara, Allah arilbalamik aik amsuna deice mikip arye dopouklobuk. Dobuka pouklobukce, anyaik pum arye batakuka, buru tam biyuk. Yo tikamukak deiyok dam binuka, tapu yo taruk kirikukce, el nong atapu arye, erebuka biribukce youpdanuka opdayuk.

⁶ Yudas anyaik batakuka binmok talak ara, elce pouklobuk keil uang bulubuka dobukabikce, ayupu nyabik. “Akeil uang ara, ninye on keil uang ati, ‘Musa sekamuk yupu yanibibyak’ tenen, Allah ati kum areptibye. Aning ara kum winiptibye,” nyabik.

⁷ Utenebuka nyabikopura, ‘Ninye asik nang, yuk mutuku arye nun mutuku yakirye dibikcopura, sik nong weinamabak ati, akeil uang bobuka, tuku deknuyabe,’ tenebikce, tuku dekik.

⁸ Winilamika ati, aninye arye, “Atuku ara, ninye ining tuku,” nlyalamik touk, wini talak ababye ayupu tuba nyanyake.

^9-10 Aning nirya winilamika deice arye, Allah yupu laka nyalamuknye, nabi Yeremia arye, “Winipnamake,” nyabuka nyalilamuk touk winibik. Yeremia arye nyalamuk yupu ara, ani. ‘Israel ninye arye ninye yupu nyabuka, opnamika ati, keil uang 30 arebik ning ara bobuka, ninye asik nang weinak ati, tuku dekik. Awinibik ning ara, Allah arye ‘Winipnamake,’ tenyamuk touk winibik.’ (Yeremia 32:6-9) Yeremia arye nyabuka sekamuk.

Yesus bobuka, Pilatus dam bobiyik ati, yupu talipmek yupu

¹¹ Yesus bobuka, amutuku nirya talyamuk deiyoknye, Gubernur Pilatus el dam bobinuka arebikura, Pilatus arye Yesus ati asipdeyuk. “Yahudi yala nang, sik weik deiyoknye Raja atonun nyanyaknye bira, an akunum do?” nyabuka asipdeyuk. Asipdeyukbuk, Yesus arye tamubuka nyabuk. “Diba, anyapmalam touk unune,” nyabuk.

¹² Nyabukura, Allah arena ati deiyok nang ap, sik Yahudi yala nang, yuk deiyok nang, wisi nang nirya ap arye, ‘Pilatus kekeplirye, diba tenepnamal’ tenen, “Yesus el malye ulye ning ara, ani-ani,” nyabuka, weik arye nyanmek. Nyanmek bukni, Yesus arye tamubuka yupu nyana kumce, talye tunimanauk ubuk.

¹³ Sik weik arye nyanmekura, Yesus tunimapmok ati ara, Pilatus arye ila tonap, Yesus ati asipdeyuk. “Anang arye, ‘El malye ulye ning ara, ani-ani,’ nyabuka, weik arye nyanamaka ara, kum kekenamlam do? Nyanamaka anya arye, an bidamnye sik yupu kum seknulam do? Yata deiyok ati, talye tunim abuka tikmalam do?” nyabuka asipdeyuk.

¹⁴ Asipdeyuk bukni, Yesus arye, sik nyanmek yupu tonok ning ati ara, yupu tamubuka kum nyamok ati, Pilatus arye, ‘Se, el ilil kum upmala ara, yata kanye bopmala arye do?’ tenebukce, ngalukuk.

¹⁵ Ura, Yahudi yala nang, keting tamun nirya winilamik ning ara ani. Kaplina ati Kwalina talak noutamak ara, wenen asik dongolamik nang kan-kan bukni, ninye nirya arye, “Anye bira, loplulume,” nyapnanye demuk, Gubernur Pilatus arye, tonoknye wibuka lolilamuk.

¹⁶ Okiting tamun deice yuk nang arye, ‘Nun mutuku talyamsik nang, Roma nang opnamap’ tenen, olamik talak ara, ninye tonok, el si ara Barabas, elce ninye ton omuk. Ninye omuka ati, wenen aik dongamikba, wenen aik tuba unmok.

¹⁷ Keting tamun nirya Kaplina Kwalina talak arye, ninye tonok lolilamuk anya arye, ninye weik arye, Pilatus dam bulubuka yayikura, Pilatus arye abulupmek nang ati asipdeyuk. “Tonoknye lopdeipnusina ara, Barabas lopdeipnun do? ‘Ninye weik lyeplirye, talinamle,’ nyanyaknye, Kristus nyanyaknye bira, Yesus lopdeipnun do, kum do?” nyabuka asipdeyuk.

¹⁸ Ura, Pilatus arye ayupu nyabuk deiyok ara, ani. Ara Allah ati arena deiyok nang, ‘Sik yuk ninye arye Yesus el yupu kekebuka dobolbakirye, nun tam bataksikcak, anya arye Yesus ara nun like,’ tenelamikce, Yesus ati kanye talima erebuka wililalamik. Yesus ati sik talima wililalamik ning ara, Pilatus akunum kel bikamuka anya arye, ‘Anang arye, Yesus akunum opdeipsilyame, nyapmanika ara, deiyok anye,’ tenebukce, “Yesus opdeipsilyame,” nyabuka, el dam morolyanmek nang ati, Pilatus arye asipdeyuk. “Yahudi yala nang, anggun weik deiyoknye, Mesias nyanyaknye bira, ‘Yesus lopdeipsutu’ tenen, patanmasil ati, moropmanulum do, ‘Barabas lopdeipsutue’ tenen ati, nyanmanulum do?” nyabuka asipdeyuk.

¹⁹ Pilatus arye, ‘Yesus yupu lipsisikuka bokeipnun’ tenen, ninye yupu lipsisikuka bokolinanye bunak deice bukmokak, el kil arye yupu nyapdeibukura, yuknye birye ayupu nyalyayuk. “Kao, anye Yesus ati ara, ninye yupu bokuka kum wenepnulyame. Na lengdar mapmanu deice arye pia ikin upmanila ati, anye bira el malye ning ton dipkoprop kum ubuka anya arye, bataknauk upnulyame. Tonap elti, yupu talibuka kum bokeipnulyame,” nyabuk.

²⁰ Nyabuk bukni, sik Allah arena ati deiyok nang ap, Yahudi yala sik deiyok nang, wisi nang ap arye, “Nyapnulyame, nyapnulyame,” nyabuka, yupu nyalinmek ati, sik talye bulubuka wekmek ninye arye kekenmek. Nyalinmek yupu ara, ani. “Barabas ara, lobuka arepsimince, Yesusuk ara, opdeipnamsulume,” nyabuka nyalinmek ati, awekmekce talye kekenmek ninye nirya arye, Pilatus ati, ayupu uk nyapdeibik.

²¹ Sik ayupu nyalilanmek talak ara, Gubernur Pilatus arye awekmek ninye nirya ati, asipdeyuk. “Abitinye nang ara, yatanye bak lobuka arepnusin do?” nyabuka asipdeyuk. Asipdeyukbuk, “Barabasuk lobuka arepsilyame,” nyabik.

²² Nyanmekbuk, Pilatus arye tamubuka nyabuk. “Aning ati ara, anggunce Ninye Lyena Deiyoknye, Kristus nyanyaknye Yesus ara, na adiparyuk yata wiripnun do?” nyabuka asipdeyuk. Nyabukopura, sik awekmek ninye nirya arye, weik yupu erebuka nyanmek. “Ance nyapminba, wanwanun yo deice deibuka opnuyake,” nyabuka weik yupu arye nyanmek.

²³ Nyanmekbuk, Pilatus arye tamubuka nyabuk. “Deiyok ara yata ning deiyok ati, anye opnuyak do? Nun amutuku talinyap nang arye, ‘Wininamlulume,’ nyanyap ning, dan ning yanisulula ati, ‘Deiyok anye,’ nyaptiniba, yin talin nang arye opnuyak do?” nyabuk. Pilatus arye nyabuk bukni, sik awekmek ninye nirya arye, ila tamubuka tonap weik yupu arye nyanmek. “Ance nyapminura, wanwanun yo deice deibuka opnuyake,” nyanmek.

²⁴ Sik yupu weik arye weik nyanmeka ati, Pilatus arye, ‘Na yupu nyaptinya babye, kum kekepnuniyake. Na yupu tonap nyapnyopura, yu upliba, deiyok koulakirye, opdakcak ati, daupmalye,’ tenebuk. Utenebukce, ‘Anye el ining na taruk deice kum upnamnile tenepnamniyak,’ tenebukce, sik anang dinmekak aryuk, Pilatus el taruk mek likuk. El taruk mek likuk talak ara, ayupu nyabuk. “Anye bira, malye ning kum winibuknye anya arye, el ining ara na taruk deice kum saknamnile. Anggun yuk nang arye opnamluma ara, anggun deiyok uka,” nyabuk.

²⁵ Nyabukopura, sik awekmek ninye nirya weik arye ayupu nyabik. “Aning ara telebuka. Nun taruk deice ap, nun mapu sik taruk deice ap, anye el ining upsutua ababye teleb atia,” nyabuka weik arye ayupu nyabik.

²⁶ Aning ati ara, Pilatus arye Barabas lopdongobukba, talye biyuk. Barabas ara talye biyuk bukni, Yesusuk ara, Pilatus arye el yin talin nang ati nyapdeibukba, Yesus bobuka ninye on ning arye kulabuka onmek. Yesus onmeka ani, ‘Yuk nang arye, Yesus bobuka, wanwanun yo deice delilbinuyak’ tenen, arebik.

Yin talin nang arye, Yesus ati, nalinmek yupu

²⁷ Gubernur Pilatus, el yin talin nang arye Yesus bobuka, Pilatus el weik aik pum bobiyik. Anyaik ara, ninye yupu talibuka bokolilamik aik atia. Yesus dobuka bobiyika ara, ‘Nun neika yin talinyap nang nirya yanuyak’ tenen, yukubik ati, nirya bulubuka yayik. Yayikce, Yesus noutamak deibikbuk bukmokopura, sik dana-dana tam nirya yanuka wekik.

²⁸ Sik yayikopura, ‘Yesus nalibuka akutunuyap’ tenena ati, Yesus el ongopmok baju kwiribukabikce, atalak ara weik ninye deiyok nang dekna weik ining bi baju ongolamaka atonun, Yesus el nong deice abaju ongopdeibik.

²⁹ Winibikce, tace weik ning kwanibukabikce, Yesus el kisok deice parikeibik. Tonda, ‘Ninye deiyok mambul nang teleb kama talibuka balamak touk winipnul’ tenen, talye kama arebikopura, el urasin tam gutam tuku dipdongobuka, Yesus el nalibuka akutuna ati, ayupu weik arye nyanmek. “Naie, Telebe. Yahudi yala nang, sik mambul ninye deiyoknye ulyama anya arye, nunce si erekinyabe,” nyabuka nalinmek.

³⁰ Nalinmek talak ara, ayo kama arepmek ning uk, ayo dobukabikce, el kisok deice molokonauk unmek. Molokonauk unmekce, el nong deice si maka tululinmek.

³¹ Atalak nirya wininmeka ani, Yesus ati weik arye nalibuka akutunmekopura, el nong deice arup ongobuka deipmek ining bi baju ara, ila tuba kwiribukabikce, el bidamnye baju ara, ila tuba ongopdeibik. Winibikce, ‘Wanwan yo deice deibuka opnuyap’ tenen, Yesus bobuka buru tam bobiyik.

Yesus wanwanun yo deice obik yupu

³² Yesus wanwanun yo deice deipmeka ati, bisik banmek talak ara, tonoknye, yuk mutuku Kirene mutukunye, el si Simon bura unmoka ani, bisik noutamak yangayuk bukni, epdayik. Yin talin nang arye Yesus bobanmekbuk, Simon ap epdayikopura, Yesus el wanwanun yo ikin ati, yin talin nang arye yupu mikip arye nyabik. “An adiparyuk awanwan yo takubuka bilyame,” nyapdeibikura, Simon arye ayo takubuka biyuk.

³³ Simon arye awanwan yo takubuka banmokbuk, bisik banmeka ani, mutuku si Golgota mutuku biyik. Sik yupu deice arye, Golgota nyalamik yupu deiyok ara, ninye kisok yok atia.

³⁴ Golgota mutuku deice biyikopura, Yesus wanwanun yo deice deipnuyika ati, anggur mek, kanye wangalamak ning ap, ‘Uk diplyak’ tenen, sekeldongon obat si ara mur ap, tabakuka kintinibikce, Yesus ati arepdeyik bukni, Yesus mangkau kanye bobuka dipdeyukce, kel kibukce, ‘Uk dadipnulule’ tenen, amek kum dibuk.

³⁵ Kum dibukopura, wanwanun yo tuku deice deibukabikce, Yesus el nong ayo deice alibuka deibikce, taruk dana-dana ap, yan tonok ak ansinibuka deibikce paku dakik. Winibikopura, Yesus el nong wanwanun yo deice deipmek yo ara, erebuka tuku palipmeka pum bisik erebuka dopkwetebik. Winibikopura, Yesus el ongolamuk baju kwiriplopmeka ara, ‘Yatanye dopropnamle do?’ tenen, sik arikal dona deice arye, el si undi arikal dopdabirye, Yesus el baju bokuka doprobik.

³⁶ Winibikopura, Yesus el wanwanun yo dam anyakauk bukmekce, kalikuka dinmek.

³⁷ Ninye arye, “Yesus el malye nyalye ning ara ani,” nyalamik ning ara, yo lakase deice surat sekuka deibikce, Yesus el kisok deice tam deibik. Ayo lakase deice surat sekik yupu ara, atia. ‘Yesus ara, Yahudi yala nang sik weik ninye deiyoknye, Raja ulule,’ nyabuka sekeipmek.

³⁸ Yesus wanwanun yo deice deipmeka dam ara, ubula dolamrik nang bitinye, tonye Yesus el sirik tam, tonye Yesus el kwanim tam, wanwanun yo deice dana-dana deibik.

³⁹ Yesus wanwanun yo deice deipmek bisik banmek nang arye, Yesus ati malye yupu nyanmekce, ‘Merekuka opmake’ tenen, taruk tapne bolokuka kaisunmek.

⁴⁰ Kai sunmekce ayupu nyanmek. “Ura, akunum wenebuka opmakiyak atia. Ance nyaplume. ‘Allah ati arilbalamikirye, Allah el si erenyak aik ara, narye uluplopmanya ani, like winilye akunum upyopura, yuk ning ton lipsisikuka dopnamne.’ Ance ayupu nyapluma ati, wini talak wanwanun yo deice lyepdamince, tukwak saklyame. Anda dipkoprop Allah el Mi Kopropa ulaminyopura, tukwak sakminyeba kum opnukile,” nyabuka weik yupu nyanmekce, nalinmek.

⁴¹ Atalye banmek nang nyanmek touk, Allah ati arena deiyok nang ap, Musa sekamuk yupu peterena deiyok nang ap, sik Yahudi yala nang, deiyok nang, wisi nang ap, anang nirya arye sik babye Yesus ati, nalibuka akutunmek.

⁴² Sik nyanmek yupu ara ani. “Yesus arye yuk nang ati melibuka lyelamuk bukni, elce el bidamnye ati kum lyepdatue. Elda Yahudi yala nang, nun weik ninye deiyoknye Raja Israel, ulamtu toura, wanwanun yo deice arye tukwak kouluktuba eiptibyeura, elti, diba teneptibye.

⁴³ Anye bira, ‘Nara, Allah el Mi Koprop unune,’ nyalamuka ati, ‘Allah elcuk melinulul’ tenen, ululnye anya arye, Allah arye anye pataptopura, atalak aryuk Allah arye lyepmimitue,” nyabuka nalinmek.

⁴⁴ Sik anang nirya nalinmek touk, Yesus noutamak dana-dana tam wanwanun yo deice deipmek nang, malye ulamrik nang ara, sik bitinye arye, Yesus ati malye yupu weik arye nyanmarik.

Yesus dibuk yupu

⁴⁵ Inina tonok keting deice arye, Yesus wanwanun yo deice deipmekura, daunmoka ani, keting dukduk jam 12 siang ara inibukba, amutuku nirya adiparyuk inibukce kuna dakuk.

⁴⁶ Inibukce kunadakmoka ani, keting winilye ton akunum ubukura, sintam jam 3 sore atonun, Yesus weik yupu arye nyabuka ngalukuk. El yupu deice arye nyabuk ning ara atia. “Eloi, Eloi lama sabaktani.” Yesus arye nyabuk. Anyabuk yupu deiyok ara ani. Ara, “Na ni Allah, na ni Allah yata ati batakuka lubakipmanilam do?” nyabuka ngalukuk.’ (Mazmur 22:1)

⁴⁷ Ayupu nyanmok talak ara, amining dam tikmek nang noutamak, ton nang kekebikce, walwal arye nyabik. “E, anggun kekeplulume. Yesus arye nabi Elia, el si sisibuka yukupmale,” nyabik. (Yesus “Eloi, Eloi,” nyapmok yupu ara, bita moubuka kum kekepmeka ati, ayupu nyabik.)

⁴⁸ Yesus ayupu nyabukura, adiparyuk tonoknye bik-bik abuka biyukce, mek tulongon ning, kama arye lumubuka, anggur mek yu ning, ‘Yesus dipnul’ tenen, mek burubuka, Yesus si bam bol dam arebuk.

⁴⁹ Arebukura, sik yuk aunmek nang arye ayupu nyabik. “Aning-aning winina kum dauplye. Allah yupu laka nyalamuknye, ‘Nabi Elia arye wanwanun yo deice arye, Yesus ati lyebuka dopropnul do?’ tenen, dinauk unuyabe,” nyabik.

⁵⁰ Winibikura, Yesus weik arye ngalukuka, malye nyabukce, adiparyuk dibuk.

⁵¹ Yesus dibukopura, adiparyuk Allah arilbalamik aik noutamak, wilibuka lalkwetelamik cang kain ara, el yuk aryuk, itam arye kwilikuka, dana-dana kibukce, bitinye kibuk. Atalak aryuk, amutuku nirya weik arye lokukce, keil bulamuka nirya bongabuka dibuk.

⁵² Tonda, ninye diksukum ulamna ani, dipneba weilamik keil deiya, buplan tirikilongolamik keil ara, paksakukura, min arye akunum diamik nang weik bukni, kam bukuka yanganmekak yuk ninye amutuku unmekce eibik.

⁵³ Keil deiya pum bisik weiamikak arye, min arye akunum diamik nang kam bukuka yanuka daunmek bukni, Yesus kam bukuk talak ara, anang arye Yerusalem mutuku asik dolamika noutamak banmekba, amutuku ulamik ninye weik arye sik kam bukuka banmek nang eilinmek.

⁵⁴ Yesus weik arye ngalukukce, el dipmok talak ining mek lokuk ning ap, ton asum winibuk ning yuk ning nirya winibukba, yuk nang ton eibik. Tonda, tonoknye, yin talin nang yupa weik, 100 nang talyamuknye, Yesus wanwanun yo deipmeka deice tam tikuka dinmoka anya arye, el ap neika unmek ninye ap, sik nirya eibikce, ilil weik ubuk ati, ayupu nyabik. “Se, anye bira, dipkoprop Allah el Mi Koprop ulamuke,” nyabik.

⁵⁵ Yesus wanwanun yo deice opmek talak ara, kilapu ton mitikto pera arye dinmek. Akilapu ara, ‘Yesus el patalye ning nun melipnamap’ tenen, Galilea tam arye yuk mutuku balamuk talak arye, sik ap melibuka neika balamik.

⁵⁶ Anirya dinmek kilapu noutamak arye, akilapu si ara ani. Magdalena mutuku kil el si Maria ap, kam nang Yakobus ap, Yoses ap, sik deibuk kil Maria ap, ton Zebedeus el kil ap, unmekce dinmek. Akilapu nirya ara, Yesus Galilea tam balamuk talak ara, el ap melibuka balamikce, el patapne ning sikce melibuka arilamik.

Yesus el nong dobuka, keil deiya pum weibik yupu

⁵⁷ Inibukura, tonok bona talinanye el si ara Yusuf, ara Arimatea mutukunye, Yesus el yupu kekebuka talyamuknye binya arye, ilil kumce, ‘Pilatus dam binuka moropnyopura, Yesus nong arepnunil’ tenen, Pilatus ati morolbiyuk.

⁵⁸ Morobukura, Pilatus arye, ‘Na yin talin nang arye arepnuyak’ tenen, nyapdeibuk ati, arebik.

⁵⁹ Yesus el nong Yusuf arebikura, dobukabukce, namin baju, teleb baju arye pakubuka kitipdongobuk.

⁶⁰ Yahudi yala nang ara, ninye dipnopura, keil deiya weilamik. Sik nirya winilamika ati, Yusuf bira namin teleb baju dekukce, wanwanun yo deice arye Yesus nong dobuka, anamin baju arye el nong kitibuka, Yusuf el bidamang keil deiya lokamuk pum bisik ara, Yesus el nong dongobukce weibuk. Dongobukce, keil deiya pum ara, yuk weik pala keil bongopnin banmoka ani, bura tam buplan tirikdongobukce, biyuk.

⁶¹ Yusuf arye Yesus el nong dongobuka weipmokak ara, Maria Magdalena ap, Yoses el lin Maria ap, sikce Yesus weinmek keil deiya dam bukmarikce, dinmarik.

Yesus nong weibika ati, kaliknanye deibik yupu

⁶² Yesus akunum dibukura, sik nirya daulamika ani, mapmeka Sabat sum lukunyan berekuk sum ara, sik Yahudi yala ninye arye, Kaplina ati Kwalina deiyok koulamik sum ubuka ati, sik Farisi nang ap, Allah arena ati deiyok nang ap arye, Pilatus el dam ayupu nyalbiyik.

⁶³ “Naie, atilila yupu nyalamuknye Yesus, el tuba kam ulamuk talak ara, ‘Na opnikceura, dipmanya ani, like winilye mapnirye, tamubuka kam buknamne,’ nyalamuk yupu ara, nun tuba tenenauk unmabe.

⁶⁴ Wininmaba ati, ance nyapdeipminba, an yin talin nang bikirye, el nong weibik keil deiya binuka kaliklamikibuk, winilye sum akunum uplyopura, bataknamake. Ara urdem ati kume. Aning kum winipbikceura, el yupu kekebuka melin nang arye, el nong lukuka doprobikirye, ‘Yesus akunum kam bukmal atia,’ nyapsikcopura, ninye weik diba tenebikiba, nunda ikin weik upnamsile. El minop arye tilila yupu nyalamuk ning ara, mitikto ikin bukni, el mapu arye anyapmap yupu nyapsikcopura, aning ara dipkoprop weik ikin upnamsile. Yuk nang nirya arye nunti, ‘Sikda tilila yupu nyan nang,’ nyapsikcak ati nyababe,” nyabik.

⁶⁵ Sik Yahudi yala deiyok nang arye nyabikura, Pilatus arye sik anang ati tamubuka nyabuk. “Aning ati ara, anggun bidamnye aryuk na yin talin nang dobukapmunce, ‘Yesus el nong weipmakak, teleb ubuka kaliklulume,’ nyapdeipnamlulume,” nyabuk.

⁶⁶ Pilatus arye nyabuka ati, sik anang arye yin talin nang dobuka, “Keil deiya buplan dam kaliknulume,” nyapdeibikura, kalikikopura, buplan kum kum alip tam pum uamukak ara, yo pia arye lelipdongobik. Aning dakmacopura, ninye arye, ‘Yesus nong ubula dopmake’ tenen, ‘Kel biktibye,’ tenebikce, keil deiya buplanak deipmek keil deice tam, yo pia tabakuka deibik.