Matius 25 - Eipomek

Yesus winipmanto yupu deice arye, 10 kam kilapu ati, nyabuk yupu

¹ Yesus arye el mapu ati nyabuk. “Na Ninye Mi Koprop Atonunye birye, ‘Aning-aning nirya talinamne’ tenen, im deice arye tukwak yanamne talak winipnamle ning ara, ‘Kel biknamlum’ tenen, winipmanto yupu nyapnusine. Winipmanto yupu ara ani.

² Sik kam kilapu 10 noutamak bukni, pamubarye (5) kilapu walwal kilapu ulamik. Ton pamubarye kilapu, kel kilapu ulamik.

³ Sik walwal kilapu pamubarye, sik weisa lampu el si pelita bobuka banmek bukni, minyak mek uku dibuka sirya dakukopura, ‘Aminyan punubuka dikdongopnamap’ tenen, dokola ning ton kwebuka, kum bobinmek. Aning kum tenebik.

⁴ Sik winibik bukni, sik kel kilapu ton tam pamubarye kilapu arye, sik lampu pelita bobinmek. Tonda, ‘Aminyan minyak mek tonap dikdongopnamap’ tenen, uku mek makau dobuka, uku mek dokola ning ton, kintinibuka bobinmek.

⁵ Sik nirya arye weisa dobuka, ‘Kil dopnamuka deiyoknye yaliba epdanamap’ tenen, aik pum arye, bulupmekce, daunmek bukni, wi weik upmok ati, mapmek. Kil dopnamuka deiyoknye nimalye arye yanganmoka ati, sik nirya wi talipmoka ati mapmek.

⁶ Sik mapmeka ani, lukunyan duduk ubukura, yuk nang arye nyabik. “Kil dopnamuka deiyoknye yanganmoka ati, anggun bisik ak yanuka epdanulume,” nyabik.

⁷ Nyabikopura, sik kam kilapu 10 nirya arye bukikopura, sik weisa ubik.

⁸ Winibikopura uku dinmoka ani, walwal kilapu pamubarye sik weisa ara angam-angam anmokba, sikce sik kayapu kilapu, kel kilapu ati morobik. “Se, nun weisa ara angabum-angabum anmasila ati, minyak uku mek ton arepsululume,” nyabuka morobik.

⁹ Morobikopura, sik kel kilapu pamubarye kilapu arye tamubuka nyabik. “Kume, nun mek anggunti arepsibyopura, nun weisa lampu ababye, angabum-angabum apsilyake. Ati, sikuku mek deklamikce aik, anggun bidamnye aryuk, anggun bidamnye minyak mek eibuka dekelbinulume,” nyabik.

¹⁰ Nyabikopura, sik walwal kilapu dekelbinmek talak ara, kil dopnamuka deiyoknye tamubuka aik yayuk. Yayukopura, sik kel kilapu uku mek akunum kintinipmek kilapu pamubarye ap, kil dopnamuka deiyoknye ap, kil don kwalina kwalibuka deipmek aik neika dilbiyik. Aik wekikura, sik yuk nang arye anyaik buplan tirikdongobik.

¹¹ Tirikdongobikura, daunmekbuk, aminyan ara, sik walwal kilapu pamubarye kilapu arye tamubuka akwalina kintinipmek aik dam yayikce nyabik. ‘Naie, nun buplan kukeipsilyame,’ nyabuka morobik.

¹² Nyabuka morobik bukni, anyaik deiyoknye birye tamubuka nyabuk. ‘Kumde, na dipkoprop nyapsine, anggunda na walwale,’ nyabuk.” Yesus arye ayupu winipmanto ning nyabuk.

¹³ Yesus arye el mapu ati nyabukopura, ayupu tonap nyabuk. “Aning ati ara, Na Ninye Mi Koprop Atonunye tamubuka yanamne sum ap, keting ap, anggun walwal anya arye, mangkau kanye bopmunye talak, na yanamne ati, pia kalikuka dinamnulum, nyapsine,” Yesus arye el mapu ati ayupu nyabuk.

Yesus arye winipmanto yupu deice, “Tonok deiyoknye birye, el pil don nang ati, yo bok aribukce,” nyabuk yupu

¹⁴ Yesus arye ayupu nyabukopura, ayupu tonap, el mapu ati nyabuk. Na tukwak tamubuka yanamne talak winipnamle ning, ‘Kel biknamlum,’ tenen, winipmanto yupu tonap nyapnusine. Tonoknye birye, el mutuku batakuka, yuk pera mutuku binuyuk talak ara, el pil don nang nirya yukubuk. Yukubukba, yayikopura, ‘Na yo bok arepniba, pil dolamikca ani, yo bok weik tabakuka arepnamniyak’ tenen, el yo bok weik ning bokuka, anang ati, yuk-yuk aribuk.

¹⁵ El dekna weik yo bok bokuka aribuk ning ara, bin tonok ati pamubarye aribuk, yuknye biti bitinye aribuk, yuknye biti tonok aribuk. Ara, sik kel ara yuk-yuk bikamik anya arye, sik pil dopmanto winilamik touk bokuka, sik yuk-yuk aribuk. Aribukopura, adeiyoknye amutuku batakuka, yuk pera mutuku binuka ulamuk.

¹⁶ Biyukopura, weik yo bok pamubarye aribuknye birye, adiparyuk deiyok koubuka pil dopnin balamuka ani, pil dolamuka deice arye, weik yo bok 5 tonap tabakdeibukura, 10 kibuk.

¹⁷ El winilamuk touk, weik yo bok 2 doprobuknye birye, pil dolamuka deice arye, weik yo bok 2 ton tabakdeibukura, 4 kibuk.

¹⁸ Sik winilamrik bukni, weik yo bok tonok doprobuknye bira, adiparyuk tuku palibuka, ayo bok tuku pum duknubuka deibukce, tuku arye siknipdongobuk. Anye birye yo bok tonap tabakuka kum deibuk.

¹⁹ Sik nirya daulamika ani, aminyan ara, adeiyoknye el mutuku kopropa tamubuka yayukce, sik pil donyaka deice arye, ‘Weik yo bok yata barye deipnik do?’ tenen, apil don nang ati yukubuk ati, yayikura, nukdeyuk.

²⁰ Weik yo bok 5 dopromukce, pil dolamuka deice arye, 5 tonap tabakuka deibuknye birye nyabuk. “Naie, ance, ‘Pil dopnamnil’ tenen, yo bok 5 areamnulumba, pil dolamsa ani, weik yo bok 5 tonap tabakuka kintinipdeipmakince, 10 aupmal atia,” nyabuk.

²¹ Nyabukopura, el deiyoknye birye tamubuka nyabuk. “Telebe, anda pil pia batakna kumce, teleb ubuka dolamnulume. Na mitik anunuk areamkisibuk, pil batakna kumce, teleb ubuka pil dolamnuluma ati, wini talak na talyamse ning weik arye arepnukine. Na ap, an ap, kanye deipdanimirye, teleb ubuka neika unamname,” nyabuk.

²² Weik yo bok bitinye dopromukce, pil dolamuka deice arye, weik yo bok 2 tonap tabakuka deibuknye birye yanuka nyabuk. “Naie ance, ‘Pil dopnamnil’ tenen, weik yo bok 2 areamnulumba, pil dolamsa ani, weik yo bok 2 tonap tabakuka kintinipdeipmakince 4 aupmal atia,” nyabuk.

²³ Nyabukopura, el deiyoknye birye tamubuka nyabuk. “Telebe, anda pil pia batakna kumce, teleb ubuka dolamnulume. Na mitik anunuk areamkisibuk, pil batakna kumce, teleb ubuka pil dolamnuluma ati, wini talak na talyamse ning weik arye arepnukine. Na ap, an ap, kanye deipdanimirye, teleb ubuka neika unamname,” nyabuk.

²⁴ Aminyan ara, weik yo bok tonok doprobuknye yayukce nyabuk. “Naie anda pia yunye ulamlum ati kel bikamkise. An kum kouamlum wa win dam arye kwaning yongobuka dololyame. Tonda, an kum kouamlum ning ap, kum dokamlum ning ap, libuka dilyame. Anirya winilalumba kel bikamkisa ati, ilil upnukba, ance areamnulum ning weik yo bok tonok ning ara, buru bobinuka, tuku palibuka tuku pum duknubuka deipse,” nyabuk.

²⁵ “Winipsa ati, an areamnulum ara, weik yo bok tonok adeiamse touk, tonok yo bokuk tamubuka arepkine,” nyabuk.

²⁶ Nyabukura, adeiyoknye birye yu ubukura, tamubuka nyabuk. “Anda, pil lik arye batakaminya ati, anda pia malinye ulyame. Ura, na kum kouamse ning ap, kum dokamse ning ap, libuka diniba, ance kel bikamnulume.

²⁷ Aning akunum kel bikamnuluma anya arye, na arepkise yo bok ara, yo bok dokola delin aik dongopmatumba, sikce yo bok tonap tabakuka deipkitingba, weik upnin balamtua ani, aning ap tabakuka arepnutume. Winipmanutum bukni, talyauk duknubuka deipluma ati, anda pia malinye,” nyabuk.

²⁸ Adeiyoknye birye nyabukopura, el pil melin nang, yuk nang ati ayupu nyabuk. “Amalinye buk, na arepsiba doprobuk weik yo bok tonok ning ara, anggunce dobuka, wini talak 10 weik yo bok arepmanilanye biti, ayo bok ton tabakuka areplulume,” nyabuk.

²⁹ Ara, yata ninye do nirya, sikce pil teleb ubuka donyaka deice sik talinyak ning weik anun awaplye ninye ara, narye tonap tabakuka arepniba, pia weik upnamle. Bukni yata ninye do nirya, sikce pil dona ati, lik uliba, ‘Nun like’ tenen, teleb ubuka pil kum donyakce, sik talinyak ning, mitik tonun wamlye ninye ara, mitik tonun wamlye ninye ara, tamubuka dopropniba, pia kum danamle. Aninye ara, talye nonguk unamake.

³⁰ Ati ara, anye tamubuka tapu koupnirye, weik kunuknak dopkwetepniba, elda pia kunukna kankan daunamle. Winibuka dopkwetepniba daunamle talak ara, engena ap, malye winina ap, si lina ap unamle. Deiyok ara, pia malye winilamuka atia,” adeiyoknye birye nyabuk. Yesus arye awinipmanto yupu nirya ara, nyabuk.

Yesus arye winipmanto yupu deice arye, domba ap, kambing ap ati, nyabuk yupu

³¹ Yesus arye ayupu nyabukopura, ayupu tonap nyabuk. Na Ninye Mi Koprop Atonunye ap, na im deice pil donyak nang, malaikat ap, im deice arye yanamap talak ara, im deice ning nirya ulye touk, na babye urasin teleb una ap, na nong dirina weik una ap winipnamne. Winipnilyopura, weik ninye deiyok nang bulamak ning atonun ning deice buknirye, ninye mutuku-mutuku nirya unyak ninye ati bokuka deipnamne. Aning deice bunamne talak ara, na ning nirya ara, im alip ning ulye touk, pia telebuk upnamle.

³² Ninye mutuku-mutuku nirya unyak ninye dobuka, na dam deipnikirye, sik domba basam wein ninye arye, kambing basam yuk, domba basam yuk, bokuka delilamak touk, tukwak ninye mutuku-mutuku nirya bokuka yuk-yuk deipnamne.

³³ Sik domba atonun yala ninye, teleb unyak ninye ara, na sirik taruk tam deipnamne. Ara, sik diksukum unyak ninye ati nyapne. Sik kambing atonun yala ninye ara, na kwanim taruk tam deipnamne. Ara sik malye unyak ninye ati, nyapne.

³⁴ Deipnyopura, na Raja unamna ati, na sirik taruk tam deipnamne ninye ati ayupu nyapnamne. Sikda na ni Allah arye talima aribukba, bico tenebuka kanye deilisilye ninye ara, na dam wekelyalulume. Allah arye aning-aning nirya min kum kwepdeiyamuk talak arye, ‘Anang aryuk talinamak’ tenen, akunum kintinibuka deiamsuk ning ara dolyalulume.

³⁵ Ara urdem ati kume. Na din ning ap, mek ap, patalamnuk talak ara, anggunce arelamnulume. Na ninye asik nang antonun ulamse talak ara, anggunce nati telebe nyabuka, yukubuka aik dongolamnulume.

³⁶ Na baju patalamnuk talak ara, baju ongolilamnulume. Na uk dilamnuk talak ara, anggunce melilamnulume. Na wenena aik dongamnik talak ara, anggunce na dam yangalamlumce, melilamnulume. Narye sik diksukum unyak ninye ati nyapnamne.

³⁷ Nyapnyopura, sik diksukum unyak ninye arye ayupu tamubuka nyapnamniake. “Naie dan talak din ning ap, mek ap, patalamkukba, areamkupu do?

³⁸ Dan talak ninye asik nang antonun ulamlumba, nunce yukubuka aik dongolamkupu do? Dan talak baju patalamkukba, nunce onglilamkupu do?

³⁹ Tonda, dan talakuk dina ap, wenena aik una ap, ulamlumba melibuka dilyangalamkupu do?” nyabuka, asipdenamniake.

⁴⁰ Asipdenicopura, nara, weik ninye deiyoknye Rajanye birye, aninye ati nyapnamne. “Na dipkoprop nyapsine, nati diba tenepnik nang, na mapu ara, bona utotoa talina kum ninye ap, sekeltakne ninye ap, yuk nang arye, ‘Aninye ara mambul kume,’ tenenyak ninye ara, anggunce tonoknye babye melilamlum ning ara, nati melilamnulume.”

⁴¹ Nyapnyopura, na kwanim taruk tam deipnamne ninye ati nyapnamne. “Allah arye, ‘Aninye na like,’ tenebuka akunum bataksuk ninye ara, na dam arye yukak bilulume. Allah arye Isa Mutuku Dongonye ap, el pil donyak nang, sik malye malaikat atonun isa ap, nati bataknikce, malye ning talibuka, sik malye wininyak kili sal niryada, ‘Pia uku dipnamle’ tenen, uku din mutuku kintinibuka deibukak ara, anggun wekelbululume.

⁴² Ara tilila ati kume. Na din ning ap, mek ap, patalamnuk talak ara, anggunce din ning kum arelamnulume.

⁴³ Na ninye asik nang antonun ulamse talak ara, anggunce nati telebe nyabuka, kum yukubuka aik dongolanulume. Na baju patalamnuk talak ara, baju kum ongolilamnulume. Na uk dilamnuk talak ara, anggunce kum melilamnulume. Na wenen aik dongomnik talak ara, anggunce melibuka kum dilbalamnulume. Narye sik malye unyak ninye ati nyapnamne.” Yesus arye nyabuk.

⁴⁴ Yesus arye nyabukopura, ayupu ton nyabuk. Nyapnye bukni, sik malye unyak ninye babye, sikce ayupu tamubuka nyapnamniake. “Naie dan talak din ning ap, mek ap, patalamkukba, kum areamkupu do? Dan talak ninye asik nang atonun ulamlumba, nunce yukubuka, aik kum dongolamkupu do? Dan talak baju patalamkukba, nunce kum onglilamkupu do? Tonda, dan talakuk dina ap, wenen aik una ap ulamlumbuk, nun kum melibuka dilyangalamkupu do?” nyabuka, asipdenamniake.

⁴⁵ Asipdecopura, narye aninye ati nyapnamne. “Na dipkoprop nyapsine, na mapu ara, bona utotoa talina kum ninye ap, sekeltakne ninye ap, yuk nang arye, ‘Aninye ara mambul kume,’ tenenyak ninye ara, tonoknye babye kum melilamlum nang ara, nati kum melyamnulume.” Sik malye unyak ninye ati nyapnamne.

⁴⁶ Nyapnyopura, adiparyuk, sik malye unyak ninye ara, dopdeipniba, Allah arye wenebuka pia opnamle bukni, sik diksukum unyak ninye ara, telebukirye kam pia unamake. Yesus arye el mapu ati ayupu nirya nyabuk.